៩. អបរិនិប្ផន្នកថាវណ្ណនា

៩១៧-៩១៨. អនិច្ចាទិកោ ភាវោតិ អនិច្ចសង្ខារបដិច្ចសមុប្បន្នតាទិកោ ភាវោ ធម្មោ បកតិ ឯតស្សាតិ អត្ថោ. ទុក្ខញ្ញេវ បរិនិប្ផន្នន្តិ ‘‘ទុក្ខសច្ចំ សន្ធាយ បុច្ឆា កតា, ន ទុក្ខតាមត្ត’’ន្តិ អយមត្ថោ វិញ្ញាយតិ ‘‘ន កេវលញ្ហិ បឋមសច្ចមេវ ទុក្ខ’’ន្តិ វចនេន. តថា សតិ បរវាទិនា ចក្ខាយតនាទីនំ អញ្ញេសញ្ច តំសរិក្ខកានំ ធម្មានំ បរិនិប្ផន្នតា នានុជានិតព្ពា សិយា. កស្មា? តេសម្បិ ហិ ទុក្ខសច្ចេន សង្គហោ, ន ឥតរសច្ចេហិ. យញ្ហិ សមុទយសច្ចតោ និព្ពត្តំ, តំ និប្បរិយាយតោ ទុក្ខសច្ចំ, ឥតរំ សង្ខារទុក្ខតាយ ទុក្ខន្តិ ឥមមត្ថំ ទស្សេន្តោ ‘‘ន កេវលញ្ហី’’តិអាទិមាហ. តត្ថ ន ហិ អនុបាទិន្នានីតិ ឥមិនា ចក្ខាយតនាទីនំ សមុទយសច្ចេន សង្គហាភាវមាហ. លោកុត្តរានីតិ ឥមិនា និរោធមគ្គសច្ចេហិ. យទិ ឯវមេត្ថ យុត្តិ វត្តព្ពា, កិមេត្ថ វត្តព្ពំ? សភាវោ ហេស បរវាទិវាទស្ស, យទិទំ បុព្ពេនាបរមសំសន្ទនំ. តថា ហិ សោ វិញ្ញូហិ បដិក្ខិត្តោ. តថា ចេវ តំ អម្ហេហិ តត្ថ តត្ថ វិភាវិតំ. ឯតន្តិ ‘‘រូបំ អបរិនិប្ផន្នំ, ទុក្ខញ្ញេវ បរិនិប្ផន្ន’’ន្តិ យទេតំ តយា វុត្តំ, ឯតំ នោ វត រេ វត្តព្ពេ. កស្មា? រូបស្ស ច ទុក្ខត្តា. រូបញ្ហិ អនិច្ចំ ទុក្ខាធិដ្ឋានញ្ច. តេន វុត្តំ ‘‘យទនិច្ចំ តំ ទុក្ខំ. សំខិត្តេន បញ្ចុបាទានក្ខន្ធា ទុក្ខា’’តិ ច.

អបរិនិប្ផន្នកថាវណ្ណនា និដ្ឋិតា.

តេវីសតិមវគ្គវណ្ណនា និដ្ឋិតា.

កថាវត្ថុបករណ-អនុដីកា សមត្តា.

នមោ តស្ស ភគវតោ អរហតោ សម្មាសម្ពុទ្ធស្ស