១២. ទ្វាទសមសិក្ខាបទំ

៧៨៨. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន ថុល្លនន្ទា ភិក្ខុនី ពហុស្សុតា ហោតិ ភាណិកា វិសារទា បដ្ដា ធម្មិំ កថំ កាតុំ. អថ ខោ រាជា បសេនទិ កោសលោ ឧណ្ហកាលេ មហគ្ឃំ ខោមំ បារុបិត្វា យេន ថុល្លនន្ទា ភិក្ខុនី តេនុបសង្កមិ; ឧបសង្កមិត្វា ថុល្លនន្ទំ ភិក្ខុនិំ អភិវាទេត្វា ឯកមន្តំ និសីទិ. ឯកមន្តំ និសិន្នំ ខោ រាជានំ បសេនទិំ កោសលំ ថុល្លនន្ទា ភិក្ខុនី ធម្មិយា កថាយ សន្ទស្សេសិ សមាទបេសិ សមុត្តេជេសិ សម្បហំសេសិ. អថ ខោ រាជា បសេនទិ កោសលោ ថុល្លនន្ទាយ ភិក្ខុនិយា ធម្មិយា កថាយ សន្ទស្សិតោ សមាទបិតោ សមុត្តេជិតោ សម្បហំសិតោ ថុល្លនន្ទំ ភិក្ខុនិំ ឯតទវោច – ‘‘វទេយ្យាសិ, អយ្យេ, យេន អត្ថោ’’តិ. ‘‘សចេ មេ ត្វំ, មហារាជ, ទាតុកាមោសិ, ឥមំ ខោមំ ទេហី’’តិ. អថ ខោ រាជា បសេនទិ កោសលោ ថុល្លនន្ទាយ ភិក្ខុនិយា ខោមំ ទត្វា ឧដ្ឋាយាសនា ថុល្លនន្ទំ ភិក្ខុនិំ អភិវាទេត្វា បទក្ខិណំ កត្វា បក្កាមិ. មនុស្សា ឧជ្ឈាយន្តិ ខិយ្យន្តិ វិបាចេន្តិ – ‘‘មហិច្ឆា ឥមា ភិក្ខុនិយោ អសន្តុដ្ឋា. កថញ្ហិ នាម រាជានំ ខោមំ វិញ្ញាបេស្សន្តី’’តិ! អស្សោសុំ ខោ ភិក្ខុនិយោ តេសំ មនុស្សានំ ឧជ្ឈាយន្តានំ ខិយ្យន្តានំ វិបាចេន្តានំ. យា តា ភិក្ខុនិយោ អប្បិច្ឆា…បេ… តា ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម អយ្យា ថុល្លនន្ទា រាជានំ ខោមំ វិញ្ញាបេស្សតី’’តិ…បេ… សច្ចំ កិរ, ភិក្ខវេ, ថុល្លនន្ទា ភិក្ខុនី រាជានំ ខោមំ វិញ្ញាបេតីតិ [វិញ្ញាបេសីតិ (ក.)]? ‘‘សច្ចំ, ភគវាតិ’’. វិគរហិ ពុទ្ធោ ភគវា…បេ… កថញ្ហិ នាម, ភិក្ខវេ, ថុល្លនន្ទា ភិក្ខុនី រាជានំ ខោមំ វិញ្ញាបេស្សតិ! នេតំ, ភិក្ខវេ, អប្បសន្នានំ វា បសាទាយ…បេ… ឯវញ្ច បន, ភិក្ខវេ, ភិក្ខុនិយោ ឥមំ សិក្ខាបទំ ឧទ្ទិសន្តុ –

៧៨៩. ‘‘លហុបាវុរណំ បន ភិក្ខុនិយា ចេតាបេន្តិយា អឌ្ឍតេយ្យកំសបរមំ ចេតាបេតព្ពំ. តតោ ចេ ឧត្តរិ ចេតាបេយ្យ, និស្សគ្គិយំ បាចិត្តិយ’’ន្តិ.

៧៩០. លហុបាវុរណំ នាម យំ កិញ្ចិ ឧណ្ហកាលេ បាវុរណំ.

ចេតាបេន្តិយាតិ វិញ្ញាបេន្តិយា.

អឌ្ឍតេយ្យកំសបរមំ ចេតាបេតព្ពន្តិ ទសកហាបណគ្ឃនកំ ចេតាបេតព្ពំ.

តតោ ចេ ឧត្តរិ ចេតាបេយ្យាតិ តតុត្តរិ វិញ្ញាបេតិ, បយោគេ ទុក្កដំ. បដិលាភេន និស្សគ្គិយំ ហោតិ. និស្សជ្ជិតព្ពំ សង្ឃស្ស វា គណស្ស វា ឯកភិក្ខុនិយា វា. ឯវញ្ច បន, ភិក្ខវេ, និស្សជ្ជិតព្ពំ…បេ… ឥទំ មេ, អយ្យេ, លហុបាវុរណំ អតិរេកអឌ្ឍតេយ្យកំសបរមំ ចេតាបិតំ និស្សគ្គិយំ, ឥមាហំ សង្ឃស្ស និស្សជ្ជាមីតិ…បេ… ទទេយ្យាតិ…បេ… ទទេយ្យុន្តិ…បេ… អយ្យាយ ទម្មីតិ.

៧៩១. អតិរេកអឌ្ឍតេយ្យកំសេ អតិរេកសញ្ញា ចេតាបេតិ, និស្សគ្គិយំ បាចិត្តិយំ. អតិរេកអឌ្ឍតេយ្យកំសេ វេមតិកា ចេតាបេតិ, និស្សគ្គិយំ បាចិត្តិយំ. អតិរេកអឌ្ឍតេយ្យកំសេ ឩនកសញ្ញា ចេតាបេតិ, និស្សគ្គិយំ បាចិត្តិយំ.

ឩនកអឌ្ឍតេយ្យកំសេ អតិរេកសញ្ញា, អាបត្តិ ទុក្កដស្ស. ឩនកអឌ្ឍតេយ្យកំសេ វេមតិកា, អាបត្តិ ទុក្កដស្ស. ឩនកអឌ្ឍតេយ្យកំសេ ឩនកសញ្ញា, អនាបត្តិ.

៧៩២. អនាបត្តិ អឌ្ឍតេយ្យកំសបរមំ ចេតាបេតិ, ឩនកអឌ្ឍតេយ្យកំសបរមំ ចេតាបេតិ, ញាតកានំ, បវារិតានំ, អញ្ញស្សត្ថាយ, អត្តនោ ធនេន, មហគ្ឃំ ចេតាបេតុកាមស្ស អប្បគ្ឃំ ចេតាបេតិ, ឧម្មត្តិកាយ, អាទិកម្មិកាយាតិ.

ទ្វាទសមសិក្ខាបទំ និដ្ឋិតំ.

ឧទ្ទិដ្ឋា ខោ, អយ្យាយោ, តិំស និស្សគ្គិយា បាចិត្តិយា ធម្មា. តត្ថាយ្យាយោ បុច្ឆាមិ – ‘‘កច្ចិត្ថ បរិសុទ្ធា’’? ទុតិយម្បិ បុច្ឆាមិ – ‘‘កច្ចិត្ថ បរិសុទ្ធា’’? តតិយម្បិ បុច្ឆាមិ – ‘‘កច្ចិត្ថ បរិសុទ្ធា’’? បរិសុទ្ធេត្ថាយ្យាយោ, តស្មា តុណ្ហី, ឯវមេតំ ធារយាមីតិ.

ភិក្ខុនិវិភង្គេ និស្សគ្គិយកណ្ឌំ និដ្ឋិតំ.