២២១. បច្ឆិមវិកប្បនុបគចីវរាទិកថា

៣៥៨. អថ ខោ ភិក្ខូនំ ឯតទហោសិ – ‘‘យានិ តានិ ភគវតា អនុញ្ញាតានិ តិចីវរន្តិ វា វស្សិកសាដិកាតិ វា និសីទនន្តិ វា បច្ចត្ថរណន្តិ វា កណ្ឌុប្បដិច្ឆាទីតិ វា មុខបុញ្ឆនចោឡន្តិ វា បរិក្ខារចោឡន្តិ វា, សព្ពានិ តានិ អធិដ្ឋាតព្ពានិ នុ ខោ, ឧទាហុ, វិកប្បេតព្ពានី’’តិ? ភគវតោ ឯតមត្ថំ អារោចេសុំ. អនុជានាមិ, ភិក្ខវេ, តិចីវរំ អធិដ្ឋាតុំ ន វិកប្បេតុំ; វស្សិកសាដិកំ វស្សានំ ចាតុមាសំ អធិដ្ឋាតុំ, តតោ បរំ វិកប្បេតុំ; និសីទនំ អធិដ្ឋាតុំ ន វិកប្បេតុំ; បច្ចត្ថរណំ អធិដ្ឋាតុំ ន វិកប្បេតុំ; កណ្ឌុប្បដិច្ឆាទិំ យាវអាពាធា អធិដ្ឋាតុំ តតោ បរំ វិកប្បេតុំ; មុខបុញ្ឆនចោឡំ អធិដ្ឋាតុំ ន វិកប្បេតុំ; បរិក្ខារចោឡំ អធិដ្ឋាតុំ ន វិកប្បេតុន្តិ.

អថ ខោ ភិក្ខូនំ ឯតទហោសិ – ‘‘កិត្តកំ បច្ឆិមំ នុ ខោ ចីវរំ វិកប្បេតព្ព’’ន្តិ? ភគវតោ ឯតមត្ថំ អារោចេសុំ. អនុជានាមិ, ភិក្ខវេ, អាយាមេន អដ្ឋង្គុលំ សុគតង្គុលេន ចតុរង្គុលវិត្ថតំ បច្ឆិមំ ចីវរំ វិកប្បេតុន្តិ.

៣៥៩. តេន ខោ បន សមយេន អាយស្មតោ មហាកស្សបស្ស បំសុកូលកតោ គរុកោ ហោតិ. ភគវតោ ឯតមត្ថំ អារោចេសុំ. អនុជានាមិ, ភិក្ខវេ, សុត្តលូខំ កាតុន្តិ. វិកណ្ណោ ហោតិ. ភគវតោ ឯតមត្ថំ អារោចេសុំ. អនុជានាមិ, ភិក្ខវេ, វិកណ្ណំ ឧទ្ធរិតុន្តិ. សុត្តា ឱកិរិយន្តិ. ភគវតោ ឯតមត្ថំ អារោចេសុំ. អនុជានាមិ, ភិក្ខវេ, អនុវាតំ បរិភណ្ឌំ អារោបេតុន្តិ.

តេន ខោ បន សមយេន សង្ឃាដិយា បត្តា លុជ្ជន្តិ. ភគវតោ ឯតមត្ថំ អារោចេសុំ. អនុជានាមិ, ភិក្ខវេ, អដ្ឋបទកំ កាតុន្តិ.

៣៦០. តេន ខោ បន សមយេន អញ្ញតរស្ស ភិក្ខុនោ តិចីវរេ កយិរមានេ សព្ពំ ឆិន្នកំ នប្បហោតិ. ភគវតោ ឯតមត្ថំ អារោចេសុំ. អនុជានាមិ, ភិក្ខវេ, ទ្វេ ឆិន្នកានិ ឯកំ អច្ឆិន្នកន្តិ.

ទ្វេ ឆិន្នកានិ ឯកំ អច្ឆិន្នកំ នប្បហោតិ. ភគវតោ ឯតមត្ថំ អារោចេសុំ. អនុជានាមិ, ភិក្ខវេ, ទ្វេ អច្ឆិន្នកានិ ឯកំ ឆិន្នកន្តិ.

ទ្វេ អច្ឆិន្នកានិ ឯកំ ឆិន្នកំ នប្បហោតិ. ភគវតោ ឯតមត្ថំ អារោចេសុំ. អនុជានាមិ, ភិក្ខវេ, អន្វាធិកម្បិ អារោបេតុំ, ន ច, ភិក្ខវេ, សព្ពំ អច្ឆិន្នកំ ធារេតព្ពំ. យោ ធារេយ្យ, អាបត្តិ ទុក្កដស្សាតិ.

៣៦១. តេន ខោ បន សមយេន អញ្ញតរស្ស ភិក្ខុនោ ពហុំ ចីវរំ ឧប្បន្នំ ហោតិ. សោ ច តំ ចីវរំ មាតាបិតូនំ ទាតុកាមោ ហោតិ. ភគវតោ ឯតមត្ថំ អារោចេសុំ. មាតាបិតរោតិ [មាតាបិតូនំ ខោ (សី.)] ខោ, ភិក្ខវេ, ទទមានេ [វទមានោ (ក.), វទមានេ (?)] កិំ វទេយ្យាម? អនុជានាមិ, ភិក្ខវេ, មាតាបិតូនំ ទាតុំ. ន ច, ភិក្ខវេ, សទ្ធាទេយ្យំ វិនិបាតេតព្ពំ. យោ វិនិបាតេយ្យ, អាបត្តិ ទុក្កដស្សាតិ.

៣៦២. តេន ខោ បន សមយេន អញ្ញតរោ ភិក្ខុ អន្ធវនេ ចីវរំ និក្ខិបិត្វា សន្តរុត្តរេន គាមំ បិណ្ឌាយ បាវិសិ. ចោរា តំ ចីវរំ អវហរិំសុ. សោ ភិក្ខុ ទុច្ចោឡោ ហោតិ លូខចីវរោ. ភិក្ខូ ឯវមាហំសុ – ‘‘កិស្ស ត្វំ, អាវុសោ, ទុច្ចោឡោ លូខចីវរោសី’’តិ? ‘‘ឥធាហំ [សោ អហំ (កត្ថចិ)], អាវុសោ, អន្ធវនេ ចីវរំ និក្ខិបិត្វា សន្តរុត្តរេន គាមំ បិណ្ឌាយ បាវិសិំ. ចោរា តំ ចីវរំ អវហរិំសុ. តេនាហំ ទុច្ចោឡោ លូខចីវរោ’’តិ. ភគវតោ ឯតមត្ថំ អារោចេសុំ. ន, ភិក្ខវេ, សន្តរុត្តរេន គាមោ បវិសិតព្ពោ. យោ បវិសេយ្យ, អាបត្តិ ទុក្កដស្សាតិ.

តេន ខោ បន សមយេន អាយស្មា អានន្ទោ អស្សតិយា សន្តរុត្តរេន គាមំ បិណ្ឌាយ បាវិសិ. ភិក្ខូ អាយស្មន្តំ អានន្ទំ ឯតទវោចុំ – ‘‘ននុ, អាវុសោ អានន្ទ, ភគវតា បញ្ញត្តំ – ‘ន សន្តរុត្តរេន គាមោ បវិសិតព្ពោ’តិ? កិស្ស ត្វំ, អាវុសោ អានន្ទ, សន្តរុត្តរេន គាមំ បវិដ្ឋោ’’តិ? ‘‘សច្ចំ, អាវុសោ, ភគវតា បញ្ញត្តំ – ‘ន សន្តរុត្តរេន គាមោ បវិសិតព្ពោ’តិ. អបិ ចាហំ អស្សតិយា បវិដ្ឋោ’’តិ. ភគវតោ ឯតមត្ថំ អារោចេសុំ.

បញ្ចិមេ, ភិក្ខវេ, បច្ចយា សង្ឃាដិយា និក្ខេបាយ – គិលានោ វា ហោតិ, វស្សិកសង្កេតំ វា ហោតិ, នទីបារំ គន្តុំ វា ហោតិ, អគ្គឡគុត្តិវិហារោ វា ហោតិ, អត្ថតកថិនំ វា ហោតិ. ឥមេ ខោ, ភិក្ខវេ, បញ្ច បច្ចយា សង្ឃាដិយា និក្ខេបាយ.

បញ្ចិមេ, ភិក្ខវេ, បច្ចយា ឧត្តរាសង្គស្ស និក្ខេបាយ…បេ… អន្តរវាសកស្ស និក្ខេបាយ – គិលានោ វា ហោតិ, វស្សិកសង្កេតំ វា ហោតិ, នទីបារំ គន្តុំ វា ហោតិ, អគ្គឡគុត្តិវិហារោ វា ហោតិ, អត្ថតកថិនំ វា ហោតិ. ឥមេ ខោ, ភិក្ខវេ, បញ្ច បច្ចយា ឧត្តរាសង្គស្ស អន្តរវាសកស្ស និក្ខេបាយ.

បញ្ចិមេ, ភិក្ខវេ, បច្ចយា វស្សិកសាដិកាយ និក្ខេបាយ – គិលានោ វា ហោតិ, និស្សីមំ គន្តុំ វា ហោតិ, នទីបារំ គន្តុំ វា ហោតិ, អគ្គឡគុត្តិវិហារោ វា ហោតិ, វស្សិកសាដិកា អកតា វា ហោតិ វិប្បកតា វា. ឥមេ ខោ, ភិក្ខវេ, បញ្ច បច្ចយា វស្សិកសាដិកាយ និក្ខេបាយាតិ.

បច្ឆិមវិកប្បនុបគចីវរាទិកថា និដ្ឋិតា.