៥. បរិភោគមយបុញ្ញកថាវណ្ណនា

៤៨៥. តស្សា លទ្ធិយាតិ បញ្ចន្នំ វិញ្ញាណានំ សមោធានំ ហោតីតិ លទ្ធិយា. ឯតេសន្តិ វត្តមានចិត្តបរិភោគមយបុញ្ញានំ.

៤៨៦. អយំ វាទោ ហីយតិ បរិភោគស្សេវ អភាវតោ. ចាគចេតនាយ ឯវ បុញ្ញភាវោ, ន ចិត្តវិប្បយុត្តស្ស. ឯវន្តិ ឥមិនា បការេន, អបរិភុត្តេ ទេយ្យធម្មេ បុញ្ញភាវេនាតិ អត្ថោ. អបរិភុត្តេ ទេយ្យធម្មេ បុញ្ញភាវតោ ឯវ ហិ បុថុជ្ជនកាលេ ទិន្នំ អរហា ហុត្វា បរិភុញ្ជន្តេ តម្បិ បុថុជ្ជនេ ទានមេវាតិ និច្ឆិតំ. បរវាទីបដិក្ខេបមុខេន សកវាទំ បតិដ្ឋាបេតិ បឋមោ អត្ថវិកប្បោ, ទុតិយោ បន ឧជុកមេវ សកវាទំ បតិដ្ឋាបេតីតិ អយមេតេសំ វិសេសោ.

បរិភោគមយបុញ្ញកថាវណ្ណនា និដ្ឋិតា.