ឧបោសថាទិបុច្ឆាវិស្សជ្ជនាវណ្ណនា

៣៣២. ‘‘សង្ឃំ, ភន្តេ, បវារេមីតិអាទិ បវារណាកថា នាមា’’តិ គណ្ឋិបទេសុ វុត្តំ.

អត្ថវសបករណវណ្ណនា

៣៣៤. បឋមបារាជិកវណ្ណនាយមេវ វុត្តន្តិ ‘‘សង្ឃសុដ្ឋុតាយា’’តិអាទីនំ អត្ថវណ្ណនំ សន្ធាយ វុត្តំ. ទសក្ខត្តុំ យោជនាយ បទសតំ វុត្តន្តិ ឯកមូលកនយេ ទសក្ខត្តុំ យោជនាយ កតាយ សង្ខលិកនយេ វុត្តបទេហិ សទ្ធិំ បទសតំ វុត្តន្តិ ឯវមត្ថោ គហេតព្ពោ. អញ្ញថា ឯកមូលកេ ឯវ នយេ ន សក្កា បទសតំ លទ្ធុំ. ឯកមូលកនយេហិ បុរិមបច្ឆិមបទានិ ឯកតោ កត្វា ឯកេកស្មិំ វារេ នវ នវ បទានិ វុត្តានីតិ ទសក្ខត្តុំ យោជនាយ នវុតិ បទានិយេវ លព្ភន្តិ. តស្មា តានិ នវុតិ បទានិ សង្ខលិកនយេ ពទ្ធចក្កវសេន យោជិតេ ទស បទានិ លព្ភន្តីតិ តេហិ សទ្ធិំ បទសតន្តិ សក្កា វត្តុំ. ឥតោ អញ្ញថា បន ឧភោសុបិ នយេសុ វិសុំ វិសុំ អត្ថសតំ ធម្មសតញ្ច យថា លព្ភតិ, តថា បឋមបារាជិកសំវណ្ណនាយមេវ អម្ហេហិ ទស្សិតំ, តំ តត្ថ វុត្តនយេនេវ គហេតព្ពំ. បុរិមបច្ឆិមបទានិ ឯកត្តេន គហេត្វា ‘‘បទសត’’ន្តិ វុត្តត្តា ‘‘តត្ថ បច្ឆិមស្ស បច្ឆិមស្ស បទស្ស វសេន អត្ថសតំ, បុរិមស្ស បុរិមស្ស វសេន ធម្មសត’’ន្តិ វុត្តំ. តស្មិំ បទសតេ ‘‘សង្ឃសុដ្ឋូ’’តិអាទិនា វុត្តបុរិមបទានំ វសេន ធម្មសតំ, ‘‘សង្ឃផាសូ’’តិអាទិនា វុត្តបច្ឆិមបទានំ វសេន អត្ថសតន្តិ អធិប្បាយោ.

មហាវគ្គវណ្ណនា និដ្ឋិតា.