៤. វិមុច្ចមានកថាវណ្ណនា

៣៦៦. មគ្គក្ខណេ ចិត្តំ ឯកទេសេន វិមុត្តំ ឯកទេសេន អវិមុត្តន្តិ អយំ ‘‘វិមុត្តំ វិមុច្ចមាន’’ន្តិ លទ្ធិយា ទោសោ. តថា ហិ វុត្តំ ‘‘ឯកទេសំ វិមុត្តំ, ឯកទេសំ អវិមុត្ត’’ន្តិ. អដ្ឋកថាយញ្ច ‘‘តញ្ហិ តទា សមុច្ឆេទវិមុត្តិយា វិមុត្តេកទេសេន វិមុច្ចមានន្តិស្ស លទ្ធី’’តិ ទស្សិតោវាយមត្ថោ. វិប្បកតនិទ្ទេសេតិ វិមុច្ចនកិរិយាយ អបរិយោសិតតានិទ្ទេសេ. យំ សន្ធាយាហ ‘‘វិមុត្តំ វិមុច្ចមានន្តិ វិប្បកតភាវេន វុត្តត្តា’’តិ. តេនាតិ បរវាទិនា. វិមុច្ច…បេ… វុត្តំ វិមុច្ចមានស្ស វិមុត្តភាវាភាវតោ, វិមុត្តភេទេន បន តថា វុត្តន្តិ អធិប្បាយោ. សតិ ច ទោសេ វិប្បកតនិទ្ទេសេតិ អានេត្វា យោជេតព្ពំ. ឯកទេសោ វិសេសនំ ហោតិ និប្បទេសវិមុត្តិយា អវិច្ឆិន្នតោ. ផលចិត្តេនាតិ បឋមផលចិត្តេន ឧប្បន្នេន.

វិមុច្ចមានកថាវណ្ណនា និដ្ឋិតា.