៥. បញ្ចកវារោ

៣២៥. បញ្ច អាបត្តិយោ. បញ្ច អាបត្តិក្ខន្ធា. បញ្ច វិនីតវត្ថូនិ. បញ្ច កម្មានិ អានន្តរិកានិ. បញ្ច បុគ្គលា និយតា. បញ្ច ឆេទនកា អាបត្តិយោ. បញ្ចហាការេហិ អាបត្តិំ អាបជ្ជតិ. បញ្ច អាបត្តិយោ. មុសាវាទបច្ចយា បញ្ចហាការេហិ កម្មំ ន ឧបេតិ – សយំ វា កម្មំ ន ករោតិ, បរំ វា ន អជ្ឈេសតិ, ឆន្ទំ វា បារិសុទ្ធិំ វា ន ទេតិ, កយិរមានេ កម្មេ បដិក្កោសតិ, កតេ វា បន កម្មេ អធម្មទិដ្ឋិ ហោតិ. បញ្ចហាការេហិ កម្មំ ឧបេតិ – សយំ វា កម្មំ ករោតិ, បរំ វា អជ្ឈេសតិ, ឆន្ទំ វា បារិសុទ្ធិំ វា ទេតិ, កយិរមានេ កម្មេ នប្បដិក្កោសតិ, កតេ វា បន កម្មេ ធម្មទិដ្ឋិ ហោតិ. បញ្ច បិណ្ឌបាតិកស្ស ភិក្ខុនោ កប្បន្តិ – អនាមន្តចារោ, គណភោជនំ, បរម្បរភោជនំ, អនធិដ្ឋានំ, អវិកប្បនា. [អ. និ. ៥.១០២] បញ្ចហង្គេហិ សមន្នាគតោ ភិក្ខុ ឧស្សង្កិតបរិសង្កិតោ ហោតិ – បាបភិក្ខុបិ អកុប្បធម្មោបិ វេសិយាគោចរោ វា ហោតិ, វិធវាគោចរោ វា ហោតិ, ថុល្លកុមារិគោចរោ វា ហោតិ, បណ្ឌកគោចរោ វា ហោតិ, ភិក្ខុនិគោចរោ វា ហោតិ. បញ្ច តេលានិ – តិលតេលំ, សាសបតេលំ, មធុកតេលំ, ឯរណ្ឌកតេលំ, វសាតេលំ. បញ្ច វសានិ – អច្ឆវសំ, មច្ឆវសំ, សុសុកាវសំ, សូករវសំ, គទ្រភវសំ. [អ. និ. ៥.១៣០; ទី. និ. ៣.៣១៦] បញ្ច ព្យសនានិ – ញាតិព្យសនំ, ភោគព្យសនំ, រោគព្យសនំ, សីលព្យសនំ, ទិដ្ឋិព្យសនំ. [អ. និ. ៥.១៣០; ទី. និ. ៣.៣១៦] បញ្ច សម្បទា – ញាតិសម្បទា, ភោគសម្បទា, អរោគសម្បទា, សីលសម្បទា, ទិដ្ឋិសម្បទា. បញ្ច និស្សយបដិប្បស្សទ្ធិយោ ឧបជ្ឈាយម្ហា – ឧបជ្ឈាយោ បក្កន្តោ វា ហោតិ, វិព្ភន្តោ វា, កាលង្កតោ វា, បក្ខសង្កន្តោ វា, អាណត្តិយេវ បញ្ចមី. បញ្ច បុគ្គលា ន ឧបសម្បាទេតព្ពា – អទ្ធានហីនោ, អង្គហីនោ, វត្ថុវិបន្នោ, ករណទុក្កដកោ, អបរិបូរោ. បញ្ច បំសុកូលានិ – សោសានិកំ, បាបណិកំ, ឧន្ទូរក្ខាយិកំ, ឧបចិកក្ខាយិកំ, អគ្គិទឌ្ឍំ. អបរានិបិ បញ្ច បំសុកូលានិ – គោខាយិកំ, អជក្ខាយិកំ, ថូបចីវរំ, អាភិសេកិកំ, គតបដិយាគតំ [ភតបដិយាភតំ (ក.)]. បញ្ច អវហារា – ថេយ្យាវហារោ, បសយ្ហាវហារោ, បរិកប្បាវហារោ, បដិច្ឆន្នាវហារោ, កុសាវហារោ. បញ្ច មហាចោរា សន្តោ សំវិជ្ជមានា លោកស្មិំ. បញ្ច អវិស្សជ្ជនិយានិ. បញ្ច អវេភង្គិយានិ. បញ្ចាបត្តិយោ កាយតោ សមុដ្ឋន្តិ, ន វាចតោ ន ចិត្តតោ. បញ្ចាបត្តិយោ កាយតោ ច វាចតោ ច សមុដ្ឋន្តិ, ចិត្តតោ. បញ្ចាបត្តិយោ ទេសនាគាមិនិយោ. បញ្ច សង្ឃា. បញ្ច បាតិមោក្ខុទ្ទេសា. សព្ពបច្ចន្តិមេសុ ជនបទេសុ វិនយធរបញ្ចមេន គណេន ឧបសម្បាទេតព្ពំ. បញ្ចានិសំសា កថិនត្ថារេ. បញ្ច កម្មានិ. យាវតតិយកេ បញ្ច អាបត្តិយោ. បញ្ចហាការេហិ អទិន្នំ អាទិយន្តស្ស អាបត្តិ បារាជិកស្ស. បញ្ចហាការេហិ អទិន្នំ អាទិយន្តស្ស អាបត្តិ ថុល្លច្ចយស្ស. បញ្ចហាការេហិ អទិន្នំ អាទិយន្តស្ស អាបត្តិ ទុក្កដស្ស. បញ្ច អកប្បិយានិ ន បរិភុញ្ជិតព្ពានិ – អទិន្នញ្ច ហោតិ, អវិទិតញ្ច ហោតិ, អកប្បិយញ្ច ហោតិ, អប្បដិគ្គហិតញ្ច ហោតិ, អកតាតិរិត្តញ្ច ហោតិ. បញ្ច កប្បិយានិ បរិភុញ្ជិតព្ពានិ – ទិន្នញ្ច ហោតិ, វិទិតញ្ច ហោតិ, កប្បិយញ្ច ហោតិ, បដិគ្គហិតញ្ច ហោតិ, កតាតិរិត្តញ្ច ហោតិ. បញ្ច ទានានិ អបុញ្ញានិ បុញ្ញសម្មតានិ លោកស្មិំ [លោកស្ស (ស្យា.)] – មជ្ជទានំ, សមជ្ជទានំ, ឥត្ថិទានំ, ឧសភទានំ, ចិត្តកម្មទានំ. បញ្ច ឧប្បន្នា ទុប្បដិវិនោទយា [វិនោទិយា (ស្យា.)] – ឧប្បន្នោ រាគោ ទុប្បដិវិនោទយោ, ឧប្បន្នោ ទោសោ ទុប្បដិវិនោទយោ, ឧប្បន្នោ មោហោ ទុប្បដិវិនោទយោ, ឧប្បន្នំ បដិភានំ ទុប្បដិវិនោទយំ, ឧប្បន្នំ គមិយចិត្តំ ទុប្បដិវិនោទយំ. បញ្ចានិសំសា សម្មជ្ជនិយា – សកចិត្តំ បសីទតិ, បរចិត្តំ បសីទតិ, ទេវតា អត្តមនា ហោន្តិ, បាសាទិកសំវត្តនិកកម្មំ ឧបចិនតិ, កាយស្ស ភេទា បរំ មរណា សុគតិំ សគ្គំ លោកំ ឧបបជ្ជតិ. អបរេបិ បញ្ចានិសំសា សម្មជ្ជនិយា – សកចិត្តំ បសីទតិ, បរចិត្តំ បសីទតិ, ទេវតា អត្តមនា ហោន្តិ, សត្ថុសាសនំ កតំ ហោតិ, បច្ឆិមា ជនតា ទិដ្ឋានុគតិំ អាបជ្ជតិ.

បញ្ចហង្គេហិ សមន្នាគតោ វិនយធរោ ‘‘ពាលោ’’ ត្វេវ សង្ខំ គច្ឆតិ – អត្តនោ ភាសបរិយន្តំ ន ឧគ្គណ្ហាតិ, បរស្ស ភាសបរិយន្តំ ន ឧគ្គណ្ហាតិ, អត្តនោ ភាសបរិយន្តំ ន ឧគ្គហេត្វា បរស្ស ភាសបរិយន្តំ ន ឧគ្គហេត្វា អធម្មេន ការេតិ អប្បដិញ្ញាយ. បញ្ចហង្គេហិ សមន្នាគតោ វិនយធរោ ‘‘បណ្ឌិតោ’’ ត្វេវ សង្ខំ គច្ឆតិ – អត្តនោ ភាសបរិយន្តំ ឧគ្គណ្ហាតិ, បរស្ស ភាសបរិយន្តំ ឧគ្គណ្ហាតិ, អត្តនោ ភាសបរិយន្តំ ឧគ្គហេត្វា បរស្ស ភាសបរិយន្តំ ឧគ្គហេត្វា ធម្មេន ការេតិ បដិញ្ញាយ. អបរេហិបិ បញ្ចហង្គេហិ សមន្នាគតោ វិនយធរោ ពាលោ ត្វេវ សង្ខំ គច្ឆតិ – អាបត្តិំ ន ជានាតិ, អាបត្តិយា មូលំ ន ជានាតិ, អាបត្តិសមុទយំ ន ជានាតិ, អាបត្តិនិរោធំ ន ជានាតិ, អាបត្តិនិរោធគាមិនិំ បដិបទំ ន ជានាតិ. បញ្ចហង្គេហិ សមន្នាគតោ វិនយធរោ បណ្ឌិតោ ត្វេវ សង្ខំ គច្ឆតិ – អាបត្តិំ ជានាតិ, អាបត្តិយា មូលំ ជានាតិ, អាបត្តិសមុទយំ ជានាតិ, អាបត្តិនិរោធំ ជានាតិ, អាបត្តិនិរោធគាមិនិំ បដិបទំ ជានាតិ. អបរេហិបិ បញ្ចហង្គេហិ សមន្នាគតោ វិនយធរោ ពាលោ ត្វេវ សង្ខំ គច្ឆតិ – អធិករណំ ន ជានាតិ, អធិករណស្ស មូលំ ន ជានាតិ, អធិករណសមុទយំ ន ជានាតិ, អធិករណនិរោធំ ន ជានាតិ, អធិករណនិរោធគាមិនិំ បដិបទំ ន ជានាតិ. បញ្ចហង្គេហិ សមន្នាគតោ វិនយធរោ បណ្ឌិតោ ត្វេវ សង្ខំ គច្ឆតិ – អធិករណំ ជានាតិ, អធិករណស្ស មូលំ ជានាតិ, អធិករណសមុទយំ ជានាតិ, អធិករណនិរោធំ ជានាតិ, អធិករណនិរោធគាមិនិំ បដិបទំ ជានាតិ. អបរេហិបិ បញ្ចហង្គេហិ សមន្នាគតោ វិនយធរោ ពាលោ ត្វេវ សង្ខំ គច្ឆតិ – វត្ថុំ ន ជានាតិ, និទានំ ន ជានាតិ, បញ្ញត្តិំ ន ជានាតិ, អនុបញ្ញត្តិំ ន ជានាតិ, អនុសន្ធិវចនបថំ ន ជានាតិ. បញ្ចហង្គេហិ សមន្នាគតោ វិនយធរោ បណ្ឌិតោ ត្វេវ សង្ខំ គច្ឆតិ – វត្ថុំ ជានាតិ, និទានំ ជានាតិ, បញ្ញត្តិំ ជានាតិ, អនុបញ្ញត្តិំ ជានាតិ, អនុសន្ធិវចនបថំ ជានាតិ. អបរេហិបិ បញ្ចហង្គេហិ សមន្នាគតោ វិនយធរោ ពាលោ ត្វេវ សង្ខំ គច្ឆតិ – ញត្តិំ ន ជានាតិ, ញត្តិយា ករណំ ន ជានាតិ, ន បុព្ពកុសលោ ហោតិ, ន អបរកុសលោ ហោតិ, អកាលញ្ញូ ច ហោតិ. បញ្ចហង្គេហិ សមន្នាគតោ វិនយធរោ បណ្ឌិតោ ត្វេវ សង្ខំ គច្ឆតិ – ញត្តិំ ជានាតិ, ញត្តិយា ករណំ ជានាតិ, បុព្ពកុសលោ ហោតិ, អបរកុសលោ ហោតិ, កាលញ្ញូ ច ហោតិ. អបរេហិបិ បញ្ចហង្គេហិ សមន្នាគតោ វិនយធរោ ពាលោ ត្វេវ សង្ខំ គច្ឆតិ – អាបត្តានាបត្តិំ ន ជានាតិ, លហុកគរុកំ អាបត្តិំ ន ជានាតិ, សាវសេសានវសេសំ អាបត្តិំ ន ជានាតិ, ទុដ្ឋុល្លាទុដ្ឋុល្លំ អាបត្តិំ ន ជានាតិ, អាចរិយបរម្បរា ខោ បនស្ស ន សុគ្គហិតា ហោតិ ន សុមនសិកតា ន សូបធារិតា. បញ្ចហង្គេហិ សមន្នាគតោ វិនយធរោ បណ្ឌិតោត្វេវ សង្ខំ គច្ឆតិ – អាបត្តានាបត្តិំ ជានាតិ, លហុកគរុកំ អាបត្តិំ ជានាតិ, សាវសេសានវសេសំ អាបត្តិំ ជានតិ, ទុដ្ឋុល្លាទុដ្ឋុល្លំ អាបត្តិំ ជានាតិ, អាចរិយបរម្បរា ខោ បនស្ស សុគ្គហិតា ហោតិ សុមនសិកតា សូបធារិតា. អបរេហិបិ បញ្ចហង្គេហិ សមន្នាគតោ វិនយធរោ ពាលោ ត្វេវ សង្ខំ គច្ឆតិ – អាបត្តានាបត្តិំ ន ជានាតិ, លហុកគរុកំ អាបត្តិំ ន ជានាតិ, សាវសេសានវសេសំ អាបត្តិំ ន ជានាតិ, ទុដ្ឋុល្លាទុដ្ឋុល្លំ អាបត្តិំ ជានាតិ, ឧភយានិ ខោ បនស្ស បាតិមោក្ខានិ ន វិត្ថារេន ស្វាគតានិ ហោន្តិ ន សុវិភត្តានិ ន សុប្បវត្តីនិ ន សុវិនិច្ឆិតានិ សុត្តសោ អនុព្យញ្ជនសោ. បញ្ចហង្គេហិ សមន្នាគតោ វិនយធរោ បណ្ឌិតោ ត្វេវ សង្ខំ គច្ឆតិ – អាបត្តានាបត្តិំ ជានាតិ, លហុកគរុកំ អាបត្តិំ ជានាតិ, សាវសេសានវសេសំ អាបត្តិំ ជានាតិ, ទុដ្ឋុល្លាទុដ្ឋុល្លំ អាបត្តិំ ជានាតិ, ឧភយានិ ខោ បនស្ស បាតិមោក្ខានិ វិត្ថារេន ស្វាគតានិ ហោន្តិ សុវិភត្តានិ សុប្បវត្តីនិ សុវិនិច្ឆិតានិ សុត្តសោ អនុព្យញ្ជនសោ. អបរេហិបិ បញ្ចហង្គេហិ សមន្នាគតោ វិនយធរោ ពាលោ ត្វេវ សង្ខំ គច្ឆតិ – អាបត្តានាបត្តិំ ន ជានាតិ, លហុកគរុកំ អាបត្តិំ ន ជានាតិ, សាវសេសានវសេសំ អាបត្តិំ ន ជានាតិ, ទុដ្ឋុល្លាទុដ្ឋុល្លំ អាបត្តិំ ន ជានាតិ, អធិករណេ ច ន វិនិច្ឆយកុសលោ ហោតិ. បញ្ចហង្គេហិ សមន្នាគតោ វិនយធរោ បណ្ឌិតោ ត្វេវ សង្ខំ គច្ឆតិ – អាបត្តានាបត្តិំ ជានាតិ, លហុកគរុកំ អាបត្តិំ ជានាតិ, សាវសេសានវសេសំ អាបត្តិំ ជានាតិ, ទុដ្ឋុល្លាទុដ្ឋុល្លំ អាបត្តិំ ជានាតិ, អធិករណេ ច វិនិច្ឆយកុសលោ ហោតិ.

[អ. និ. ៥.១៨១; បរិ. ៤៤៣] បញ្ច អារញ្ញិកា – មន្ទត្តា មោមូហត្តា អារញ្ញិកោ ហោតិ, បាបិច្ឆោ ឥច្ឆាបកតោ អារញ្ញិកោ ហោតិ, ឧម្មាទា ចិត្តក្ខេបា អារញ្ញិកោ ហោតិ, វណ្ណិតំ ពុទ្ធេហិ ពុទ្ធសាវកេហីតិ អារញ្ញិកោ ហោតិ, អបិ ច អប្បិច្ឆញ្ញេវ និស្សាយ សន្តុដ្ឋិញ្ញេវ និស្សាយ សល្លេខញ្ញេវ និស្សាយ បវិវេកញ្ញេវ និស្សាយ ឥទមត្ថិតញ្ញេវ [ឥទមដ្ឋិតញ្ញេវ (សី. ស្យា.)] និស្សាយ អារញ្ញិកោ ហោតិ. បញ្ច បិណ្ឌបាតិកា…បេ… បញ្ច បំសុកូលិកា…បេ… បញ្ច រុក្ខមូលិកា…បេ… បញ្ច សោសានិកា…បេ… បញ្ច អព្ភោកាសិកា…បេ… បញ្ច តេចីវរិកា…បេ… បញ្ច សបទានចារិកា…បេ… បញ្ច នេសជ្ជិកា…បេ… បញ្ច យថាសន្ថតិកា…បេ… បញ្ច ឯកាសនិកា…បេ… បញ្ច ខលុបច្ឆាភត្តិកា…បេ… បញ្ច បត្តបិណ្ឌិកា – មន្ទត្តា មោមូហត្តា បត្តបិណ្ឌិកោ ហោតិ, បាបិច្ឆោ ឥច្ឆាបកតោ បត្តបិណ្ឌិកោ ហោតិ, ឧម្មាទា ចិត្តក្ខេបា បត្តបិណ្ឌិកោ ហោតិ, វណ្ណិតំ ពុទ្ធេហិ ពុទ្ធសាវកេហីតិ បត្តបិណ្ឌិកោ ហោតិ, អបិ ច អប្បិច្ឆញ្ញេវ និស្សាយ សន្តុដ្ឋិញ្ញេវ និស្សាយ សល្លេខញ្ញេវ និស្សាយ បវិវេកញ្ញេវ និស្សាយ ឥទមត្ថិតញ្ញេវ និស្សាយ បត្តបិណ្ឌិកោ ហោតិ.

[បរិ. ៤១៧] បញ្ចហង្គេហិ សមន្នាគតេន ភិក្ខុនា នានិស្សិតេន វត្ថព្ពំ – ឧបោសថំ ន ជានាតិ, ឧបោសថកម្មំ ន ជានាតិ, បាតិមោក្ខំ ន ជានាតិ, បាតិមោក្ខុទ្ទេសំ ន ជានាតិ, ឩនបញ្ចវស្សោ ហោតិ. បញ្ចហង្គេហិ សមន្នាគតេន ភិក្ខុនា អនិស្សិតេន វត្ថព្ពំ – ឧបោសថំ ជានាតិ, ឧបោសថកម្មំ ជានាតិ, បាតិមោក្ខំ ជានាតិ, បាតិមោក្ខុទ្ទេសំ ជានាតិ, បញ្ចវស្សោ វា ហោតិ អតិរេកបញ្ចវស្សោ វា. អបរេហិបិ បញ្ចហង្គេហិ សមន្នាគតេន ភិក្ខុនា នានិស្សិតេន វត្ថព្ពំ – បវារណំ ន ជានាតិ, បវារណាកម្មំ ន ជានាតិ, បាតិមោក្ខំ ន ជានាតិ, បាតិមោក្ខុទ្ទេសំ ន ជានាតិ, ឩនបញ្ចវស្សោ ហោតិ. បញ្ចហង្គេហិ សមន្នាគតេន ភិក្ខុនា អនិស្សិតេន វត្ថព្ពំ – បវារណំ ជានាតិ, បវារណាកម្មំ ជានាតិ, បាតិមោក្ខំ ជានាតិ, បាតិមោក្ខុទ្ទេសំ ជានាតិ, បញ្ចវស្សោ វា ហោតិ អតិរេកបញ្ចវស្សោ វា. អបរេហិបិ បញ្ចហង្គេហិ សមន្នាគតេន ភិក្ខុនា នានិស្សិតេន វត្ថព្ពំ – អាបត្តានាបត្តិំ ន ជានាតិ, លហុកគរុកំ អាបត្តិំ ន ជានាតិ, សាវសេសានវសេសំ អាបត្តិំ ន ជានាតិ, ទុដ្ឋុល្លាទុដ្ឋុល្លំ អាបត្តិំ ន ជានាតិ, ឩនបញ្ចវស្សោ ហោតិ. បញ្ចហង្គេហិ សមន្នាគតេន ភិក្ខុនា អនិស្សិតេន វត្ថព្ពំ – អាបត្តានាបត្តិំ ជានាតិ, លហុកគរុកំ អាបត្តិំ ជានាតិ, សាវសេសានវសេសំ អាបត្តិំ ជានាតិ, ទុដ្ឋុល្លាទុដ្ឋុល្លំ អាបត្តិំ ជានាតិ, បញ្ចវស្សោ វា ហោតិ អតិរេកបញ្ចវស្សោ វា. បញ្ចហង្គេហិ សមន្នាគតាយ ភិក្ខុនិយា នានិស្សិតាយ វត្ថព្ពំ – ឧបោសថំ ន ជានាតិ, ឧបោសថកម្មំ ន ជានាតិ, បាតិមោក្ខំ ន ជានាតិ, បាតិមោក្ខុទ្ទេសំ ន ជានាតិ, ឩនបញ្ចវស្សា ហោតិ. បញ្ចហង្គេហិ សមន្នាគតាយ ភិក្ខុនិយា អនិស្សិតាយ វត្ថព្ពំ – ឧបោសថំ ជានាតិ, ឧបោសថកម្មំ ជានាតិ, បាតិមោក្ខំ ជានាតិ, បាតិមោក្ខុទ្ទេសំ ជានាតិ, បញ្ចវស្សា វា ហោតិ អតិរេកបញ្ចវស្សា វា. អបរេហិបិ បញ្ចហង្គេហិ សមន្នាគតាយ ភិក្ខុនិយា នានិស្សិតាយ វត្ថព្ពំ – បវារណំ ន ជានាតិ, បវារណាកម្មំ ន ជានាតិ, បាតិមោក្ខំ ន ជានាតិ, បាតិមោក្ខុទ្ទេសំ ន ជានាតិ, ឩនបញ្ចវស្សា ហោតិ. បញ្ចហង្គេហិ សមន្នាគតាយ ភិក្ខុនិយា អនិស្សិតាយ វត្ថព្ពំ – បវារណំ ជានាតិ, បវារណាកម្មំ ជានាតិ, បាតិមោក្ខំ ជានាតិ, បាតិមោក្ខុទ្ទេសំ ជានាតិ, បញ្ចវស្សា វា ហោតិ អតិរេកបញ្ចវស្សា វា. អបរេហិបិ បញ្ចហង្គេហិ សមន្នាគតាយ ភិក្ខុនិយា នានិស្សិតាយ វត្ថព្ពំ – អាបត្តានាបត្តិំ ន ជានាតិ, លហុកគរុកំ អាបត្តិំ ន ជានាតិ, សាវសេសានវសេសំ អាបត្តិំ ន ជានាតិ, ទុដ្ឋុល្លាទុដ្ឋុល្លំ អាបត្តិំ ន ជានាតិ, ឩនបញ្ចវស្សា ហោតិ. បញ្ចហង្គេហិ សមន្នាគតាយ ភិក្ខុនិយា អនិស្សិតាយ វត្ថព្ពំ – អាបត្តានាបត្តិំ ជានាតិ, លហុកគរុកំ អាបត្តិំ ជានាតិ, សាវសេសានវសេសំ អាបត្តិំ ជានាតិ, ទុដ្ឋុល្លាទុដ្ឋុល្លំ អាបត្តិំ ជានាតិ, បញ្ចវស្សា វា ហោតិ អតិរេកបញ្ចវស្សា វា.

បញ្ច អាទីនវា អបាសាទិកេ – អត្តាបិ អត្តានំ ឧបវទតិ, អនុវិច្ចបិ វិញ្ញូ គរហន្តិ, បាបកោ កិត្តិសទ្ទោ អព្ភុគ្គច្ឆតិ, សម្មូឡ្ហោ កាលំ ករោតិ, កាយស្ស ភេទា បរំ មរណា អបាយំ ទុគ្គតិំ វិនិបាតំ និរយំ ឧបបជ្ជតិ. បញ្ចានិសំសា បាសាទិកេ – អត្តាបិ អត្តានំ ន ឧបវទតិ, អនុវិច្ចបិ វិញ្ញូ បសំសន្តិ, កល្យាណោ កិត្តិសទ្ទោ អព្ភុគ្គច្ឆតិ, អសម្មូឡ្ហោ កាលំ ករោតិ, កាយស្ស ភេទា បរំ មរណា សុគតិំ សគ្គំ លោកំ ឧបបជ្ជតិ. អបរេបិ បញ្ច អាទីនវា អបាសាទិកេ – អប្បសន្នា ន បសីទន្តិ, បសន្នានំ ឯកច្ចានំ អញ្ញថត្តំ ហោតិ, សត្ថុសាសនំ អកតំ ហោតិ, បច្ឆិមា ជនតា ទិដ្ឋានុគតិំ នាបជ្ជតិ, ចិត្តមស្ស ន បសីទតិ. បញ្ចានិសំសា បាសាទិកេ – អប្បសន្នា បសីទន្តិ, បសន្នានំ ភិយ្យោភាវាយ ហោតិ, សត្ថុសាសនំ កតំ ហោតិ, បច្ឆិមា ជនតា ទិដ្ឋានុគតិំ អាបជ្ជតិ, ចិត្តមស្ស បសីទតិ. បញ្ច អាទីនវា កុលូបកេ – អនាមន្តចារេ អាបជ្ជតិ, រហោ និសជ្ជាយ អាបជ្ជតិ, បដិច្ឆន្នេ អាសនេ អាបជ្ជតិ, មាតុគាមស្ស ឧត្តរិឆប្បញ្ចវាចាហិ ធម្មំ ទេសេន្តោ អាបជ្ជតិ, កាមសង្កប្បពហុលោ ច វិហរតិ. បញ្ច អាទីនវា កុលូបកស្ស ភិក្ខុនោ – អតិវេលំ កុលេសុ សំសដ្ឋស្ស វិហរតោ មាតុគាមស្ស អភិណ្ហទស្សនំ, ទស្សនេ សតិ សំសគ្គោ, សំសគ្គេ សតិ វិស្សាសោ, វិស្សាសេ សតិ ឱតារោ, ឱតិណ្ណចិត្តស្សេតំ ភិក្ខុនោ បាដិកង្ខំ អនភិរតោ វា ព្រហ្មចរិយំ ចរិស្សតិ អញ្ញតរំ វា សំកិលិដ្ឋំ អាបត្តិំ អាបជ្ជិស្សតិ សិក្ខំ វា បច្ចក្ខាយ ហីនាយាវត្តិស្សតិ.

[បាចិ. ៩២] បញ្ច ពីជជាតានិ – មូលពីជំ, ខន្ធពីជំ, ផឡុពីជំ, អគ្គពីជំ, ពីជពីជញ្ញេវ [ពីជពីជមេវ (ក.)] បញ្ចមំ. បញ្ចហិ សមណកប្បេហិ ផលំ បរិភុញ្ជិតព្ពំ – អគ្គិបរិជិតំ, សត្ថបរិជិតំ, នខបរិជិតំ, អពីជំ, និព្ពត្តពីជញ្ញេវ [និព្ពដ្ដពីជញ្ញេវ (សី.), និព្ពដពីជញ្ញេវ (ស្យា.), និប្បដ្ដពីជញ្ញេវ (ក.)] បញ្ចមំ. បញ្ច វិសុទ្ធិយោ – និទានំ ឧទ្ទិសិត្វា អវសេសំ សុតេន សាវេតព្ពំ, អយំ បឋមា វិសុទ្ធិ; និទានំ ឧទ្ទិសិត្វា ចត្តារិ បារាជិកានិ ឧទ្ទិសិត្វា អវសេសំ សុតេន សាវេតព្ពំ, អយំ ទុតិយា វិសុទ្ធិ; និទានំ ឧទ្ទិសិត្វា ចត្តារិ បារាជិកានិ ឧទ្ទិសិត្វា តេរស សង្ឃាទិសេសេ ឧទ្ទិសិត្វា អវសេសំ សុតេន សាវេតព្ពំ, អយំ តតិយា វិសុទ្ធិ; និទានំ ឧទ្ទិសិត្វា ចត្តារិ បារាជិកានិ ឧទ្ទិសិត្វា តេរស សង្ឃាទិសេសេ ឧទ្ទិសិត្វា ទ្វេ អនិយតេ ឧទ្ទិសិត្វា អវសេសំ សុតេន សាវេតព្ពំ, អយំ ចតុត្ថា វិសុទ្ធិ; វិត្ថារេនេវ បញ្ចមី. អបរាបិ បញ្ច វិសុទ្ធិយោ – សុត្តុទ្ទេសោ, បារិសុទ្ធិឧបោសថោ, អធិដ្ឋានុបោសថោ, បវារណា, សាមគ្គីឧបោសថោយេវ បញ្ចមោ. បញ្ចានិសំសា វិនយធរេ – អត្តនោ សីលក្ខន្ធោ សុគុត្តោ ហោតិ សុរក្ខិតោ, កុក្កុច្ចបកតានំ បដិសរណំ ហោតិ, វិសារទោ សង្ឃមជ្ឈេ វោហរតិ, បច្ចត្ថិកេ សហធម្មេន សុនិគ្គហិតំ និគ្គណ្ហាតិ, សទ្ធម្មដ្ឋិតិយា បដិបន្នោ ហោតិ. បញ្ច អធម្មិកានិ បាតិមោក្ខដ្ឋបនានិ. បញ្ច ធម្មិកានិ បាតិមោក្ខដ្ឋបនានីតិ.

បញ្ចកំ និដ្ឋិតំ.

តស្សុទ្ទានំ –

អាបត្តិ អាបត្តិក្ខន្ធា, វិនីតានន្តរេន ច;

បុគ្គលា ឆេទនា ចេវ, អាបជ្ជតិ ច បច្ចយា.

ន ឧបេតិ ឧបេតិ ច, កប្បន្តុសង្កិតេលញ្ច;

វសំ ព្យសនា សម្បទា, បស្សទ្ធិ បុគ្គលេន ច.

សោសានិកំ ខាយិតញ្ច, ថេយ្យំ ចោរោ ច វុច្ចតិ;

អវិស្សជ្ជិ អវេភង្គិ, កាយតោ កាយវាចតោ.

ទេសនា សង្ឃំ ឧទ្ទេសំ, បច្ចន្តិកថិនេន ច;

កម្មានិ យាវតតិយំ, បារាជិថុល្លទុក្កដំ.

អកប្បិយំ កប្បិយញ្ច, អបុញ្ញទុវិនោទយា;

សម្មជ្ជនី អបរេ ច, ភាសំ អាបត្តិមេវ ច.

អធិករណំ វត្ថុ ញត្តិ, អាបត្តា ឧភយានិ ច;

លហុកដ្ឋមកា ឯតេ, កណ្ហសុក្កា វិជានថ.

អរញ្ញំ បិណ្ឌបាតញ្ច, បំសុរុក្ខសុសានិកា;

អព្ភោកាសោ ចីវរញ្ច, សបទានោ និសជ្ជិកោ.

សន្ថតិ ខលុ បច្ឆាបិ, បត្តបិណ្ឌិកមេវ ច;

ឧបោសថំ បវារណំ, អាបត្តានាបត្តិបិ ច.

កណ្ហសុក្កបទា ឯតេ, ភិក្ខុនីនម្បិ តេ តថា;

អបាសាទិកបាសាទិ, តថេវ អបរេ ទុវេ.

កុលូបកេ អតិវេលំ, ពីជំ សមណកប្បិ ច;

វិសុទ្ធិ អបរេ ចេវ, វិនយាធម្មិកេន ច;

ធម្មិកា ច តថា វុត្តា, និដ្ឋិតា សុទ្ធិបញ្ចកាតិ.