៦. បិណ្ឌចារិកវត្តកថា

៣៦៥. តេន ខោ បន សមយេន បិណ្ឌចារិកា ភិក្ខូ ទុន្និវត្ថា ទុប្បារុតា អនាកប្បសម្បន្នា បិណ្ឌាយ ចរន្តិ, អសល្លក្ខេត្វាបិ និវេសនំ បវិសន្តិ, អសល្លក្ខេត្វាបិ និក្ខមន្តិ, អតិសហសាបិ បវិសន្តិ, អតិសហសាបិ និក្ខមន្តិ, អតិទូរេបិ តិដ្ឋន្តិ, អច្ចាសន្នេបិ តិដ្ឋន្តិ, អតិចិរម្បិ តិដ្ឋន្តិ, អតិលហុម្បិ និវត្តន្តិ. អញ្ញតរោបិ បិណ្ឌចារិកោ ភិក្ខុ អសល្លក្ខេត្វា និវេសនំ បាវិសិ. សោ ច ទ្វារំ មញ្ញមានោ អញ្ញតរំ ឱវរកំ បាវិសិ. តស្មិម្បិ ឱវរកេ ឥត្ថី នគ្គា ឧត្តានា និបន្នា ហោតិ. អទ្ទសា ខោ សោ ភិក្ខុ តំ ឥត្ថិំ នគ្គំ ឧត្តានំ និបន្នំ. ទិស្វាន – ‘‘នយិទំ ទ្វារំ, ឱវរកំ ឥទ’’ន្តិ តម្ហា ឱវរកា និក្ខមិ. អទ្ទសា ខោ តស្សា ឥត្ថិយា សាមិកោ តំ ឥត្ថិំ នគ្គំ ឧត្តានំ និបន្នំ. ទិស្វាន – ‘‘ឥមិនា មេ ភិក្ខុនា បជាបតី ទូសិតា’’តិ តំ ភិក្ខុំ គហេត្វា អាកោដេសិ. អថ ខោ សា ឥត្ថី តេន សទ្ទេន បដិពុជ្ឈិត្វា តំ បុរិសំ ឯតទវោច – ‘‘កិស្ស ត្វំ, អយ្យ, ឥមំ ភិក្ខុំ អាកោដេសី’’តិ? ‘‘ឥមិនាសិ ត្វំ ភិក្ខុនា ទូសិតា’’តិ? ‘‘នាហំ, អយ្យ, ឥមិនា ភិក្ខុនា ទូសិតា; អការកោ សោ ភិក្ខូ’’តិ តំ ភិក្ខុំ មុញ្ចាបេសិ. អថ ខោ សោ ភិក្ខុ អារាមំ គន្ត្វា ភិក្ខូនំ ឯតមត្ថំ អារោចេសិ. យេ តេ ភិក្ខូ អប្បិច្ឆា…បេ… តេ ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម បិណ្ឌចារិកា ភិក្ខូ ទុន្និវត្ថា ទុប្បារុតា អនាកប្បសម្បន្នា បិណ្ឌាយ ចរិស្សន្តិ, អសល្លក្ខេត្វាបិ និវេសនំ បវិសិស្សន្តិ, អសល្លក្ខេត្វាបិ និក្ខមិស្សន្តិ, អតិសហសាបិ បវិសិស្សន្តិ, អតិសហសាបិ និក្ខមិស្សន្តិ, អតិទូរេបិ តិដ្ឋិស្សន្តិ, អច្ចាសន្នេបិ តិដ្ឋិស្សន្តិ, អតិចិរម្បិ តិដ្ឋិស្សន្តិ, អតិលហុម្បិ និវត្តិស្សន្តី’’តិ! អថ ខោ តេ ភិក្ខូ ភគវតោ ឯតមត្ថំ អារោចេសុំ…បេ… សច្ចំ កិរ, ភិក្ខវេ…បេ… សច្ចំ ភគវាតិ…បេ… វិគរហិត្វា…បេ… ធម្មិំ កថំ កត្វា ភិក្ខូ អាមន្តេសិ –

៣៦៦. ‘‘តេន ហិ, ភិក្ខវេ, បិណ្ឌចារិកានំ ភិក្ខូនំ វត្តំ បញ្ញាបេស្សាមិ យថា បិណ្ឌចារិកេហិ ភិក្ខូហិ សម្មា វត្តិតព្ពំ. បិណ្ឌចារិកេន, ភិក្ខវេ, ភិក្ខុនា – ‘ឥទានិ គាមំ បវិសិស្សាមី’តិ តិមណ្ឌលំ បដិច្ឆាទេន្តេន បរិមណ្ឌលំ និវាសេត្វា កាយពន្ធនំ ពន្ធិត្វា សគុណំ កត្វា សង្ឃាដិយោ បារុបិត្វា គណ្ឋិកំ បដិមុញ្ចិត្វា ធោវិត្វា បត្តំ គហេត្វា សាធុកំ អតរមានេន គាមោ បវិសិតព្ពោ.

‘‘និវេសនំ បវិសន្តេន សល្លក្ខេតព្ពំ – ‘ឥមិនា បវិសិស្សាមិ, ឥមិនា និក្ខមិស្សាមី’តិ. នាតិសហសា បវិសិតព្ពំ. នាតិសហសា និក្ខមិតព្ពំ. នាតិទូរេ ឋាតព្ពំ. នាច្ចាសន្នេ ឋាតព្ពំ. នាតិចិរំ ឋាតព្ពំ. នាតិលហុំ និវត្តិតព្ពំ. ឋិតកេន សល្លក្ខេតព្ពំ – ‘ភិក្ខំ ទាតុកាមា វា អទាតុកាមា វា’តិ. សចេ កម្មំ វា និក្ខិបតិ, អាសនា វា វុដ្ឋាតិ, កដច្ឆុំ វា បរាមសតិ, ភាជនំ វា បរាមសតិ, ឋបេតិ [ឋាបេតិ (ក.)] វា – ទាតុកាមស្សាតិ [ទាតុកាមិយាតិ (ស្យា.), ទាតុកាមា វិយាតិ (សី.)] ឋាតព្ពំ. ភិក្ខាយ ទិយ្យមានាយ វាមេន ហត្ថេន សង្ឃាដិំ ឧច្ចារេត្វា ទក្ខិណេន ហត្ថេន បត្តំ បណាមេត្វា ឧភោហិ ហត្ថេហិ បត្តំ បដិគ្គហេត្វា ភិក្ខា បដិគ្គហេតព្ពា. ន ច ភិក្ខាទាយិកាយ មុខំ ឧល្លោកេតព្ពំ [ឱលោកេតព្ពំ (ស្យា.)]. សល្លក្ខេតព្ពំ – ‘សូបំ ទាតុកាមា វា អទាតុកាមា វា’តិ. សចេ កដច្ឆុំ វា បរាមសតិ, ភាជនំ វា បរាមសតិ, ឋបេតិ វា – ទាតុកាមស្សាតិ ឋាតព្ពំ. ភិក្ខាយ ទិន្នាយ សង្ឃាដិយា បត្តំ បដិច្ឆាទេត្វា សាធុកំ អតរមានេន និវត្តិតព្ពំ.

‘‘សុប្បដិច្ឆន្នេន អន្តរឃរេ គន្តព្ពំ. សុសំវុតេន អន្តរឃរេ គន្តព្ពំ. ឱក្ខិត្តចក្ខុនា អន្តរឃរេ គន្តព្ពំ. ន ឧក្ខិត្តកាយ អន្តរឃរេ គន្តព្ពំ. ន ឧជ្ជគ្ឃិកាយ អន្តរឃរេ គន្តព្ពំ. អប្បសទ្ទេន អន្តរឃរេ គន្តព្ពំ. ន កាយប្បចាលកំ អន្តរឃរេ គន្តព្ពំ. ន ពាហុប្បចាលកំ អន្តរឃរេ គន្តព្ពំ. ន សីសប្បចាលកំ អន្តរឃរេ គន្តព្ពំ. ន ខម្ភកតេន អន្តរឃរេ គន្តព្ពំ. ន ឱគុណ្ឋិតេន អន្តរឃរេ គន្តព្ពំ. ន ឧក្កុដិកាយ អន្តរឃរេ គន្តព្ពំ. យោ បឋមំ គាមតោ បិណ្ឌាយ បដិក្កមតិ, តេន អាសនំ បញ្ញបេតព្ពំ, បាទោទកំ បាទបីឋំ បាទកថលិកំ ឧបនិក្ខិបិតព្ពំ, អវក្ការបាតិ ធោវិត្វា ឧបដ្ឋាបេតព្ពា, បានីយំ បរិភោជនីយំ ឧបដ្ឋាបេតព្ពំ. យោ បច្ឆា គាមតោ បិណ្ឌាយ បដិក្កមតិ, សចេ ហោតិ ភុត្តាវសេសោ, សចេ អាកង្ខតិ, ភុញ្ជិតព្ពំ. នោ ចេ អាកង្ខតិ, អប្បហរិតេ វា ឆឌ្ឌេតព្ពំ, អប្បាណកេ វា ឧទកេ ឱបិលាបេតព្ពំ. តេន អាសនំ ឧទ្ធរិតព្ពំ, បាទោទកំ បាទបីឋំ បាទកថលិកំ បដិសាមេតព្ពំ, អវក្ការបាតិ ធោវិត្វា បដិសាមេតព្ពា, បានីយំ បរិភោជនីយំ បដិសាមេតព្ពំ, ភត្តគ្គំ សម្មជ្ជិតព្ពំ. យោ បស្សតិ បានីយឃដំ វា បរិភោជនីយឃដំ វា វច្ចឃដំ វា រិត្តំ តុច្ឆំ តេន ឧបដ្ឋាបេតព្ពំ. សចស្ស ហោតិ អវិសយ្ហំ, ហត្ថវិការេន ទុតិយំ អាមន្តេត្វា ហត្ថវិលង្ឃកេន ឧបដ្ឋាបេតព្ពំ, ន ច តប្បច្ចយា វាចា ភិន្ទិតព្ពា. ឥទំ ខោ, ភិក្ខវេ, បិណ្ឌចារិកានំ ភិក្ខូនំ វត្តំ យថា បិណ្ឌចារិកេហិ ភិក្ខូហិ សម្មា វត្តិតព្ព’’ន្តិ.