೩. ಕಾಯಸುತ್ತಂ

೨೩. ‘‘ಅತ್ಥಿ, ಭಿಕ್ಖವೇ, ಧಮ್ಮಾ ಕಾಯೇನ ಪಹಾತಬ್ಬಾ, ನೋ ವಾಚಾಯ. ಅತ್ಥಿ, ಭಿಕ್ಖವೇ, ಧಮ್ಮಾ ವಾಚಾಯ ಪಹಾತಬ್ಬಾ, ನೋ ಕಾಯೇನ. ಅತ್ಥಿ, ಭಿಕ್ಖವೇ, ಧಮ್ಮಾ ನೇವ ಕಾಯೇನ ಪಹಾತಬ್ಬಾ ನೋ ವಾಚಾಯ, ಪಞ್ಞಾಯ ದಿಸ್ವಾ [ದಿಸ್ವಾ ದಿಸ್ವಾ (ಸೀ. ಸ್ಯಾ.)] ಪಹಾತಬ್ಬಾ.

‘‘ಕತಮೇ ಚ, ಭಿಕ್ಖವೇ, ಧಮ್ಮಾ ಕಾಯೇನ ಪಹಾತಬ್ಬಾ, ನೋ ವಾಚಾಯ? ಇಧ, ಭಿಕ್ಖವೇ, ಭಿಕ್ಖು ಅಕುಸಲಂ ಆಪನ್ನೋ ಹೋತಿ ಕಿಞ್ಚಿ ದೇಸಂ [ಕಞ್ಚಿ ದೇವ ದೇಸಂ (ಸೀ. ಸ್ಯಾ.)] ಕಾಯೇನ. ತಮೇನಂ ಅನುವಿಚ್ಚ ವಿಞ್ಞೂ ಸಬ್ರಹ್ಮಚಾರೀ ಏವಮಾಹಂಸು – ‘ಆಯಸ್ಮಾ ಖೋ ಅಕುಸಲಂ ಆಪನ್ನೋ ಕಿಞ್ಚಿ ದೇಸಂ ಕಾಯೇನ. ಸಾಧು ವತಾಯಸ್ಮಾ ಕಾಯದುಚ್ಚರಿತಂ ಪಹಾಯ ಕಾಯಸುಚರಿತಂ ಭಾವೇತೂ’ತಿ. ಸೋ ಅನುವಿಚ್ಚ ವಿಞ್ಞೂಹಿ ಸಬ್ರಹ್ಮಚಾರೀಹಿ ವುಚ್ಚಮಾನೋ ಕಾಯದುಚ್ಚರಿತಂ ಪಹಾಯ ಕಾಯಸುಚರಿತಂ ಭಾವೇತಿ. ಇಮೇ ವುಚ್ಚನ್ತಿ, ಭಿಕ್ಖವೇ, ಧಮ್ಮಾ ಕಾಯೇನ ಪಹಾತಬ್ಬಾ, ನೋ ವಾಚಾಯ.

‘‘ಕತಮೇ ಚ, ಭಿಕ್ಖವೇ, ಧಮ್ಮಾ ವಾಚಾಯ ಪಹಾತಬ್ಬಾ, ನೋ ಕಾಯೇನ? ಇಧ, ಭಿಕ್ಖವೇ, ಭಿಕ್ಖು ಅಕುಸಲಂ ಆಪನ್ನೋ ಹೋತಿ ಕಿಞ್ಚಿ ದೇಸಂ ವಾಚಾಯ. ತಮೇನಂ ಅನುವಿಚ್ಚ ವಿಞ್ಞೂ ಸಬ್ರಹ್ಮಚಾರೀ ಏವಮಾಹಂಸು – ‘ಆಯಸ್ಮಾ ಖೋ ಅಕುಸಲಂ ಆಪನ್ನೋ ಕಿಞ್ಚಿ ದೇಸಂ ವಾಚಾಯ. ಸಾಧು ವತಾಯಸ್ಮಾ ವಚೀದುಚ್ಚರಿತಂ ಪಹಾಯ ವಚೀಸುಚರಿತಂ ಭಾವೇತೂ’ತಿ. ಸೋ ಅನುವಿಚ್ಚ ವಿಞ್ಞೂಹಿ ಸಬ್ರಹ್ಮಚಾರೀಹಿ ವುಚ್ಚಮಾನೋ ವಚೀದುಚ್ಚರಿತಂ ಪಹಾಯ ವಚೀಸುಚರಿತಂ ಭಾವೇತಿ. ಇಮೇ ವುಚ್ಚನ್ತಿ, ಭಿಕ್ಖವೇ, ಧಮ್ಮಾ ವಾಚಾಯ ಪಹಾತಬ್ಬಾ, ನೋ ಕಾಯೇನ.

‘‘ಕತಮೇ ಚ, ಭಿಕ್ಖವೇ, ಧಮ್ಮಾ ನೇವ ಕಾಯೇನ ಪಹಾತಬ್ಬಾ ನೋ ವಾಚಾಯ, ಪಞ್ಞಾಯ ದಿಸ್ವಾ ಪಹಾತಬ್ಬಾ? ಲೋಭೋ, ಭಿಕ್ಖವೇ, ನೇವ ಕಾಯೇನ ಪಹಾತಬ್ಬೋ ನೋ ವಾಚಾಯ, ಪಞ್ಞಾಯ ದಿಸ್ವಾ ಪಹಾತಬ್ಬೋ. ದೋಸೋ, ಭಿಕ್ಖವೇ…ಪೇ… ಮೋಹೋ… ಕೋಧೋ… ಉಪನಾಹೋ… ಮಕ್ಖೋ… ಪಳಾಸೋ … ಮಚ್ಛರಿಯಂ, ಭಿಕ್ಖವೇ, ನೇವ ಕಾಯೇನ ಪಹಾತಬ್ಬಂ ನೋ ವಾಚಾಯ, ಪಞ್ಞಾಯ ದಿಸ್ವಾ ಪಹಾತಬ್ಬಂ.

‘‘ಪಾಪಿಕಾ, ಭಿಕ್ಖವೇ, ಇಸ್ಸಾ ನೇವ ಕಾಯೇನ ಪಹಾತಬ್ಬಾ ನೋ ವಾಚಾಯ, ಪಞ್ಞಾಯ ದಿಸ್ವಾ ಪಹಾತಬ್ಬಾ. ಕತಮಾ ಚ, ಭಿಕ್ಖವೇ, ಪಾಪಿಕಾ ಇಸ್ಸಾ? ಇಧ, ಭಿಕ್ಖವೇ, ಇಜ್ಝತಿ ಗಹಪತಿಸ್ಸ ವಾ ಗಹಪತಿಪುತ್ತಸ್ಸ ವಾ ಧನೇನ ವಾ ಧಞ್ಞೇನ ವಾ ರಜತೇನ ವಾ ಜಾತರೂಪೇನ ವಾ. ತತ್ರಾಞ್ಞತರಸ್ಸ ದಾಸಸ್ಸ ವಾ ಉಪವಾಸಸ್ಸ ವಾ ಏವಂ ಹೋತಿ – ‘ಅಹೋ ವತಿಮಸ್ಸ ಗಹಪತಿಸ್ಸ ವಾ ಗಹಪತಿಪುತ್ತಸ್ಸ ವಾ ನ ಇಜ್ಝೇಯ್ಯ ಧನೇನ ವಾ ಧಞ್ಞೇನ ವಾ ರಜತೇನ ವಾ ಜಾತರೂಪೇನ ವಾ’ತಿ. ಸಮಣೋ ವಾ ಪನ ಬ್ರಾಹ್ಮಣೋ ವಾ ಲಾಭೀ ಹೋತಿ ಚೀವರಪಿಣ್ಡಪಾತಸೇನಾಸನಗಿಲಾನಪಚ್ಚಯಭೇಸಜ್ಜಪರಿಕ್ಖಾರಾನಂ. ತತ್ರಾಞ್ಞತರಸ್ಸ ಸಮಣಸ್ಸ ವಾ ಬ್ರಾಹ್ಮಣಸ್ಸ ವಾ ಏವಂ ಹೋತಿ – ‘ಅಹೋ ವತ ಅಯಮಾಯಸ್ಮಾ ನ ಲಾಭೀ ಅಸ್ಸ ಚೀವರಪಿಣ್ಡಪಾತಸೇನಾಸನಗಿಲಾನಪಚ್ಚಯಭೇಸಜ್ಜಪರಿಕ್ಖಾರಾನ’ನ್ತಿ. ಅಯಂ ವುಚ್ಚತಿ, ಭಿಕ್ಖವೇ, ಪಾಪಿಕಾ ಇಸ್ಸಾ.

‘‘ಪಾಪಿಕಾ, ಭಿಕ್ಖವೇ, ಇಚ್ಛಾ ನೇವ ಕಾಯೇನ ಪಹಾತಬ್ಬಾ ನೋ ವಾಚಾಯ, ಪಞ್ಞಾಯ ದಿಸ್ವಾ ಪಹಾತಬ್ಬಾ. ಕತಮಾ ಚ, ಭಿಕ್ಖವೇ, ಪಾಪಿಕಾ ಇಚ್ಛಾ? [ವಿಭ. ೮೫೧] ಇಧ, ಭಿಕ್ಖವೇ, ಏಕಚ್ಚೋ ಅಸ್ಸದ್ಧೋ ಸಮಾನೋ ‘ಸದ್ಧೋತಿ ಮಂ ಜಾನೇಯ್ಯು’ನ್ತಿ ಇಚ್ಛತಿ; ದುಸ್ಸೀಲೋ ಸಮಾನೋ ‘ಸೀಲವಾತಿ ಮಂ ಜಾನೇಯ್ಯು’ನ್ತಿ ಇಚ್ಛತಿ; ಅಪ್ಪಸ್ಸುತೋ ಸಮಾನೋ ‘ಬಹುಸ್ಸುತೋತಿ ಮಂ ಜಾನೇಯ್ಯು’ನ್ತಿ ಇಚ್ಛತಿ; ಸಙ್ಗಣಿಕಾರಾಮೋ ಸಮಾನೋ ‘ಪವಿವಿತ್ತೋತಿ ಮಂ ಜಾನೇಯ್ಯು’ನ್ತಿ ಇಚ್ಛತಿ; ಕುಸೀತೋ ಸಮಾನೋ ‘ಆರದ್ಧವೀರಿಯೋತಿ ಮಂ ಜಾನೇಯ್ಯು’ನ್ತಿ ಇಚ್ಛತಿ; ಮುಟ್ಠಸ್ಸತಿ ಸಮಾನೋ ‘ಉಪಟ್ಠಿತಸ್ಸತೀತಿ ಮಂ ಜಾನೇಯ್ಯು’ನ್ತಿ ಇಚ್ಛತಿ; ಅಸಮಾಹಿತೋ ಸಮಾನೋ ‘ಸಮಾಹಿತೋತಿ ಮಂ ಜಾನೇಯ್ಯು’ನ್ತಿ ಇಚ್ಛತಿ; ದುಪ್ಪಞ್ಞೋ ಸಮಾನೋ ‘ಪಞ್ಞವಾತಿ ಮಂ ಜಾನೇಯ್ಯು’ನ್ತಿ ಇಚ್ಛತಿ; ಅಖೀಣಾಸವೋ ಸಮಾನೋ ‘ಖೀಣಾಸವೋತಿ ಮಂ ಜಾನೇಯ್ಯು’ನ್ತಿ ಇಚ್ಛತಿ. ಅಯಂ ವುಚ್ಚತಿ, ಭಿಕ್ಖವೇ, ಪಾಪಿಕಾ ಇಚ್ಛಾ. ಇಮೇ ವುಚ್ಚನ್ತಿ, ಭಿಕ್ಖವೇ, ಧಮ್ಮಾ ನೇವ ಕಾಯೇನ ಪಹಾತಬ್ಬಾ ನೋ ವಾಚಾಯ, ಪಞ್ಞಾಯ ದಿಸ್ವಾ ಪಹಾತಬ್ಬಾ.

‘‘ತಞ್ಚೇ, ಭಿಕ್ಖವೇ, ಭಿಕ್ಖುಂ ಲೋಭೋ ಅಭಿಭುಯ್ಯ ಇರಿಯತಿ, ದೋಸೋ… ಮೋಹೋ… ಕೋಧೋ… ಉಪನಾಹೋ… ಮಕ್ಖೋ… ಪಳಾಸೋ… ಮಚ್ಛರಿಯಂ… ಪಾಪಿಕಾ ಇಸ್ಸಾ… ಪಾಪಿಕಾ ಇಚ್ಛಾ ಅಭಿಭುಯ್ಯ ಇರಿಯತಿ. ಸೋ ಏವಮಸ್ಸ ವೇದಿತಬ್ಬೋ – ‘ನಾಯಮಾಯಸ್ಮಾ ತಥಾ ಪಜಾನಾತಿ ಯಥಾ ಪಜಾನತೋ ಲೋಭೋ ನ ಹೋತಿ, ತಥಾಹಿಮಂ ಆಯಸ್ಮನ್ತಂ ಲೋಭೋ ಅಭಿಭುಯ್ಯ ಇರಿಯತಿ; ನಾಯಮಾಯಸ್ಮಾ ತಥಾ ಪಜಾನಾತಿ ಯಥಾ ಪಜಾನತೋ ದೋಸೋ ನ ಹೋತಿ… ಮೋಹೋ… ಕೋಧೋ… ಉಪನಾಹೋ… ಮಕ್ಖೋ… ಪಳಾಸೋ… ಮಚ್ಛರಿಯಂ… ಪಾಪಿಕಾ ಇಸ್ಸಾ… ಪಾಪಿಕಾ ಇಚ್ಛಾ ನ ಹೋತಿ, ತಥಾಹಿಮಂ ಆಯಸ್ಮನ್ತಂ ಪಾಪಿಕಾ ಇಚ್ಛಾ ಅಭಿಭುಯ್ಯ ಇರಿಯತೀ’ತಿ.

‘‘ತಞ್ಚೇ, ಭಿಕ್ಖವೇ, ಭಿಕ್ಖುಂ ಲೋಭೋ ನಾಭಿಭುಯ್ಯ ಇರಿಯತಿ, ದೋಸೋ… ಮೋಹೋ… ಕೋಧೋ… ಉಪನಾಹೋ… ಮಕ್ಖೋ… ಪಳಾಸೋ… ಮಚ್ಛರಿಯಂ… ಪಾಪಿಕಾ ಇಸ್ಸಾ… ಪಾಪಿಕಾ ಇಚ್ಛಾ ನಾಭಿಭುಯ್ಯ ಇರಿಯತಿ, ಸೋ ಏವಮಸ್ಸ ವೇದಿತಬ್ಬೋ – ‘ತಥಾ ಅಯಮಾಯಸ್ಮಾ ಪಜಾನಾತಿ ಯಥಾ ಪಜಾನತೋ ಲೋಭೋ ನ ಹೋತಿ, ತಥಾಹಿಮಂ ಆಯಸ್ಮನ್ತಂ ಲೋಭೋ ನಾಭಿಭುಯ್ಯ ಇರಿಯತಿ; ತಥಾ ಅಯಮಾಯಸ್ಮಾ ಪಜಾನಾತಿ ಯಥಾ ಪಜಾನತೋ ದೋಸೋ ನ ಹೋತಿ… ಮೋಹೋ… ಕೋಧೋ … ಉಪನಾಹೋ… ಮಕ್ಖೋ… ಪಳಾಸೋ… ಮಚ್ಛರಿಯಂ… ಪಾಪಿಕಾ ಇಸ್ಸಾ… ಪಾಪಿಕಾ ಇಚ್ಛಾ ನ ಹೋತಿ, ತಥಾಹಿಮಂ ಆಯಸ್ಮನ್ತಂ ಪಾಪಿಕಾ ಇಚ್ಛಾ ನಾಭಿಭುಯ್ಯ ಇರಿಯತೀ’’’ತಿ. ತತಿಯಂ.