៤. វស្សិកសាដិកសិក្ខាបទំ

៦២៦. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន ភគវតា ភិក្ខូនំ វស្សិកសាដិកា អនុញ្ញាតា ហោតិ. ឆព្ពគ្គិយា ភិក្ខូ – ‘‘ភគវតា វស្សិកសាដិកា អនុញ្ញាតា’’តិ, បដិកច្ចេវ [បដិគច្ចេវ (សី.)] វស្សិកសាដិកចីវរំ បរិយេសន្តិ, បដិកច្ចេវ កត្វា និវាសេន្តិ, ជិណ្ណាយ វស្សិកសាដិកាយ នគ្គា កាយំ ឱវស្សាបេន្តិ. យេ តេ ភិក្ខូ អប្បិច្ឆា… តេ ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម ឆព្ពគ្គិយា ភិក្ខូ បដិកច្ចេវ វស្សិកសាដិកចីវរំ បរិយេសិស្សន្តិ, បដិកច្ចេវ កត្វា និវាសេស្សន្តិ, ជិណ្ណាយ វស្សិកសាដិកាយ នគ្គា កាយំ ឱវស្សាបេស្សន្តី’’តិ! អថ ខោ តេ ភិក្ខូ ឆព្ពគ្គិយេ ភិក្ខូ អនេកបរិយាយេន វិគរហិត្វា ភគវតោ ឯតមត្ថំ អារោចេសុំ…បេ… ‘‘សច្ចំ កិរ តុម្ហេ, ភិក្ខវេ, បដិកច្ចេវ វស្សិកសាដិកចីវរំ បរិយេសថ? បដិកច្ចេវ កត្វា និវាសេថ? ជិណ្ណាយ វស្សិកសាដិកាយ នគ្គា កាយំ ឱវស្សាបេថា’’តិ? ‘‘សច្ចំ, ភគវា’’តិ. វិគរហិ ពុទ្ធោ ភគវា…បេ… កថញ្ហិ នាម តុម្ហេ មោឃបុរិសា, បដិកច្ចេវ វស្សិកសាដិកចីវរំ បរិយេសិស្សថ, បដិកច្ចេវ កត្វា និវាសេស្សថ, ជិណ្ណាយ វស្សិកសាដិកាយ នគ្គា កាយំ ឱវស្សាបេស្សថ! នេតំ, មោឃបុរិសា, អប្បសន្នានំ វា បសាទាយ…បេ… ឯវញ្ច បន, ភិក្ខវេ, ឥមំ សិក្ខាបទំ ឧទ្ទិសេយ្យាថ –

៦២៧. ‘‘មាសោ សេសោ គិម្ហាន’ន្តិ ភិក្ខុនា វស្សិកសាដិកចីវរំ បរិយេសិតព្ពំ; ‘អទ្ធមាសោ សេសោ គិម្ហាន’ន្តិ កត្វា និវាសេតព្ពំ. ‘ឱរេន ចេ មាសោ សេសោ គិម្ហាន’ន្តិ វស្សិកសាដិកចីវរំ បរិយេសេយ្យ, ‘ឱរេនទ្ធមាសោ សេសោ គិម្ហាន’ន្តិ កត្វា និវាសេយ្យ, និស្សគ្គិយំ បាចិត្តិយ’’ន្តិ.

៦២៨. ‘មាសោ សេសោ គិម្ហាន’ន្តិ ភិក្ខុនា វស្សិកសាដិកចីវរំ បរិយេសិតព្ពន្តិ. យេ មនុស្សា បុព្ពេបិ វស្សិកសាដិកចីវរំ ទេន្តិ តេ ឧបសង្កមិត្វា ឯវមស្សុ វចនីយា – ‘‘កាលោ វស្សិកសាដិកាយ, សមយោ វស្សិកសាដិកាយ, អញ្ញេបិ មនុស្សា វស្សិកសាដិកចីវរំ ទេន្តី’’តិ. ន វត្តព្ពា – ‘‘ទេថ មេ វស្សិកសាដិកចីវរំ, អាហរថ មេ វស្សិកសាដិកចីវរំ, បរិវត្តេថ មេ វស្សិកសាដិកចីវរំ, ចេតាបេថ មេ វស្សិកសាដិកចីវរ’’ន្តិ.

‘អទ្ធមាសោ សេសោ គិម្ហាន’ន្តិ កត្វា និវាសេតព្ពន្តិ. អទ្ធមាសេ សេសេ គិម្ហានេ កត្វា និវាសេតព្ពំ.

‘ឱរេន ចេ មាសោ សេសោ គិម្ហាន’ន្តិ អតិរេកមាសេ សេស គិម្ហានេ វស្សិកសាដិកចីវរំ បរិយេសតិ, និស្សគ្គិយំ បាចិត្តិយំ.

‘ឱរេនទ្ធមាសោ សេសោ គិម្ហាន’ន្តិ អតិរេកទ្ធមាសេ សេសេ គិម្ហានេ កត្វា និវាសេតិ, និស្សគ្គិយំ ហោតិ. និស្សជ្ជិតព្ពំ សង្ឃស្ស វា គណស្ស វា បុគ្គលស្ស វា. ឯវញ្ច បន, ភិក្ខវេ, និស្សជ្ជិតព្ពំ…បេ… ឥទំ មេ, ភន្តេ, វស្សិកសាដិកចីវរំ អតិរេកមាសេ សេសេ គិម្ហានេ បរិយិដ្ឋំ អតិរេកទ្ធមាសេ សេសេ គិម្ហានេ កត្វា បរិទហិតំ និស្សគ្គិយំ. ឥមាហំ សង្ឃស្ស និស្សជ្ជាមីតិ.…បេ… ទទេយ្យាតិ…បេ… ទទេយ្យុន្តិ…បេ… អាយស្មតោ ទម្មីតិ.

៦២៩. អតិរេកមាសេ សេសេ គិម្ហានេ អតិរេកសញ្ញី វស្សិកសាដិកចីវរំ បរិយេសតិ, និស្សគ្គិយំ បាចិត្តិយំ. អតិរេកមាសេ សេសេ គិម្ហានេ វេមតិកោ វស្សិកសាដិកចីវរំ បរិយេសតិ, និស្សគ្គិយំ បាចិត្តិយំ. អតិរេកមាសេ សេសេ គិម្ហានេ ឩនកសញ្ញី វស្សិកសាដិកចីវរំ បរិយេសតិ, និស្សគ្គិយំ បាចិត្តិយំ.

អតិរេកទ្ធមាសេ សេសេ គិម្ហានេ អតិរេកសញ្ញី កត្វា និវាសេតិ, និស្សគ្គិយំ បាចិត្តិយំ. អតិរេកទ្ធមាសេ សេសេ គិម្ហានេ វេមតិកោ កត្វា និវាសេតិ, និស្សគ្គិយំ បាចិត្តិយំ. អតិរេកទ្ធមាសេ សេសេ គិម្ហានេ ឩនកសញ្ញី កត្វា និវាសេតិ, និស្សគ្គិយំ បាចិត្តិយំ.

សតិយា វស្សិកសាដិកាយ នគ្គោ កាយំ ឱវស្សាបេតិ, អាបត្តិ ទុក្កដស្ស. ឩនកមាសេ សេសេ គិម្ហានេ អតិរេកសញ្ញី, អាបត្តិ ទុក្កដស្ស. ឩនកមាសេ សេសេ គិម្ហានេ វេមតិកោ, អាបត្តិ ទុក្កដស្ស. ឩនកមាសេ សេសេ គិម្ហានេ ឩនកសញ្ញី, អនាបត្តិ.

ឩនកទ្ធមាសេ សេសេ គិម្ហានេ អតិរេកសញ្ញី, អាបត្តិ ទុក្កដស្ស. ឩនកទ្ធមាសេ សេសេ គិម្ហានេ វេមតិកោ, អាបត្តិ ទុក្កដស្ស. ឩនកទ្ធមាសេ សេសេ គិម្ហានេ ឩនកសញ្ញី, អនាបត្តិ.

៦៣០. អនាបត្តិ ‘មាសោ សេសោ គិម្ហាន’ន្តិ វស្សិកសាដិកចីវរំ បរិយេសតិ, ‘អទ្ធមាសោ សេសោ គិម្ហាន’ន្តិ កត្វា និវាសេតិ, ‘ឩនកមាសោ សេសោ គិម្ហាន’ន្តិ វស្សិកសាដិកចីវរំ បរិយេសតិ, ‘ឩនកទ្ធមាសោ សេសោ គិម្ហាន’ន្តិ កត្វា និវាសេតិ, បរិយិដ្ឋាយ វស្សិកសាដិកាយ វស្សំ ឧក្កឌ្ឍិយ្យតិ, និវត្ថាយ វស្សិកសាដិកាយ វស្សំ ឧក្កឌ្ឍិយ្យតិ, ធោវិត្វា និក្ខិបិតព្ពំ; សមយេ និវាសេតព្ពំ, អច្ឆិន្នចីវរស្ស, នដ្ឋចីវរស្ស, អាបទាសុ, ឧម្មត្តកស្ស, អាទិកម្មិកស្សាតិ.

វស្សិកសាដិកសិក្ខាបទំ និដ្ឋិតំ ចតុត្ថំ.