២២៣. ឧបនន្ទសក្យបុត្តវត្ថុ

៣៦៤. តេន ខោ បន សមយេន អាយស្មា ឧបនន្ទោ សក្យបុត្តោ សាវត្ថិយំ វស្សំវុដ្ឋោ អញ្ញតរំ គាមកាវាសំ អគមាសិ. តត្ថ ច ភិក្ខូ ចីវរំ ភាជេតុកាមា សន្និបតិំសុ. តេ ឯវមាហំសុ – ‘‘ឥមានិ ខោ, អាវុសោ, សង្ឃិកានិ ចីវរានិ ភាជិយិស្សន្តិ, សាទិយិស្សសិ ភាគ’’ន្តិ? ‘‘អាមាវុសោ, សាទិយិស្សាមី’’តិ. តតោ ចីវរភាគំ គហេត្វា អញ្ញំ អាវាសំ អគមាសិ. តត្ថបិ ភិក្ខូ ចីវរំ ភាជេតុកាមា សន្និបតិំសុ. តេបិ ឯវមាហំសុ – ‘‘ឥមានិ ខោ, អាវុសោ, សង្ឃិកានិ ចីវរានិ ភាជិយិស្សន្តិ, សាទិយិស្សសិ ភាគ’’ន្តិ? ‘‘អាមាវុសោ, សាទិយិស្សាមី’’តិ. តតោបិ ចីវរភាគំ គហេត្វា អញ្ញំ អាវាសំ អគមាសិ. តត្ថបិ ភិក្ខូ ចីវរំ ភាជេតុកាមា សន្និបតិំសុ. តេបិ ឯវមាហំសុ – ‘‘ឥមានិ ខោ, អាវុសោ, សង្ឃិកានិ ចីវរានិ ភាជិយិស្សន្តិ, សាទិយិស្សសិ ភាគ’’ន្តិ? ‘‘អាមាវុសោ, សាទិយិស្សាមី’’តិ. តតោបិ ចីវរភាគំ គហេត្វា មហន្តំ ចីវរភណ្ឌិកំ អាទាយ បុនទេវ សាវត្ថិំ បច្ចាគញ្ឆិ. ភិក្ខូ ឯវមាហំសុ – ‘‘មហាបុញ្ញោសិ ត្វំ, អាវុសោ ឧបនន្ទ, ពហុំ តេ ចីវរំ ឧប្បន្ន’’ន្តិ. ‘‘កុតោ មេ, អាវុសោ, បុញ្ញំ? ឥធាហំ, អាវុសោ, សាវត្ថិយំ វស្សំវុដ្ឋោ អញ្ញតរំ គាមកាវាសំ អគមាសិំ. តត្ថ ភិក្ខូ ចីវរំ ភាជេតុកាមា សន្និបតិំសុ. តេ មំ ឯវមាហំសុ – ‘ឥមានិ ខោ, អាវុសោ, សង្ឃិកានិ ចីវរានិ ភាជិយិស្សន្តិ, សាទិយិស្សសិ ភាគ’ន្តិ? ‘អាមាវុសោ, សាទិយិស្សាមី’តិ. តតោ ចីវរភាគំ គហេត្វា អញ្ញំ អាវាសំ អគមាសិំ. តត្ថបិ ភិក្ខូ ចីវរំ ភាជេតុកាមា សន្និបតិំសុ. តេបិ មំ ឯវមាហំសុ – ‘ឥមានិ ខោ, អាវុសោ, សង្ឃិកានិ ចីវរានិ ភាជិយិស្សន្តិ, សាទិយិស្សសិ ភាគ’’’ន្តិ? ‘អាមាវុសោ, សាទិយិស្សាមី’តិ. តតោបិ ចីវរភាគំ គហេត្វា អញ្ញំ អាវាសំ អគមាសិំ. តត្ថបិ ភិក្ខូ ចីវរំ ភាជេតុកាមា សន្និបតិំសុ. តេបិ មំ ឯវមាហំសុ – ‘ឥមានិ ខោ, អាវុសោ, សង្ឃិកានិ ចីវរានិ ភាជិយិស្សន្តិ, សាទិយិស្សសិ ភាគ’ន្តិ? ‘អាមាវុសោ, សាទិយិស្សាមី’តិ. តតោបិ ចីវរភាគំ អគ្គហេសិំ. ឯវំ មេ ពហុំ ចីវរំ ឧប្បន្នន្តិ. ‘‘កិំ បន ត្វំ, អាវុសោ ឧបនន្ទ, អញ្ញត្រ វស្សំវុដ្ឋោ អញ្ញត្រ ចីវរភាគំ សាទិយី’’តិ? ‘‘ឯវមាវុសោ’’តិ. យេ តេ ភិក្ខូ អប្បិច្ឆា…បេ… តេ ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម អាយស្មា ឧបនន្ទោ សក្យបុត្តោ អញ្ញត្រ វស្សំវុដ្ឋោ អញ្ញត្រ ចីវរភាគំ សាទិយិស្សតី’’តិ. ភគវតោ ឯតមត្ថំ អារោចេសុំ…បេ… ‘‘សច្ចំ កិរ ត្វំ, ឧបនន្ទ, អញ្ញត្រ វស្សំវុដ្ឋោ អញ្ញត្រ ចីវរភាគំ សាទិយី’’តិ? ‘‘សច្ចំ ភគវា’’តិ. វិគរហិ ពុទ្ធោ ភគវា…បេ… កថញ្ហិ នាម ត្វំ, មោឃបុរិស, អញ្ញត្រ វស្សំវុដ្ឋោ អញ្ញត្រ ចីវរភាគំ សាទិយិស្សសិ. នេតំ, មោឃបុរិស, អប្បសន្នានំ វា បសាទាយ…បេ… វិគរហិត្វា…បេ… ធម្មិំ កថំ កត្វា ភិក្ខូ អាមន្តេសិ – ‘‘ន, ភិក្ខវេ, អញ្ញត្រ វស្សំវុដ្ឋេន អញ្ញត្រ ចីវរភាគោ សាទិតព្ពោ. យោ សាទិយេយ្យ, អាបត្តិ ទុក្កដស្សា’’តិ.

តេន ខោ បន សមយេន អាយស្មា ឧបនន្ទោ សក្យបុត្តោ ឯកោ ទ្វីសុ អាវាសេសុ វស្សំ វសិ – ‘‘ឯវំ មេ ពហុំ ចីវរំ ឧប្បជ្ជិស្សតី’’តិ. អថ ខោ តេសំ ភិក្ខូនំ ឯតទហោសិ – ‘‘កថំ នុ ខោ អាយស្មតោ ឧបនន្ទស្ស សក្យបុត្តស្ស ចីវរបដិវីសោ ទាតព្ពោ’’តិ? ភគវតោ ឯតមត្ថំ អារោចេសុំ. ទេថ, ភិក្ខវេ, មោឃបុរិសស្ស ឯកាធិប្បាយំ. ឥធ បន, ភិក្ខវេ, ភិក្ខុ ឯកោ ទ្វីសុ អាវាសេសុ វស្សំ វសតិ – ‘‘ឯវំ មេ ពហុំ ចីវរំ ឧប្បជ្ជិស្សតី’’តិ. សចេ អមុត្រ ឧបឌ្ឍំ អមុត្រ ឧបឌ្ឍំ វសតិ, អមុត្រ ឧបឌ្ឍោ អមុត្រ ឧបឌ្ឍោ ចីវរបដិវីសោ ទាតព្ពោ. យត្ថ វា បន ពហុតរំ វសតិ, តតោ ចីវរបដិវីសោ ទាតព្ពោតិ.

ឧបនន្ទសក្យបុត្តវត្ថុ និដ្ឋិតំ.