សេទមោចនគាថា

អវិប្បវាសាទិបញ្ហវណ្ណនា

៤៧៩. សេទមោចនគាថាសុ តហិន្តិ តស្មិំ បុគ្គលេ. ‘‘អកប្បិយសម្ភោគោ នាម មេថុនធម្មាទី’’តិ គណ្ឋិបទេសុ វុត្តំ. ឯសា បញ្ហា កុសលេហិ ចិន្តិតាតិ លិង្គវិបល្លាសវសេនេតំ វុត្តំ, ឯសោ បញ្ហោ កុសលេហិ ចិន្តិតោតិ អត្ថោ.

ទសាតិ អវន្ទិយេ ទស. ឯកាទសាតិ បណ្ឌកាទយោ ឯកាទស. ឧព្ភក្ខកេ ន វទាមីតិ ឥមិនា មុខេ មេថុនធម្មាភាវំ ទីបេតិ. អធោនាភិំ វិវជ្ជិយាតិ ឥមិនា វច្ចមគ្គបស្សាវមគ្គេសុ.

គាមន្តរបរិយាបន្នំ នទីបារំ ឱក្កន្តភិក្ខុនិំ សន្ធាយាតិ ឯត្ថ នទី ភិក្ខុនិយា គាមបរិយាបន្នា, បរតីរំ គាមន្តរបរិយាបន្នំ. តត្ថ បរតីរេ បឋមលេឌ្ឌុបាតប្បមាណោ គាមូបចារោ នទីបរិយន្តេន បរិច្ឆិន្នោ, តស្មា បរតីរេ រតនមត្តម្បិ អរញ្ញំ នត្ថិ, បរតីរញ្ច តិណាទីហិ បដិច្ឆន្នត្តា ទស្សនូបចារវិរហិតំ ករោតិ. តត្ថ អត្តនោ គាមេ អាបត្តិ នត្ថិ, បរតីរេ បន បឋមលេឌ្ឌុបាតសង្ខាតេ គាមូបចារេយេវ បាទំ ឋបេតិ. អន្តរេ អភិធម្មេ វុត្តនយេន អរញ្ញភូតំ សកគាមំ អតិក្កមតិ នាម, តស្មា គណម្ហា ឱហីយនា នាម ហោតីតិ វេទិតព្ពំ.

ភិក្ខូនំ សន្តិកេ ឯកតោឧបសម្បន្នា នាម មហាបជាបតិបមុខា បញ្ចសតសាកិនិយោ ភិក្ខុនិយោ. មហាបជាបតិបិ ហិ អានន្ទត្ថេរេន ទិន្នឱវាទស្ស បដិគ្គហិតត្តា ភិក្ខូនំ សន្តិកេ ឧបសម្បន្នា នាម.

បារាជិកាទិបញ្ហវណ្ណនា

៤៨០. សហ ទុស្សេន មេថុនវីតិក្កមស្ស សក្កុណេយ្យតាយ ‘‘ទុស្សកុដិអាទីនិ សន្ធាយា’’តិ វុត្តំ. លិង្គបរិវត្តំ សន្ធាយ វុត្តាតិ ‘‘លិង្គបរិវត្តេ សតិ បដិគ្គហណស្ស វិជហនតោ សាមំ គហេត្វា ភុញ្ជិតុំ ន វដ្ដតី’’តិ លិង្គបរិវត្តនំ សន្ធាយ វុត្តា.

៤៨១. សុប្បតិដ្ឋិតនិគ្រោធសទិសន្តិ យោជនទ្វិយោជនាទិបរមំ មហានិគ្រោធំ សន្ធាយ វុត្តំ.

សេទមោចនគាថាវណ្ណនា និដ្ឋិតា.