ទុតិយគាថាសង្គណិកំ

១. កាយិកាទិអាបត្តិ

៤៧៤. កតិ អាបត្តិយោ កាយិកា, កតិ វាចសិកា កតា.

ឆាទេន្តស្ស កតិ អាបត្តិយោ, កតិ សំសគ្គបច្ចយា.

ឆាបត្តិយោ កាយិកា, ឆ វាចសិកា កតា;

ឆាទេន្តស្ស តិស្សោ អាបត្តិយោ, បញ្ច សំសគ្គបច្ចយា.

អរុណុគ្គេ កតិ អាបត្តិយោ, កតិ យាវតតិយកា;

កតេត្ថ អដ្ឋ វត្ថុកា, កតិហិ សព្ពសង្គហោ.

អរុណុគ្គេ តិស្សោ អាបត្តិយោ, ទ្វេ យាវតតិយកា;

ឯកេត្ថ អដ្ឋ វត្ថុកា, ឯកេន សព្ពសង្គហោ.

វិនយស្ស កតិ មូលានិ, យានិ ពុទ្ធេន បញ្ញត្តា;

វិនយគរុកា កតិ វុត្តា, ទុដ្ឋុល្លច្ឆាទនា កតិ.

វិនយស្ស ទ្វេ មូលានិ, យានិ ពុទ្ធេន បញ្ញត្តា;

វិនយគរុកា ទ្វេ វុត្តា, ទ្វេ ទុដ្ឋុល្លច្ឆាទនា.

គាមន្តរេ កតិ អាបត្តិយោ, កតិ នទិបារបច្ចយា;

កតិមំសេសុ ថុល្លច្ចយំ, កតិមំសេសុ ទុក្កដំ.

គាមន្តរេ ចតស្សោ អាបត្តិយោ, ចតស្សោ នទិបារបច្ចយា;

ឯកមំសេ ថុល្លច្ចយំ, នវមំសេសុ ទុក្កដំ.

កតិ វាចសិកា រត្តិំ, កតិ វាចសិកា ទិវា;

ទទមានស្ស កតិ អាបត្តិយោ, បដិគ្គណ្ហន្តស្ស កិត្តកា.

ទ្វេ វាចសិកា រត្តិំ, ទ្វេ វាចសិកា ទិវា;

ទទមានស្ស តិស្សោ អាបត្តិយោ, ចត្តារោ ច បដិគ្គហេ.

២. ទេសនាគាមិនិយាទិអាបត្តិ

៤៧៥. កតិ ទេសនាគាមិនិយោ, កតិ សប្បដិកម្មា កតា;

កតេត្ថ អប្បដិកម្មា វុត្តា, ពុទ្ធេនាទិច្ចពន្ធុនា.

បញ្ច ទេសនាគាមិនិយោ, ឆ សប្បដិកម្មា កតា;

ឯកេត្ថ អប្បដិកម្មា វុត្តា, ពុទ្ធេនាទិច្ចពន្ធុនា.

វិនយគរុកា កតិ វុត្តា, កាយវាចសិកានិ ច;

កតិ វិកាលេ ធញ្ញរសោ, កតិ ញត្តិចតុត្ថេន សម្មុតិ.

វិនយគរុកា ទ្វេ វុត្តា, កាយវាចសិកានិ ច;

ឯកោ វិកាលេ ធញ្ញរសោ, ឯកា ញត្តិចតុត្ថេន សម្មុតិ.

បារាជិកា កាយិកា កតិ, កតិ សំវាសកភូមិយោ;

កតិនំ រត្តិច្ឆេទោ, បញ្ញត្តា ទ្វង្គុលា កតិ.

បារាជិកា កាយិកា ទ្វេ, ទ្វេ សំវាសកភូមិយោ;

ទ្វិន្នំ រត្តិច្ឆេទោ, បញ្ញត្តា ទ្វង្គុលា ទុវេ.

កតត្តានំ វធិត្វាន, កតិហិ សង្ឃោ ភិជ្ជតិ;

កតេត្ថ បឋមាបត្តិកា, ញត្តិយា ករណា កតិ.

ទ្វេ អត្តានំ វធិត្វាន, ទ្វីហិ សង្ឃោ ភិជ្ជតិ;

ទ្វេត្ថ បឋមាបត្តិកា, ញត្តិយា ករណា ទុវេ.

បាណាតិបាតេ កតិ អាបត្តិយោ, វាចា បារាជិកា កតិ;

ឱភាសនា កតិ វុត្តា, សញ្ចរិត្តេន វា កតិ.

បាណាតិបាតេ តិស្សោ អាបត្តិយោ;

វាចា បារាជិកា តយោ;

ឱភាសនា តយោ វុត្តា;

សញ្ចរិត្តេន វា តយោ.

កតិ បុគ្គលា ន ឧបសម្បាទេតព្ពា, កតិ កម្មានំ សង្គហា;

នាសិតកា កតិ វុត្តា, កតិនំ ឯកវាចិកា.

តយោ បុគ្គលា ន ឧបសម្បាទេតព្ពា, តយោ កម្មានំ សង្គហា;

នាសិតកា តយោ វុត្តា, តិណ្ណន្នំ ឯកវាចិកា.

អទិន្នាទានេ កតិ អាបត្តិយោ, កតិ មេថុនបច្ចយា;

ឆិន្ទន្តស្ស កតិ អាបត្តិយោ, កតិ ឆឌ្ឌិតបច្ចយា.

អទិន្នាទានេ តិស្សោ អាបត្តិយោ, ចតស្សោ មេថុនបច្ចយា;

ឆិន្ទន្តស្ស តិស្សោ អាបត្តិយោ, បញ្ច ឆឌ្ឌិតបច្ចយា.

ភិក្ខុនោវាទកវគ្គស្មិំ, បាចិត្តិយេន ទុក្កដា;

កតេត្ថ នវកា វុត្តា, កតិនំ ចីវរេន ច.

ភិក្ខុនោវាទកវគ្គស្មិំ, បាចិត្តិយេន ទុក្កដា កតា;

ចតុរេត្ថ នវកា វុត្តា, ទ្វិន្នំ ចីវរេន ច.

ភិក្ខុនីនញ្ច អក្ខាតា, បាដិទេសនិយា កតិ;

ភុញ្ជន្តាមកធញ្ញេន, បាចិត្តិយេន ទុក្កដា កតិ.

ភិក្ខុនីនញ្ច អក្ខាតា, អដ្ឋ បាដិទេសនីយា កតា;

ភុញ្ជន្តាមកធញ្ញេន, បាចិត្តិយេន ទុក្កដា កតា.

គច្ឆន្តស្ស កតិ អាបត្តិយោ, ឋិតស្ស ចាបិ កិត្តកា;

និសិន្នស្ស កតិ អាបត្តិយោ, និបន្នស្សាបិ កិត្តកា.

គច្ឆន្តស្ស ចតស្សោ អាបត្តិយោ, ឋិតស្ស ចាបិ តត្តកា;

និសិន្នស្ស ចតស្សោ អាបត្តិយោ, និបន្នស្សាបិ តត្តកា.

៣. បាចិត្តិយំ

៤៧៦. កតិ បាចិត្តិយានិ, សព្ពានិ នានាវត្ថុកានិ;

អបុព្ពំ អចរិមំ, អាបជ្ជេយ្យ ឯកតោ.

បញ្ច បាចិត្តិយានិ, សព្ពានិ នានាវត្ថុកានិ;

អបុព្ពំ អចរិមំ, អាបជ្ជេយ្យ ឯកតោ.

កតិ បាចិត្តិយានិ, សព្ពានិ នានាវត្ថុកានិ;

អបុព្ពំ អចរិមំ, អាបជ្ជេយ្យ ឯកតោ.

ន បាចិត្តិយានិ, សព្ពានិ នានាវត្ថុកានិ;

អបុព្ពំ អចរិមំ, អាបជ្ជេយ្យ ឯកតោ.

កតិ បាចិត្តិយានិ, សព្ពានិ នានាវត្ថុកានិ;

កតិ វាចាយ ទេសេយ្យ, វុត្តា អាទិច្ចពន្ធុនា.

បញ្ច បាចិត្តិយានិ, សព្ពានិ នានាវត្ថុកានិ;

ឯកវាចាយ ទេសេយ្យ, វុត្តា អាទិច្ចពន្ធុនា.

កតិ បាចិត្តិយានិ, សព្ពានិ នានាវត្ថុកានិ;

កតិ វាចាយ ទេសេយ្យ, វុត្តា អាទិច្ចពន្ធុនា.

នវ បាចិត្តិយានិ, សព្ពានិ នានាវត្ថុកានិ;

ឯកវាចាយ ទេសេយ្យ, វុត្តា អាទិច្ចពន្ធុនា.

កតិ បាចិត្តិយានិ, សព្ពានិ នានាវត្ថុកានិ;

កិញ្ច កិត្តេត្វា ទេសេយ្យ, វុត្តា អាទិច្ចពន្ធុនា.

បញ្ច បាចិត្តិយានិ, សព្ពានិ នានាវត្ថុកានិ;

វត្ថុំ កិត្តេត្វា ទេសេយ្យ, វុត្តា អាទិច្ចពន្ធុនា.

កតិ បាចិត្តិយានិ, សព្ពានិ នានាវត្ថុកានិ;

កិញ្ច កិត្តេត្វា ទេសេយ្យ, វុត្តា អាទិច្ចពន្ធុនា.

នវ បាចិត្តិយានិ, សព្ពានិ នានាវត្ថុកានិ;

វត្ថុំ កិត្តេត្វា ទេសេយ្យ, វុត្តា អាទិច្ចពន្ធុនា.

យាវតតិយកេ កតិ អាបត្តិយោ, កតិ វោហារបច្ចយា;

ខាទន្តស្ស កតិ អាបត្តិយោ, កតិ ភោជនបច្ចយា.

យាវតតិយកេ តិស្សោ អាបត្តិយោ, ឆ វោហារបច្ចយា;

ខាទន្តស្ស តិស្សោ អាបត្តិយោ, បញ្ច ភោជនបច្ចយា.

សព្ពា យាវតតិយកា, កតិ ឋានានិ គច្ឆន្តិ;

កតិនញ្ចេវ អាបត្តិ, កតិនំ អធិករណេន ច.

សព្ពា យាវតតិយកា, បញ្ច ឋានានិ គច្ឆន្តិ;

បញ្ចន្នញ្ចេវ អាបត្តិ, បញ្ចន្នំ អធិករណេន ច.

កតិនំ វិនិច្ឆយោ ហោតិ, កតិនំ វូបសមេន ច;

កតិនញ្ចេវ អនាបត្តិ, កតិហិ ឋានេហិ សោភតិ.

បញ្ចន្នំ វិនិច្ឆយោ ហោតិ, បញ្ចន្នំ វូបសមេន ច;

បញ្ចន្នញ្ចេវ អនាបត្តិ, តីហិ ឋានេហិ សោភតិ.

កតិ កាយិកា រត្តិំ, កតិ កាយិកា ទិវា;

និជ្ឈាយន្តស្ស កតិ អាបត្តិ, កតិ បិណ្ឌបាតបច្ចយា.

ទ្វេ កាយិកា រត្តិំ, ទ្វេ កាយិកា ទិវា;

និជ្ឈាយន្តស្ស ឯកា អាបត្តិ, ឯកា បិណ្ឌបាតបច្ចយា.

កតានិសំសេ សម្បស្សំ, បរេសំ សទ្ធាយ ទេសយេ;

ឧក្ខិត្តកា កតិ វុត្តា, កតិ សម្មាវត្តនា.

អដ្ឋានិសំសេ សម្បស្សំ, បរេសំ សទ្ធាយ ទេសយេ;

ឧក្ខិត្តកា តយោ វុត្តា, តេចត្តាលីស សម្មាវត្តនា.

កតិ ឋានេ មុសាវាទោ, កតិ បរមន្តិ វុច្ចតិ;

កតិ បាដិទេសនីយា, កតិនំ ទេសនាយ ច.

បញ្ច ឋានេ មុសាវាទោ, ចុទ្ទស បរមន្តិ វុច្ចតិ;

ទ្វាទស បាដិទេសនីយា, ចតុន្នំ ទេសនាយ ច.

កតង្គិកោ មុសាវាទោ, កតិ ឧបោសថង្គានិ;

កតិ ទូតេយ្យង្គានិ, កតិ តិត្ថិយវត្តនា.

អដ្ឋង្គិកោ មុសាវាទោ, អដ្ឋ ឧបោសថង្គានិ;

អដ្ឋ ទូតេយ្យង្គានិ, អដ្ឋ តិត្ថិយវត្តនា.

កតិវាចិកា ឧបសម្បទា, កតិនំ បច្ចុដ្ឋាតព្ពំ;

កតិនំ អាសនំ ទាតព្ពំ, ភិក្ខុនោវាទកោ កតិហិ.

អដ្ឋវាចិកា ឧបសម្បទា, អដ្ឋន្នំ បច្ចុដ្ឋាតព្ពំ;

អដ្ឋន្នំ អាសនំ ទាតព្ពំ, ភិក្ខុនោវាទកោ អដ្ឋហិ.

កតិនំ ឆេជ្ជំ ហោតិ, កតិនំ ថុល្លច្ចយំ;

កតិនញ្ចេវ អនាបត្តិ, សព្ពេសំ ឯកវត្ថុកា.

ឯកស្ស ឆេជ្ជំ ហោតិ, ចតុន្នំ ថុល្លច្ចយំ;

ចតុន្នញ្ចេវ អនាបត្តិ, សព្ពេសំ ឯកវត្ថុកា.

កតិ អាឃាតវត្ថូនិ, កតិហិ សង្ឃោ ភិជ្ជតិ;

កតេត្ថ បឋមាបត្តិកា, ញត្តិយា ករណា កតិ.

នវ អាឃាតវត្ថូនិ, នវហិ សង្ឃោ ភិជ្ជតិ;

នវេត្ថ បឋមាបត្តិកា, ញត្តិយា ករណា នវ.

៤. អវន្ទនីយបុគ្គលាទិ

៤៧៧. កតិ បុគ្គលា នាភិវាទេតព្ពា, អញ្ជលិសាមិចេន ច;

កតិនំ ទុក្កដំ ហោតិ, កតិ ចីវរធារណា.

ទស បុគ្គលា នាភិវាទេតព្ពា, អញ្ជលិសាមិចេន ច;

ទសន្នំ ទុក្កដំ ហោតិ, ទស ចីវរធារណា.

កតិនំ វស្សំវុដ្ឋានំ, ទាតព្ពំ ឥធ ចីវរំ;

កតិនំ ភន្តេ ទាតព្ពំ, កតិនញ្ចេវ ន ទាតព្ពំ.

បញ្ចន្នំ វស្សំវុដ្ឋានំ, ទាតព្ពំ ឥធ ចីវរំ;

សត្តន្នំ សន្តេ ទាតព្ពំ, សោឡសន្នំ ន ទាតព្ពំ.

កតិសតំ រត្តិសតំ, អាបត្តិយោ ឆាទយិត្វាន;

កតិ រត្តិយោ វសិត្វាន, មុច្ចេយ្យ បារិវាសិកោ.

ទសសតំ រត្តិសតំ, អាបត្តិយោ ឆាទយិត្វាន;

ទស រត្តិយោ វសិត្វាន, មុច្ចេយ្យ បារិវាសិកោ.

កតិ កម្មទោសា វុត្តា, ពុទ្ធេនាទិច្ចពន្ធុនា;

ចម្បាយំ វិនយវត្ថុស្មិំ, សព្ពេវ អធម្មិកា [សព្ពេ អធម្មិកា (សី. ស្យា.)] កតិ.

ទ្វាទស កម្មទោសា វុត្តា, ពុទ្ធេនាទិច្ចពន្ធុនា;

ចម្បាយំ វិនយវត្ថុស្មិំ, សព្ពេវ អធម្មិកា [សព្ពេវាធម្មិកា (សី.), សព្ពេ អធម្មិកា (ស្យា.)] កតា.

កតិ កម្មសម្បត្តិយោ វុត្តា, ពុទ្ធេនាទិច្ចពន្ធុនា;

ចម្បាយំ វិនយវត្ថុស្មិំ, សព្ពេវ ធម្មិកា កតិ.

ចតស្សោ កម្មសម្បត្តិយោ វុត្តា, ពុទ្ធេនាទិច្ចពន្ធុនា;