៤. ចតុក្កវារោ

៣២៤. អត្ថាបត្តិ សកវាចាយ អាបជ្ជតិ, បរវាចាយ វុដ្ឋាតិ; អត្ថាបត្តិ បរវាចាយ អាបជ្ជតិ, សកវាចាយ វុដ្ឋាតិ; អត្ថាបត្តិ សកវាចាយ អាបជ្ជតិ, សកវាចាយ វុដ្ឋាតិ; អត្ថាបត្តិ បរវាចាយ អាបជ្ជតិ, បរវាចាយ វុដ្ឋាតិ. អត្ថាបត្តិ កាយេន អាបជ្ជតិ, វាចាយ វុដ្ឋាតិ; អត្ថាបត្តិ វាចាយ អាបជ្ជតិ, កាយេន វុដ្ឋាតិ; អត្ថាបត្តិ កាយេន អាបជ្ជតិ, កាយេន វុដ្ឋាតិ; អត្ថាបត្តិ វាចាយ អាបជ្ជតិ, វាចាយ វុដ្ឋាតិ. អត្ថាបត្តិ បសុត្តោ អាបជ្ជតិ, បដិពុទ្ធោ វុដ្ឋាតិ; អត្ថាបត្តិ បដិពុទ្ធោ អាបជ្ជតិ, បសុត្តោ វុដ្ឋាតិ; អត្ថាបត្តិ បសុត្តោ អាបជ្ជតិ, បសុត្តោ វុដ្ឋាតិ; អត្ថាបត្តិ បដិពុទ្ធោ អាបជ្ជតិ, បដិពុទ្ធោ វុដ្ឋាតិ. អត្ថាបត្តិ អចិត្តកោ អាបជ្ជតិ, សចិត្តកោ វុដ្ឋាតិ; អត្ថាបត្តិ សចិត្តកោ អាបជ្ជតិ, អចិត្តកោ វុដ្ឋាតិ; អត្ថាបត្តិ អចិត្តកោ អាបជ្ជតិ, អចិត្តកោ វុដ្ឋាតិ; អត្ថាបត្តិ សចិត្តកោ អាបជ្ជតិ, សចិត្តកោ វុដ្ឋាតិ. អត្ថាបត្តិ អាបជ្ជន្តោ ទេសេតិ; ទេសេន្តោ អាបជ្ជតិ; អត្ថាបត្តិ អាបជ្ជន្តោ វុដ្ឋាតិ; វុដ្ឋហន្តោ អាបជ្ជតិ. អត្ថាបត្តិ កម្មេន អាបជ្ជតិ, អកម្មេន វុដ្ឋាតិ; អត្ថាបត្តិ អកម្មេន អាបជ្ជតិ, កម្មេន វុដ្ឋាតិ; អត្ថាបត្តិ កម្មេន អាបជ្ជតិ, កម្មេន វុដ្ឋាតិ; អត្ថាបត្តិ អកម្មេន អាបជ្ជតិ, អកម្មេន វុដ្ឋាតិ.

[អ. និ. ៤.២៥០; ទី. និ. ៣.៣១៣; វិភ. ៩៣៩] ចត្តារោ អនរិយវោហារា – អទិដ្ឋេ ទិដ្ឋវាទិតា, អស្សុតេ សុតវាទិតា, អមុតេ មុតវាទិតា, អវិញ្ញាតេ វិញ្ញាតវាទិតា. ចត្តារោ អរិយវោហារា – អទិដ្ឋេ អទិដ្ឋវាទិតា, អស្សុតេ អស្សុតវាទិតា, អមុតេ អមុតវាទិតា, អវិញ្ញាតេ អវិញ្ញាតវាទិតា. អបរេបិ ចត្តារោ អនរិយវោហារា – ទិដ្ឋេ អទិដ្ឋវាទិតា, សុតេ អស្សុតវាទិតា, មុតេ អមុតវាទិតា, វិញ្ញាតេ អវិញ្ញាតវាទិតា. ចត្តារោ អរិយវោហារា – ទិដ្ឋេ ទិដ្ឋវាទិតា, សុតេ សុតវាទិតា, មុតេ មុតវាទិតា, វិញ្ញាតេ វិញ្ញាតវាទិតា.

ចត្តារោ បារាជិកា ភិក្ខូនំ ភិក្ខុនីហិ សាធារណា; ចត្តារោ បារាជិកា ភិក្ខុនីនំ ភិក្ខូហិ អសាធារណា. ចត្តារោ បរិក្ខារា – អត្ថិ បរិក្ខារោ រក្ខិតព្ពោ គោបេតព្ពោ មមាយិតព្ពោ បរិភុញ្ជិតព្ពោ; អត្ថិ បរិក្ខារោ រក្ខិតព្ពោ គោបេតព្ពោ មមាយិតព្ពោ, ន បរិភុញ្ជិតព្ពោ; អត្ថិ បរិក្ខារោ រក្ខិតព្ពោ គោបេតព្ពោ, ន មមាយិតព្ពោ ន បរិភុញ្ជិតព្ពោ; អត្ថិ បរិក្ខារោ ន រក្ខិតព្ពោ ន គោបេតព្ពោ, ន មមាយិតព្ពោ ន បរិភុញ្ជិតព្ពោ. អត្ថាបត្តិ សម្មុខា អាបជ្ជតិ, បរម្មុខា វុដ្ឋាតិ; អត្ថាបត្តិ បរម្មុខា អាបជ្ជតិ, សម្មុខា វុដ្ឋាតិ; អត្ថាបត្តិ សម្មុខា អាបជ្ជតិ, សម្មុខា វុដ្ឋាតិ; អត្ថាបត្តិ បរម្មុខា អាបជ្ជតិ, បរម្មុខា វុដ្ឋាតិ. អត្ថាបត្តិ អជានន្តោ អាបជ្ជតិ, ជានន្តោ វុដ្ឋាតិ; អត្ថាបត្តិ ជានន្តោ អាបជ្ជតិ, អជានន្តោ វុដ្ឋាតិ; អត្ថាបត្តិ អជានន្តោ អាបជ្ជតិ, អជានន្តោ វុដ្ឋាតិ; អត្ថាបត្តិ ជានន្តោ អាបជ្ជតិ, ជានន្តោ វុដ្ឋាតិ.

ចតូហាការេហិ អាបត្តិំ អាបជ្ជតិ – កាយេន អាបជ្ជតិ, វាចាយ អាបជ្ជតិ, កាយេន វាចាយ អាបជ្ជតិ, កម្មវាចាយ អាបជ្ជតិ. អបរេហិបិ ចតូហាការេហិ អាបត្តិំ អាបជ្ជតិ – សង្ឃមជ្ឈេ, គណមជ្ឈេ, បុគ្គលស្ស សន្តិកេ, លិង្គបាតុភាវេន. ចតូហាការេហិ អាបត្តិយា វុដ្ឋាតិ – កាយេន វុដ្ឋាតិ, វាចាយ វុដ្ឋាតិ, កាយេន វាចាយ វុដ្ឋាតិ, កម្មវាចាយ វុដ្ឋាតិ. អបរេហិបិ ចតូហាការេហិ អាបត្តិយា វុដ្ឋាតិ – សង្ឃមជ្ឈេ, គណមជ្ឈេ, បុគ្គលស្ស សន្តិកេ, លិង្គបាតុភាវេន. សហ បដិលាភេន បុរិមំ ជហតិ, បច្ឆិមេ បតិដ្ឋាតិ, វិញ្ញត្តិយោ បដិប្បស្សម្ភន្តិ, បណ្ណត្តិយោ និរុជ្ឈន្តិ. សហ បដិលាភេន បច្ឆិមំ ជហតិ, បុរិមេ បតិដ្ឋាតិ, វិញ្ញត្តិយោ បដិប្បស្សម្ភន្តិ, បណ្ណត្តិយោ និរុជ្ឈន្តិ. ចតស្សោ ចោទនា – សីលវិបត្តិយា ចោទេតិ, អាចារវិបត្តិយា ចោទេតិ, ទិដ្ឋិវិបត្តិយា ចោទេតិ, អាជីវវិបត្តិយា ចោទេតិ. ចត្តារោ បរិវាសា – បដិច្ឆន្នបរិវាសោ, អប្បដិច្ឆន្នបរិវាសោ, សុទ្ធន្តបរិវាសោ, សមោធានបរិវាសោ. ចត្តារោ មានត្តា – បដិច្ឆន្នមានត្តំ, អប្បដិច្ឆន្នមានត្តំ, បក្ខមានត្តំ, សមោធានមានត្តំ. ចត្តារោ មានត្តចារិកស្ស ភិក្ខុនោ រត្តិច្ឆេទា – សហវាសោ, វិប្បវាសោ, អនារោចនា, ឩនេ គណេ ចរតិ. ចត្តារោ សាមុក្កំសា. ចត្តារោ បដិគ្គហិតបរិភោគា – យាវកាលិកំ, យាមកាលិកំ, សត្តាហកាលិកំ, យាវជីវិកំ. ចត្តារិ មហាវិកដានិ – គូថោ, មុត្តំ, ឆារិកា, មត្តិកា. ចត្តារិ កម្មានិ – អបលោកនកម្មំ, ញត្តិកម្មំ, ញត្តិទុតិយកម្មំ, ញត្តិចតុត្ថកម្មំ. អបរានិបិ ចត្តារិ កម្មានិ – អធម្មេន វគ្គកម្មំ, អធម្មេន សមគ្គកម្មំ, ធម្មេន វគ្គកម្មំ, ធម្មេន សមគ្គកម្មំ. ចតស្សោ វិបត្តិយោ – សីលវិបត្តិ, អាចារវិបត្តិ, ទិដ្ឋិវិបត្តិ, អាជីវវិបត្តិ. ចត្តារិ អធិករណានិ – វិវាទាធិករណំ, អនុវាទាធិករណំ, អាបត្តាធិករណំ, កិច្ចាធិករណំ. [អ. និ. ៤.២១១] ចត្តារោ បរិសទូសនា – ភិក្ខុ ទុស្សីលោ បាបធម្មោ បរិសទូសនោ, ភិក្ខុនី ទុស្សីលា បាបធម្មា បរិសទូសនា, ឧបាសកោ ទុស្សីលោ បាបធម្មោ បរិសទូសនោ, ឧបាសិកា ទុស្សីលា បាបធម្មា បរិសទូសនា. ចត្តារោ បរិសសោភនា [បរិសសោភណា (ស្យា. ក.)] – ភិក្ខុ សីលវា កល្យាណធម្មោ បរិសសោភនោ, ភិក្ខុនី សីលវតី កល្យាណធម្មា បរិសសោភនា, ឧបាសកោ សីលវា កល្យាណធម្មោ បរិសសោភនោ, ឧបាសិកា សីលវតី កល្យាណធម្មា បរិសសោភនា.

អត្ថាបត្តិ អាគន្តុកោ អាបជ្ជតិ, នោ អាវាសិកោ; អត្ថាបត្តិ អាវាសិកោ អាបជ្ជតិ, នោ អាគន្តុកោ; អត្ថាបត្តិ អាគន្តុកោ ចេវ អាបជ្ជតិ អាវាសិកោ ច អត្ថាបត្តិ នេវ អាគន្តុកោ អាបជ្ជតិ, នោ អាវាសិកោ. អត្ថាបត្តិ គមិកោ អាបជ្ជតិ, នោ អាវាសិកោ; អត្ថាបត្តិ អាវាសិកោ អាបជ្ជតិ, នោ គមិកោ; អត្ថាបត្តិ គមិកោ ចេវ អាបជ្ជតិ អាវាសិកោ ច; អត្ថាបត្តិ នេវ គមិកោ អាបជ្ជតិ នោ អាវាសិកោ. អត្ថិ វត្ថុនានត្តតា នោ អាបត្តិនានត្តតា, អត្ថិ អាបត្តិនានត្តតា នោ វត្ថុនានត្តតា, អត្ថិ វត្ថុនានត្តតា ចេវ អាបត្តិនានត្តតា ច, អត្ថិ នេវ វត្ថុនានត្តតា នោ អាបត្តិនានត្តតា. អត្ថិ វត្ថុសភាគតា នោ អាបត្តិសភាគតា, អត្ថិ អាបត្តិសភាគតា នោ វត្ថុសភាគតា, អត្ថិ វត្ថុសភាគតា ចេវ អាបត្តិសភាគតា ច អត្ថិ នេវ វត្ថុសភាគតា នោ អាបត្តិសភាគតា. អត្ថាបត្តិ ឧបជ្ឈាយោ អាបជ្ជតិ នោ សទ្ធិវិហារិកោ, អត្ថាបត្តិ សទ្ធិវិហារិកោ អាបជ្ជតិ នោ ឧបជ្ឈាយោ, អត្ថាបត្តិ ឧបជ្ឈាយោ ចេវ អាបជ្ជតិ សទ្ធិវិហារិកោ ច, អត្ថាបត្តិ នេវ ឧបជ្ឈាយោ អាបជ្ជតិ នោ សទ្ធិវិហារិកោ. អត្ថាបត្តិ អាចរិយោ អាបជ្ជតិ នោ អន្តេវាសិកោ, អត្ថាបត្តិ អន្តេវាសិកោ អាបជ្ជតិ នោ អាចរិយោ, អត្ថាបត្តិ អាចរិយោ ចេវ អាបជ្ជតិ អន្តេវាសិកោ ច, អត្ថាបត្តិ នេវ អាចរិយោ អាបជ្ជតិ នោ អន្តេវាសិកោ. ចត្តារោ បច្ចយា អនាបត្តិ វស្សច្ឆេទស្ស – សង្ឃោ វា ភិន្នោ ហោតិ, សង្ឃំ វា ភិន្ទិតុកាមា ហោន្តិ, ជីវិតន្តរាយោ វា ហោតិ, ព្រហ្មចរិយន្តរាយោ វា ហោតិ. ចត្តារិ វចីទុច្ចរិតានិ – មុសាវាទោ, បិសុណា វាចា, ផរុសា វាចា, សម្ផប្បលាបោ. ចត្តារិ វចីសុចរិតានិ – សច្ចវាចា, អបិសុណា វាចា, សណ្ហា វាចា, មន្តា ភាសា. អត្ថិ អាទិយន្តោ គរុកំ អាបត្តិំ អាបជ្ជតិ, បយោជេន្តោ លហុកំ; អត្ថិ អាទិយន្តោ លហុកំ អាបត្តិំ អាបជ្ជតិ, បយោជេន្តោ គរុកំ, អត្ថិ អាទិយន្តោបិ បយោជេន្តោបិ គរុកំ អាបត្តិំ អាបជ្ជតិ; អត្ថិ អាទិយន្តោបិ បយោជេន្តោបិ លហុកំ អាបត្តិំ អាបជ្ជតិ.

អត្ថិ បុគ្គលោ អភិវាទនារហោ, នោ បច្ចុដ្ឋានារហោ; អត្ថិ បុគ្គលោ បច្ចុដ្ឋានារហោ, នោ អភិវាទនារហោ; អត្ថិ បុគ្គលោ អភិវាទនារហោ ចេវ បច្ចុដ្ឋានារហោ ច; អត្ថិ បុគ្គលោ នេវ អភិវាទនារហោ នោ បច្ចុដ្ឋានារហោ. អត្ថិ បុគ្គលោ អាសនារហោ, នោ អភិវាទនារហោ; អត្ថិ បុគ្គលោ អភិវាទនារហោ, នោ អាសនារហោ; អត្ថិ បុគ្គលោ អាសនារហោ ចេវ អភិវាទនារហោ ច; អត្ថិ បុគ្គលោ នេវ អាសនារហោ នោ អភិវាទនារហោ. អត្ថាបត្តិ កាលេ អាបជ្ជតិ, នោ វិកាលេ; អត្ថាបត្តិ វិកាលេ អាបជ្ជតិ, នោ កាលេ; អត្ថាបត្តិ កាលេ ចេវ អាបជ្ជតិ វិកាលេ ច; អត្ថាបត្តិ នេវ កាលេ អាបជ្ជតិ នោ វិកាលេ. អត្ថិ បដិគ្គហិតំ កាលេ កប្បតិ, នោ វិកាលេ; អត្ថិ បដិគ្គហិតំ វិកាលេ កប្បតិ, នោ កាលេ; អត្ថិ បដិគ្គហិតំ កាលេ ចេវ កប្បតិ វិកាលេ ច; អត្ថិ បដិគ្គហិតំ នេវ កាលេ កប្បតិ នោ វិកាលេ. អត្ថាបត្តិ បច្ចន្តិមេសុ ជនបទេសុ អាបជ្ជតិ, នោ មជ្ឈិមេសុ; អត្ថាបត្តិ មជ្ឈិមេសុ ជនបទេសុ អាបជ្ជតិ, នោ បច្ចន្តិមេសុ; អត្ថាបត្តិ បច្ចន្តិមេសុ ចេវ ជនបទេសុ អាបជ្ជតិ មជ្ឈិមេសុ ច; អត្ថាបត្តិ នេវ បច្ចន្តិមេសុ ជនបទេសុ អាបជ្ជតិ នោ មជ្ឈិមេសុ. អត្ថិ បច្ចន្តិមេសុ ជនបទេសុ កប្បតិ, នោ មជ្ឈិមេសុ; អត្ថិ មជ្ឈិមេសុ ជនបទេសុ កប្បតិ, នោ បច្ចន្តិមេសុ; អត្ថិ បច្ចន្តិមេសុ ចេវ ជនបទេសុ កប្បតិ មជ្ឈិមេសុ ច; អត្ថិ នេវ បច្ចន្តិមេសុ ជនបទេសុ កប្បតិ នោ មជ្ឈិមេសុ. អត្ថាបត្តិ អន្តោ អាបជ្ជតិ, នោ ពហិ; អត្ថាបត្តិ ពហិ អាបជ្ជតិ, នោ អន្តោ; អត្ថាបត្តិ អន្តោ ចេវ អាបជ្ជតិ ពហិ ច; អត្ថាបត្តិ នេវ អន្តោ អាបជ្ជតិ នោ ពហិ. អត្ថាបត្តិ អន្តោសីមាយ អាបជ្ជតិ, នោ ពហិសីមាយ; អត្ថាបត្តិ ពហិសីមាយ អាបជ្ជតិ, នោ អន្តោសីមាយ; អត្ថាបត្តិ អន្តោសីមាយ ចេវ អាបជ្ជតិ ពហិសីមាយ ច; អត្ថាបត្តិ នេវ អន្តោសីមាយ អាបជ្ជតិ នោ ពហិសីមាយ. អត្ថាបត្តិ គាមេ អាបជ្ជតិ, នោ អរញ្ញេ; អត្ថាបត្តិ អរញ្ញេ អាបជ្ជតិ, នោ គាមេ; អត្ថាបត្តិ គាមេ ចេវ អាបជ្ជតិ អរញ្ញេ ច; អត្ថាបត្តិ នេវ គាមេ អាបជ្ជតិ នោ អរញ្ញេ.

ចតស្សោ ចោទនា – វត្ថុសន្ទស្សនា, អាបត្តិសន្ទស្សនា, សំវាសបដិក្ខេបោ, សាមីចិបដិក្ខេបោ. ចត្តារោ បុព្ពកិច្ចា. ចត្តារោ បត្តកល្លា. ចត្តារិ អនញ្ញបាចិត្តិយានិ. ចតស្សោ ភិក្ខុសម្មុតិយោ. [អ. និ. ៤.១៧; វិភ. ៩៣៩; ទី. និ. ៣.៣១១] ចត្តារិ អគតិគមនានិ – ឆន្ទាគតិំ គច្ឆតិ, ទោសាគតិំ គច្ឆតិ, មោហាគតិំ គច្ឆតិ, ភយាគតិំ គច្ឆតិ. ចត្តារិ នាគតិគមនានិ – ន ឆន្ទាគតិំ គច្ឆតិ, ន ទោសាគតិំ គច្ឆតិ, ន មោហាគតិំ គច្ឆតិ, ន ភយាគតិំ គច្ឆតិ. ចតូហង្គេហិ សមន្នាគតោ អលជ្ជី ភិក្ខុ សង្ឃំ ភិន្ទតិ – ឆន្ទាគតិំ គច្ឆន្តោ, ទោសាគតិំ គច្ឆន្តោ, មោហាគតិំ គច្ឆន្តោ, ភយាគតិំ គច្ឆន្តោ. ចតូហង្គេហិ សមន្នាគតោ បេសលោ ភិក្ខុ ភិន្នំ សង្ឃំ សមគ្គំ ករោតិ – ន ឆន្ទាគតិំ គច្ឆន្តោ, ន ទោសាគតិំ គច្ឆន្តោ, ន មោហាគតិំ គច្ឆន្តោ, ន ភយាគតិំ គច្ឆន្តោ. ចតូហង្គេហិ សមន្នាគតស្ស ភិក្ខុនោ វិនយោ ន បុច្ឆិតព្ពោ – ឆន្ទាគតិំ គច្ឆតិ, ទោសាគតិំ គច្ឆតិ, មោហាគតិំ គច្ឆតិ, ភយាគតិំ គច្ឆតិ. ចតូហង្គេហិ សមន្នាគតេន ភិក្ខុនា វិនយោ ន បុច្ឆិតព្ពោ – ឆន្ទាគតិំ គច្ឆតិ, ទោសាគតិំ គច្ឆតិ, មោហាគតិំ គច្ឆតិ, ភយាគតិំ គច្ឆតិ. ចតូហង្គេហិ សមន្នាគតស្ស ភិក្ខុនោ វិនយោ ន វិស្សជ្ជេតព្ពោ – ឆន្ទាគតិំ គច្ឆតិ, ទោសាគតិំ គច្ឆតិ, មោហាគតិំ គច្ឆតិ, ភយាគតិំ គច្ឆតិ. ចតូហង្គេហិ សមន្នាគតេន ភិក្ខុនា វិនយោ ន វិស្សជ្ជេតព្ពោ – ឆន្ទាគតិំ គច្ឆតិ, ទោសាគតិំ គច្ឆតិ, មោហាគតិំ គច្ឆតិ, ភយាគតិំ គច្ឆតិ. ចតូហង្គេហិ សមន្នាគតស្ស ភិក្ខុនោ អនុយោគោ ន ទាតព្ពោ – ឆន្ទាគតិំ គច្ឆតិ, ទោសាគតិំ គច្ឆតិ, មោហាគតិំ គច្ឆតិ, ភយាគតិំ គច្ឆតិ. ចតូហង្គេហិ សមន្នាគតេ ភិក្ខុនា សទ្ធិំ វិនយោ ន សាកច្ឆិតព្ពោ – ឆន្ទាគតិំ គច្ឆតិ, ទោសាគតិំ គច្ឆតិ, មោហាគតិំ គច្ឆតិ, ភយាគតិំ គច្ឆតិ. អត្ថាបត្តិ គិលានោ អាបជ្ជតិ, នោ អគិលានោ; អត្ថាបត្តិ អគិលានោ អាបជ្ជតិ, នោ គិលានោ; អត្ថាបត្តិ គិលានោ ចេវ អាបជ្ជតិ អគិលានោ ច; អត្ថាបត្តិ នេវ គិលានោ អាបជ្ជតិ នោ អគិលានោ. ចត្តារិ អធម្មិកានិ បាតិមោក្ខដ្ឋបនានិ. ចត្តារិ ធម្មិកានិ បាតិមោក្ខដ្ឋបនានិ.

ចតុក្កំ និដ្ឋិតំ.

តស្សុទ្ទានំ –

សកវាចាយ កាយេន, បសុត្តោ ច អចិត្តកោ;

អាបជ្ជន្តោ ច កម្មេន, វោហារា ចតុរោ តថា.

ភិក្ខូនំ ភិក្ខុនីនញ្ច, បរិក្ខារោ ច សម្មុខា;

អជានកាយេ មជ្ឈេ ច, វុដ្ឋាតិ ទុវិធា តថា.

បដិលាភេន ចោទនា, បរិវាសា ច វុច្ចតិ;

មានត្តចារិកា ចាបិ, សាមុក្កំសា បដិគ្គហិ.

មហាវិកដកម្មានិ, បុន កម្មេ វិបត្តិយោ;

អធិករណា ទុស្សីលា ច, សោភនាគន្តុកេន ច.

គមិកោ វត្ថុនានត្តា, សភាគុបជ្ឈាយេន ច;

អាចរិយោ បច្ចយា វា, ទុច្ចរិតំ សុចរិតំ.

អាទិយន្តោ បុគ្គលោ ច, អរហោ អាសនេន ច;

កាលេ ច កប្បតិ ចេវ, បច្ចន្តិមេសុ កប្បតិ.

អន្តោ អន្តោ ច សីមាយ, គាមេ ច ចោទនាយ ច;

បុព្ពកិច្ចំ បត្តកល្លំ, អនញ្ញា សម្មុតិយោ ច.

អគតិ នាគតិ ចេវ, អលជ្ជី បេសលេន ច;

បុច្ឆិតព្ពា ទុវេ ចេវ, វិស្សជ្ជេយ្យា តថា ទុវេ;

អនុយោគោ ច សាកច្ឆា, គិលានោ ឋបនេន ចាតិ.