១១. ឯកាទសមសិក្ខាបទំ

៧៨៣. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន ថុល្លនន្ទា ភិក្ខុនី ពហុស្សុតា ហោតិ ភាណិកា វិសារទា បដ្ដា ធម្មិំ កថំ កាតុំ. អថ ខោ រាជា បសេនទិ កោសលោ សីតកាលេ មហគ្ឃំ កម្ពលំ បារុបិត្វា យេន ថុល្លនន្ទា ភិក្ខុនី តេនុបសង្កមិ; ឧបសង្កមិត្វា ថុល្លនន្ទំ ភិក្ខុនិំ អភិវាទេត្វា ឯកមន្តំ និសីទិ. ឯកមន្តំ និសិន្នំ ខោ រាជានំ បសេនទិំ កោសលំ ថុល្លនន្ទា ភិក្ខុនី ធម្មិយា កថាយ សន្ទស្សេសិ សមាទបេសិ សមុត្តេជេសិ សម្បហំសេសិ. អថ ខោ រាជា បសេនទិ កោសលោ ថុល្លនន្ទាយ ភិក្ខុនិយា ធម្មិយា កថាយ សន្ទស្សិតោ សមាទបិតោ សមុត្តេជិតោ សម្បហំសិតោ ថុល្លនន្ទំ ភិក្ខុនិំ ឯតទវោច – ‘‘វទេយ្យាសិ, អយ្យេ, យេន អត្ថោ’’តិ? ‘‘សចេ មេ ត្វំ, មហារាជ, ទាតុកាមោសិ, ឥមំ កម្ពលំ ទេហី’’តិ. អថ ខោ រាជា បសេនទិ កោសលោ ថុល្លនន្ទាយ ភិក្ខុនិយា កម្ពលំ ទត្វា ឧដ្ឋាយាសនា ថុល្លនន្ទំ ភិក្ខុនិំ អភិវាទេត្វា បទក្ខិណំ កត្វា បក្កាមិ. មនុស្សា ឧជ្ឈាយន្តិ ខិយ្យន្តិ វិបាចេន្តិ – ‘‘មហិច្ឆា ឥមា ភិក្ខុនិយោ អសន្តុដ្ឋា. កថញ្ហិ នាម រាជានំ កម្ពលំ វិញ្ញាបេស្សន្តី’’តិ! អស្សោសុំ ខោ ភិក្ខុនិយោ តេសំ មនុស្សានំ ឧជ្ឈាយន្តានំ ខិយ្យន្តានំ វិបាចេន្តានំ. យា តា ភិក្ខុនិយោ អប្បិច្ឆា…បេ… តា ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម អយ្យា ថុល្លនន្ទា រាជានំ កម្ពលំ វិញ្ញាបេស្សតី’’តិ…បេ… សច្ចំ កិរ, ភិក្ខវេ, ថុល្លនន្ទា ភិក្ខុនី រាជានំ កម្ពលំ វិញ្ញាបេតីតិ [វិញ្ញាបេសីតិ (ក.)]? ‘‘សច្ចំ, ភគវា’’តិ. វិគរហិ ពុទ្ធោ ភគវា…បេ… កថញ្ហិ នាម, ភិក្ខវេ, ថុល្លនន្ទា ភិក្ខុនី រាជានំ កម្ពលំ វិញ្ញាបេស្សតិ! នេតំ, ភិក្ខវេ, អប្បសន្នានំ វា បសាទាយ…បេ… ឯវញ្ច បន, ភិក្ខវេ, ភិក្ខុនិយោ ឥមំ សិក្ខាបទំ ឧទ្ទិសន្តុ –

៧៨៤. ‘‘គរុបាវុរណំ [បាបុរណំ (សី. ស្យា.)] បន ភិក្ខុនិយា ចេតាបេន្តិយា ចតុក្កំសបរមំ ចេតាបេតព្ពំ. តតោ ចេ ឧត្តរិ ចេតាបេយ្យ, និស្សគ្គិយំ បាចិត្តិយ’’ន្តិ.

៧៨៥. គរុបាវុរណំ នាម យំ កិញ្ចិ សីតកាលេ បាវុរណំ.

ចេតាបេន្តិយាតិ វិញ្ញាបេន្តិយា.

ចតុក្កំសបរមំ ចេតាបេតព្ពន្តិ សោឡសកហាបណគ្ឃនកំ ចេតាបេតព្ពំ.

តតោ ចេ ឧត្តរិ ចេតាបេយ្យាតិ តតុត្តរិ វិញ្ញាបេតិ, បយោគេ ទុក្កដំ. បដិលាភេន និស្សគ្គិយំ ហោតិ. និស្សជ្ជិតព្ពំ សង្ឃស្ស វា គណស្ស វា ឯកភិក្ខុនិយា វា. ឯវញ្ច បន, ភិក្ខវេ, និស្សជ្ជិតព្ពំ…បេ… ‘‘ឥទំ មេ, អយ្យេ, គរុបាវុរណំ អតិរេកចតុក្កំសបរមំ ចេតាបិតំ និស្សគ្គិយំ, ឥមាហំ សង្ឃស្ស និស្សជ្ជាមី’’តិ…បេ… ទទេយ្យាតិ…បេ… ទទេយ្យុន្តិ…បេ… អយ្យាយ ទម្មីតិ.

៧៨៦. អតិរេកចតុក្កំសេ អតិរេកសញ្ញា ចេតាបេតិ, និស្សគ្គិយំ បាចិត្តិយំ. អតិរេកចតុក្កំសេ វេមតិកា ចេតាបេតិ, និស្សគ្គិយំ បាចិត្តិយំ. អតិរេកចតុក្កំសេ ឩនកសញ្ញា ចេតាបេតិ, និស្សគ្គិយំ បាចិត្តិយំ.

ឩនកចតុក្កំសេ អតិរេកសញ្ញា, អាបត្តិ ទុក្កដស្ស. ឩនកចតុក្កំសេ វេមតិកា, អាបត្តិ ទុក្កដស្ស. ឩនកចតុក្កំសេ ឩនកសញ្ញា, អនាបត្តិ.

៧៨៧. អនាបត្តិ ចតុក្កំសបរមំ ចេតាបេតិ, ឩនកចតុក្កំសបរមំ ចេតាបេតិ, ញាតកានំ, បវារិតានំ, អញ្ញស្សត្ថាយ, អត្តនោ ធនេន, មហគ្ឃំ ចេតាបេតុកាមស្ស អប្បគ្ឃំ ចេតាបេតិ, ឧម្មត្តិកាយ, អាទិកម្មិកាយាតិ.

ឯកាទសមសិក្ខាបទំ និដ្ឋិតំ.