៧. សត្តកនិទ្ទេសវណ្ណនា

២០៣. កុសលេសុ ធម្មេសូតិ អាធារេ ភុម្មំ, ន វិសយេតិ ទស្សេន្តោ ‘‘កុសលេសុ ធម្មេសុ អន្តោគធា’’តិ អាហ. ឥទានិ វិសយលក្ខណំ ឯតំ ភុម្មន្តិ ទស្សេន្តោ ‘‘ពោធិបក្ខិយធម្មេសុ វា’’តិអាទិមាហ. ‘‘តទុបការតាយា’’តិ ឥទំ កុសលេសុ ធម្មេសុ សាធេតព្ពេសូតិ ឥមមត្ថំ សន្ធាយ វុត្តំ. ឧម្មុជ្ជនបញ្ញាយាតិ ឧម្មុជ្ជាបនបញ្ញាយ, ឧម្មុជ្ជនាការេន វា បវត្តបញ្ញាយ. តេនេវាតិ ឧម្មុជ្ជនមត្តត្តា ឯវ. យថា ហិ ញាណុប្បាទោ សំកិលេសបក្ខតោ ឧម្មុជ្ជនំ, ឯវំ សទ្ធុប្បាទោបីតិ អាហ ‘‘សទ្ធាសង្ខាតមេវ ឧម្មុជ្ជន’’ន្តិ. ចិត្តវារោតិ ចិត្តប្បពន្ធវារោ. បច្ចេកំ ឋានវិបស្សនាបតរណបតិគាធប្បត្តិនិដ្ឋត្តា តេសំ បុគ្គលានំ ‘‘អនេកេ បុគ្គលា’’តិ វុត្តំ. កស្មា? តេនត្តភាវេន អរហត្តស្ស អគ្គហណតោ. តតិយបុគ្គលាទិភាវន្តិ ឧម្មុជ្ជិត្វា ឋិតបុគ្គលាទិភាវំ.

សត្តកនិទ្ទេសវណ្ណនា និដ្ឋិតា.