១១. ឯកាទសកវារោ

៣៣១. ឯកាទ បុគ្គលា អនុបសម្បន្នា ន ឧបសម្បាទេតព្ពា, ឧបសម្បន្នា នាសេតព្ពា. ឯកាទស បាទុកា អកប្បិយា. ឯកាទស បត្តា អកប្បិយា. ឯកាទស ចីវរានិ អកប្បិយានិ. ឯកាទស យាវតតិយកា. ភិក្ខុនីនំ ឯកាទស អន្តរាយិកា ធម្មា បុច្ឆិតព្ពា. ឯកាទស ចីវរានិ អធិដ្ឋាតព្ពានិ. ឯកាទស ចីវរានិ ន វិកប្បេតព្ពានិ. ឯកាទសេ អរុណុគ្គមនេ និស្សគ្គិយំ ហោតិ. ឯកាទស គណ្ឋិកា កប្បិយា. ឯកាទស វិធា [វីថា (ស្យា.)] កប្បិយា. ឯកាទស បថវី អកប្បិយា. ឯកាទស បថវី កប្បិយា. ឯកាទស និស្សយបដិប្បស្សទ្ធិយោ. ឯកាទស បុគ្គលា អវន្ទិយា. ឯកាទស បរមានិ. ឯកាទស វរានិ យាចិំសុ. ឯកាទស សីមាទោសា. អក្កោសកបរិភាសកេ បុគ្គលេ ឯកាទសាទីនវា បាដិកង្ខា. [អ. និ. ១១.១៥; មិ. ប. ៤.៤.៦] មេត្តាយ ចេតោវិមុត្តិយា អាសេវិតាយ ភាវិតាយ ពហុលីកតាយ យានីកតាយ វត្ថុកតាយ អនុដ្ឋិតាយ បរិចិតាយ សុសមារទ្ធាយ ឯកាទសានិសំសា បាដិកង្ខា. សុខំ សុបតិ, សុខំ បដិពុជ្ឈតិ, ន បាបកំ សុបិនំ បស្សតិ, មនុស្សានំ បិយោ ហោតិ, អមនុស្សានំ បិយោ ហោតិ, ទេវតា រក្ខន្តិ, នាស្ស អគ្គិ វា វិសំ វា សត្ថំ វា កមតិ, តុវដ្ដំ ចិត្តំ សមាធិយតិ, មុខវណ្ណោ វិប្បសីទតិ, អសម្មូឡ្ហោ កាលង្ករោតិ, ឧត្តរិ អប្បដិវិជ្ឈន្តោ ព្រហ្មលោកូបគោ ហោតិ – មេត្តាយ ចេតោវិមុត្តិយា អាសេវិតាយ ភាវិតាយ ពហុលីកតាយ យានីកតាយ វត្ថុកតាយ អនុដ្ឋិតាយ បរិចិតាយ សុសមារទ្ធាយ ឥមេ ឯកាទសានិសំសា បាដិកង្ខាតិ.

ឯកាទសកំ និដ្ឋិតំ.

តស្សុទ្ទានំ –

នាសេតព្ពា បាទុកា ច, បត្តា ច ចីវរានិ ច;

តតិយា បុច្ឆិតព្ពា ច, អធិដ្ឋានវិកប្បនា.

អរុណា គណ្ឋិកា វិធា, អកប្បិយា ច កប្បិយំ;

និស្សយាវន្ទិយា ចេវ, បរមានិ វរានិ ច;

សីមាទោសា ច អក្កោសា, មេត្តាយេកាទសា កតាតិ.

ឯកុត្តរិកនយោ.

តស្សុទ្ទានំ –

ឯកកា ច ទុកា ចេវ, តិកា ច ចតុបញ្ចកា;

ឆសត្តដ្ឋនវកា ច, ទស ឯកាទសានិ ច.

ហិតាយ សព្ពសត្តានំ, ញាតធម្មេន តាទិនា;

ឯកុត្តរិកា វិមលា, មហាវីរេន ទេសិតាតិ.

ឯកុត្តរិកនយោ និដ្ឋិតោ.