៤. ចតុត្ថសិក្ខាបទំ

៧៤៨. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន ថុល្លនន្ទា ភិក្ខុនី គិលានា ហោតិ. អថ ខោ អញ្ញតរោ ឧបាសកោ យេន ថុល្លនន្ទា ភិក្ខុនី តេនុបសង្កមិ; ឧបសង្កមិត្វា ថុល្លនន្ទំ ភិក្ខុនិំ ឯតទវោច – ‘‘កិំ តេ, អយ្យេ, អផាសុ, កិំ អាហរីយតូ’’តិ? ‘‘សប្បិនា មេ, អាវុសោ, អត្ថោ’’តិ. អថ ខោ សោ ឧបាសកោ អញ្ញតរស្ស អាបណិកស្ស ឃរា កហាបណស្ស សប្បិំ អាហរិត្វា ថុល្លនន្ទាយ ភិក្ខុនិយា អទាសិ. ថុល្លនន្ទា ភិក្ខុនី ឯវមាហ – ‘‘ន មេ, អាវុសោ, សប្បិនា អត្ថោ; តេលេន មេ អត្ថោ’’តិ. អថ ខោ សោ ឧបាសកោ យេន សោ អាបណិកោ តេនុបសង្កមិ; ឧបសង្កមិត្វា តំ អាបណិកំ ឯតទវោច – ‘‘ន កិរាយ្យោ អយ្យាយ សប្បិនា អត្ថោ, តេលេន អត្ថោ. ហន្ទ តេ សប្បិំ, តេលំ មេ ទេហី’’តិ. ‘‘សចេ មយំ អយ្យោ វិក្កីតំ ភណ្ឌំ បុន អាទិយិស្សាម [អាហរិស្សាម (ក.)], កទា អម្ហាកំ ភណ្ឌំ វិក្កាយិស្សតិ [វិក្កីយិស្សតិ (?)]; សប្បិស្ស កយេន សប្បិ ហដំ, តេលស្ស កយំ អាហរ, តេលំ ហរិស្សសី’’តិ. អថ ខោ សោ ឧបាសកោ ឧជ្ឈាយតិ ខិយ្យតិ វិបាចេតិ – ‘‘កថញ្ហិ នាម អយ្យា ថុល្លនន្ទា អញ្ញំ វិញ្ញាបេត្វា អញ្ញំ វិញ្ញាបេស្សតី’’តិ! អស្សោសុំ ខោ ភិក្ខុនិយោ តស្ស ឧបាសកស្ស ឧជ្ឈាយន្តស្ស ខិយ្យន្តស្ស វិបាចេន្តស្ស. យា តា ភិក្ខុនិយោ អប្បិច្ឆា…បេ… តា ឧជ្ឈាយន្តិ ខិយ្យន្តិ វិបាចេន្តិ…បេ… អថ ខោ តា ភិក្ខុនិយោ ភិក្ខូនំ ឯតមត្ថំ អារោចេសុំ. ភិក្ខូ ភគវតោ ឯតមត្ថំ អារោចេសុំ…បេ… សច្ចំ កិរ, ភិក្ខវេ, ថុល្លនន្ទា ភិក្ខុនី អញ្ញំ វិញ្ញាបេត្វា អញ្ញំ វិញ្ញាបេតីតិ [វិញ្ញាបេសីតិ (ក.)]? ‘‘សច្ចំ, ភគវា’’តិ. វិគរហិ ពុទ្ធោ ភគវា …បេ… កថញ្ហិ នាម, ភិក្ខវេ, ថុល្លនន្ទា ភិក្ខុនី អញ្ញំ វិញ្ញាបេត្វា អញ្ញំ វិញ្ញាបេស្សតិ! នេតំ, ភិក្ខវេ, អប្បសន្នានំ វា បសាទាយ…បេ… ឯវញ្ច បន, ភិក្ខវេ, ភិក្ខុនិយោ ឥមំ សិក្ខាបទំ ឧទ្ទិសន្តុ –

៧៤៩. ‘‘យា បន ភិក្ខុនី អញ្ញំ វិញ្ញាបេត្វា អញ្ញំ វិញ្ញាបេយ្យ, និស្សគ្គិយំ បាចិត្តិយ’’ន្តិ.

៧៥០. យា បនាតិ យា យាទិសា…បេ… ភិក្ខុនីតិ…បេ… អយំ ឥមស្មិំ អត្ថេ អធិប្បេតា ភិក្ខុនីតិ.

អញ្ញំ វិញ្ញាបេត្វាតិ យំ កិញ្ចិ វិញ្ញាបេត្វា.

អញ្ញំ វិញ្ញាបេយ្យាតិ តំ ឋបេត្វា អញ្ញំ វិញ្ញាបេតិ, បយោគេ ទុក្កដំ. បដិលាភេន និស្សគ្គិយំ ហោតិ. និស្សជ្ជិតព្ពំ សង្ឃស្ស វា គណស្ស វា ឯកភិក្ខុនិយា វា. ឯវញ្ច បន, ភិក្ខវេ, និស្សជ្ជិតព្ពំ…បេ… ‘‘ឥទំ មេ អយ្យេ អញ្ញំ វិញ្ញាបេត្វា អញ្ញំ វិញ្ញាបិតំ និស្សគ្គិយំ, ឥមាហំ សង្ឃស្ស និស្សជ្ជាមីតិ…បេ… ទទេយ្យាតិ…បេ… ទទេយ្យុន្តិ…បេ… អយ្យាយ ទម្មី’’តិ.

៧៥១. អញ្ញេ អញ្ញសញ្ញា អញ្ញំ វិញ្ញាបេតិ, និស្សគ្គិយំ បាចិត្តិយំ. អញ្ញេ វេមតិកា អញ្ញំ វិញ្ញាបេតិ, និស្សគ្គិយំ បាចិត្តិយំ. អញ្ញេ អនញ្ញសញ្ញា អញ្ញំ វិញ្ញាបេតិ, និស្សគ្គិយំ បាចិត្តិយំ.

អនញ្ញេ អញ្ញសញ្ញា អនញ្ញំ វិញ្ញាបេតិ, អាបត្តិ ទុក្កដស្ស. អនញ្ញេ វេមតិកា អនញ្ញំ វិញ្ញាបេតិ, អាបត្តិ ទុក្កដស្ស. អនញ្ញេ អនញ្ញសញ្ញា, អនាបត្តិ.

៧៥២. អនាបត្តិ តញ្ញេវ [តញ្ចេវ (ស្យា.)] វិញ្ញាបេតិ, អញ្ញញ្ច វិញ្ញាបេតិ, អានិសំសំ ទស្សេត្វា វិញ្ញាបេតិ, ឧម្មត្តិកាយ, អាទិកម្មិកាយាតិ.

ចតុត្ថសិក្ខាបទំ និដ្ឋិតំ.