៤. បាតិមោក្ខសវនារហោ

៣៨៦. អថ ខោ ភគវា ភិក្ខូ អាមន្តេសិ – ‘‘នទានាហំ, ភិក្ខវេ, ឥតោ បរំ ឧបោសថំ ករិស្សាមិ, បាតិមោក្ខំ ឧទ្ទិសិស្សាមិ. តុម្ហេវទានិ, ភិក្ខវេ, ឥតោ បរំ ឧបោសថំ ករេយ្យាថ, បាតិមោក្ខំ ឧទ្ទិសេយ្យាថ. អដ្ឋានមេតំ, ភិក្ខវេ, អនវកាសោ យំ តថាគតោ អបរិសុទ្ធាយ បរិសាយ ឧបោសថំ ករេយ្យ, បាតិមោក្ខំ ឧទ្ទិសេយ្យ. ន ច, ភិក្ខវេ [ន ច ភិក្ខវេ ភិក្ខុនា (ស្យា. កំ.)], សាបត្តិកេន បាតិមោក្ខំ សោតព្ពំ. យោ សុណេយ្យ, អាបត្តិ ទុក្កដស្ស. អនុជានាមិ, ភិក្ខវេ, យោ សាបត្តិកោ បាតិមោក្ខំ សុណាតិ, តស្ស បាតិមោក្ខំ ឋបេតុំ. ឯវញ្ច បន, ភិក្ខវេ, ឋបេតព្ពំ. តទហុបោសថេ ចាតុទ្ទសេ វា បន្នរសេ វា តស្មិំ បុគ្គលេ សម្មុខីភូតេ សង្ឃមជ្ឈេ ឧទាហរិតព្ពំ –

‘សុណាតុ មេ ភន្តេ, សង្ឃោ. ឥត្ថន្នាមោ បុគ្គលោ សាបត្តិកោ, តស្ស បាតិមោក្ខំ ឋបេមិ, ន តស្មិំ សម្មុខីភូតេ បាតិមោក្ខំ ឧទ្ទិសិតព្ព’ន្តិ ឋបិតំ ហោតិ បាតិមោក្ខ’’ន្តិ.

តេន ខោ បន សមយេន ឆព្ពគ្គិយា ភិក្ខូ ‘នាម្ហេ កោចិ ជានាតី’តិ សាបត្តិកាវ បាតិមោក្ខំ សុណន្តិ. ថេរា ភិក្ខូ បរចិត្តវិទុនោ ភិក្ខូនំ អារោចេន្តិ – ‘‘ឥត្ថន្នាមោ ច ឥត្ថន្នាមោ ច, អាវុសោ, ឆព្ពគ្គិយា ភិក្ខូ ‘នាម្ហេ កោចិ ជានាតី’តិ សាបត្តិកាវ បាតិមោក្ខំ សុណន្តី’’តិ. អស្សោសុំ ខោ ឆព្ពគ្គិយា ភិក្ខូ – ‘‘ថេរា កិរ ភិក្ខូ បរចិត្តវិទុនោ អម្ហេ ភិក្ខូនំ អារោចេន្តិ – ឥត្ថន្នាមោ ច ឥត្ថន្នាមោ ច, អាវុសោ, ឆព្ពគ្គិយា ភិក្ខូ ‘នាម្ហេ កោចិ ជានាតី’តិ សាបត្តិកាវ បាតិមោក្ខំ សុណន្តី’’តិ.

តេ – បុរម្ហាកំ បេសលា ភិក្ខូ បាតិមោក្ខំ ឋបេន្តីតិ – បដិកច្ចេវ សុទ្ធានំ ភិក្ខូនំ អនាបត្តិកានំ អវត្ថុស្មិំ អការណេ បាតិមោក្ខំ ឋបេន្តិ. យេ តេ ភិក្ខូ អប្បិច្ឆា…បេ… តេ ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម ឆព្ពគ្គិយា ភិក្ខូ សុទ្ធានំ ភិក្ខូនំ អនាបត្តិកានំ អវត្ថុស្មិំ អការណេ បាតិមោក្ខំ ឋបេស្សន្តី’’តិ! អថ ខោ តេ ភិក្ខូ ភគវតោ ឯតមត្ថំ អារោចេសុំ…បេ… ‘‘សច្ចំ កិរ, ភិក្ខវេ, ឆព្ពគ្គិយា ភិក្ខូ សុទ្ធានំ ភិក្ខូនំ អនាបត្តិកានំ អវត្ថុស្មិំ អការណេ បាតិមោក្ខំ ឋបេន្តី’’តិ? ‘‘សច្ចំ ភគវា’’តិ…បេ… វិគរហិត្វា…បេ… ធម្មិំ កថំ កត្វា ភិក្ខូ អាមន្តេសិ – ‘‘ន, ភិក្ខវេ, សុទ្ធានំ ភិក្ខូនំ អនាបត្តិកានំ អវត្ថុស្មិំ អការណេ បាតិមោក្ខំ ឋបេតព្ពំ. យោ ឋបេយ្យ, អាបត្តិ ទុក្កដស្ស’’.