១៤. អន្តេវាសិកវត្តកថា

៣៨១. តេន ខោ បន សមយេន អាចរិយា អន្តេវាសិកេសុ ន សម្មា វត្តន្តិ. យេ តេ ភិក្ខូ អប្បិច្ឆា…បេ… តេ ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម អាចរិយា អន្តេវាសិកេសុ ន សម្មា វត្តិស្សន្តី’’តិ! អថ ខោ តេ ភិក្ខូ ភគវតោ ឯតមត្ថំ អារោចេសុំ. អថ ខោ ភគវា ឯតស្មិំ និទានេ ឯតស្មិំ បករណេ ភិក្ខុសង្ឃំ សន្និបាតាបេត្វា ភិក្ខូ បដិបុច្ឆិ – ‘‘សច្ចំ កិរ, ភិក្ខវេ, អាចរិយា អន្តេវាសិកេសុ ន សម្មា វត្តន្តី’’តិ? ‘‘សច្ចំ ភគវា’’តិ…បេ… វិគរហិត្វា…បេ… ធម្មិំ កថំ កត្វា ភិក្ខូ អាមន្តេសិ –

៣៨២. ‘‘តេន ហិ, ភិក្ខវេ, អាចរិយានំ អន្តេវាសិកេសុ វត្តំ បញ្ញបេស្សាមិ យថា អាចរិយេហិ អន្តេវាសិកេសុ សម្មា វត្តិតព្ពំ. [មហាវ. ៧៩] អាចរិយេន, ភិក្ខវេ, អន្តេវាសិកម្ហិ សម្មា វត្តិតព្ពំ. តត្រាយំ សម្មាវត្តនា –

‘‘អាចរិយេន, ភិក្ខវេ, អន្តេវាសិកោ សង្គហេតព្ពោ អនុគ្គហេតព្ពោ ឧទ្ទេសេន បរិបុច្ឆាយ ឱវាទេន អនុសាសនិយា. សចេ អាចរិយស្ស បត្តោ ហោតិ, អន្តេវាសិកស្ស បត្តោ ន ហោតិ, អាចរិយេន អន្តេវាសិកស្ស បត្តោ ទាតព្ពោ, ឧស្សុក្កំ វា កាតព្ពំ – កិន្តិ នុ ខោ អន្តេវាសិកស្ស បត្តោ ឧប្បជ្ជិយេថាតិ. សចេ អាចរិយស្ស ចីវរំ ហោតិ, អន្តេវាសិកស្ស ចីវរំ ន ហោតិ, អាចរិយេន អន្តេវាសិកស្ស ចីវរំ ទាតព្ពំ, ឧស្សុក្កំ វា កាតព្ពំ – កិន្តិ នុ ខោ អន្តេវាសិកស្ស ចីវរំ ឧប្បជ្ជិយេថាតិ. សចេ អាចរិយស្ស បរិក្ខារោ ហោតិ, អន្តេវាសិកស្ស បរិក្ខារោ ន ហោតិ, អាចរិយេន អន្តេវាសិកស្ស បរិក្ខារោ ទាតព្ពោ, ឧស្សុក្កំ វា កាតព្ពំ – កិន្តិ នុ ខោ អន្តេវាសិកស្ស បរិក្ខារោ ឧប្បជ្ជិយេថាតិ.

‘‘សចេ អន្តេវាសិកោ គិលានោ ហោតិ, កាលស្សេវ ឧដ្ឋាយ ទន្តកដ្ឋំ ទាតព្ពំ, មុខោទកំ ទាតព្ពំ, អាសនំ បញ្ញបេតព្ពំ. សចេ យាគុ ហោតិ, ភាជនំ ធោវិត្វា យាគុ ឧបនាមេតព្ពា. យាគុំ បីតស្ស ឧទកំ ទត្វា ភាជនំ បដិគ្គហេត្វា នីចំ កត្វា សាធុកំ អប្បដិឃំសន្តេន ធោវិត្វា បដិសាមេតព្ពំ. អន្តេវាសិកម្ហិ វុដ្ឋិតេ អាសនំ ឧទ្ធរិតព្ពំ. សចេ សោ ទេសោ ឧក្លាបោ ហោតិ, សោ ទេសោ សម្មជ្ជិតព្ពោ.

‘‘សចេ អន្តេវាសិកោ គាមំ បវិសិតុកាមោ ហោតិ, និវាសនំ ទាតព្ពំ, បដិនិវាសនំ បដិគ្គហេតព្ពំ, កាយពន្ធនំ ទាតព្ពំ, សគុណំ កត្វា សង្ឃាដិយោ ទាតព្ពា, ធោវិត្វា បត្តោ សោទកោ ទាតព្ពោ.

‘‘ឯត្តាវតា និវត្តិស្សតីតិ អាសនំ បញ្ញបេតព្ពំ, បាទោទកំ បាទបីឋំ បាទកថលិកំ ឧបនិក្ខិបិតព្ពំ, បច្ចុគ្គន្ត្វា បត្តចីវរំ បដិគ្គហេតព្ពំ, បដិនិវាសនំ ទាតព្ពំ, និវាសនំ បដិគ្គហេតព្ពំ. សចេ ចីវរំ សិន្នំ ហោតិ, មុហុត្តំ ឧណ្ហេ ឱតាបេតព្ពំ, ន ច ឧណ្ហេ ចីវរំ និទហិតព្ពំ. ចីវរំ សង្ឃរិតព្ពំ. ចីវរំ សង្ឃរន្តេន ចតុរង្គុលំ កណ្ណំ ឧស្សារេត្វា ចីវរំ សង្ឃរិតព្ពំ – មា មជ្ឈេ ភង្គោ អហោសីតិ. ឱភោគេ កាយពន្ធនំ កាតព្ពំ.

‘‘សចេ បិណ្ឌបាតោ ហោតិ, អន្តេវាសិកោ ច ភុញ្ជិតុកាមោ ហោតិ, ឧទកំ ទត្វា បិណ្ឌបាតោ ឧបនាមេតព្ពោ. អន្តេវាសិកោ បានីយេន បុច្ឆិតព្ពោ. ភុត្តាវិស្ស ឧទកំ ទត្វា បត្តំ បដិគ្គហេត្វា នីចំ កត្វា សាធុកំ អប្បដិឃំសន្តេន ធោវិត្វា វោទកំ កត្វា មុហុត្តំ ឧណ្ហេ ឱតាបេតព្ពោ, ន ច ឧណ្ហេ បត្តោ និទហិតព្ពោ. បត្តចីវរំ និក្ខិបិតព្ពំ. បត្តំ និក្ខិបន្តេន…បេ… ចីវរំ និក្ខិបន្តេន…បេ… បារតោ អន្តំ ឱរតោ ភោគំ កត្វា ចីវរំ និក្ខិបិតព្ពំ. អន្តេវាសិកម្ហិ ឧដ្ឋិតេ អាសនំ ឧទ្ធរិតព្ពំ, បាទោទកំ បាទបីឋំ បាទកថលិកំ បដិសាមេតព្ពំ. សចេ សោ ទេសោ ឧក្លាបោ ហោតិ, សោ ទេសោ សម្មជ្ជិតព្ពោ.

‘‘សចេ អន្តេវាសិកោ នហាយិតុកាមោ ហោតិ, នហានំ បដិយាទេតព្ពំ. សចេ សីតេន អត្ថោ ហោតិ, សីតំ បដិយាទេតព្ពំ. សចេ ឧណ្ហេន អត្ថោ ហោតិ, ឧណ្ហំ បដិយាទេតព្ពំ.

‘‘សចេ អន្តេវាសិកោ ជន្តាឃរំ បវិសិតុកាមោ ហោតិ, ចុណ្ណំ សន្នេតព្ពំ, មត្តិកា តេមេតព្ពា, ជន្តាឃរបីឋំ អាទាយ [អាទាយ អន្តេវាសិកស្ស បិដ្ឋិតោ បិដ្ឋិតោ (ក.)] គន្ត្វា ជន្តាឃរបីឋំ ទត្វា ចីវរំ បដិគ្គហេត្វា ឯកមន្តំ និក្ខិបិតព្ពំ, ចុណ្ណំ ទាតព្ពំ, មត្តិកា ទាតព្ពា. សចេ ឧស្សហតិ ជន្តាឃរំ បវិសិតព្ពំ. ជន្តាឃរំ បវិសន្តេន មត្តិកាយ មុខំ មក្ខេត្វា បុរតោ ច បច្ឆតោ ច បដិច្ឆាទេត្វា ជន្តាឃរំ បវិសិតព្ពំ. ន ថេរេ ភិក្ខូ អនុបខជ្ជ និសីទិតព្ពំ. ន នវា ភិក្ខូ អាសនេន បដិពាហិតព្ពា. ជន្តាឃរេ អន្តេវាសិកស្ស បរិកម្មំ កាតព្ពំ. ជន្តាឃរា និក្ខមន្តេន ជន្តាឃរបីឋំ អាទាយ បុរតោ ច បច្ឆតោ ច បដិច្ឆាទេត្វា ជន្តាឃរា និក្ខមិតព្ពំ.

‘‘ឧទកេបិ អន្តេវាសិកស្ស បរិកម្មំ កាតព្ពំ. នហាតេន បឋមតរំ ឧត្តរិត្វា អត្តនោ គត្តំ វោទកំ កត្វា និវាសេត្វា អន្តេវាសិកស្ស គត្តតោ ឧទកំ បមជ្ជិតព្ពំ, និវាសនំ ទាតព្ពំ, សង្ឃាដិ ទាតព្ពា, ជន្តាឃរបីឋំ អាទាយ បឋមតរំ អាគន្ត្វា អាសនំ បញ្ញបេតព្ពំ, បាទោទកំ បាទបីឋំ បាទកថលិកំ ឧបនិក្ខិបិតព្ពំ, អន្តេវាសិកោ បានីយេន បុច្ឆិតព្ពោ.

‘‘យស្មិំ វិហារេ អន្តេវាសិកោ វិហរតិ, សចេ សោ វិហារោ ឧក្លាបោ ហោតិ, សចេ ឧស្សហតិ, សោធេតព្ពោ. វិហារំ សោធេន្តេន បឋមំ បត្តចីវរំ នីហរិត្វា ឯកមន្តំ និក្ខិបិតព្ពំ…បេ… អាចមនកុម្ភិយា ឧទកំ ន ហោតិ, អាចមនកុម្ភិយា ឧទកំ អាសិញ្ចិតព្ពំ.

‘‘សចេ អន្តេវាសិកស្ស អនភិរតិ ឧប្បន្នា ហោតិ, អាចរិយេន វូបកាសេតព្ពោ, វូបកាសាបេតព្ពោ, ធម្មកថា វាស្ស កាតព្ពា. សចេ អន្តេវាសិកស្ស កុក្កុច្ចំ ឧប្បន្នំ ហោតិ, អាចរិយេន វិនោទេតព្ពំ, វិនោទាបេតព្ពំ, ធម្មកថា វាស្ស កាតព្ពា. សចេ អន្តេវាសិកស្ស ទិដ្ឋិគតំ ឧប្បន្នំ ហោតិ, អាចរិយេន វិវេចេតព្ពំ, វិវេចាបេតព្ពំ, ធម្មកថា វាស្ស កាតព្ពា. សចេ អន្តេវាសិកោ គរុធម្មំ អជ្ឈាបន្នោ ហោតិ, បរិវាសារហោ, អាចរិយេន ឧស្សុក្កំ កាតព្ពំ – កិន្តិ នុ ខោ សង្ឃោ អន្តេវាសិកស្ស បរិវាសំ ទទេយ្យាតិ. សចេ អន្តេវាសិកោ មូលាយបដិកស្សនារហោ ហោតិ, អាចរិយេន ឧស្សុក្កំ កាតព្ពំ – កិន្តិ នុ ខោ សង្ឃោ អន្តេវាសិកំ មូលាយ បដិកស្សេយ្យាតិ. សចេ អន្តេវាសិកោ មានត្តារហោ ហោតិ, អាចរិយេន ឧស្សុក្កំ កាតព្ពំ – កិន្តិ នុ ខោ សង្ឃោ អន្តេវាសិកស្ស មានត្តំ ទទេយ្យាតិ. សចេ អន្តេវាសិកោ អព្ភានារហោ ហោតិ, អាចរិយេន ឧស្សុក្កំ កាតព្ពំ – កិន្តិ នុ ខោ សង្ឃោ អន្តេវាសិកំ អព្ភេយ្យាតិ. សចេ សង្ឃោ អន្តេវាសិកស្ស កម្មំ កត្តុកាមោ ហោតិ, តជ្ជនីយំ វា និយស្សំ វា បព្ពាជនីយំ វា បដិសារណីយំ វា ឧក្ខេបនីយំ វា, អាចរិយេន ឧស្សុក្កំ កាតព្ពំ – កិន្តិ នុ ខោ សង្ឃោ អន្តេវាសិកស្ស កម្មំ ន ករេយ្យ, លហុកាយ វា បរិណាមេយ្យាតិ. កតំ វា បនស្ស ហោតិ, សង្ឃេន កម្មំ, តជ្ជនីយំ វា និយស្សំ វា បព្ពាជនីយំ វា បដិសារណីយំ វា ឧក្ខេបនីយំ វា, អាចរិយេន ឧស្សុក្កំ កាតព្ពំ – កិន្តិ នុ ខោ អន្តេវាសិកោ សម្មា វត្តេយ្យ, លោមំ បាតេយ្យ, នេត្ថារំ វត្តេយ្យ, សង្ឃោ តំ កម្មំ បដិប្បស្សម្ភេយ្យាតិ.

‘‘សចេ អន្តេវាសិកស្ស ចីវរំ ធោវិតព្ពំ ហោតិ, អាចរិយេន អាចិក្ខិតព្ពំ – ឯវំ ធោវេយ្យាសីតិ, ឧស្សុក្កំ វា កាតព្ពំ – កិន្តិ នុ ខោ អន្តេវាសិកស្ស ចីវរំ ធោវិយេថាតិ. សចេ អន្តេវាសិកស្ស ចីវរំ កាតព្ពំ ហោតិ, អាចរិយេន អាចិក្ខិតព្ពំ – ឯវំ ករេយ្យាសីតិ, ឧស្សុក្កំ វា កាតព្ពំ – កិន្តិ នុ ខោ អន្តេវាសិកស្ស ចីវរំ ករិយេថាតិ. សចេ អន្តេវាសិកស្ស រជនំ បចិតព្ពំ ហោតិ, អាចរិយេន អាចិក្ខិតព្ពំ – ឯវំ បចេយ្យាសីតិ, ឧស្សុក្កំ វា កាតព្ពំ – កិន្តិ នុ ខោ អន្តេវាសិកស្ស រជនំ បចិយេថាតិ. សចេ អន្តេវាសិកស្ស ចីវរំ រជិតព្ពំ ហោតិ, អាចរិយេន អាចិក្ខិតព្ពំ – ឯវំ រជេយ្យាសីតិ, ឧស្សុក្កំ វា កាតព្ពំ – កិន្តិ នុ ខោ អន្តេវាសិកស្ស ចីវរំ រជិយេថាតិ. ចីវរំ រជន្តេន សាធុកំ សម្បរិវត្តកំ សម្បរិវត្តកំ រជិតព្ពំ. ន ច អច្ឆិន្នេ ថេវេ បក្កមិតព្ពំ. សចេ អន្តេវាសិកោ គិលានោ ហោតិ, យាវជីវំ ឧបដ្ឋាតព្ពោ, វុដ្ឋានមស្ស អាគមេតព្ពំ. ឥទំ ខោ, ភិក្ខវេ, អាចរិយានំ អន្តេវាសិកេសុ វត្តំ យថា អាចរិយេហិ អន្តេវាសិកេសុ សម្មា វត្តិតព្ព’’ន្តិ.

វត្តក្ខន្ធកោ អដ្ឋមោ.

ឥមម្ហិ ខន្ធកេ វត្ថូ ឯកូនវីសតិ, វត្តា ចុទ្ទស.

តស្សុទ្ទានំ –

សឧបាហនា ឆត្តា ច, ឱគុណ្ឋិ សីសំ បានីយំ;

នាភិវាទេ ន បុច្ឆន្តិ, អហិ ឧជ្ឈន្តិ បេសលា.

ឱមុញ្ចិ ឆត្តំ ខន្ធេ ច, អតរញ្ច បដិក្កមំ;

បត្តចីវរំ និក្ខិបា, បតិរូបញ្ច បុច្ឆិតា.

អាសិញ្ចេយ្យ ធោវិតេន, សុក្ខេនល្លេនុបាហនា;

វុឌ្ឍោ នវកោ បុច្ឆេយ្យ, អជ្ឈាវុដ្ឋញ្ច គោចរា.

សេក្ខា វច្ចា បានី បរិ, កត្តរំ កតិកំ តតោ;

កាលំ មុហុត្តំ ឧក្លាបោ, ភូមត្ថរណំ នីហរេ.

បដិបាទោ ភិសិពិព្ពោ, មញ្ចបីឋញ្ច មល្លកំ;

អបស្សេនុល្លោកកណ្ណា, គេរុកា កាឡ អកតា.

សង្ការញ្ច ភូមត្ថរណំ, បដិបាទកំ មញ្ចបីឋំ;

ភិសិ និសីទនម្បិ, មល្លកំ អបស្សេន ច.

បត្តចីវរំ ភូមិ ច, បារន្តំ ឱរតោ ភោគំ;

បុរត្ថិមា បច្ឆិមា ច, ឧត្តរា អថ ទក្ខិណា.

សីតុណ្ហេ ច ទិវារត្តិំ, បរិវេណញ្ច កោដ្ឋកោ;

ឧបដ្ឋានគ្គិ សាលា ច, វត្តំ វច្ចកុដីសុ ច.

បានី បរិភោជនិយា, កុម្ភិ អាចមនេសុ ច;

អនោបមេន បញ្ញត្តំ, វត្តំ អាគន្តុកេហិមេ [វេ (ក. ឯវមុបរិបិ)].

នេវាសនំ ន ឧទកំ, ន បច្ចុ ន ច បានិយំ;

នាភិវាទេ នបញ្ញបេ, ឧជ្ឈាយន្តិ ច បេសលា.

វុឌ្ឍាសនញ្ច ឧទកំ, បច្ចុគ្គន្ត្វា ច បានិយំ;

ឧបាហនេ ឯកមន្តំ, អភិវាទេ ច បញ្ញបេ.

វុត្ថំ គោចរសេក្ខោ ច, ឋានំ បានិយភោជនំ;

កត្តរំ កតិកំ កាលំ, នវកស្ស និសិន្នកេ.

អភិវាទយេ អាចិក្ខេ, យថា ហេដ្ឋា តថា នយេ;

និទ្ទិដ្ឋំ សត្ថវាហេន វត្តំ អាវាសិកេហិមេ.

គមិកា ទារុមត្តិ ច, វិវរិត្វា ន បុច្ឆិយ;

នស្សន្តិ ច អគុត្តញ្ច, ឧជ្ឈាយន្តិ ច បេសលា.

បដិសាមេត្វា ថកេត្វា, អាបុច្ឆិត្វាវ បក្កមេ;

ភិក្ខុ វា សាមណេរោ វា, អារាមិកោ ឧបាសកោ.

បាសាណកេសុ ច បុញ្ជំ, បដិសាមេ ថកេយ្យ ច;

សចេ ឧស្សហតិ ឧស្សុក្កំ, អនោវស្សេ តថេវ ច.

សព្ពោ ឱវស្សតិ គាមំ, អជ្ឈោកាសេ តថេវ ច;

អប្បេវង្គានិ សេសេយ្យុំ, វត្តំ គមិកភិក្ខុនា.

នានុមោទន្តិ ថេរេន, ឱហាយ ចតុបញ្ចហិ;

វច្ចិតោ មុច្ឆិតោ អាសិ, វត្តានុមោទនេសុមេ.

ឆព្ពគ្គិយា ទុន្និវត្ថា, អថោបិ ច ទុប្បារុតា;

អនាកប្បា ច វោក្កម្ម, ថេរេ អនុបខជ្ជនេ.

នវេ ភិក្ខូ ច សង្ឃាដិ, ឧជ្ឈាយន្តិ ច បេសលា;

តិមណ្ឌលំ និវាសេត្វា, កាយសគុណគណ្ឋិកា.

ន វោក្កម្ម បដិច្ឆន្នំ, សុសំវុតោក្ខិត្តចក្ខុ;

ឧក្ខិត្តោជ្ជគ្ឃិកាសទ្ទោ, តយោ ចេវ បចាលនា.

ខម្ភោគុណ្ឋិឧក្កុដិកា, បដិច្ឆន្នំ សុសំវុតោ;

ឱក្ខិត្តុក្ខិត្តឧជ្ជគ្ឃិ, អប្បសទ្ទោ តយោ ចលា.

ខម្ភោគុណ្ឋិបល្លត្ថិ ច, អនុបខជ្ជ នាសនេ;

ឱត្ថរិត្វាន ឧទកេ, នីចំ កត្វាន សិញ្ចិយា.

បដិ សាមន្តា សង្ឃាដិ, ឱទនេ ច បដិគ្គហេ;

សូបំ ឧត្តរិភង្គេន, សព្ពេសំ សមតិត្ថិ ច.

សក្កច្ចំ បត្តសញ្ញី ច, សបទានញ្ច សូបកំ;

ន ថូបតោ បដិច្ឆាទេ, វិញ្ញត្តុជ្ឈានសញ្ញិនា.

មហន្តមណ្ឌលទ្វារំ, សព្ពហត្ថោ ន ព្យាហរេ;

ឧក្ខេបោ ឆេទនាគណ្ឌ, ធុនំ សិត្ថាវការកំ.

ជិវ្ហានិច្ឆារកញ្ចេវ, ចបុចបុ សុរុសុរុ;

ហត្ថបត្តោដ្ឋនិល្លេហំ, សាមិសេន បដិគ្គហេ.

យាវ ន សព្ពេ ឧទកេ, នីចំ កត្វាន សិញ្ចិយំ;

បដិ សាមន្តា សង្ឃាដិ, នីចំ កត្វា ឆមាយ ច.

សសិត្ថកំ និវត្តន្តេ, សុប្បដិច្ឆន្នមុក្កុដិ;

ធម្មរាជេន បញ្ញត្តំ, ឥទំ ភត្តគ្គវត្តនំ.

ទុន្និវត្ថា អនាកប្បា, អសល្លេក្ខេត្វា ច សហសា;

ទូរេ អច្ច ចិរំ លហុំ, តថេវ បិណ្ឌចារិកោ.

បដិច្ឆន្នោវ គច្ឆេយ្យ, សុំសវុតោក្ខិត្តចក្ខុ;

ឧក្ខិត្តោជ្ជគ្ឃិកាសទ្ទោ, តយោ ចេវ បចាលនា.

ខម្ភោគុណ្ឋិឧក្កុដិកា, សល្លក្ខេត្វា ច សហសា;

ទូរេ អច្ច ចិរំ លហុំ, អាសនកំ កដច្ឆុកា.

ភាជនំ វា ឋបេតិ ច, ឧច្ចារេត្វា បណាមេត្វា;

បដិគ្គហេ ន ឧល្លោកេ, សូបេសុបិ តថេវ តំ.

ភិក្ខុ សង្ឃាដិយា ឆាទេ, បដិច្ឆន្នេវ គច្ឆិយំ;

សំវុតោក្ខិត្តចក្ខុ ច, ឧក្ខិត្តោជ្ជគ្ឃិកាយ ច;

អប្បសទ្ទោ តយោ ចាលា, ខម្ភោគុណ្ឋិកឧក្កុដិ.

បឋមាសនវក្ការ, បានិយំ បរិភោជនី;

បច្ឆាកង្ខតិ ភុញ្ជេយ្យ, ឱបិលាបេយ្យ ឧទ្ធរេ.

បដិសាមេយ្យ សម្មជ្ជេ, រិត្តំ តុច្ឆំ ឧបដ្ឋបេ;

ហត្ថវិការេ ភិន្ទេយ្យ, វត្តិទំ បិណ្ឌចារិកេ.

បានី បរិ អគ្គិរណិ, នក្ខត្តទិសចោរា ច;

សព្ពំ នត្ថីតិ កោដ្ដេត្វា, បត្តំសេ ចីវរំ តតោ.

ឥទានិ អំសេ លគ្គេត្វា, តិមណ្ឌលំ បរិមណ្ឌលំ;

យថា បិណ្ឌចារិវត្តំ, នយេ អារញ្ញកេសុបិ.

បត្តំសេ ចីវរំ សីសេ, អារោហិត្វា ច បានិយំ;

បរិភោជនិយំ អគ្គិ, អរណី ចាបិ កត្តរំ.

នក្ខត្តំ សប្បទេសំ វា, ទិសាបិ កុសលោ ភវេ;

សត្តុត្តមេន បញ្ញត្តំ, វត្តំ អារញ្ញកេសុមេ.

អជ្ឈោកាសេ ឱកិរិំសុ, ឧជ្ឈាយន្តិ ច បេសលា;

សចេ វិហារោ ឧក្លាបោ, បឋមំ បត្តចីវរំ.

ភិសិពិព្ពោហនំ មញ្ចំ, បីឋញ្ច ខេឡមល្លកំ;

អបស្សេនុល្លោកកណ្ណា, គេរុកា កាឡ អកតា.

សង្ការំ ភិក្ខុសាមន្តា, សេនាវិហារបានិយំ;

បរិភោជនសាមន្តា, បដិវាតេ ច អង្គណេ.

អធោវាតេ អត្ថរណំ, បដិបាទកមញ្ចោ ច;

បីឋំ ភិសិ និសីទនំ, មល្លកំ អបស្សេន ច.

បត្តចីវរំ ភូមិ ច, បារន្តំ ឱរតោ ភោគំ;

បុរត្ថិមា ច បច្ឆិមា, ឧត្តរា អថ ទក្ខិណា.

សីតុណ្ហេ ច ទិវា រត្តិំ, បរិវេណញ្ច កោដ្ឋកោ;

ឧបដ្ឋានគ្គិសាលា ច, វច្ចកុដី ច បានិយំ.

អាចមនកុម្ភិ វុឌ្ឍេ ច, ឧទ្ទេសបុច្ឆនា សជ្ឈា;

ធម្មោ បទីបំ វិជ្ឈាបេ, ន វិវរេ នបិ ថកេ.

យេន វុឌ្ឍោ បរិវត្តិ, កណ្ណេនបិ ន ឃដ្ដយេ;

បញ្ញបេសិ មហាវីរោ, វត្តំ សេនាសនេសុ តំ.

និវារិយមានា ទ្វារំ, មុច្ឆិតុជ្ឈន្តិ បេសលា;

ឆារិកំ ឆឌ្ឌយេ ជន្តា, បរិភណ្ឌំ តថេវ ច.

បរិវេណំ កោដ្ឋកោ សាលា, ចុណ្ណមត្តិកទោណិកា;

មុខំ បុរតោ ន ថេរេ, ន នវេ ឧស្សហតិ សចេ.

បុរតោ ឧបរិមគ្គោ, ចិក្ខល្លំ មត្តិ បីឋកំ;

វិជ្ឈាបេត្វា ថកេត្វា ច, វត្តំ ជន្តាឃរេសុមេ.

នាចមេតិ យថាវុឌ្ឍំ, បដិបាដិ ច សហសា;

ឧព្ភជិ និត្ថុនោ កដ្ឋំ, វច្ចំ បស្សាវ ខេឡកំ.

ផរុសា កូប សហសា, ឧព្ភជិ ចបុ សេសេន;

ពហិ អន្តោ ច ឧក្កាសេ, រជ្ជុ អតរមានញ្ច.

សហសា ឧព្ភជិ ឋិតេ, និត្ថុនេ កដ្ឋ វច្ចញ្ច;

បស្សាវ ខេឡ ផរុសា, កូបញ្ច វច្ចបាទុកេ.

នាតិសហសា ឧព្ភជិ, បាទុកាយ ចបុចបុ;

ន សេសយេ បដិច្ឆាទេ, ឧហតបិធរេន ច.

វច្ចកុដី បរិភណ្ឌំ, បរិវេណញ្ច កោដ្ឋកោ;

អាចមនេ ច ឧទកំ, វត្តំ វច្ចកុដីសុមេ.

ឧបាហនា ទន្តកដ្ឋំ, មុខោទកញ្ច អាសនំ;

យាគុ ឧទកំ ធោវិត្វា, ឧទ្ធារុក្លាប គាម ច.

និវាសនា កាយពន្ធា, សគុណំ បត្តសោទកំ;

បច្ឆា តិមណ្ឌលោ ចេវ, បរិមណ្ឌល ពន្ធនំ.

សគុណំ ធោវិត្វា បច្ឆា, នាតិទូរេ បដិគ្គហេ;

ភណមានស្ស អាបត្តិ, បឋមាគន្ត្វាន អាសនំ.

ឧទកំ បីឋកថលិ, បច្ចុគ្គន្ត្វា និវាសនំ;

ឱតាបេ និទហិ ភង្គោ, ឱភោគេ ភុញ្ជិតុ នមេ.

បានីយំ ឧទកំ នីចំ, មុហុត្តំ ន ច និទហេ;

បត្តចីវរំ ភូមិ ច, បារន្តំ ឱរតោ ភោគំ.

ឧទ្ធរេ បដិសាមេ ច, ឧក្លាបោ ច នហាយិតុំ;

សីតំ ឧណ្ហំ ជន្តាឃរំ, ចុណ្ណំ មត្តិក បិដ្ឋិតោ.

បីឋញ្ច ចីវរំ ចុណ្ណំ, មត្តិកុស្សហតិ មុខំ;

បុរតោ ថេរេ នវេ ច, បរិកម្មញ្ច និក្ខមេ.

បុរតោ ឧទកេ ន្ហាតេ, និវាសេត្វា ឧបជ្ឈាយំ;

និវាសនញ្ច សង្ឃាដិ, បីឋកំ អាសនេន ច.

បាទោ បីឋំ កថលិញ្ច, បានីយុទ្ទេសបុច្ឆនា;

ឧក្លាបំ សុសោធេយ្យ, បឋមំ បត្តចីវរំ.

និសីទនបច្ចត្ថរណំ, ភិសិ ពិព្ពោហនានិ ច;

មញ្ចោ បីឋំ បដិបាទំ, មល្លកំ អបស្សេន ច.