បឋមគាថាសង្គណិកំ

សត្តនគរេសុ បញ្ញត្តសិក្ខាបទវណ្ណនា

៣៣៥. អឌ្ឍុឌ្ឍសតានីតិ តីណិ សតានិ បញ្ញាសញ្ច សិក្ខាបទានិ. វិគ្គហន្តិ មនុស្សវិគ្គហំ. អតិរេកន្តិ ទសាហបរមំ អតិរេកចីវរំ. កាឡកន្តិ ‘‘សុទ្ធកាឡកាន’’ន្តិ វុត្តកាឡកំ. ភូតន្តិ ភូតារោចនំ. បរម្បរភត្តន្តិ បរម្បរភោជនំ. ភិក្ខុនីសុ ច អក្កោសោតិ ‘‘យា បន ភិក្ខុនី ភិក្ខុំ អក្កោសេយ្យ វា បរិភាសេយ្យ វា’’តិ (បាចិ. ១០២៩) វុត្តសិក្ខាបទំ. អន្តរវាសកន្តិ អញ្ញាតិកាយ ភិក្ខុនិយា ចីវរបដិគ្គណ្ហនំ. រូបិយន្តិ រូបិយសំវោហារំ. សុត្តន្តិ ‘‘សាមំ សុត្តំ វិញ្ញាបេត្វា តន្តវាយេហី’’តិ (បារា. ៦៣៧) វុត្តសិក្ខាបទំ. ឧជ្ឈាបនកេតិ ឧជ្ឈាបនកេ ខិយ្យនកេ បាចិត្តិយំ. បាចិតបិណ្ឌន្តិ ភិក្ខុនីបរិបាចិតំ. ចីវរំ ទត្វាតិ ‘‘សមគ្គេន សង្ឃេន ចីវរំ ទត្វា’’តិ (បាចិ. ៤៨៥) វុត្តសិក្ខាបទំ. វោសាសន្តីតិ ‘‘ភិក្ខូ បនេវ កុលេសុ និមន្តិតា ភុញ្ជន្តិ, តត្រ ចេសា ភិក្ខុនី’’តិ (បាចិ. ៥៥៨) វុត្តបាដិទេសនីយំ. គិរគ្គន្តិ ‘‘យា បន ភិក្ខុនី នច្ចំ វា គីតំ វា’’តិ (បាចិ. ៨៣៤) វុត្តសិក្ខាបទំ. ចរិយាតិ ‘‘អន្តោវស្សំ ចារិកំ ចរេយ្យា’’តិ (បាចិ. ៩៧០) ច, ‘‘វស្សំវុត្ថា ចារិកំ ន បក្កមេយ្យា’’តិ (បាចិ. ៩៧៤) ច វុត្តសិក្ខាបទទ្វយំ. ឆន្ទទានេនាតិ បារិវាសិកេន ឆន្ទទានេន.

បារាជិកានិ ចត្តារីតិ ភិក្ខុនីនំ ចត្តារិ បារាជិកានិ. កុដីតិ កុដិការសិក្ខាបទំ. កោសិយន្តិ កោសិយមិស្សកសិក្ខាបទំ. សេយ្យាតិ អនុបសម្បន្នេន សហសេយ្យសិក្ខាបទំ. ខណនេតិ បថវីខណនំ. គច្ឆ ទេវតេតិ ភូតគាមសិក្ខាបទំ. សិញ្ចន្តិ សប្បាណកឧទកសិញ្ចនំ. មហាវិហារោតិ មហល្លកវិហារោ. អញ្ញន្តិ អញ្ញវាទកំ. ទ្វារន្តិ យាវ ទ្វារកោសា. សហធម្មោតិ សហធម្មិកំ វុច្ចមានោ. បយោបានន្តិ សុរុសុរុការកំ. ឯឡកលោមានីតិ ឯឡកលោមធោវាបនំ. បត្តោតិ ឩនបញ្ចពន្ធនបត្តោ. ឱវាទោតិ ភិក្ខុនុបស្សយំ ឧបសង្កមិត្វា ឱវាទោ. ភេសជ្ជន្តិ តទុត្តរិភេសជ្ជវិញ្ញាបនំ. សូចីតិ អដ្ឋិមយាទិសូចិឃរំ. អារញ្ញិកោតិ ‘‘យានិ ខោ បន តានិ អារញ្ញកានិ សេនាសនានី’’តិអាទិនា (បាចិ. ៥៧០) វុត្តបាដិទេសនីយំ. ឱវាទោតិ ‘‘យា បន ភិក្ខុនី ឱវាទាយ វា សំវាសាយ វា ន គច្ឆេយ្យា’’តិ (បាចិ. ១០៥៥) វុត្តសិក្ខាបទំ.

បារាជិកានិ ចត្តារីតិអាទិនា ឆសុ នគរេសុ បញ្ញត្តំ ឯកតោ សម្បិណ្ឌិត្វា សាវត្ថិយា បញ្ញត្តំ វិសុំ គណេត្វា សព្ពានេវ សិក្ខាបទានិ ទ្វីហិ រាសីហិ សង្គណ្ហាតិ.

សត្តនគរេសុ បញ្ញត្តសិក្ខាបទវណ្ណនា និដ្ឋិតា.

ចតុវិបត្តិវណ្ណនា

៣៣៦. ឯកតិំស គរុកា នាម ឧភតោ អដ្ឋ បារាជិកា, ភិក្ខូនំ តេរស, ភិក្ខុនីនំ ទស សង្ឃាទិសេសា. អដ្ឋេត្ថ អនវសេសាតិ ឯតេសុ យថាវុត្តគរុកេសុ សាធារណាសាធារណវសេន អដ្ឋ បារាជិកា អនវសេសា នាម.

អសាធារណាទិវណ្ណនា

៣៣៨. ‘‘ធោវនញ្ច បដិគ្គហោ’’តិ គាថា អដ្ឋកថាចរិយានំ. តត្ថ ធោវនញ្ច បដិគ្គហោតិ អញ្ញាតិកាយ ភិក្ខុនិយា ចីវរធោវាបនំ ចីវរបដិគ្គហណញ្ច. កោសេយ្យ…បេ… ទ្វេ លោមាតិ ឯឡកលោមវគ្គេ អាទិតោ សត្ត សិក្ខាបទានិ វុត្តានិ. វស្សិកាតិ វស្សិកសាដិកសិក្ខាបទំ. អារញ្ញកេន ចាតិ សាសង្កសិក្ខាបទំ វុត្តំ. បណីតន្តិ បណីតភោជនវិញ្ញត្តិ. ឩនន្តិ ឩនវីសតិវស្សសិក្ខាបទំ. និសីទនេ ច យា សិក្ខា, វស្សិកា យា ច សាដិកាតិ និសីទនវស្សិកសាដិកានំ បមាណាតិក្កមោ.

អាបត្តិក្ខន្ធា ចេវ ឧបោសថាទីនិ ច ‘‘បារាជិកសង្ឃាទិសេសា’’តិអាទិនា វិភត្តត្តា ‘‘វិភត្តិយោ’’តិ វុត្តានិ. តេវីសតិ សង្ឃាទិសេសាតិ ភិក្ខុនីនំ អាគតានិ ទស, ភិក្ខូនំ តេរសាតិ តេវីសតិ. ទ្វេចត្តាលីស និស្សគ្គិយាតិអាទីសុបិ ឯសេវ នយោ. ទ្វីហិ…បេ… កិច្ចំ ឯកេន សម្មតីតិ ទ្វីហិ វិវាទាធិករណំ, ចតូហិ អនុវាទាធិករណំ, តីហិ អាបត្តាធិករណំ, ឯកេន កិច្ចាធិករណំ សម្មតីតិ អត្ថោ.

៣៣៩. និរង្កតោតិ សង្ឃម្ហា អបសារិតោ.