អបរទុតិយគាថាសង្គណិកំ

កាយិកាទិអាបត្តិវណ្ណនា

៤៧៤. វិនយេ គរុកា វិនយគរុកា. កិញ្ចាបិ ឥទំ ទ្វីសុ គាថាសុ អាគតំ, អញ្ញេហិ បន មិស្សេត្វា វុត្តភាវតោ នានាករណំ បច្ចេតព្ពំ.

ទេសនាគាមិនិយាទិវណ្ណនា

៤៧៥. ទ្វេ សំវាសកភូមិយោតិ ឯត្ថ ភូមីតិ អវត្ថា. អង្គហីនតា ការណវេកល្លវសេនបិ វេទិតព្ពាតិ អាហ ‘‘អបិចេត្ថា’’តិអាទិ. ឯស នយោតិ ‘‘អបិចេត្ថា’’តិអាទិនា វុត្តនយោ. វនប្បតិំ ឆិន្ទន្តស្ស បារាជិកន្តិ អទិន្នាទានេ វនប្បតិកថាយ អាគតំ បរសន្តកំ សន្ធាយ វុត្តំ. វិស្សដ្ឋិឆឌ្ឌនេតិ សុក្កវិស្សដ្ឋិយា មោចនេ. ទុក្កដា កតាតិ ទុក្កដំ វុត្តំ. បឋមសិក្ខាបទម្ហិយេវាតិ ភិក្ខុនោវាទកវគ្គស្ស បឋមសិក្ខាបទេយេវ. អាមកធញ្ញំ វិញ្ញាបេត្វា ភុញ្ជន្តិយា បុព្ពបយោគេ ទុក្កដំ, អជ្ឈោហារេ បាចិត្តិយំ.

បាចិត្តិយវណ្ណនា

៤៧៦. អព្ភុណ្ហសីលោតិ អភិនវសីលោ.

៤៧៨. អសុត្តកន្តិ សុត្តវិរហិតំ, សុត្តតោ អបនីតំ នត្ថីតិ អត្ថោ.