៦. ឆក្កវារោ

៣២៦. [ទី. និ. ៣.៣២៤] ឆ អគារវា. ឆ គារវា. ឆ វិនីតវត្ថូនិ. ឆ សាមីចិយោ. ឆ អាបត្តិសមុដ្ឋានា. ឆច្ឆេទនកា អាបត្តិយោ. ឆហាការេហិ អាបត្តិំ អាបជ្ជតិ. ឆានិសំសា វិនយធរេ. ឆ បរមានិ. ឆារត្តំ តិចីវរេន វិប្បវសិតព្ពំ. ឆ ចីវរានិ. ឆ រជនានិ. ឆ អាបត្តិយោ កាយតោ ច ចិត្តតោ ច សមុដ្ឋន្តិ ន វាចតោ. ឆ អាបត្តិយោ វាចតោ ច ចិត្តតោ ច សមុដ្ឋន្តិ ន កាយតោ. ឆ អាបត្តិយោ កាយតោ ច វាចតោ ច ចិត្តតោ ច សមុដ្ឋន្តិ. ឆ កម្មានិ. ឆ វិវាទមូលានិ. ឆ អនុវាទមូលានិ. ឆ សារណីយា ធម្មា ទីឃសោ. ឆ វិទត្ថិយោ, សុគតវិទត្ថិយា, តិរិយំ ឆ វិទត្ថិយោ. ឆ និស្សយបដិប្បស្សទ្ធិយោ អាចរិយម្ហា. ឆ នហានេ អនុបញ្ញត្តិយោ – វិប្បកតចីវរំ អាទាយ បក្កមតិ, វិប្បកតចីវរំ សមាទាយ បក្កមតិ.

[មហាវ. ៨៥ អាទយោ] ឆហង្គេហិ សមន្នាគតេន ភិក្ខុនា ឧបសម្បាទេតព្ពំ និស្សយោ ទាតព្ពោ សាមណេរោ ឧបដ្ឋាបេតព្ពោ – អសេក្ខេន សីលក្ខន្ធេន សមន្នាគតោ ហោតិ, អសេក្ខេន សមាធិក្ខន្ធេន សមន្នាគតោ ហោតិ, អសេក្ខេន បញ្ញក្ខន្ធេន សមន្នាគតោ ហោតិ, អសេក្ខេន វិមុត្តិក្ខន្ធេន សមន្នាគតោ ហោតិ, អសេក្ខេន វិមុត្តិញាណទស្សនក្ខន្ធេន សមន្នាគតោ ហោតិ, ទសវស្សោ វា ហោតិ អតិរេកទសវស្សោ វា.

អបរេហិបិ ឆហង្គេហិ សមន្នាគតេន ភិក្ខុនា ឧបសម្បាទេតព្ពំ និស្សយោ ទាតព្ពោ សាមណេរោ ឧបដ្ឋាបេតព្ពោ – អត្តនា អសេក្ខេន សីលក្ខន្ធេ សមន្នាគតោ ហោតិ, បរំ អសេក្ខេ សីលក្ខន្ធេ សមាទបេតា; អត្តនា អសេក្ខេន សមាធិក្ខន្ធេន សមន្នាគតោ ហោតិ, បរំ អសេក្ខេ សមាធិក្ខន្ធេ សមាទបេតា; អត្តនា អសេក្ខេន បញ្ញក្ខន្ធេន សមន្នាគតោ ហោតិ, បរំ អសេក្ខេ បញ្ញក្ខន្ធេ សមាទបេតា; អត្តនា អសេក្ខេន វិមុត្តិក្ខន្ធេន សមន្នាគតោ ហោតិ, បរំ អសេក្ខេ វិមុត្តិក្ខន្ធេ សមាទបេតា; អត្តនា អសេក្ខេន វិមុត្តិញាណទស្សនក្ខន្ធេន សមន្នាគតោ ហោតិ, បរំ អសេក្ខេ វិមុត្តិញាណទស្សនក្ខន្ធេ សមាទបេតា; ទសវស្សោ វា ហោតិ អតិរេកទសវស្សោ វា.

អបរេហិបិ ឆហង្គេហិ សមន្នាគតេន ភិក្ខុនា ឧបសម្បាទេតព្ពំ និស្សយោ ទាតព្ពោ សាមណេរោ ឧបដ្ឋាបេតព្ពោ – សទ្ធោ ហោតិ, ហិរិមា ហោតិ, ឱត្តប្បី ហោតិ, អារទ្ធវីរិយោ ហោតិ, ឧបដ្ឋិតស្សតិ ហោតិ, ទសវស្សោ វា ហោតិ អតិរេកទសវស្សោ វា.

អបរេហិបិ ឆហង្គេហិ សមន្នាគតេន ភិក្ខុនា ឧបសម្បាទេតព្ពំ និស្សយោ ទាតព្ពោ សាមណេរោ ឧបដ្ឋាបេតព្ពោ – ន អធិសីលេ សីលវិបន្នោ ហោតិ, ន អជ្ឈាចារេ អាចារវិបន្នោ ហោតិ, ន អតិទិដ្ឋិយា ទិដ្ឋិវិបន្នោ ហោតិ, ពហុស្សុតោ ហោតិ, បញ្ញវា ហោតិ, ទសវស្សោ វា ហោតិ អតិរេកទសវស្សោ វា.

អបរេហិបិ ឆហង្គេហិ សមន្នាគតេន ភិក្ខុនា ឧបសម្បាទេតព្ពំ និស្សយោ ទាតព្ពោ សាមណេរោ ឧបដ្ឋាបេតព្ពោ – បដិពលោ ហោតិ អន្តេវាសិំ វា សទ្ធិវិហារិំ វា គិលានំ ឧបដ្ឋាតុំ វា ឧបដ្ឋាបេតុំ វា, អនភិរតំ វូបកាសេតុំ វា វូបកាសាបេតុំ វា [អនភិរតិំ (ក.)], ឧប្បន្នំ កុក្កុច្ចំ ធម្មតោ វិនោទេតុំ [វិនោទេតុំ វា វិនោទាបេតុំ វា (ស្យា.) មហាវ. ៨៥], អាបត្តិំ ជានាតិ, អាបត្តិវុដ្ឋានំ ជានាតិ, ទសវស្សោ វា ហោតិ អតិរេកទសវស្សោ វា.

អបរេហិបិ ឆហង្គេហិ សមន្នាគតេន ភិក្ខុនា ឧបសម្បាទេតព្ពំ និស្សយោ ទាតព្ពោ សាមណេរោ ឧបដ្ឋាបេតព្ពោ – បដិពលោ ហោតិ អន្តេវាសិំ វា សទ្ធិវិហារិំ វា អាភិសមាចារិកាយ សិក្ខាយ សិក្ខាបេតុំ, អាទិព្រហ្មចារិយកាយ សិក្ខាយ វិនេតុំ, អភិធម្មេ វិនេតុំ, អភិវិនយេ វិនេតុំ, ឧប្បន្នំ ទិដ្ឋិគតំ ធម្មតោ វិវេចេតុំ, ទសវស្សោ វា ហោតិ អតិរេកទសវស្សោ វា.

អបរេហិបិ ឆហង្គេហិ សមន្នាគតេន ភិក្ខុនា ឧបសម្បាទេតព្ពំ និស្សយោ ទាតព្ពោ សាមណេរោ ឧបដ្ឋាបេតព្ពោ – អាបត្តិំ ជានាតិ, អនាបត្តិំ ជានាតិ, លហុកំ អាបត្តិំ ជានាតិ, គរុកំ អាបត្តិំ ជានាតិ, ឧភយានិ ខោ បនស្ស បាតិមោក្ខានិ វិត្ថារេន ស្វាគតានិ ហោន្តិ សុវិភត្តានិ សុប្បវត្តីនិ សុវិនិច្ឆិតានិ សុត្តសោ អនុព្យញ្ជនសោ, ទសវស្សោ វា ហោតិ អតិរេកទសវស្សោ វា.

ឆ អធម្មិកានិ បាតិមោក្ខដ្ឋបនានិ, ឆ ធម្មិកានិ បាតិមោក្ខដ្ឋបនានីតិ.

ឆក្កំ និដ្ឋិតំ.

តស្សុទ្ទានំ –

អគារវា គារវា ច, វិនីតា សាមីចិបិ ច;

សមុដ្ឋានា ឆេទនា ចេវ, អាការានិសំសេន ច.

បរមានិ ច ឆារត្តំ, ចីវរំ រជនានិ ច;

កាយតោ ចិត្តតោ ចាបិ, វាចតោ ចិត្តតោបិ ច.

កាយវាចាចិត្តតោ ច, កម្មវិវាទមេវ ច;

អនុវាទា ទីឃសោ ច, តិរិយំ និស្សយេន ច.

អនុបញ្ញត្តិ អាទាយ, សមាទាយ តថេវ ច;

អសេក្ខេ សមាទបេតា, សទ្ធោ អធិសីលេន ច;

គិលានាភិសមាចារី, អាបត្តាធម្មធម្មិកាតិ.