៥. បញ្ចមសិក្ខាបទំ

៧៥៣. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន ថុល្លនន្ទា ភិក្ខុនី គិលានា ហោតិ. អថ ខោ អញ្ញតរោ ឧបាសកោ យេន ថុល្លនន្ទា ភិក្ខុនី តេនុបសង្កមិ; ឧបសង្កមិត្វា ថុល្លនន្ទំ ភិក្ខុនិំ ឯតទវោច – ‘‘កច្ចិ, អយ្យេ, ខមនីយំ កច្ចិ យាបនីយ’’ន្តិ? ‘‘ន មេ, អាវុសោ, ខមនីយំ, ន យាបនីយ’’ន្តិ. ‘‘អមុកស្ស, អយ្យេ, អាបណិកស្ស ឃរេ កហាបណំ និក្ខិបិស្សាមិ, តតោ យំ ឥច្ឆេយ្យាសិ តំ អាហរាបេយ្យាសី’’តិ. ថុល្លនន្ទា ភិក្ខុនី អញ្ញតរំ សិក្ខមានំ អាណាបេសិ – ‘‘គច្ឆ, សិក្ខមានេ, អមុកស្ស អាបណិកស្ស ឃរា កហាបណស្ស តេលំ អាហរា’’តិ. អថ ខោ សា សិក្ខមានា តស្ស អាបណិកស្ស ឃរា កហាបណស្ស តេលំ អាហរិត្វា ថុល្លនន្ទាយ ភិក្ខុនិយា អទាសិ. ថុល្លនន្ទា ភិក្ខុនី ឯវមាហ – ‘‘ន មេ, សិក្ខមានេ, តេលេន អត្ថោ, សប្បិនា មេ អត្ថោ’’តិ. អថ ខោ សា សិក្ខមានា យេន សោ អាបណិកោ តេនុបសង្កមិ; ឧបសង្កមិត្វា តំ អាបណិកំ ឯតទវោច – ‘‘ន កិរ, អាវុសោ, អយ្យាយ តេលេន អត្ថោ, សប្បិនា អត្ថោ, ហន្ទ តេ តេលំ, សប្បិំ មេ ទេហី’’តិ. ‘‘សចេ មយំ, អយ្យេ, វិក្កីតំ ភណ្ឌំ បុន អាទិយិស្សាម, កទា អម្ហាកំ ភណ្ឌំ វិក្កាយិស្សតិ! តេលស្ស កយេន តេលំ ហដំ, សប្បិស្ស កយំ អាហរ, សប្បិំ ហរិស្សសី’’តិ. អថ ខោ សា សិក្ខមានា រោទន្តី អដ្ឋាសិ. ភិក្ខុនិយោ តំ សិក្ខមានំ ឯតទវោចុំ – ‘‘កិស្ស ត្វំ, សិក្ខមានេ, រោទសី’’តិ? អថ ខោ សា សិក្ខមានា ភិក្ខុនីនំ ឯតមត្ថំ អារោចេសិ. យា តា ភិក្ខុនិយោ អប្បិច្ឆា…បេ… តា ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម អយ្យា ថុល្លនន្ទា អញ្ញំ ចេតាបេត្វា អញ្ញំ ចេតាបេស្សតី’’តិ…បេ… សច្ចំ កិរ, ភិក្ខវេ, ថុល្លនន្ទា ភិក្ខុនី អញ្ញំ ចេតាបេត្វា អញ្ញំ ចេតាបេតីតិ [ចេតាបេសីតិ (ក.)]? ‘‘សច្ចំ, ភគវា’’តិ. វិគរហិ ពុទ្ធោ ភគវា…បេ… កថញ្ហិ នាម, ភិក្ខវេ, ថុល្លនន្ទា ភិក្ខុនី អញ្ញំ ចេតាបេត្វា អញ្ញំ ចេតាបេស្សតិ! នេតំ, ភិក្ខវេ, អប្បសន្នានំ វា បសាទាយ…បេ… ឯវញ្ច បន, ភិក្ខវេ, ភិក្ខុនិយោ ឥមំ សិក្ខាបទំ ឧទ្ទិសន្តុ –

៧៥៤. ‘‘យា បន ភិក្ខុនី អញ្ញំ ចេតាបេត្វា អញ្ញំ ចេតាបេយ្យ, និស្សគ្គិយំ បាចិត្តិយ’’ន្តិ.

៧៥៥. យា បនាតិ យា យាទិសា…បេ… ភិក្ខុនីតិ…បេ… អយំ ឥមស្មិំ អត្ថេ អធិប្បេតា ភិក្ខុនីតិ.

អញ្ញំ ចេតាបេត្វាតិ យំ កិញ្ចិ ចេតាបេត្វា.

អញ្ញំ ចេតាបេយ្យាតិ តំ ឋបេត្វា អញ្ញំ ចេតាបេតិ, បយោគេ ទុក្កដំ. បដិលាភេន និស្សគ្គិយំ ហោតិ. និស្សជ្ជិតព្ពំ សង្ឃស្ស វា គណស្ស វា ឯកភិក្ខុនិយា វា. ឯវញ្ច បន, ភិក្ខវេ, និស្សជ្ជិតព្ពំ…បេ… ‘‘ឥទំ មេ, អយ្យេ, អញ្ញំ ចេតាបេត្វា អញ្ញំ ចេតាបិតំ និស្សគ្គិយំ, ឥមាហំ សង្ឃស្ស និស្សជ្ជាមី’’តិ…បេ… ទទេយ្យាតិ…បេ… ទទេយ្យុន្តិ…បេ… អយ្យាយ ទម្មីតិ.

៧៥៦. អញ្ញេ អញ្ញសញ្ញា អញ្ញំ ចេតាបេតិ, និស្សគ្គិយំ បាចិត្តិយំ. អញ្ញេ វេមតិកា អញ្ញំ ចេតាបេតិ, និស្សគ្គិយំ បាចិត្តិយំ. អញ្ញេ អនញ្ញសញ្ញា អញ្ញំ ចេតាបេតិ, និស្សគ្គិយំ បាចិត្តិយំ.

អនញ្ញេ អញ្ញសញ្ញា អនញ្ញំ ចេតាបេតិ, អាបត្តិ ទុក្កដស្ស. អនញ្ញេ វេមតិកា អនញ្ញំ ចេតាបេតិ, អាបត្តិ ទុក្កដស្ស. អនញ្ញេ អនញ្ញសញ្ញា អនាបត្តិ.

៧៥៧. អនាបត្តិ តញ្ញេវ [តញ្ចេវ (ស្យា.)] ចេតាបេតិ, អញ្ញញ្ច ចេតាបេតិ, អានិសំសំ ទស្សេត្វា ចេតាបេតិ, ឧម្មត្តិកាយ, អាទិកម្មិកាយាតិ.

បញ្ចមសិក្ខាបទំ និដ្ឋិតំ.