೨. ಕಣ್ಟಕಸುತ್ತಂ

೭೨. ಏಕಂ ಸಮಯಂ ಭಗವಾ ವೇಸಾಲಿಯಂ ವಿಹರತಿ ಮಹಾವನೇ ಕೂಟಾಗಾರಸಾಲಾಯಂ ಸಮ್ಬಹುಲೇಹಿ ಅಭಿಞ್ಞಾತೇಹಿ ಅಭಿಞ್ಞಾತೇಹಿ ಥೇರೇಹಿ ಸಾವಕೇಹಿ ಸದ್ಧಿಂ – ಆಯಸ್ಮತಾ ಚ ಚಾಲೇನ [ಪಾಲೇನ (ಸ್ಯಾ.)], ಆಯಸ್ಮತಾ ಚ ಉಪಚಾಲೇನ [ಉಪ್ಪಾಲೇನ (ಸ್ಯಾ.)], ಆಯಸ್ಮತಾ ಚ ಕುಕ್ಕುಟೇನ [ಕಕ್ಕಟೇನ (ಸೀ. ಸ್ಯಾ.)], ಆಯಸ್ಮತಾ ಚ ಕಳಿಮ್ಭೇನ [ಕವಿಮ್ಭೇನ (ಸೀ.)], ಆಯಸ್ಮತಾ ಚ ನಿಕಟೇನ [ಕಟೇನ (ಸೀ.)], ಆಯಸ್ಮತಾ ಚ ಕಟಿಸ್ಸಹೇನ; ಅಞ್ಞೇಹಿ ಚ ಅಭಿಞ್ಞಾತೇಹಿ ಅಭಿಞ್ಞಾತೇಹಿ ಥೇರೇಹಿ ಸಾವಕೇಹಿ ಸದ್ಧಿಂ.

ತೇನ ಖೋ ಪನ ಸಮಯೇನ ಸಮ್ಬಹುಲಾ ಅಭಿಞ್ಞಾತಾ ಅಭಿಞ್ಞಾತಾ ಲಿಚ್ಛವೀ ಭದ್ರೇಹಿ ಭದ್ರೇಹಿ ಯಾನೇಹಿ ಪರಪುರಾಯ [ಪರಂಪುರಾಯ (ಸ್ಯಾ. ಅಟ್ಠ.)] ಉಚ್ಚಾಸದ್ದಾ ಮಹಾಸದ್ದಾ ಮಹಾವನಂ ಅಜ್ಝೋಗಾಹನ್ತಿ ಭಗವನ್ತಂ ದಸ್ಸನಾಯ. ಅಥ ಖೋ ತೇಸಂ ಆಯಸ್ಮನ್ತಾನಂ ಏತದಹೋಸಿ – ‘‘ಇಮೇ ಖೋ ಸಮ್ಬಹುಲಾ ಅಭಿಞ್ಞಾತಾ ಅಭಿಞ್ಞಾತಾ ಲಿಚ್ಛವೀ ಭದ್ರೇಹಿ ಭದ್ರೇಹಿ ಯಾನೇಹಿ ಪರಪುರಾಯ ಉಚ್ಚಾಸದ್ದಾ ಮಹಾಸದ್ದಾ ಮಹಾವನಂ ಅಜ್ಝೋಗಾಹನ್ತಿ ಭಗವನ್ತಂ ದಸ್ಸನಾಯ. ‘ಸದ್ದಕಣ್ಟಕಾ ಖೋ ಪನ ಝಾನಾ’ ವುತ್ತಾ ಭಗವತಾ. ಯಂನೂನ ಮಯಂ ಯೇನ ಗೋಸಿಙ್ಗಸಾಲವನದಾಯೋ ತೇನುಪಸಙ್ಕಮೇಯ್ಯಾಮ. ತತ್ಥ ಮಯಂ ಅಪ್ಪಸದ್ದಾ ಅಪ್ಪಾಕಿಣ್ಣಾ ಫಾಸುಂ [ಫಾಸು (ಸ್ಯಾ. ಕ.)] ವಿಹರೇಯ್ಯಾಮಾ’’ತಿ. ಅಥ ಖೋ ತೇ ಆಯಸ್ಮನ್ತೋ ಯೇನ ಗೋಸಿಙ್ಗಸಾಲವನದಾಯೋ ತೇನುಪಸಙ್ಕಮಿಂಸು; ತತ್ಥ ತೇ ಆಯಸ್ಮನ್ತೋ ಅಪ್ಪಸದ್ದಾ ಅಪ್ಪಾಕಿಣ್ಣಾ ಫಾಸುಂ ವಿಹರನ್ತಿ.

ಅಥ ಖೋ ಭಗವಾ ಭಿಕ್ಖೂ ಆಮನ್ತೇಸಿ – ‘‘ಕಹಂ ನು ಖೋ, ಭಿಕ್ಖವೇ, ಚಾಲೋ, ಕಹಂ ಉಪಚಾಲೋ, ಕಹಂ ಕುಕ್ಕುಟೋ, ಕಹಂ ಕಳಿಮ್ಭೋ, ಕಹಂ ನಿಕಟೋ, ಕಹಂ ಕಟಿಸ್ಸಹೋ; ಕಹಂ ನು ಖೋ ತೇ, ಭಿಕ್ಖವೇ, ಥೇರಾ ಸಾವಕಾ ಗತಾ’’ತಿ?

‘‘ಇಧ, ಭನ್ತೇ, ತೇಸಂ ಆಯಸ್ಮನ್ತಾನಂ ಏತದಹೋಸಿ – ‘ಇಮೇ ಖೋ ಸಮ್ಬಹುಲಾ ಅಭಿಞ್ಞಾತಾ ಅಭಿಞ್ಞಾತಾ ಲಿಚ್ಛವೀ ಭದ್ರೇಹಿ ಭದ್ರೇಹಿ ಯಾನೇಹಿ ಪರಪುರಾಯ ಉಚ್ಚಾಸದ್ದಾ ಮಹಾಸದ್ದಾ ಮಹಾವನಂ ಅಜ್ಝೋಗಾಹನ್ತಿ ಭಗವನ್ತಂ ದಸ್ಸನಾಯ ‘ಸದ್ದಕಣ್ಟಕಾ ಖೋ ಪನ ಝಾನಾವುತ್ತಾ ಭಗವತಾ ಯಂನೂನ ಮಯಂ ಯೇನ ಗೋಸಿಙ್ಗಸಾಲವನದಾಯೋ ತೇನುಪಸಙ್ಕಮೇಯ್ಯಾಮ ತತ್ಥ ಮಯಂ ಅಪ್ಪಸದ್ದಾ ಅಪ್ಪಾಕಿಣ್ಣಾ ಫಾಸುಂ ವಿಹರೇಯ್ಯಾಮಾ’ತಿ. ಅಥ ಖೋ ತೇ, ಭನ್ತೇ, ಆಯಸ್ಮನ್ತೋ ಯೇನ ಗೋಸಿಙ್ಗಸಾಲವನದಾಯೋ ತೇನುಪಸಙ್ಕಮಿಂಸು. ತತ್ಥ ತೇ ಆಯಸ್ಮನ್ತೋ ಅಪ್ಪಸದ್ದಾ ಅಪ್ಪಾಕಿಣ್ಣಾ ಫಾಸುಂ ವಿಹರನ್ತೀ’’ತಿ.

‘‘ಸಾಧು ಸಾಧು, ಭಿಕ್ಖವೇ, ಯಥಾ ತೇ ಮಹಾಸಾವಕಾ ಸಮ್ಮಾ ಬ್ಯಾಕರಮಾನಾ ಬ್ಯಾಕರೇಯ್ಯುಂ, ‘ಸದ್ದಕಣ್ಟಕಾ ಹಿ, ಭಿಕ್ಖವೇ, ಝಾನಾ’ ವುತ್ತಾ ಮಯಾ.

‘‘ದಸಯಿಮೇ, ಭಿಕ್ಖವೇ, ಕಣ್ಟಕಾ. ಕತಮೇ ದಸ? ಪವಿವೇಕಾರಾಮಸ್ಸ ಸಙ್ಗಣಿಕಾರಾಮತಾ ಕಣ್ಟಕೋ, ಅಸುಭನಿಮಿತ್ತಾನುಯೋಗಂ ಅನುಯುತ್ತಸ್ಸ ಸುಭನಿಮಿತ್ತಾನುಯೋಗೋ ಕಣ್ಟಕೋ, ಇನ್ದ್ರಿಯೇಸು ಗುತ್ತದ್ವಾರಸ್ಸ ವಿಸೂಕದಸ್ಸನಂ ಕಣ್ಟಕೋ, ಬ್ರಹ್ಮಚರಿಯಸ್ಸ ಮಾತುಗಾಮೂಪಚಾರೋ [ಮಾತುಗಾಮೋಪವಿಚಾರೋ (ಸೀ.), ಮಾತುಗಾಮೂಪವಿಚರೋ (ಕ.)] ಕಣ್ಟಕೋ, [ಕಥಾ. ೩೩೩] ಪಠಮಸ್ಸ ಝಾನಸ್ಸ ಸದ್ದೋ ಕಣ್ಟಕೋ, ದುತಿಯಸ್ಸ ಝಾನಸ್ಸ ವಿತಕ್ಕವಿಚಾರಾ ಕಣ್ಟಕಾ, ತತಿಯಸ್ಸ ಝಾನಸ್ಸ ಪೀತಿ ಕಣ್ಟಕೋ, ಚತುತ್ಥಸ್ಸ ಝಾನಸ್ಸ ಅಸ್ಸಾಸಪಸ್ಸಾಸೋ ಕಣ್ಟಕೋ, ಸಞ್ಞಾವೇದಯಿತನಿರೋಧಸಮಾಪತ್ತಿಯಾ ಸಞ್ಞಾ ಚ ವೇದನಾ ಚ ಕಣ್ಟಕೋ ರಾಗೋ ಕಣ್ಟಕೋ ದೋಸೋ ಕಣ್ಟಕೋ ಮೋಹೋ ಕಣ್ಟಕೋ.

‘‘ಅಕಣ್ಟಕಾ, ಭಿಕ್ಖವೇ, ವಿಹರಥ. ನಿಕ್ಕಣ್ಟಕಾ, ಭಿಕ್ಖವೇ, ವಿಹರಥ. ಅಕಣ್ಟಕನಿಕ್ಕಣ್ಟಕಾ, ಭಿಕ್ಖವೇ, ವಿಹರಥ. ಅಕಣ್ಟಕಾ, ಭಿಕ್ಖವೇ, ಅರಹನ್ತೋ; ನಿಕ್ಕಣ್ಟಕಾ, ಭಿಕ್ಖವೇ, ಅರಹನ್ತೋ; ಅಕಣ್ಟಕನಿಕ್ಕಣ್ಟಕಾ, ಭಿಕ್ಖವೇ, ಅರಹನ್ತೋ’’ತಿ. ದುತಿಯಂ.