៨. និយាមោក្កន្តិកថាវណ្ណនា

៤០៣. បារមីបូរណន្តិ ឥទំ ពោធិចរិយាយ ឧបលក្ខណំ, ន បារមីនំ បុណ្ណភាវទស្សនំ. តេន តេសំ អារម្ភសមាទានាទីនម្បិ សង្គហោ កតោតិ ទដ្ឋព្ពំ. មហាភិនីហារតោ បដ្ឋាយ ហិ មហាសត្តា និយតាតិ វុច្ចន្តិ. យថាហ – ‘‘ឯវំ សព្ពង្គសម្បន្នា, ពោធិយា និយតា នរា’’តិ, ‘‘ធុវំ ពុទ្ធោ ភវិស្សតី’’តិ ច, ន និយាមស្ស នាម កស្សចិ ធម្មស្ស ឧប្បន្នត្តា ព្យាករោន្តិ, អថ ខោ ឯកំសេនាយំ បារមិយោ បូរេត្វា ពុទ្ធោ ភវិស្សតីតិ កត្វា ព្យាករោន្តីតិ បរវាទីបរិកប្បិតំ ធម្មន្តរំ បដិសេធេតិ, ន ពោធិយា និយតត្តំ. តេនាហ ‘‘កេវលញ្ហិ ន’’ន្តិអាទិ.

និយាមោក្កន្តិកថាវណ្ណនា និដ្ឋិតា.