៧. អារញ្ញិកវត្តកថា

៣៦៧. តេន ខោ បន សមយេន សម្ពហុលា ភិក្ខូ អរញ្ញេ វិហរន្តិ. តេ នេវ បានីយំ ឧបដ្ឋាបេន្តិ, ន បរិភោជនីយំ ឧបដ្ឋាបេន្តិ, ន អគ្គិំ ឧបដ្ឋាបេន្តិ, ន អរណិសហិតំ ឧបដ្ឋាបេន្តិ, ន នក្ខត្តបទានិ ជានន្តិ, ន ទិសាភាគំ ជានន្តិ. ចោរា តត្ថ គន្ត្វា តេ ភិក្ខូ ឯតទវោចុំ – ‘‘អត្ថិ, ភន្តេ, បានីយ’’ន្តិ? ‘‘នត្ថាវុសោ’’តិ. ‘‘អត្ថិ, ភន្តេ, បរិភោជនីយ’’ន្តិ? ‘‘នត្ថាវុសោ’’តិ. ‘‘អត្ថិ, ភន្តេ, អគ្គី’’តិ? ‘‘នត្ថាវុសោ’’តិ. ‘‘អត្ថិ, ភន្តេ, អរណិសហិត’’ន្តិ? ‘‘នត្ថាវុសោ’’តិ. ( ) [(អត្ថិ ភន្តេ នក្ខត្តបទានីតិ, ន ជានាម អាវុសោតិ, អត្ថិ ភន្តេ ទិសាភាគន្តិ, ន ជានាម អាវុសោតិ.) សី. វិមតិដីកាយ បន សមេតិ] ‘‘កេនជ្ជ, ភន្តេ, យុត្ត’’ន្តិ? ‘‘ន ខោ មយំ, អាវុសោ, ជានាមា’’តិ. ‘‘កតមាយំ, ភន្តេ, ទិសា’’តិ? ‘‘ន ខោ មយំ, អាវុសោ, ជានាមា’’តិ. អថ ខោ តេ ចោរា – ‘នេវិមេសំ បានីយំ អត្ថិ, ន បរិភោជនីយំ អត្ថិ, ន អគ្គិ អត្ថិ, ន អរណិសហិតំ អត្ថិ, ន នក្ខត្តបទានិ ជានន្តិ, ន ទិសាភាគំ ជានន្តិ; ចោរា ឥមេ, នយិមេ ភិក្ខូ’តិ – អាកោដេត្វា បក្កមិំសុ. អថ ខោ តេ ភិក្ខូ ភិក្ខូនំ ឯតមត្ថំ អារោចេសុំ. ភិក្ខូ ភគវតោ ឯតមត្ថំ អារោចេសុំ. អថ ខោ ភគវា ឯតស្មិំ និទានេ ឯតស្មិំ បករណេ ធម្មិំ កថំ កត្វា ភិក្ខូ អាមន្តេសិ –

៣៦៨. ‘‘តេន ហិ, ភិក្ខវេ, អារញ្ញិកានំ ភិក្ខូនំ វត្តំ បញ្ញបេស្សាមិ យថា អារញ្ញិកេហិ ភិក្ខូហិ សម្មា វត្តិតព្ពំ. អារញ្ញិកេន, ភិក្ខវេ, ភិក្ខុនា កាលស្សេវ ឧដ្ឋាយ បត្តំ ថវិកាយ បក្ខិបិត្វា អំសេ អាលគ្គេត្វា ចីវរំ ខន្ធេ ករិត្វា ឧបាហនា អារោហិត្វា ទារុភណ្ឌំ មត្តិកាភណ្ឌំ បដិសាមេត្វា ទ្វារវាតបានំ ថកេត្វា សេនាសនា ឱតរិតព្ពំ – ឥទានិ គាមំ បវិសិស្សាមីតិ. ឧបាហនា ឱមុញ្ចិត្វា នីចំ កត្វា បប្ផោដេត្វា ថវិកាយ បក្ខិបិត្វា អំសេ អាលគ្គេត្វា តិមណ្ឌលំ បដិច្ឆាទេន្តេន បរិមណ្ឌលំ និវាសេត្វា កាយពន្ធនំ ពន្ធិត្វា សគុណំ កត្វា សង្ឃាដិយោ បារុបិត្វា គណ្ឋិកំ បដិមុញ្ចិត្វា ធោវិត្វា បត្តំ គហេត្វា សាធុកំ អតរមានេន គាមោ បវិសិតព្ពោ. សុប្បដិច្ឆន្នេន អន្តរឃរេ គន្តព្ពំ…បេ… ន ខម្ភកតេន អន្តរឃរេ គន្តព្ពំ. ន ឱគុណ្ឋិតេន អន្តរឃរេ គន្តព្ពំ. ន ឧក្កុដិកាយ អន្តរឃរេ គន្តព្ពំ.

‘‘និវេសនំ បវិសន្តេន សល្លក្ខេតព្ពំ – ‘ឥមិនា បវិសិស្សាមិ, ឥមិនា និក្ខមិស្សាមី’តិ. នាតិសហសា បវិសិតព្ពំ. នាតិសហសា និក្ខមិតព្ពំ. នាតិទូរេ ឋាតព្ពំ. នាច្ចាសន្នេ ឋាតព្ពំ. នាតិចិរំ ឋាតព្ពំ. នាតិលហុំ និវត្តិតព្ពំ. ឋិតកេន សល្លក្ខេតព្ពំ – ‘ភិក្ខំ ទាតុកាមា វា អទាតុកាមា វា’តិ. សចេ កម្មំ វា និក្ខិបតិ, អាសនា វា វុដ្ឋាតិ, កដច្ឆុំ វា បរាមសតិ, ភាជនំ វា បរាមសតិ, ឋបេតិ វា – ទាតុកាមស្សាតិ ឋាតព្ពំ. ភិក្ខាយ ទិយ្យមានាយ វាមេន ហត្ថេន សង្ឃាដិំ ឧច្ចារេត្វា ទក្ខិណេន ហត្ថេន បត្តំ បណាមេត្វា ឧភោហិ ហត្ថេហិ បត្តំ បដិគ្គហេត្វា ភិក្ខា បដិគ្គហេតព្ពា. ន ច ភិក្ខាទាយិកាយ មុខំ ឧល្លោកេតព្ពំ. សល្លក្ខេតព្ពំ – ‘សូបំ ទាតុកាមា វា អទាតុកាមា វា’តិ. សចេ កដច្ឆុ វា បរាមសតិ, ភាជនំ វា បរាមសតិ, ឋបេតិ វា – ទាតុកាមស្សាតិ ឋាតព្ពំ. ភិក្ខាយ ទិន្នាយ សង្ឃាដិយា បត្តំ បដិច្ឆាទេត្វា សាធុកំ អតរមានេន និវត្តិតព្ពំ.

‘‘សុប្បដិច្ឆន្នេន អន្តរឃរេ គន្តព្ពំ…បេ… ន ឧក្កុដិកាយ អន្តរឃរេ គន្តព្ពំ. គាមតោ និក្ខមិត្វា បត្តំ ថវិកាយ បក្ខិបិត្វា អំសេ អាលគ្គេត្វា ចីវរំ សង្ឃរិត្វា សីសេ ករិត្វា ឧបាហនា អារោហិត្វា គន្តព្ពំ.

‘‘អារញ្ញិកេន, ភិក្ខវេ, ភិក្ខុនា បានីយំ ឧបដ្ឋាបេតព្ពំ, បរិភោជនីយំ ឧបដ្ឋាបេតព្ពំ, អគ្គិ ឧបដ្ឋាបេតព្ពោ, អរណិសហិតំ ឧបដ្ឋាបេតព្ពំ, កត្តរទណ្ឌោ ឧបដ្ឋាបេតព្ពោ, នក្ខត្តបទានិ ឧគ្គហេតព្ពានិ – សកលានិ វា ឯកទេសានិ វា, ទិសាកុសលេន ភវិតព្ពំ. ឥទំ ខោ, ភិក្ខវេ, អារញ្ញិកានំ ភិក្ខូនំ វត្តំ យថា អារញ្ញិកេហិ ភិក្ខូហិ សម្មា វត្តិតព្ព’’ន្តិ.