៤. អវន្ទនីយបុគ្គលាទិ

៤៧៧. កតិ បុគ្គលា នាភិវាទេតព្ពា, អញ្ជលិសាមិចេន ច;

កតិនំ ទុក្កដំ ហោតិ, កតិ ចីវរធារណា.

ទស បុគ្គលា នាភិវាទេតព្ពា, អញ្ជលិសាមិចេន ច;

ទសន្នំ ទុក្កដំ ហោតិ, ទស ចីវរធារណា.

កតិនំ វស្សំវុដ្ឋានំ, ទាតព្ពំ ឥធ ចីវរំ;

កតិនំ ភន្តេ ទាតព្ពំ, កតិនញ្ចេវ ន ទាតព្ពំ.

បញ្ចន្នំ វស្សំវុដ្ឋានំ, ទាតព្ពំ ឥធ ចីវរំ;

សត្តន្នំ សន្តេ ទាតព្ពំ, សោឡសន្នំ ន ទាតព្ពំ.

កតិសតំ រត្តិសតំ, អាបត្តិយោ ឆាទយិត្វាន;

កតិ រត្តិយោ វសិត្វាន, មុច្ចេយ្យ បារិវាសិកោ.

ទសសតំ រត្តិសតំ, អាបត្តិយោ ឆាទយិត្វាន;

ទស រត្តិយោ វសិត្វាន, មុច្ចេយ្យ បារិវាសិកោ.

កតិ កម្មទោសា វុត្តា, ពុទ្ធេនាទិច្ចពន្ធុនា;

ចម្បាយំ វិនយវត្ថុស្មិំ, សព្ពេវ អធម្មិកា [សព្ពេ អធម្មិកា (សី. ស្យា.)] កតិ.

ទ្វាទស កម្មទោសា វុត្តា, ពុទ្ធេនាទិច្ចពន្ធុនា;

ចម្បាយំ វិនយវត្ថុស្មិំ, សព្ពេវ អធម្មិកា [សព្ពេវាធម្មិកា (សី.), សព្ពេ អធម្មិកា (ស្យា.)] កតា.

កតិ កម្មសម្បត្តិយោ វុត្តា, ពុទ្ធេនាទិច្ចពន្ធុនា;

ចម្បាយំ វិនយវត្ថុស្មិំ, សព្ពេវ ធម្មិកា កតិ.

ចតស្សោ កម្មសម្បត្តិយោ វុត្តា, ពុទ្ធេនាទិច្ចពន្ធុនា;

ចម្បាយំ វិនយវត្ថុស្មិំ, សព្ពេវ ធម្មិកា កតា.

កតិ កម្មានិ វុត្តានិ, ពុទ្ធេនាទិច្ចពន្ធុនា;

ចម្បាយំ វិនយវត្ថុស្មិំ, ធម្មិកា អធម្មិកា កតិ.

ឆ កម្មានិ វុត្តានិ, ពុទ្ធេនាទិច្ចពន្ធុនា;

ចម្បាយំ វិនយវត្ថុស្មិំ, ឯកេត្ថ ធម្មិកា កតា;

បញ្ច អធម្មិកា វុត្តា, ពុទ្ធេនាទិច្ចពន្ធុនា.

កតិ កម្មានិ វុត្តានិ, ពុទ្ធេនាទិច្ចពន្ធុនា;

ចម្បាយំ វិនយវត្ថុស្មិំ, ធម្មិកា អធម្មិកា កតិ.

ចត្តារិ កម្មានិ វុត្តានិ, ពុទ្ធេនាទិច្ចពន្ធុនា;

ចម្បាយំ វិនយវត្ថុស្មិំ, ឯកេត្ថ ធម្មិកា កតា;

តយោ អធម្មិកា វុត្តា, ពុទ្ធេនាទិច្ចពន្ធុនា.

យំ ទេសិតំនន្តជិនេន តាទិនា;

អាបត្តិក្ខន្ធានិ វិវេកទស្សិនា;

កតេត្ថ សម្មន្តិ វិនា សមថេហិ;

បុច្ឆាមិ តំ ព្រូហិ វិភង្គកោវិទ.

យំ ទេសិតំនន្តជិនេន តាទិនា;

អាបត្តិក្ខន្ធានិ វិវេកទស្សិនា;

ឯកេត្ថ សម្មតិ វិនា សមថេហិ;

ឯតំ តេ អក្ខាមិ វិភង្គកោវិទ.

កតិ អាបាយិកា វុត្តា, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ [វិសយានិ (សី. ស្យា. ឯវមុបរិបិ)] សុណោម តេ.

ឆឩនទិយឌ្ឍសតា វុត្តា, ពុទ្ធេនាទិច្ចពន្ធុនា;

អាបាយិកា នេរយិកា, កប្បដ្ឋា សង្ឃភេទកា;

វិនយំ បដិជានន្តស្ស, វិនយានិ សុណោហិ មេ.

កតិ នាបាយិកា វុត្តា, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោម តេ.

អដ្ឋារស នាបាយិកា វុត្តា, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោហិ មេ.

កតិ អដ្ឋកា វុត្តា, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោម តេ.

អដ្ឋារស អដ្ឋកា វុត្តា, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោហិ មេ.