៦. សុរុសុរុវគ្គវណ្ណនា

៦២៧. ឆដ្ឋវគ្គេ សីតីកតោតិ សីតដ្ដោ, សីតបីឡិតោតិ វុត្តំ ហោតិ. សិលកពុទ្ធោតិ បរិហាសវចនមេតំ. សិលកញ្ហិ កញ្ចិ ទិស្វា ‘‘ពុទ្ធោ អយ’’ន្តិ វោហរន្តិ.

៦៣៤. វិលីវច្ឆត្តន្តិ វេណុវិលីវេហិ កតំ ឆត្តំ. តត្ថជាតកទណ្ឌកេន កតន្តិ តាលបណ្ណំ សហ ទណ្ឌកេន ឆិន្ទិត្វា តមេវ ឆត្តទណ្ឌំ ករោន្តិ គោបាលកាទយោ វិយ, តំ សន្ធាយេតំ វុត្តំ. ឆត្តបាទុកាយ វា ឋិតំ ហោតីតិ ឯត្ថ ឆត្តបាទុកា វុច្ចតិ ឆត្តាធារោ. យស្មិំ ឆត្តំ អបតមានំ កត្វា ឋបេន្តិ, តាទិសិកាយ ឆត្តបាទុកាយ ឋិតំ ឆត្តំ ‘‘ឆត្ត’’ន្តិ អជ្ឈាហរិតព្ពំ. ‘‘ឆត្តំ ឆត្តបាទុកាយ ឋិត’’ន្តិបិ បឋន្តិ, តត្ថាបិ អយមេវត្ថោ.

៦៣៧. ចាបោតិ មជ្ឈេ វង្កា កាចទណ្ឌសទិសា ធនុវិកតិ. កោទណ្ឌោតិ វដ្ដលទណ្ឌា ធនុវិកតិ. បដិមុក្កន្តិ បវេសិតំ លគ្គិតំ.

សុរុសុរុវគ្គវណ្ណនា និដ្ឋិតា.