១០. ទសកវារោ

៣៣០. ទស អាឃាតវត្ថូនិ. ទស អាឃាតបដិវិនយា. ទស វិនីតវត្ថូនិ. ទសវត្ថុកា មិច្ឆាទិដ្ឋិ. ទសវត្ថុកា សម្មាទិដ្ឋិ. ទស អន្តគ្គាហិកា ទិដ្ឋិ. ទស មិច្ឆត្តា. ទស សម្មត្តា. ទស អកុសលកម្មបថា. ទស កុសលកម្មបថា. ទស អធម្មិកា សលាកគ្គាហា. ទស ធម្មិកា សលាកគ្គាហា. សាមណេរានំ ទស សិក្ខាបទានិ. ទសហង្គេហិ សមន្នាគតោ សាមណេរោ នាសេតព្ពោ.

ទសហង្គេហិ សមន្នាគតោ វិនយធរោ ពាលោ ត្វេវ សង្ខំ គច្ឆតិ – អត្តនោ ភាសបរិយន្តំ ន ឧគ្គណ្ហាតិ, បរស្ស ភាសបរិយន្តំ ន ឧគ្គណ្ហាតិ, អត្តនោ ភាសបរិយន្តំ អនុគ្គហេត្វា បរស្ស ភាសបរិយន្តំ អនុគ្គហេត្វា អធម្មេន ការេតិ, អប្បដិញ្ញាយ អាបត្តិំ ន ជានាតិ, អាបត្តិយា មូលំ ន ជានាតិ, អាបត្តិសមុទយំ ន ជានាតិ, អាបត្តិនិរោធំ ន ជានាតិ, អាបត្តិនិរោធគាមិនិំ បដិបទំ ន ជានាតិ.

ទសហង្គេហិ សមន្នាគតោ វិនយធរោ បណ្ឌិតោ ត្វេវ សង្ខំ គច្ឆតិ – អត្តនោ ភាសបរិយន្តំ ឧគ្គណ្ហាតិ, បរស្ស ភាសបរិយន្តំ ឧគ្គណ្ហាតិ, អត្តនោ ភាសបរិយន្តំ ឧគ្គហេត្វា បរស្ស ភាសបរិយន្តំ ឧគ្គហេត្វា ធម្មេន ការេតិ, បដិញ្ញាយ អាបត្តិំ ជានាតិ, អាបត្តិយា មូលំ ជានាតិ, អាបត្តិសមុទយំ ជានាតិ, អាបត្តិនិរោធំ ជានាតិ, អាបត្តិនិរោធគាមិនិំ បដិបទំ ជានាតិ.

អបរេហិបិ ទសហង្គេហិ សមន្នាគតោ វិនយធរោ ពាលោ ត្វេវ សង្ខំ គច្ឆតិ – អធិករណំ ន ជានាតិ, អធិករណស្ស មូលំ ន ជានាតិ, អធិករណសមុទយំ ន ជានាតិ, អធិករណនិរោធំ ន ជានាតិ, អធិករណនិរោធគាមិនិំ បដិបទំ ន ជានាតិ, វត្ថុំ ន ជានាតិ, និទានំ [ឧទ្ទានំ (ក.)] ន ជានាតិ, បញ្ញត្តិំ ន ជានាតិ, អនុបញ្ញត្តិំ ន ជានាតិ, អនុសន្ធិវចនបថំ ន ជានាតិ.

ទសហង្គេហិ សមន្នាគតោ វិនយធរោ បណ្ឌិតោ ត្វេវ សង្ខំ គច្ឆតិ – អធិករណំ ជានាតិ, អធិករណស្ស មូលំ ជានាតិ, អធិករណសមុទយំ ជានាតិ, អធិករណនិរោធំ ជានាតិ, អធិករណនិរោធគាមិនិំ បដិបទំ ជានាតិ, វត្ថុំ ជានាតិ, និទានំ ជានាតិ, បញ្ញត្តិំ ជានាតិ, អនុបញ្ញត្តិំ ជានាតិ, អនុសន្ធិវចនបថំ ជានាតិ.

អបរេហិបិ ទសហង្គេហិ សមន្នាគតោ វិនយធរោ ពាលោ ត្វេវ សង្ខំ គច្ឆតិ – ញត្តិំ ន ជានាតិ, ញត្តិយា ករណំ ន ជានាតិ, ន បុព្ពកុសលោ ហោតិ, ន អបរកុសលោ ហោតិ, អកាលញ្ញូ ច ហោតិ, អាបត្តានាបត្តិំ ន ជានាតិ, លហុកគរុកំ អាបត្តិំ ន ជានាតិ, សាវសេសានវសេសំ អាបត្តិំ ន ជានាតិ, ទុដ្ឋុល្លាទុដ្ឋុល្លំ អាបត្តិំ ន ជានាតិ, អាចរិយបរម្បរា ខោ បនស្ស ន សុគ្គហិតា ហោតិ ន សុមនសិកតា ន សូបធារិតា.

ទសហង្គេហិ សមន្នាគតោ វិនយធរោ បណ្ឌិតោ ត្វេវ សង្ខំ គច្ឆតិ – ញត្តិំ ជានាតិ, ញត្តិយា ករណំ ជានាតិ, បុព្ពកុសលោ ហោតិ, អបរកុសលោ ហោតិ, កាលញ្ញូ ច ហោតិ, អាបត្តានាបត្តិំ ជានាតិ, លហុកគរុកំ អាបត្តិំ ជានាតិ, សាវសេសានវសេសំ អាបត្តិំ ជានាតិ, ទុដ្ឋុល្លាទុដ្ឋុល្លំ អាបត្តិំ ជានាតិ, អាចរិយបរម្បរា ខោ បនស្ស សុគ្គហិតា ហោតិ សុមនសិកតា សូបធារិតា.

អបរេហិបិ ទសហង្គេហិ សមន្នាគតោ វិនយធរោ ពាលោ ត្វេវ សង្ខំ គច្ឆតិ – អាបត្តានាបត្តិំ ន ជានាតិ, លហុកគរុកំ អាបត្តិំ ន ជានាតិ, សាវសេសានវសេសំ អាបត្តិំ ន ជានាតិ, ទុដ្ឋុល្លាទុដ្ឋុល្លំ អាបត្តិំ ន ជានាតិ, ឧភយានិ ខោ បនស្ស បាតិមោក្ខានិ វិត្ថារេន ន ស្វាគតានិ ហោន្តិ ន សុវិភត្តានិ ន សុប្បវត្តីនិ ន សុវិនិច្ឆិតានិ សុត្តសោ អនុព្យញ្ជនសោ, អាបត្តានាបត្តិំ ន ជានាតិ, លហុកគរុកំ អាបត្តិំ ន ជានាតិ, សាវសេសានវសេសំ អាបត្តិំ ន ជានាតិ, ទុដ្ឋុល្លាទុដ្ឋុល្លំ អាបត្តិំ ន ជានាតិ, អធិករណេ ច ន វិនិច្ឆយកុសលោ ហោតិ.

ទសហង្គេហិ សមន្នាគតោ វិនយធរោ បណ្ឌិតោ ត្វេវ សង្ខំ គច្ឆតិ – អាបត្តានាបត្តិំ ជានាតិ, លហុកគរុកំ អាបត្តិំ ជានាតិ, សាវសេសានវសេសំ អាបត្តិំ ជានាតិ, ទុដ្ឋុល្លាទុដ្ឋុល្លំ អាបត្តិំ ជានាតិ, ឧភយានិ ខោ បនស្ស បាតិមោក្ខានិ វិត្ថារេន ស្វាគតានិ ហោន្តិ សុវិភត្តានិ សុប្បវត្តីនិ សុវិនិច្ឆិតានិ សុត្តសោ អនុព្យញ្ជនសោ, អាបត្តានាបត្តិំ ជានាតិ, លហុកគរុកំ អាបត្តិំ ជានាតិ, សាវសេសានវសេសំ អាបត្តិំ ជានាតិ, ទុដ្ឋុល្លាទុដ្ឋុល្លំ អាបត្តិំ ជានាតិ, អធិករណេ ច វិនិច្ឆយកុសលោ ហោតិ.

[អ. និ. ១០.៣៣] ទសហង្គេហិ សមន្នាគតោ ភិក្ខុ ឧព្ពាហិកាយ សម្មន្និតព្ពោ. ទស អត្ថវសេ បដិច្ច តថាគតេន សាវកានំ សិក្ខាបទំ បញ្ញត្តំ. ទស អាទីនវា រាជន្តេបុរប្បវេសនេ. ទស ទានវត្ថូនិ. ទស រតនានិ. ទសវគ្គោ ភិក្ខុសង្ឃោ. ទសវគ្គេន គណេន ឧបសម្បាទេតព្ពំ. ទស បំសុកូលានិ. ទស ចីវរធារណា [ចីវរធារណានិ (ស្យា.)]. ទសាហបរមំ អតិរេកចីវរំ ធារេតព្ពំ. ទស សុក្កានិ. ទស ឥត្ថិយោ. ទស ភរិយាយោ. វេសាលិយា ទស វត្ថូនិ ទីបេន្តិ. ទស បុគ្គលា អវន្ទិយា. ទស អក្កោសវត្ថូនិ. ទសហាការេហិ បេសុញ្ញំ ឧបសំហរតិ. ទស សេនាសនានិ. ទស វរានិ យាចិំសុ. ទស អធម្មិកានិ បាតិមោក្ខដ្ឋបនានិ. ទស ធម្មិកានិ បាតិមោក្ខដ្ឋបនានិ. ទសានិសំសា យាគុយា. ទស មំសា អកប្បិយា. ទស បរមានិ. ទសវស្សេន ភិក្ខុនា ព្យត្តេន បដិពលេន បព្ពាជេតព្ពំ ឧបសម្បាទេតព្ពំ និស្សយោ ទាតព្ពោ សាមណេរោ ឧបដ្ឋាបេតព្ពោ. ទសវស្សាយ ភិក្ខុនិយា ព្យត្តាយ បដិពលាយ បព្ពាជេតព្ពំ ឧបសម្បាទេតព្ពំ និស្សយោ ទាតព្ពោ សាមណេរី ឧបដ្ឋាបេតព្ពា. ទសវស្សាយ ភិក្ខុនិយា ព្យត្តាយ បដិពលាយ វុដ្ឋាបនសម្មុតិ សាទិតព្ពា. ទសវស្សាយ គិហិគតាយ សិក្ខា ទាតព្ពាតិ.

ទសកំ និដ្ឋិតំ.

តស្សុទ្ទានំ –

អាឃាតំ វិនយំ វត្ថុ, មិច្ឆា សម្មា ច អន្តគា;

មិច្ឆត្តា ចេវ សម្មត្តា, អកុសលា កុសលាបិ ច.

សលាកា អធម្មា ធម្មា, សាមណេរា ច នាសនា;

ភាសាធិករណញ្ចេវ, ញត្តិលហុកមេវ ច.

លហុកា គរុកា ឯតេ, កណ្ហសុក្កា វិជានថ;

ឧព្ពាហិកា ច សិក្ខា ច, អន្តេបុរេ ច វត្ថូនិ.

រតនំ ទសវគ្គោ ច, តថេវ ឧបសម្បទា;

បំសុកូលធារណា ច, ទសាហសុក្កឥត្ថិយោ.

ភរិយា ទស វត្ថូនិ, អវន្ទិយក្កោសេន ច;

បេសុញ្ញញ្ចេវ សេនានិ, វរានិ ច អធម្មិកា.

ធម្មិកា យាគុមំសា ច, បរមា ភិក្ខុ ភិក្ខុនី;

វុដ្ឋាបនា គិហិគតា, ទសកា សុប្បកាសិតាតិ.