៥. សហសេយ្យសិក្ខាបទំ

៤៩. តេន សមយេន ពុទ្ធោ ភគវា អាឡវិយំ វិហរតិ អគ្គាឡវេ ចេតិយេ. តេន ខោ បន សមយេន ឧបាសកា អារាមំ អាគច្ឆន្តិ ធម្មស្សវនាយ. ធម្មេ ភាសិតេ ថេរា ភិក្ខូ យថាវិហារំ គច្ឆន្តិ. នវកា ភិក្ខូ តត្ថេវ ឧបដ្ឋានសាលាយំ ឧបាសកេហិ សទ្ធិំ មុដ្ឋស្សតី, អសម្បជានា, នគ្គា, វិកូជមានា, កាកច្ឆមានា សេយ្យំ កប្បេន្តិ. ឧបាសកា ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម ភទន្តា មុដ្ឋស្សតី អសម្បជានា នគ្គា វិកូជមានា កាកច្ឆមានា សេយ្យំ កប្បេស្សន្តី’’តិ! អស្សោសុំ ខោ ភិក្ខូ តេសំ ឧបាសកានំ ឧជ្ឈាយន្តានំ ខិយ្យន្តានំ វិបាចេន្តានំ. យេ តេ ភិក្ខូ អប្បិច្ឆា…បេ… តេ ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម ភិក្ខូ អនុបសម្បន្នេន សហសេយ្យំ កប្បេស្សន្តី’’តិ! អថ ខោ តេ ភិក្ខូ តេ នវកេ ភិក្ខូ អនេកបរិយាយេន វិគរហិត្វា ភគវតោ ឯតមត្ថំ អារោចេសុំ…បេ… ‘‘សច្ចំ កិរ, ភិក្ខវេ, ភិក្ខូ អនុបសម្បន្នេន សហសេយ្យំ កប្បេន្តី’’តិ? ‘‘សច្ចំ, ភគវា’’តិ. វិគរហិ ពុទ្ធោ ភគវា…បេ… កថញ្ហិ នាម តេ, ភិក្ខវេ, មោឃបុរិសា អនុបសម្បន្នេន សហសេយ្យំ កប្បេស្សន្តិ! នេតំ, ភិក្ខវេ, អប្បសន្នានំ វា បសាទាយ…បេ… ឯវញ្ច បន, ភិក្ខវេ, ឥមំ សិក្ខាបទំ ឧទ្ទិសេយ្យាថ –

‘‘យោ បន ភិក្ខុ អនុបសម្បន្នេន សហសេយ្យំ កប្បេយ្យ បាចិត្តិយ’’ន្តិ.

ឯវញ្ចិទំ ភគវតា ភិក្ខូនំ សិក្ខាបទំ បញ្ញត្តំ ហោតិ.

៥០. អថ ខោ ភគវា អាឡវិយំ យថាភិរន្តំ វិហរិត្វា យេន កោសម្ពី តេន ចារិកំ បក្កាមិ. អនុបុព្ពេន ចារិកំ ចរមានោ យេន កោសម្ពី តទវសរិ. តត្រ សុទំ ភគវា កោសម្ពិយំ វិហរតិ ពទរិការាមេ. ភិក្ខូ អាយស្មន្តំ រាហុលំ ឯតទវោចុំ – ‘‘ភគវតា, អាវុសោ រាហុល, សិក្ខាបទំ បញ្ញត្តំ – ‘ន អនុបសម្បន្នេន សហសេយ្យា កប្បេតព្ពា’តិ. សេយ្យំ, អាវុសោ រាហុល, ជានាហី’’តិ. អថ ខោ អាយស្មា រាហុលោ សេយ្យំ អលភមានោ វច្ចកុដិយា សេយ្យំ កប្បេសិ. អថ ខោ ភគវា រត្តិយា បច្ចូសសមយំ បច្ចុដ្ឋាយ យេន វច្ចកុដិ តេនុបសង្កមិ; ឧបសង្កមិត្វា ឧក្កាសិ. អាយស្មាបិ រាហុលោ ឧក្កាសិ. ‘‘កោ ឯត្ថា’’តិ? ‘‘អហំ, ភគវា, រាហុលោ’’តិ. ‘‘កិស្ស ត្វំ, រាហុល, ឥធ និសិន្នោសី’’តិ? អថ ខោ អាយស្មា រាហុលោ ភគវតោ ឯតមត្ថំ អារោចេសិ. អថ ខោ ភគវា ឯតស្មិំ និទានេ ឯតស្មិំ បករណេ ធម្មិំ កថំ កត្វា ភិក្ខូ អាមន្តេសិ – ‘‘អនុជានាមិ, ភិក្ខវេ, អនុបសម្បន្នេន ទិរត្តតិរត្តំ សហសេយ្យំ កប្បេតុំ. ឯវញ្ច បន, ភិក្ខវេ, ឥមំ សិក្ខាបទំ ឧទ្ទិសេយ្យាថ –

៥១. ‘‘យោ បន ភិក្ខុ អនុបសម្បន្នេន ឧត្តរិទិរត្តតិរត្តំ សហសេយ្យំ កប្បេយ្យ, បាចិត្តិយ’’ន្តិ.

៥២. យោ បនាតិ យោ យាទិសោ…បេ… ភិក្ខូតិ…បេ… អយំ ឥមស្មិំ អត្ថេ អធិប្បេតោ ភិក្ខូតិ.

អនុបសម្បន្នោ នាម ភិក្ខុំ ឋបេត្វា អវសេសោ អនុបសម្បន្នោ នាម.

ឧត្តរិទិរត្តតិរត្តន្តិ អតិរេកទិរត្តតិរត្តំ.

សហាតិ ឯកតោ.

សេយ្យា នាម សព្ពច្ឆន្នា, សព្ពបរិច្ឆន្នា, យេភុយ្យេនច្ឆន្នា, យេភុយ្យេន បរិច្ឆន្នា.

សេយ្យំ កប្បេយ្យាតិ ចតុត្ថេ ទិវសេ អត្ថង្គតេ សូរិយេ, អនុបសម្បន្នេ និបន្នេ, ភិក្ខុ និបជ្ជតិ, អាបត្តិ បាចិត្តិយស្ស. ភិក្ខុ និបន្នេ, អនុបសម្បន្នោ និបជ្ជតិ, អាបត្តិ បាចិត្តិយស្ស. ឧភោ វា និបជ្ជន្តិ, អាបត្តិ បាចិត្តិយស្ស. ឧដ្ឋហិត្វា បុនប្បុនំ និបជ្ជន្តិ, អាបត្តិ បាចិត្តិយស្ស.

៥៣. អនុបសម្បន្នេ អនុបសម្បន្នសញ្ញី ឧត្តរិទិរត្តតិរត្តំ សហសេយ្យំ កប្បេតិ, អាបត្តិ បាចិត្តិយស្ស. អនុបសម្បន្នេ វេមតិកោ ឧត្តរិទិរត្តតិរត្តំ សហសេយ្យំ កប្បេតិ, អាបត្តិ បាចិត្តិយស្ស. អនុបសម្បន្នេ ឧបសម្បន្នសញ្ញី ឧត្តរិទិរត្តតិរត្តំ សហសេយ្យំ កប្បេតិ, អាបត្តិ បាចិត្តិយស្ស.

ឧបឌ្ឍច្ឆន្នេ ឧបឌ្ឍបរិច្ឆន្នេ, អាបត្តិ ទុក្កដស្ស. ឧបសម្បន្នេ អនុបសម្បន្នសញ្ញី, អាបត្តិ ទុក្កដស្ស. ឧបសម្បន្នេ វេមតិកោ, អាបត្តិ ទុក្កដស្ស. ឧបសម្បន្នេ ឧបសម្បន្នសញ្ញី, អនាបត្តិ.

៥៤. អនាបត្តិ ទ្វេតិស្សោ រត្តិយោ វសតិ, ឩនកទ្វេតិស្សោ រត្តិយោ វសតិ, ទ្វេ រត្តិយោ វសិត្វា តតិយាយ រត្តិយា បុរារុណា និក្ខមិត្វា បុន វសតិ, សព្ពច្ឆន្នេ, សព្ពអបរិច្ឆន្នេ, សព្ពបរិច្ឆន្នេ សព្ពអច្ឆន្នេ [វសតិ, សព្ពអច្ឆន្នេ សព្ពអបរិច្ឆន្នេ, (សី.)], យេភុយ្យេន អច្ឆន្នេ, យេភុយ្យេន អបរិច្ឆន្នេ, អនុបសម្បន្នេ និបន្នេ ភិក្ខុ និសីទតិ, ភិក្ខុ និបន្នេ អនុបសម្បន្នោ និសីទតិ, ឧភោ វា និសីទន្តិ, ឧម្មត្តកស្ស, អាទិកម្មិកស្សាតិ.

សហសេយ្យសិក្ខាបទំ និដ្ឋិតំ បញ្ចមំ.