៣. កាមគុណកថាវណ្ណនា

៥១០. សព្ពេបីតិ កុសលាកុសលក្ខន្ធាទយោបិ. តេសម្បិ ហិ អាលម្ពនត្ថិកតាលក្ខណស្ស កត្តុកម្យតាឆន្ទស្ស វសេន សិយា កមនដ្ឋតាតិ អធិប្បាយោ. ធាតុកថាយំ ‘‘កាមភវោ បញ្ចហិ ខន្ធេហិ ឯកាទសហិ អាយតនេហិ សត្តរសហិ ធាតូហិ សង្គហិតោ. កតិហិ អសង្គហិតោ? ន កេហិចិ ខន្ធេហិ ឯកេនាយតនេន ឯកាយ ធាតុយា អសង្គហិតោ’’តិ អាគតត្តា អាហ ‘‘ឧបាទិន្នក្ខន្ធានមេវ កាមភវភាវោ ធាតុកថាយំ ទស្សិតោ’’តិ. បញ្ចាតិ គណនបរិច្ឆេទោ, តទញ្ញគណននិវត្តនត្ថោតិ ‘‘បញ្ច កាមគុណា’’តិ វចនំ តតោ អញ្ញេសំ តព្ភាវំ និវត្តេតីតិ អាហ ‘‘បញ្ចេវ កាមកោដ្ឋាសា កាមោតិ វុត្តា’’តិ. តតោ ឯវ កាមធាតូតិ វចនំ ន អញ្ញស្ស នាមំ, តេសំយេវ នាមន្តិ អត្ថោ. តយិទំ បរវាទិនោ មតិមត្តន្តិ វុត្តំ ‘‘ឥមិនា អធិប្បាយេនា’’តិ. ឯវំ វចនមត្តន្តិ ឯវំ ‘‘បញ្ចិមេ កាមគុណា’’តិ វចនមត្តំ និស្សាយ, ន បនត្ថស្ស អវិបរីតំ អត្ថន្តិ អត្ថោ.

កាមគុណកថាវណ្ណនា និដ្ឋិតា.