៥. សោឡសកម្មាទិ

៤៧៨. កតិ កម្មានិ វុត្តានិ, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោម តេ.

សោឡស កម្មានិ វុត្តានិ, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោហិ មេ.

កតិ កម្មទោសា វុត្តា, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោម តេ.

ទ្វាទស កម្មទោសា វុត្តា, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោហិ មេ.

កតិ កម្មសម្បត្តិយោ វុត្តា, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោម តេ.

ចតស្សោ កម្មសម្បត្តិយោ វុត្តា, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោហិ មេ.

កតិ កម្មានិ វុត្តានិ, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោម តេ.

ឆ កម្មានិ វុត្តានិ, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោហិ មេ.

កតិ កម្មានិ វុត្តានិ, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោម តេ.

ចត្តារិ កម្មានិ វុត្តានិ, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោហិ មេ.

កតិ បារាជិកា វុត្តា, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោម តេ.

អដ្ឋ បារាជិកា វុត្តា, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោហិ មេ.

កតិ សង្ឃាទិសេសា វុត្តា, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោម តេ.

តេវីស សង្ឃាទិសេសា វុត្តា, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោហិ មេ.

កតិ អនិយតា វុត្តា, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោម តេ.

ទ្វេ អនិយតា វុត្តា, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោហិ មេ.

កតិ និស្សគ្គិយា វុត្តា, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោម តេ.

ទ្វេចត្តាលីស និស្សគ្គិយា វុត្តា, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោហិ មេ.

កតិ បាចិត្តិយា វុត្តា, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោម តេ.

អដ្ឋាសីតិសតំ បាចិត្តិយា វុត្តា, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោហិ មេ.

កតិ បាដិទេសនីយា វុត្តា, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោម តេ.

ទ្វាទស បាដិទេសនីយា វុត្តា, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោហិ មេ.

កតិ សេខិយា វុត្តា, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោម តេ.

បញ្ចសត្តតិ សេខិយា វុត្តា, ពុទ្ធេនាទិច្ចពន្ធុនា;

វិនយំ បដិជានន្តស្ស, វិនយានិ សុណោហិ មេ.

យាវ សុបុច្ឆិតំ តយា, យាវ សុវិស្សជ្ជិតំ មយា;

បុច្ឆាវិស្សជ្ជនាយ វា, នត្ថិ កិញ្ចិ អសុត្តកន្តិ.

ទុតិយគាថាសង្គណិកំ និដ្ឋិតំ.