២៨០. តស្សុទ្ទានំ

កោសម្ពិយំ ជិនវរោ, វិវាទាបត្តិទស្សនេ;

នុក្ខិបេយ្យ យស្មិំ តស្មិំ, សទ្ធាយាបត្តិ ទេសយេ.

អន្តោសីមាយំ តត្ថេវ, ពាលកញ្ចេវ វំសទា;

បាលិលេយ្យា ច សាវត្ថិ, សារិបុត្តោ ច កោលិតោ.

មហាកស្សបកច្ចានា, កោដ្ឋិកោ កប្បិនេន ច;

មហាចុន្ទោ ច អនុរុទ្ធោ, រេវតោ ឧបាលិ ចុភោ.

អានន្ទោ រាហុលោ ចេវ, គោតមីនាថបិណ្ឌិកោ;

សេនាសនំ វិវិត្តញ្ច, អាមិសំ សមកម្បិ ច.

ន កេហិ ឆន្ទោ ទាតព្ពោ, ឧបាលិបរិបុច្ឆិតោ;

អនានុវជ្ជោ សីលេន, សាមគ្គី ជិនសាសនេតិ.

កោសម្ពកក្ខន្ធកោ និដ្ឋិតោ.