អធិករណភេទវណ្ណនា

៣៤០. យស្មា អធិករណំ ឧក្កោដេន្តោ សមថប្បត្តមេវ ឧក្កោដេតិ, តស្មា ‘‘វិវាទាធិករណំ ឧក្កោដេន្តោ កតិ សមថេ ឧក្កោដេតី’’តិអាទិ វុត្តំ.

៣៤១. បាឡិមុត្តកវិនិច្ឆយេនេវាតិ វិនយលក្ខណំ វិនា កេវលំ ធម្មទេសនាមត្តវសេនេវាតិ អត្ថោ. យេនាបិ វិនិច្ឆយេនាតិ បាឡិមុត្តកវិនិច្ឆយមេវ សន្ធាយ វុត្តំ. ខន្ធកតោ ច បរិវារតោ ច សុត្តេនាតិ ខន្ធកបរិវារតោ អានីតសុត្តេន. និជ្ឈាបេន្តីតិ បញ្ញាបេន្តិ.

៣៤២. កិច្ចំ និស្សាយ ឧប្បជ្ជនកកិច្ចានន្តិ បុព្ពេ កតឧក្ខេបនីយាទិកិច្ចំ និស្សាយ ឧប្បជ្ជនកកិច្ចានំ. កីទិសានំ? យាវតតិយសមនុភាសនាទីនំ.

៣៤៣. តំ ហីតិ តំ វិវាទាធិករណំ.

៣៤៤. អធិករណេសុ យេន អធិករណេន សម្មន្តិ, តំ ទស្សេតុំ វុត្តន្តិ យទា អធិករណេហិ សម្មន្តិ, តទា កិច្ចាធិករណេនេវ សម្មន្តិ, ន អញ្ញេហិ អធិករណេហីតិ ទស្សនត្ថំ វុត្តន្តិ អធិប្បាយោ.

៣៥៣. ‘‘សត្តន្នំ សមថានំ កតមេ ឆត្តិំស សមុដ្ឋានា’’តិ បុច្ឆិត្វាបិ ‘‘កម្មស្ស កិរិយា ករណ’’ន្តិអាទិនា សម្មុខាវិនយស្ស សមុដ្ឋានានិ អវិភជិត្វាវ សតិវិនយាទីនំ ឆន្នញ្ញេវ ឆ សមុដ្ឋានានិ វិភត្តានិ, តំ កស្មាតិ អាហ ‘‘កិញ្ចាបិ សត្តន្នំ សមថាន’’ន្តិអាទិ. សតិវិនយាទីនំ វិយ សង្ឃសម្មុខតាទីនំ កិច្ចយតា នាម នត្ថីតិ អាហ ‘‘កម្មសង្គហាភាវេនា’’តិ.