២. ទេសនាគាមិនិយាទិអាបត្តិ

៤៧៥. កតិ ទេសនាគាមិនិយោ, កតិ សប្បដិកម្មា កតា;

កតេត្ថ អប្បដិកម្មា វុត្តា, ពុទ្ធេនាទិច្ចពន្ធុនា.

បញ្ច ទេសនាគាមិនិយោ, ឆ សប្បដិកម្មា កតា;

ឯកេត្ថ អប្បដិកម្មា វុត្តា, ពុទ្ធេនាទិច្ចពន្ធុនា.

វិនយគរុកា កតិ វុត្តា, កាយវាចសិកានិ ច;

កតិ វិកាលេ ធញ្ញរសោ, កតិ ញត្តិចតុត្ថេន សម្មុតិ.

វិនយគរុកា ទ្វេ វុត្តា, កាយវាចសិកានិ ច;

ឯកោ វិកាលេ ធញ្ញរសោ, ឯកា ញត្តិចតុត្ថេន សម្មុតិ.

បារាជិកា កាយិកា កតិ, កតិ សំវាសកភូមិយោ;

កតិនំ រត្តិច្ឆេទោ, បញ្ញត្តា ទ្វង្គុលា កតិ.

បារាជិកា កាយិកា ទ្វេ, ទ្វេ សំវាសកភូមិយោ;

ទ្វិន្នំ រត្តិច្ឆេទោ, បញ្ញត្តា ទ្វង្គុលា ទុវេ.

កតត្តានំ វធិត្វាន, កតិហិ សង្ឃោ ភិជ្ជតិ;

កតេត្ថ បឋមាបត្តិកា, ញត្តិយា ករណា កតិ.

ទ្វេ អត្តានំ វធិត្វាន, ទ្វីហិ សង្ឃោ ភិជ្ជតិ;

ទ្វេត្ថ បឋមាបត្តិកា, ញត្តិយា ករណា ទុវេ.

បាណាតិបាតេ កតិ អាបត្តិយោ, វាចា បារាជិកា កតិ;

ឱភាសនា កតិ វុត្តា, សញ្ចរិត្តេន វា កតិ.

បាណាតិបាតេ តិស្សោ អាបត្តិយោ;

វាចា បារាជិកា តយោ;

ឱភាសនា តយោ វុត្តា;

សញ្ចរិត្តេន វា តយោ.

កតិ បុគ្គលា ន ឧបសម្បាទេតព្ពា, កតិ កម្មានំ សង្គហា;

នាសិតកា កតិ វុត្តា, កតិនំ ឯកវាចិកា.

តយោ បុគ្គលា ន ឧបសម្បាទេតព្ពា, តយោ កម្មានំ សង្គហា;

នាសិតកា តយោ វុត្តា, តិណ្ណន្នំ ឯកវាចិកា.

អទិន្នាទានេ កតិ អាបត្តិយោ, កតិ មេថុនបច្ចយា;

ឆិន្ទន្តស្ស កតិ អាបត្តិយោ, កតិ ឆឌ្ឌិតបច្ចយា.

អទិន្នាទានេ តិស្សោ អាបត្តិយោ, ចតស្សោ មេថុនបច្ចយា;

ឆិន្ទន្តស្ស តិស្សោ អាបត្តិយោ, បញ្ច ឆឌ្ឌិតបច្ចយា.

ភិក្ខុនោវាទកវគ្គស្មិំ, បាចិត្តិយេន ទុក្កដា;

កតេត្ថ នវកា វុត្តា, កតិនំ ចីវរេន ច.

ភិក្ខុនោវាទកវគ្គស្មិំ, បាចិត្តិយេន ទុក្កដា កតា;

ចតុរេត្ថ នវកា វុត្តា, ទ្វិន្នំ ចីវរេន ច.

ភិក្ខុនីនញ្ច អក្ខាតា, បាដិទេសនិយា កតិ;

ភុញ្ជន្តាមកធញ្ញេន, បាចិត្តិយេន ទុក្កដា កតិ.

ភិក្ខុនីនញ្ច អក្ខាតា, អដ្ឋ បាដិទេសនីយា កតា;

ភុញ្ជន្តាមកធញ្ញេន, បាចិត្តិយេន ទុក្កដា កតា.

គច្ឆន្តស្ស កតិ អាបត្តិយោ, ឋិតស្ស ចាបិ កិត្តកា;

និសិន្នស្ស កតិ អាបត្តិយោ, និបន្នស្សាបិ កិត្តកា.

គច្ឆន្តស្ស ចតស្សោ អាបត្តិយោ, ឋិតស្ស ចាបិ តត្តកា;

និសិន្នស្ស ចតស្សោ អាបត្តិយោ, និបន្នស្សាបិ តត្តកា.