១. កាយិកាទិអាបត្តិ

៤៧៤. កតិ អាបត្តិយោ កាយិកា, កតិ វាចសិកា កតា.

ឆាទេន្តស្ស កតិ អាបត្តិយោ, កតិ សំសគ្គបច្ចយា.

ឆាបត្តិយោ កាយិកា, ឆ វាចសិកា កតា;

ឆាទេន្តស្ស តិស្សោ អាបត្តិយោ, បញ្ច សំសគ្គបច្ចយា.

អរុណុគ្គេ កតិ អាបត្តិយោ, កតិ យាវតតិយកា;

កតេត្ថ អដ្ឋ វត្ថុកា, កតិហិ សព្ពសង្គហោ.

អរុណុគ្គេ តិស្សោ អាបត្តិយោ, ទ្វេ យាវតតិយកា;

ឯកេត្ថ អដ្ឋ វត្ថុកា, ឯកេន សព្ពសង្គហោ.

វិនយស្ស កតិ មូលានិ, យានិ ពុទ្ធេន បញ្ញត្តា;

វិនយគរុកា កតិ វុត្តា, ទុដ្ឋុល្លច្ឆាទនា កតិ.

វិនយស្ស ទ្វេ មូលានិ, យានិ ពុទ្ធេន បញ្ញត្តា;

វិនយគរុកា ទ្វេ វុត្តា, ទ្វេ ទុដ្ឋុល្លច្ឆាទនា.

គាមន្តរេ កតិ អាបត្តិយោ, កតិ នទិបារបច្ចយា;

កតិមំសេសុ ថុល្លច្ចយំ, កតិមំសេសុ ទុក្កដំ.

គាមន្តរេ ចតស្សោ អាបត្តិយោ, ចតស្សោ នទិបារបច្ចយា;

ឯកមំសេ ថុល្លច្ចយំ, នវមំសេសុ ទុក្កដំ.

កតិ វាចសិកា រត្តិំ, កតិ វាចសិកា ទិវា;

ទទមានស្ស កតិ អាបត្តិយោ, បដិគ្គណ្ហន្តស្ស កិត្តកា.

ទ្វេ វាចសិកា រត្តិំ, ទ្វេ វាចសិកា ទិវា;

ទទមានស្ស តិស្សោ អាបត្តិយោ, ចត្តារោ ច បដិគ្គហេ.