១. អចេលកសិក្ខាបទវណ្ណនា

២៧៣. អចេលកវគ្គស្ស បឋមសិក្ខាបទេ តេសន្តិ តិត្ថិយានំ. តត្ថាតិ ភាជនេ. ឥតោតិ បត្តតោ. សចេ តិត្ថិយោ វទតីតិ ‘‘បឋមមេវ មំ សន្ធាយ អភិហរិត្វា ឋបិតំ មយ្ហំ សន្តកំ ហោតិ, ឥមស្មិំ ភាជនេ អាកិរថា’’តិ វទតិ, វដ្ដតិ. សេសមេត្ថ ឧត្តានមេវ. អញ្ញតិត្ថិយតា, អជ្ឈោហរណីយតា, អជ្ឈោហរណត្ថាយ សហត្ថា អនិក្ខិត្តភាជនេ ទានន្តិ ឥមានិ បនេត្ថ តីណិ អង្គានិ.

អចេលកសិក្ខាបទវណ្ណនា និដ្ឋិតា.