២២២. សង្ឃិកចីវរុប្បាទកថា

៣៦៣. តេន ខោ បន សមយេន អញ្ញតរោ ភិក្ខុ ឯកោ វស្សំ វសិ. តត្ថ មនុស្សា សង្ឃស្ស ទេមាតិ ចីវរានិ អទំសុ. អថ ខោ តស្ស ភិក្ខុនោ ឯតទហោសិ – ‘‘ភគវតា បញ្ញត្តំ ‘ចតុវគ្គោ បច្ឆិមោ សង្ឃោ’តិ. អហញ្ចម្ហិ ឯកកោ. ឥមេ ច មនុស្សា សង្ឃស្ស ទេមាតិ ចីវរានិ អទំសុ. យំនូនាហំ ឥមានិ សង្ឃិកានិ ចីវរានិ សាវត្ថិំ ហរេយ្យ’’ន្តិ. អថ ខោ សោ ភិក្ខុ តានិ ចីវរានិ អាទាយ សាវត្ថិំ គន្ត្វា ភគវតោ ឯតមត្ថំ អារោចេសិ. ‘‘តុយ្ហេវ, ភិក្ខុ, តានិ ចីវរានិ យាវ កថិនស្ស ឧព្ភារាយា’’តិ. ឥធ បន, ភិក្ខវេ, ភិក្ខុ ឯកោ វស្សំ វសតិ. តត្ថ មនុស្សា សង្ឃស្ស ទេមាតិ ចីវរានិ ទេន្តិ. អនុជានាមិ, ភិក្ខវេ, តស្សេវ តានិ ចីវរានិ យាវ កថិនស្ស ឧព្ភារាយាតិ.

តេន ខោ បន សមយេន អញ្ញតរោ ភិក្ខុ ឧតុកាលំ ឯកោ វសិ. តត្ថ មនុស្សា សង្ឃស្ស ទេមាតិ ចីវរានិ អទំសុ. អថ ខោ តស្ស ភិក្ខុនោ ឯតទហោសិ – ‘‘ភគវតា បញ្ញត្តំ ‘ចតុវគ្គោ បច្ឆិមោ សង្ឃោ’តិ. អហញ្ចម្ហិ ឯកកោ. ឥមេ ច មនុស្សា សង្ឃស្ស ទេមាតិ ចីវរានិ អទំសុ. យំនូនាហំ ឥមានិ សង្ឃិកានិ ចីវរានិ សាវត្ថិំ ហរេយ្យ’’ន្តិ. អថ ខោ សោ ភិក្ខុ តានិ ចីវរានិ អាទាយ សាវត្ថិំ គន្ត្វា ភិក្ខូនំ ឯតមត្ថំ អារោចេសិ. ភិក្ខូ ភគវតោ ឯតមត្ថំ អារោចេសុំ. អនុជានាមិ, ភិក្ខវេ, សម្មុខីភូតេន សង្ឃេន ភាជេតុំ. ឥធ បន, ភិក្ខវេ, ភិក្ខុ ឧតុកាលំ ឯកោ វសតិ. តត្ថ មនុស្សា សង្ឃស្ស ទេមាតិ ចីវរានិ ទេន្តិ. អនុជានាមិ, ភិក្ខវេ, តេន ភិក្ខុនា តានិ ចីវរានិ អធិដ្ឋាតុំ – ‘‘មយ្ហិមានិ ចីវរានី’’តិ. តស្ស ចេ, ភិក្ខវេ, ភិក្ខុនោ តំ ចីវរំ អនធិដ្ឋិតេ អញ្ញោ ភិក្ខុ អាគច្ឆតិ, សមកោ ទាតព្ពោ ភាគោ. តេហិ ចេ, ភិក្ខវេ, ភិក្ខូហិ តំ ចីវរំ ភាជិយមានេ, អបាតិតេ កុសេ, អញ្ញោ ភិក្ខុ អាគច្ឆតិ, សមកោ ទាតព្ពោ ភាគោ. តេហិ ចេ, ភិក្ខវេ, ភិក្ខូហិ តំ ចីវរំ ភាជិយមានេ, បាតិតេ កុសេ, អញ្ញោ ភិក្ខុ អាគច្ឆតិ, នាកាមា ទាតព្ពោ ភាគោតិ.

តេន ខោ បន សមយេន ទ្វេ ភាតិកា ថេរា, អាយស្មា ច ឥសិទាសោ អាយស្មា ច ឥសិភដោ, សាវត្ថិយំ វស្សំវុដ្ឋា អញ្ញតរំ គាមកាវាសំ អគមំសុ. មនុស្សា ចិរស្សាបិ ថេរា អាគតាតិ សចីវរានិ ភត្តានិ អទំសុ. អាវាសិកា ភិក្ខូ ថេរេ បុច្ឆិំសុ – ‘‘ឥមានិ, ភន្តេ, សង្ឃិកានិ ចីវរានិ ថេរេ អាគម្ម ឧប្បន្នានិ, សាទិយិស្សន្តិ ថេរា ភាគ’’ន្តិ. ថេរា ឯវមាហំសុ – ‘‘យថា ខោ មយំ, អាវុសោ, ភគវតា ធម្មំ ទេសិតំ អាជានាម, តុម្ហាកំយេវ តានិ ចីវរានិ យាវ កថិនស្ស ឧព្ភារាយា’’តិ.

តេន ខោ បន សមយេន តយោ ភិក្ខូ រាជគហេ វស្សំ វសន្តិ. តត្ថ មនុស្សា សង្ឃស្ស

ទេមាតិ ចីវរានិ ទេន្តិ. អថ ខោ តេសំ ភិក្ខូនំ ឯតទហោសិ – ‘‘ភគវតា បញ្ញត្តំ ‘ចតុវគ្គោ បច្ឆិមោ សង្ឃោ’តិ. មយញ្ចម្ហា តយោ ជនា. ឥមេ ច មនុស្សា សង្ឃស្ស ទេមាតិ ចីវរានិ ទេន្តិ. កថំ នុ ខោ អម្ហេហិ បដិបជ្ជិតព្ព’’ន្តិ? តេន ខោ បន សមយេន សម្ពហុលា ថេរា, អាយស្មា ច និលវាសី អាយស្មា ច សាណវាសី អាយស្មា ច គោតកោ អាយស្មា ច ភគុ អាយស្មា ច ផឡិកសន្តានោ, បាដលិបុត្តេ វិហរន្តិ កុក្កុដារាមេ. អថ ខោ តេ ភិក្ខូ បាដលិបុត្តំ គន្ត្វា ថេរេ បុច្ឆិំសុ. ថេរា ឯវមាហំសុ – ‘‘យថា ខោ មយំ អាវុសោ ភគវតា ធម្មំ ទេសិតំ អាជានាម, តុម្ហាកំយេវ តានិ ចីវរានិ យាវ កថិនស្ស ឧព្ភារាយា’’តិ.

សង្ឃិកចីវរុប្បាទកថា និដ្ឋិតា.