៥. ចិត្តាគារវគ្គវណ្ណនា

៩៧៨. ចិត្តាគារវគ្គស្ស បឋមេ កីឡនឧបវនន្តិ អន្តោនគរេ ឋិតំ សន្ធាយ វុត្តំ, កីឡនុយ្យានន្តិ ពហិនគរេ ឋិតំ សន្ធាយ. បាដេក្កា អាបត្តិយោតិ គីវាយ បរិវដ្ដនប្បយោគគណនាយ អាបត្តិយោ, ន ឧម្មីលនគណនាយ. ‘‘អជ្ឈារាមេ រាជាគារាទីនិ ករោន្តិ, តានិ បស្សន្តិយា អនាបត្តី’’តិ វចនតោ ‘‘អន្តោអារាមេ តត្ថ តត្ថ គន្ត្វា នច្ចាទីនិ បស្សិតុំ លភតី’’តិបិ សិទ្ធំ.

៩៨២. ទុតិយាទីនិ ឧត្តានត្ថានេវ.

១០១៥. នវមេ ហត្ថិអាទីសុ សិប្ប-សទ្ទោ បច្ចេកំ យោជេតព្ពោ, តថា អាថព្ពណាទីសុ មន្ត-សទ្ទោ. តត្ថ អាថព្ពណមន្តោ នាម អាថព្ពណវេទវិហិតោ បរូបឃាតករោ មន្តោ, ខីលនមន្តោ នាម ទារុសារខីលំ មន្តេត្វា បថវិយំ បវេសេត្វា មារណមន្តោ, អគទប្បយោគោ វិសយោជនំ. នាគមណ្ឌលន្តិ សប្បានំ បវេសនិវារណត្ថំ មណ្ឌលពទ្ធមន្តោ.

១០១៨. ទសមំ ឧត្តានត្ថមេវ.

ចិត្តាគារវគ្គវណ្ណនា និដ្ឋិតា.

១០២១. អារាមវគ្គេ សព្ពំ ឧត្តានត្ថមេវ.

១០៦៧. គព្ភិនិវគ្គេបិ សព្ពំ សុវិញ្ញេយ្យមេវ.