ភិក្ខុនីវិភង្គោ

១៧០. ភិក្ខូនំ បាដវត្ថាយ, វិនយស្ស វិនិច្ឆយេ;

ភិក្ខុនីនំ វិភង្គោបិ, កិញ្ចិមត្តំ ភណាមហំ.

១៧១. អវស្សុតស្ស បោសស្ស, ភិក្ខុនីបិ អវស្សុតា;

នន្ទន្តី កាយសំសគ្គំ, កតិ អាបត្តិយោ ផុសេ;

១៧២. តិស្សោ អាបត្តិយោ ឧព្ភ-ជាណុស្សាធក្ខកស្ស ច;

ហោតិ បារាជិកំ តស្សា, គហណំ សាទិយន្តិយា.

១៧៣. ឧព្ភក្ខកំ អធោជាណុ-គហណំ សាទិយន្តិយា;

ថុល្លច្ចយំ សិយា, កាយ-បដិពទ្ធេ តុ ទុក្កដំ.

១៧៤. ឆាទេន្តី ភិក្ខុនី វជ្ជំ, តិស្សោ អាបត្តិយោ ផុសេ;

ជានំ បារាជិកំ ធម្មំ, ឆាទេន្តី សា បរាជិកា.

១៧៥. ថុល្លច្ចយំ វេមតិកា, បដិច្ឆាទេតិ ចេ បន;

អថាចារវិបត្តិំ ចេ, បដិច្ឆាទេតិ ទុក្កដំ.

១៧៦. និស្សជ្ជន្តី ន តំ លទ្ធិំ, ឧក្ខិត្តស្សានុវត្តិកា;

សមនុភាសនាយេវ, តិស្សោ អាបត្តិយោ ផុសេ.

១៧៧. ញត្តិយា ទុក្កដំ, ទ្វីហិ, កម្មវាចាហិ ថុល្លតា;

កម្មវាចាយ ឱសានេ, បារាជិកមុទីរិតំ.

១៧៨. បូរេន្តី អដ្ឋមំ វត្ថុំ, តិស្សោ អាបត្តិយោ ផុសេ;

បុរិសេនិធាគច្ឆាតិ, វុត្តាគច្ឆតិ ទុក្កដំ.

១៧៩. ថុល្លច្ចយំ តុ បោសស្ស, ហត្ថបាសប្បវេសនេ;

បូរេន្តី អដ្ឋមំ វត្ថុំ, សមណី សា បរាជិតា.

បារាជិកកថា.

១៨០. ឧស្សយវាទិកា អដ្ដំ, ករោន្តី តិវិធំ ផុសេ;

ឯកស្សារោចនេ តស្សា, ហោតិ អាបត្តិ ទុក្កដំ.

១៨១. ទុតិយារោចនេ តស្សា, ថុល្លច្ចយមុទីរិតំ;

អដ្ដស្ស បរិយោសានេ, ហោតិ សង្ឃាទិសេសតា.

១៨២. ចោរិវុដ្ឋាបិកា វាបិ, ញត្តិយា ទុក្កដំ ផុសេ;

ទ្វីហិ ថុល្លច្ចយំ កម្ម-វាចោសានេ គរុំ សិយា.

១៨៣. ឯកា គាមន្តរំ គច្ឆេ, គមនេ ទុក្កដំ សិយា;

បរិក្ខេបេ អតិក្កន្តេ, បាទេន បឋមេន តុ.

១៨៤. ហោតិ ថុល្លច្ចយាបត្តិ, តស្សា សមណិយា បន;

ទុតិយេន អតិក្កន្តេ, គរុកេ បន តិដ្ឋតិ.

១៨៥. ចតុត្ថេ ទុតិយេ វុត្ត-សទិសោវ វិនិច្ឆយោ;

អាបត្តីនំ បភេទេ តុ, កាចិ នត្ថិ វិសេសតា.

១៨៦. អវស្សុតា សយំ ហុត្វា, តាទិសស្សេវ ហត្ថតោ;

គហេត្វា បន ភុញ្ជន្តី, ភោជនាទីសុ កិញ្ចិបិ.

១៨៧. ផុសេ អាបត្តិយោ តិស្សោ, ភោជនាទីសុ កិញ្ចិបិ;

បដិគ្គណ្ហន្តិយា តស្សា, ហោតិ ថុល្លច្ចយំ បន.

១៨៨. អជ្ឈោហារេសុ សព្ពេសុ, ហោតិ សង្ឃាទិសេសតា;

ឧទកំ ទន្តបោនំ វា, បដិគ្គណ្ហាតិ ទុក្កដំ.

១៨៩. ‘‘សហត្ថេន គហេត្វា ត្វំ, ខាទ វា ភុញ្ជ វា’’តិបិ;

ឧយ្យោជេន្តី បនេវំ តុ, តិស្សោ អាបត្តិយោ ផុសេ.

១៩០. ទុក្កដំ វចនេ តស្សា, ‘‘ភុញ្ជិស្សាមី’’តិ គណ្ហតិ;

អជ្ឈោហារេសុ សព្ពេសុ, តស្សា ថុល្លច្ចយំ សិយា.

១៩១. ភោជនស្ស បនោសានេ, ហោតិ សង្ឃាទិសេសតា;

ឧយ្យោជេតិ ច យា តស្សា, ឥមា តិស្សោតិ ទីបយេ.

១៩២. សត្តមេ អដ្ឋមេ ចាបិ, នវមេ ទសមេបិ ច;

ចោរិវុដ្ឋាបនេនេវ, សមានោវ វិនិច្ឆយោ.

សង្ឃាទិសេសកថា.

១៩៣. បត្តសន្និចយំ យិហ, ករោន្តី ភិក្ខុនី បន;

ឯកំ និស្សគ្គិយំយេវ, ផុសេ បាចិត្តិយំ តុ សា.

១៩៤. អកាលចីវរំ កាល-ចីវរំ ភាជាបេន្តិយា;

បយោគេ ទុក្កដំ វុត្តំ, លាភេ និស្សគ្គិយំ សិយា.

១៩៥. ចីវរំ បរិវត្តេត្វា, អច្ឆិន្ទតិ សចេ បន;

បយោគេ ទុក្កដំ, ឆិន្នេ, តស្សា និស្សគ្គិយំ សិយា.

១៩៦. វិញ្ញាបេត្វាវ អញ្ញំ ចេ, វិញ្ញាបេតិ តតោ បរំ;

បយោគេ ទុក្កដំ, វិញ្ញា-បិតេ និស្សគ្គិយំ សិយា.

១៩៧. ចេតាបេត្វា ហិ អញ្ញំ ចេ, ចេតាបេតិ តតោ បរំ;

បយោគេ ទុក្កដំ, ចេតា-បិតេ និស្សគ្គិយំ សិយា.

១៩៨. ឯវមេវ ច សេសេសុ, ឆដ្ឋាទីសុ ច សត្តសុ;

អនន្តរសមានោវ, អាបត្តីនំ វិនិច្ឆយោ.

និស្សគ្គិយកថា.

១៩៩. លសុណំ ខាទតិ ទ្វេ ចេ, ទុក្កដំ គហណេ សិយា;

អជ្ឈោហារបយោគេសុ, បាចិត្តិ បរិយាបុតា.

២០០. សំហរាបេន្តិយា លោមំ, សម្ពាធេ ទ្វេវ ហោន្តិ ហិ;

បយោគេ ទុក្កដំ វុត្តំ, ហោតិ បាចិត្តិ សំហដេ.

២០១. ករោន្តី តលឃាតំ តុ, ទ្វេ បនាបត្តិយោ ផុសេ;

បយោគេ ទុក្កដំ ហោតិ, កតេ បាចិត្តិយំ សិយា.

២០២. ជតុនា មដ្ឋកំ កិញ្ចិ, សាទិយន្តី ទុវេ ផុសេ;

បយោគេ ទុក្កដាទិន្នេ, តស្សា បាចិត្តិយំ សិយា.

២០៣. បញ្ចមំ តុ ចតុត្ថេន, សមានមិតិ ទីបយេ;

អាបត្តីនំ វិភាគស្មិំ, វិសេសោ នត្ថិ កោចិបិ.

២០៤. ភិក្ខុស្ស ភុញ្ជមានស្ស, បានីយេនុបតិដ្ឋតិ;

ហត្ថបាសេ តុ បាចិត្តិ, ហិត្វា តិដ្ឋតិ ទុក្កដំ.

២០៥. វិញ្ញាបេត្វាមកំ ធញ្ញំ, ‘‘ភុញ្ជិស្សាមី’’តិ គណ្ហតិ;

ទុក្កដំ ហោតិ បាចិត្តិ, អជ្ឈោហារេសុ ទីបយេ.

២០៦. ឧច្ចារាទិំ តិរោកុដ្ដេ, ឆឌ្ឌេន្តី ទ្វេ ផុសេ ហវេ;

បយោគេ ទុក្កដំ វុត្តំ, បាចិត្តិ ឆឌ្ឌិតេ សិយា.

២០៧. ឧច្ចារាទិចតុក្កំ តុ, ឆឌ្ឌេតិ ហរិតេ សចេ;

បយោគេ ទុក្កដំ តស្សា, បាចិត្តិ ឆឌ្ឌិតេ សិយា.

២០៨. នច្ចាទិំ ទស្សនត្ថាយ, សចេ គច្ឆតិ ទុក្កដំ;

បស្សន្តិយាបិ បាចិត្តិ, តថេវ ច សុណន្តិយា.

លសុណវគ្គោ បឋមោ.

២០៩. បឋមេ ទុតិយេ ចេវ, តតិយេ ច ចតុត្ថកេ;

តុល្យោ លសុណវគ្គស្ស, ឆដ្ឋេនិធ វិនិច្ឆយោ.

២១០. កុលានិ ឧបសង្កម្ម, និសីទិត្វា បនាសនេ;

សាមិកេ តុ អនាបុច្ឆា, បក្កមន្តី ទុវេ ផុសេ.

២១១. បឋមេន ច បាទេន, អនោវស្សមតិក្កមេ;

ទុក្កដំ ហោតិ, បាចិត្តិ, ទុតិយាតិក្កមេ សិយា.

២១២. សាមិកេ តុ អនាបុច្ឆា, អាសនេ ចេ និសីទតិ;

បយោគេ ទុក្កដំ ហោតិ, បាចិត្តិ ច និសីទិតេ.

២១៣. ឆដ្ឋេន សត្តមំ សព្ពំ, សមានំ អដ្ឋមេ បន;

បយោគេ ទុក្កដំ, ឧជ្ឈា-បិតេ បាចិត្តិយំ សិយា.

២១៤. អត្តានំ ចាភិសប្បេន្តី, ទ្វេ ផុសេ និរយាទិនា;

បយោគេ ទុក្កដំ វុត្តំ, បាចិត្តិ អភិសប្បិតេ.

២១៥. វធិត្វា បន អត្តានំ, រោទន្តី តុ ទុវេ ផុសេ;

វធតិ រោទតិ បាចិត្តិ, ករោតេកំ តុ ទុក្កដំ.

រត្តន្ធការវគ្គោ ទុតិយោ.

២១៦. នគ្គា ន្ហាយតិ ទ្វេ ចេវ, បយោគេ ទុក្កដំ សិយា;

ន្ហានស្ស បរិយោសានេ, តស្សា បាចិត្តិយំ សិយា.

២១៧. ការាបេតិ បមាណាតិ-ក្កន្តំ ឧទកសាដិកំ;

បយោគេ ទុក្កដំ, ការា-បិតេ បាចិត្តិយំ សិយា.

២១៨. ចីវរំ តុ វិសិព្ពេត្វា, វិសិព្ពាបេត្វ វា បន;

នេវ សិព្ពន្តិយា វុត្ត-មេកំ បាចិត្តិយំ បន.

២១៩. បញ្ចាហិកំ តុ សង្ឃាដិ-ចារំ បន អតិក្កមេ;

ឯកាវស្សា បនាបត្តិ, បាចិត្តិ បរិទីបិតា.

២២០. សចេ សង្កមនីយំ តុ, ធារេតិ បន ចីវរំ;

បយោគេ ទុក្កដំ វុត្តំ, បាចិត្តិ បន ធារិតេ.

២២១. គណចីវរលាភស្ស, អន្តរាយំ ករោតិ ចេ;

បយោគេ ទុក្កដំ ហោតិ, កតេ បាចិត្តិយំ សិយា.

២២២. វិភង្គំ បដិពាហន្តី, ចីវរានំ តុ ធម្មិកំ;

បយោគេ ទុក្កដំ វុត្តំ, បាចិត្តិ បដិពាហិតេ.

២២៣. អគារិកាទិនោ ទេតិ, សចេ សមណចីវរំ;

បយោគេ ទុក្កដំ, ទិន្នេ, បាចិត្តិ បរិយាបុតា.

២២៤. ចីវរេ ទុព្ពលាសាយ, កាលំ ចេ សមតិក្កមេ;

បយោគេ ទុក្កដំ វុត្តំ, បាចិត្តិ សមតិក្កមេ.

២២៥. ធម្មិកំ កថិនុទ្ធារំ, បដិពាហន្តិយា ទុវេ;

បយោគេ ទុក្កដំ ហោតិ, បាចិត្តិ បដិពាហិតេ.

ន្ហានវគ្គោ តតិយោ.

២២៦. ទុវេ ភិក្ខុនិយោ ឯក-មញ្ចស្មិំ ចេ តុវដ្ដេយ្យុំ;

បយោគេ ទុក្កដំ តាសំ, និបន្នេ ឥតរំ សិយា.

២២៧. ទុតិយំ បឋមេនេវ, សទិសំ តតិយេ បន;

បយោគេ ទុក្កដំ ហោតិ, កតេ បាចិត្តិយំ សិយា.

២២៨. នុបដ្ឋាបេន្តិយា វាបិ, ទុក្ខិតំ សហជីវិនិំ;

ឯកាយេវ បនាបត្តិ, បាចិត្តិ បរិទីបិតា.

២២៩. សចេ ឧបស្សយំ ទត្វា, និក្កឌ្ឍតិ ច ភិក្ខុនិំ;

បយោគេ ទុក្កដំ តស្សា, ហោតិ បាចិត្តិ កឌ្ឍិតេ.

២៣០. ឆដ្ឋេ បន ច សំសដ្ឋា, ញត្តិយា ទុក្កដំ ផុសេ;

កម្មវាចាយ ឱសានេ, បាចិត្តិ បរិទីបិតា.

២៣១. អន្តោរដ្ឋេ តុ សាសង្កេ, ចារិកំ តុ ចរន្តិយា;

បយោគេ ទុក្កដំ វុត្តំ, បដិបន្នាយ សេសកំ.

២៣២. អដ្ឋមំ នវមញ្ចេវ, សត្តមេន សមំ មតំ;

ទសមេ បន ឯកាវ, បាចិត្តិ បរិទីបិតា.

តុវដ្ដវគ្គោ ចតុត្ថោ.

២៣៣. រាជាគារាទិកំ សព្ពំ, ទស្សនត្ថាយ គច្ឆតិ;

បយោគេ ទុក្កដំ តស្សា, បាចិត្តិ យទិ បស្សតិ.

២៣៤. អាសន្ទិំ វាបិ បល្លង្កំ, បរិភុញ្ជន្តិយា ទុវេ;

បយោគេ ទុក្កដំ វុត្តំ, ភុត្តេ បាចិត្តិយំ សិយា.

២៣៥. សុត្តំ កន្តន្តិយា ទ្វេវ, បយោគេ ទុក្កដំ មតំ;

ឧជ្ជវុជ្ជវនេ តស្សា, បាចិត្តិ សមុទាហរេ.

២៣៦. វេយ្យាវច្ចំ គិហីនំ តុ, ទ្វេវ ហោន្តិ ករោន្តិយា;

បយោគេ ទុក្កដំ វុត្តំ, កតេ បាចិត្តិយំ សិយា.

២៣៧. បញ្ចមេ បន ឯកាវ, បាចិត្តិ បរិទីបិតា;

បយោគេ ទុក្កដំ ឆដ្ឋេ, ទិន្នេ បាចិត្តិយំ សិយា.

២៣៨. សត្តមំ ទុតិយេនេវ, សមាបត្តិបភេទតោ;

អដ្ឋមំ ទុតិយេ វគ្គេ, បញ្ចមេន សមំ មតំ.

២៣៩. តិរច្ឆានគតំ វិជ្ជំ, ទ្វេវ ហោន្តិ បឋន្តិយា;

បយោគេ ទុក្កដំ ហោតិ, បាចិត្តិ ហិ បទេ បទេ.

២៤០. ទសមំ នវមេនេវ, សមានំ សព្ពថា បន;

‘‘បរិយាបុណាតិ, វាចេតិ’’, បទមត្តំ វិសេសកំ.