៩. ទុដ្ឋុល្លារោចនសិក្ខាបទំ

៧៨. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន អាយស្មា ឧបនន្ទោ សក្យបុត្តោ ឆព្ពគ្គិយេហិ ភិក្ខូហិ សទ្ធិំ ភណ្ឌនកតោ ហោតិ. សោ សញ្ចេតនិកំ សុក្កវិស្សដ្ឋិំ អាបត្តិំ អាបជ្ជិត្វា សង្ឃំ តស្សា អាបត្តិយា បរិវាសំ យាចិ. តស្ស សង្ឃោ តស្សា អាបត្តិយា បរិវាសំ អទាសិ. តេន ខោ បន សមយេន សាវត្ថិយំ អញ្ញតរស្ស បូគស្ស សង្ឃភត្តំ ហោតិ. សោ បរិវសន្តោ ភត្តគ្គេ អាសនបរិយន្តេ និសីទិ. ឆព្ពគ្គិយា ភិក្ខូ តេ ឧបាសកេ ឯតទវោចុំ – ‘‘ឯសោ, អាវុសោ, អាយស្មា ឧបនន្ទោ សក្យបុត្តោ តុម្ហាកំ សម្ភាវិតោ កុលូបកោ; យេនេវ ហត្ថេន សទ្ធាទេយ្យំ ភុញ្ជតិ តេនេវ ហត្ថេន ឧបក្កមិត្វា អសុចិំ មោចេសិ. សោ សញ្ចេតនិកំ សុក្កវិស្សដ្ឋិំ អាបត្តិំ អាបជ្ជិត្វា សង្ឃំ តស្សា អាបត្តិយា បរិវាសំ យាចិ. តស្ស សង្ឃោ តស្សា អាបត្តិយា បរិវាសំ អទាសិ. សោ បរិវសន្តោ អាសនបរិយន្តេ និសិន្នោ’’តិ. យេ តេ ភិក្ខូ អប្បិច្ឆា…បេ… តេ ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម ឆព្ពគ្គិយា ភិក្ខូ ភិក្ខុស្ស ទុដ្ឋុល្លំ អាបត្តិំ អនុបសម្បន្នស្ស អារោចេស្សន្តី’’តិ…បេ… ‘‘សច្ចំ កិរ តុម្ហេ, ភិក្ខវេ, ភិក្ខុស្ស ទុដ្ឋុល្លំ អាបត្តិំ អនុបសម្បន្នស្ស អារោចេថា’’តិ? ‘‘សច្ចំ, ភគវា’’តិ. វិគរហិ ពុទ្ធោ ភគវា…បេ… កថញ្ហិ នាម តុម្ហេ, មោឃបុរិសា, ភិក្ខុស្ស ទុដ្ឋុល្លំ អាបត្តិំ អនុបសម្បន្នស្ស អារោចេស្សថ! នេតំ, មោឃបុរិសា, អប្បសន្នានំ វា បសាទាយ…បេ… ឯវញ្ច បន, ភិក្ខវេ, ឥមំ សិក្ខាបទំ ឧទ្ទិសេយ្យាថ –

៧៩. ‘‘យោ បន ភិក្ខុ ភិក្ខុស្ស ទុដ្ឋុល្លំ អាបត្តិំ អនុបសម្បន្នស្ស អារោចេយ្យ, អញ្ញត្រ ភិក្ខុសម្មុតិយា [ភិក្ខុសម្មតិយា (ស្យា.)], បាចិត្តិយ’’ន្តិ.

៨០. យោ បនាតិ យោ យាទិសោ…បេ… ភិក្ខូតិ…បេ… អយំ ឥមស្មិំ អត្ថេ អធិប្បេតោ ភិក្ខូតិ.

ភិក្ខុស្សាតិ អញ្ញស្ស ភិក្ខុស្ស.

ទុដ្ឋុល្លា នាម អាបត្តិ – ចត្តារិ ច បារាជិកានិ, តេរស ច សង្ឃាទិសេសា.

អនុបសម្បន្នោ នាម ភិក្ខុញ្ច ភិក្ខុនិញ្ច ឋបេត្វា អវសេសោ អនុបសម្បន្នោ នាម.

អារោចេយ្យាតិ អារោចេយ្យ ឥត្ថិយា វា បុរិសស្ស វា គហដ្ឋស្ស វា បព្ពជិតស្ស វា.

អញ្ញត្រ ភិក្ខុសម្មុតិយាតិ ឋបេត្វា ភិក្ខុសម្មុតិំ.

អត្ថិ ភិក្ខុសម្មុតិ អាបត្តិបរិយន្តា, ន កុលបរិយន្តា. អត្ថិ ភិក្ខុសម្មុតិ កុលបរិយន្តា, ន អាបត្តិបរិយន្តា, អត្ថិ ភិក្ខុសម្មុតិ អាបត្តិបរិយន្តា ច កុលបរិយន្តា ច, អត្ថិ ភិក្ខុសម្មុតិ នេវ អាបត្តិបរិយន្តា ន កុលបរិយន្តា.

អាបត្តិបរិយន្តា នាម អាបត្តិយោ បរិគ្គហិតាយោ ហោន្តិ – ‘‘ឯត្តកាហិ អាបត្តីហិ អារោចេតព្ពោ’’តិ.

កុលបរិយន្តា នាម កុលានិ បរិគ្គហិតានិ ហោន្តិ – ‘‘ឯត្តកេសុ កុលេសុ អារោចេតព្ពោ’’តិ. អាបត្តិបរិយន្តា ច កុលបរិយន្តា ច នាម អាបត្តិយោ ច បរិគ្គហិតាយោ ហោន្តិ, កុលានិ ច បរិគ្គហិតានិ ហោន្តិ – ‘‘ឯត្តកាហិ អាបត្តីហិ ឯត្តកេសុ កុលេសុ អារោចេតព្ពោ’’តិ. នេវ អាបត្តិបរិយន្តា ន កុលបរិយន្តា នាម អាបត្តិយោ ច អបរិគ្គហិតាយោ ហោន្តិ, កុលានិ ច អបរិគ្គហិតានិ ហោន្តិ – ‘‘ឯត្តកាហិ អាបត្តីហិ ឯត្តកេសុ កុលេសុ អារោចេតព្ពោ’’តិ.

៨១. អាបត្តិបរិយន្តេ យា អាបត្តិយោ បរិគ្គហិតាយោ ហោន្តិ, តា អាបត្តិយោ ឋបេត្វា អញ្ញាហិ អាបត្តីហិ អារោចេតិ, អាបត្តិ បាចិត្តិយស្ស.

កុលបរិយន្តេ យានិ កុលានិ បរិគ្គហិតានិ ហោន្តិ, តានិ កុលានិ ឋបេត្វា អញ្ញេសុ កុលេសុ អារោចេតិ, អាបត្តិ បាចិត្តិយស្ស.

អាបត្តិបរិយន្តេ ច កុលបរិយន្តេ ច យា អាបត្តិយោ បរិគ្គហិតាយោ ហោន្តិ, តា អាបត្តិយោ ឋបេត្វា យានិ កុលានិ បរិគ្គហិតានិ ហោន្តិ, តានិ កុលានិ ឋបេត្វា អញ្ញាហិ អាបត្តីហិ អញ្ញេសុ កុលេសុ អារោចេតិ, អាបត្តិ បាចិត្តិយស្ស.

នេវ អាបត្តិបរិយន្តេ ន កុលបរិយន្តេ, អនាបត្តិ.

៨២. ទុដ្ឋុល្លាយ អាបត្តិយា ទុដ្ឋុល្លាបត្តិសញ្ញី អនុបសម្បន្នស្ស អារោចេតិ, អញ្ញត្រ ភិក្ខុសម្មុតិយា, អាបត្តិ បាចិត្តិយស្ស.

ទុដ្ឋុល្លាយ អាបត្តិយា វេមតិកោ អនុបសម្បន្នស្ស អារោចេតិ, អញ្ញត្រ ភិក្ខុសម្មុតិយា, អាបត្តិ បាចិត្តិយស្ស.

ទុដ្ឋុល្លាយ អាបត្តិយា អទុដ្ឋុល្លាបត្តិសញ្ញី អនុបសម្បន្នស្ស អារោចេតិ, អញ្ញត្រ ភិក្ខុសម្មុតិយា, អាបត្តិ បាចិត្តិយស្ស.

អទុដ្ឋុល្លំ អាបត្តិំ អារោចេតិ, អាបត្តិ ទុក្កដស្ស.

អនុបសម្បន្នស្ស ទុដ្ឋុល្លំ វា អទុដ្ឋុល្លំ វា អជ្ឈាចារំ អារោចេតិ, អាបត្តិ ទុក្កដស្ស.

អទុដ្ឋុល្លាយ អាបត្តិយា ទុដ្ឋុល្លាបត្តិសញ្ញី, អាបត្តិ ទុក្កដស្ស.

អទុដ្ឋុល្លាយ អាបត្តិយា វេមតិកោ, អាបត្តិ ទុក្កដស្ស.

អទុដ្ឋុល្លាយ អាបត្តិយា អទុដ្ឋុល្លាបត្តិសញ្ញី, អាបត្តិ ទុក្កដស្ស.

៨៣. អនាបត្តិ វត្ថុំ អារោចេតិ នោ អាបត្តិំ, អាបត្តិំ អារោចេតិ នោ វត្ថុំ, ភិក្ខុសម្មុតិយា, ឧម្មត្តកស្ស, អាទិកម្មិកស្សាតិ.

ទុដ្ឋុល្លារោចនសិក្ខាបទំ និដ្ឋិតំ នវមំ.