២. អរិយន្តិកថាវណ្ណនា

៣៥៧. សង្ខារេ សន្ធាយ បដិជានន្តស្សាតិ ទិដ្ឋិយា បរិកប្បិតេន សត្តេន សុញ្ញេ សង្ខារេ សន្ធាយ ‘‘សុញ្ញតញ្ច មនសិ ករោតី’’តិ បុច្ឆាយ ‘‘អាមន្តា’’តិ បដិជានន្តស្ស. ទ្វិន្នំ ផស្សានំ សមោធានំ កថំ អាបជ្ជតិ ឋានាឋានភូតេ សង្ខារេ វុត្តនយេន សុញ្ញតំ មនសិ ករោន្តស្សាតិ អធិប្បាយោ. យថាវុត្តនយេនាតិ ‘‘ទិដ្ឋិយា បរិកប្បិតេន សត្តេន សុញ្ញា បញ្ចក្ខន្ធា’’តិ បការេន នយេន. អថ វា យថាវុត្តនយេនាតិ ‘‘ឋានាឋានមនសិការោ សង្ខារារម្មណោ, សុញ្ញតាមនសិការោ និព្ពានារម្មណោ’’តិ ឯវំ វុត្តនយេន. ‘‘សង្ខារេ សន្ធាយ បដិជានន្តស្សា’’តិ វុត្តត្តា ‘‘ទ្វិន្នំ ផស្សានំ សមោធានំ កថំ អាបជ្ជតី’’តិ អាហ. សត្តសុញ្ញតាយ សុញ្ញត្តេបិ សង្ខារានំ អញ្ញោវ ឋានាឋានមនសិការោ, អញ្ញោ សុញ្ញតាមនសិការោតិ យុជ្ជតេវ ទ្វិន្នំ ផស្សានំ សមោធានាបត្តិចោទនា, សង្ខារេ សន្ធាយ បដិជានន្តស្ស បន កថំ អរិយភាវសិទ្ធិ ឋានាឋានញាណាទីនន្តិ វិចារេតព្ពំ. កិំ វា ឯតាយ យុត្តិចិន្តាយ. ឧម្មត្តកបច្ឆិសទិសោ ហិ បរវាទិវាទោ. អញ្ញេសុបិ ឋានេសុ ឦទិសេសុ ឯសេវ នយោ. អារោបេត្វាតិ ឥត្ថិបុរិសាទិអាការំ, សត្តាការមេវ វា អសន្តំ រូបាទិឧបាទានេ អារោបេត្វា. អភូតារោបនញ្ហេត្ថ បណិទហនន្តិ អធិប្បេតំ. តេនាហ ‘‘បរិកប្បនវសេនា’’តិ. សោតិ យថាវុត្តោ បណិធិ. ឯកស្មិម្បិ ខន្ធេ.

អរិយន្តិកថាវណ្ណនា និដ្ឋិតា.