៩. វិកប្បនសិក្ខាបទវណ្ណនា

៣៧៤. នវមេ អបច្ចុទ្ធារណន្តិ ‘‘មយ្ហំ សន្តកំ បរិភុញ្ជ វា វិស្សជ្ជេហិ វា’’តិអាទិនា អកតបច្ចុទ្ធារំ. យេន វិនយកម្មំ កតន្តិ យេន សទ្ធិំ វិនយកម្មំ កតំ. តិំសកវណ្ណនាយន្តិ និស្សគ្គិយវណ្ណនាយំ. បរិភោគេន កាយកម្មំ, អបច្ចុទ្ធារាបនេន វចីកម្មំ. សេសមេត្ថ ឧត្តានមេវ. សាមំ វិកប្បិតស្ស អបច្ចុទ្ធារោ, វិកប្បនុបគចីវរតា, បរិភោគោតិ ឥមានិ បនេត្ថ តីណិ អង្គានិ.

វិកប្បនសិក្ខាបទវណ្ណនា និដ្ឋិតា.