នមោ តស្ស ភគវតោ អរហតោ សម្មាសម្ពុទ្ធស្ស

វិនយវិនិច្ឆយោ

គន្ថារម្ភកថា

១. វន្ទិត្វា សិរសា សេដ្ឋំ, ពុទ្ធមប្បដិបុគ្គលំ;

ភវាភាវករំ ធម្មំ, គណញ្ចេវ និរង្គណំ.

២. ភិក្ខូនំ ភិក្ខុនីនញ្ច, ហិតត្ថាយ សមាហិតោ;

បវក្ខាមិ សមាសេន, វិនយស្សវិនិច្ឆយំ.

៣. អនាកុលមសំកិណ្ណំ, មធុរត្ថបទក្កមំ;

បដុភាវករំ ឯតំ, បរមំ វិនយក្កមេ.

៤. អបារំ ឱតរន្តានំ, សារំ វិនយសាគរំ;

ភិក្ខូនំ ភិក្ខុនីនញ្ច, នាវាភូតំ មនោរមំ.

៥. តស្មា វិនយនូបាយំ, វិនយស្សវិនិច្ឆយំ;

អវិក្ខិត្តេន ចិត្តេន, វទតោ មេ និពោធថ.

ភិក្ខុវិភង្គោ

បារាជិកកថា

បឋមបារាជិកកថា

៦. តិវិធេ តិលមត្តម្បិ, មគ្គេ សេវនចេតនោ;

អង្គជាតំ បវេសេន្តោ, អល្លោកាសេ បរាជិតោ.

៧. បវេសនំ បវិដ្ឋំ វា, ឋិតមុទ្ធរណម្បិ វា;

សសិក្ខោ សាទិយន្តោ សោ, ឋបេត្វា កិរិយំ ចុតោ.

៨. សន្ថតេនង្គជាតេន, សន្ថតំ វា អសន្ថតំ;

មគ្គំ បន បវេសេន្តោ, តថេវាសន្ថតេន ច.

៩. ឧបាទិន្នេនុបាទិន្នេ, អនុបាទិន្នកេន វា;

ឃដ្ដិតេ អនុបាទិន្នេ, សចេ សាទិយតេត្ថ សោ.

១០. ហោតិ បារាជិកក្ខេត្តេ, បវិដ្ឋេ តុ បរាជិតោ;

ខេត្តេ ថុល្លច្ចយំ តស្ស, ទុក្កដញ្ច វិនិទ្ទិសេ.

១១. មតេ អក្ខាយិតេ ចាបិ, យេភុយ្យក្ខាយិតេបិ ច;

មេថុនំ បដិសេវន្តោ, ហោតិ បារាជិកោ នរោ.

១២. យេភុយ្យក្ខាយិតេ ចាបិ, ឧបឌ្ឍក្ខាយិតេបិ ច;

ហោតិ ថុល្លច្ចយាបត្តិ, សេសេ អាបត្តិ ទុក្កដំ.

១៣. និមិត្តមត្តំ សេសេត្វា, ខាយិតេបិ សរីរកេ;

និមិត្តេ មេថុនំ តស្មិំ, សេវតោបិ បរាជយោ.

១៤. ឧទ្ធុមាតាទិសម្បត្តេ, សព្ពត្ថាបិ ច ទុក្កដំ;

ខាយិតាក្ខាយិតំ នាម, សព្ពំ មតសរីរកេ.

១៥. ឆិន្ទិត្វា បន តច្ឆេត្វា, និមិត្តុប្បាដិតេ បន;

វណសង្ខេបតោ តស្មិំ, សេវំ ថុល្លច្ចយំ ផុសេ.

១៦. តតោ មេថុនរាគេន, បតិតាយ និមិត្តតោ;

តាយំ ឧបក្កមន្តស្ស, ទុក្កដំ មំសបេសិយំ.

១៧. នខបិដ្ឋិប្បមាណេបិ, មំសេ ន្ហារុម្ហិ វា សតិ;

មេថុនំ បដិសេវន្តោ, ជីវមានេ បរាជិតោ.

១៨. កណ្ណច្ឆិទ្ទក្ខិនាសាសុ, វត្ថិកោសេ វណេសុ វា;

អង្គជាតំ បវេសេន្តោ, រាគា ថុល្លច្ចយំ ផុសេ.

១៩. អវសេសសរីរស្មិំ, ឧបកច្ឆូរុកាទិសុ;

វសា មេថុនរាគស្ស, សេវមានស្ស ទុក្កដំ.

២០. អស្សគោមហិសាទីនំ, ឱដ្ឋគទ្រភទន្តិនំ;

នាសាសុ វត្ថិកោសេសុ, សេវំ ថុល្លច្ចយំ ផុសេ.

២១. តថា សព្ពតិរច្ឆានំ, អក្ខិកណ្ណវណេសុបិ;

អវសេសសរីរេសុ, សេវមានស្ស ទុក្កដំ.

២២. តេសំ អល្លសរីរេសុ, មតានំ សេវតោ បន;

តិវិធាបិ សិយាបត្តិ, ខេត្តស្មិំ តិវិធេ សតិ.

២៣. ពហិ មេថុនរាគេន, និមិត្តំ ឥត្ថិយា បន;

និមិត្តេន ឆុបន្តស្ស, តស្ស ថុល្លច្ចយំ សិយា.

២៤. កាយសំសគ្គរាគេន, និមិត្តេន មុខេន វា;

និមិត្តំ ឥត្ថិយា តស្ស, ឆុបតោ គរុកំ សិយា.

២៥. តថេវោភយរាគេន, និមិត្តំ បុរិសស្សបិ;

និមិត្តេន ឆុបន្តស្ស, ហោតិ អាបត្តិ ទុក្កដំ.

២៦. និមិត្តេន និមិត្តំ តុ, តិរច្ឆានគតិត្ថិយា;

ថុល្លច្ចយំ ឆុបន្តស្ស, ហោតិ មេថុនរាគតោ.

២៧. កាយសំសគ្គរាគេន, តិរច្ឆានគតិត្ថិយា;

និមិត្តេន និមិត្តស្ស, ឆុបនេ ទុក្កដំ មតំ.

២៨. អង្គជាតំ បវេសេត្វា, តមាវដ្ដកតេ មុខេ;

តត្ថាកាសគតំ កត្វា, នីហរន្តស្ស ទុក្កដំ.

២៩. តថា ចតូហិ បស្សេហិ, ឥត្ថិយា ហេដ្ឋិមត្តលំ;

អឆុបន្តំ បវេសេត្វា, នីហរន្តស្ស ទុក្កដំ.

៣០. ឧប្បាដិតោដ្ឋមំសេសុ, ពហិ និក្ខន្តកេសុ វា;

ទន្តេសុ វាយមន្តស្ស, តស្ស ថុល្លច្ចយំ សិយា.

៣១. អដ្ឋិសង្ឃដ្ដនំ កត្វា, មគ្គេ ទុវិធរាគតោ;

សុក្កេ មុត្តេបិ វាមុត្តេ, វាយមន្តស្ស ទុក្កដំ.

៣២. ឥត្ថិំ មេថុនរាគេន, អាលិង្គន្តស្ស ទុក្កដំ;

ហត្ថគ្គាហបរាមាស-ចុម្ពនាទីស្វយំ នយោ.

៣៣. អបទេ អហយោ មច្ឆា, កបោតា ទ្វិបទេបិ ច;

គោធា ចតុប្បទេ ហេដ្ឋា, វត្ថុ បារាជិកស្សិមេ.

៣៤. សេវេតុកាមតាចិត្តំ, មគ្គេ មគ្គប្បវេសនំ;

ឥទមង្គទ្វយំ វុត្តំ, បឋមន្តិមវត្ថុនោ.

៣៥. ទុក្កដំ បឋមស្សេវ, សាមន្តមិតិ វណ្ណិតំ;

សេសានំ បន តិណ្ណម្បិ, ថុល្លច្ចយមុទីរិតំ.

៣៦. ‘‘អនាបត្តី’’តិ ញាតព្ពំ, អជានន្តស្ស ភិក្ខុនោ;

តថេវាសាទិយន្តស្ស, ជានន្តស្សាទិកម្មិនោ.

៣៧. វិនយេ អនយូបរមេ បរមេ;

សុជនស្ស សុខានយនេ នយនេ;

បដុ ហោតិ បធានរតោ ន រតោ;

ឥធ យោ បន សារមតេ រមតេ.

៣៨. ឥមំ ហិតវិភាវនំ ភាវនំ;

អវេទិ សុរសម្ភវំ សម្ភវំ;

ស មារពឡិសាសនេ សាសនេ;

សមោ ភវតុបាលិនា បាលិនា.

ឥតិ វិនយវិនិច្ឆយេ បឋមបារាជិកកថា និដ្ឋិតា.

ទុតិយបារាជិកកថា

៣៩. អាទិយន្តោ ហរន្តោវ-ហរន្តោ ឥរិយាបថំ;

វិកោបេន្តោ តថា ឋានា, ចាវេន្តោបិ បរាជិតោ.

៤០. តត្ថ នានេកភណ្ឌានំ, បញ្ចកានំ វសា បន;

អវហារា ទសេវេតេ, វិញ្ញាតព្ពា វិភាវិនា.

៤១. សាហត្ថាណត្តិកោ ចេវ, និស្សគ្គោ អត្ថសាធកោ;

ធុរនិក្ខេបនញ្ចាតិ, ឥទំ សាហត្ថបញ្ចកំ.

៤២. បុព្ពសហបយោគោ ច, សំវិទាហរណម្បិ ច;

សង្កេតកម្មំ នេមិត្តំ, បុព្ពយោគាទិបញ្ចកំ.

៤៣. ថេយ្យបសយ្ហបរិកប្ប-បដិច្ឆន្នកុសាទិកា;

អវហារា ឥមេ បញ្ច, វេទិតព្ពាវ វិញ្ញុនា.

៤៤. វត្ថុកាលគ្ឃទេសេ ច, បរិភោគញ្ច បញ្ចបិ;

ញត្វា ឯតានិ កាតព្ពោ, បណ្ឌិតេន វិនិច្ឆយោ.

៤៥. ទុតិយំ វាបិ កុទ្ទាលំ, បិដកំ បរិយេសតោ;

គច្ឆតោ ថេយ្យចិត្តេន, ទុក្កដំ បុព្ពយោគតោ.

៤៦. តត្ថជាតកកដ្ឋំ វា, លតំ វា ឆិន្ទតោ បន;

ទុក្កដំ ឧភយត្ថាបិ, វុត្តំ សហបយោគតោ.

៤៧. បថវិំ ខណតោ វាបិ, ព្យូហតោ បំសុមេវ វា;

អាមសន្តស្ស វា កុម្ភិំ, ហោតិ អាបត្តិ ទុក្កដំ.

៤៨. មុខេ បាសំ បវេសេត្វា, ខាណុកេ ពទ្ធកុម្ភិយា;

ពន្ធនានំ វសា ញេយ្យោ, ឋានភេទោ វិជានតា.

៤៩. ទ្វេ ឋានានិ បនេកស្មិំ, ខាណុកេ ពទ្ធកុម្ភិយា;

វលយំ រុក្ខមូលស្មិំ, បវេសេត្វា កតាយ វា.

៥០. ឧទ្ធរន្តស្ស ខាណុំ វា, ឆិន្ទតោ សង្ខលិម្បិ វា;

ថុល្លច្ចយំ តតោ កុម្ភិំ, ឋានា ចាវេតិ ចេ ចុតោ.

៥១. បឋមំ បន កុម្ភិំ វា, ឧទ្ធរិត្វា តថា បុន;

ឋានា ចាវេតិ ខាណុំ វា, សង្ខលិំ វាបិ សោ នយោ.

៥២. ឥតោ ចិតោ ច ឃំសន្តោ, មូលេ សារេតិ រក្ខតិ;

វលយំ ខេគតំ តត្ថ, ករោន្តោវ បរាជិតោ.

៥៣. ជាតំ ឆិន្ទតិ ចេ រុក្ខំ, ទុក្កដំ កុម្ភិមត្ថកេ;

សមីបេ ឆិន្ទតោ តស្ស, បាចិត្តិយមតត្ថជំ.

៥៤. អន្តោកុម្ភិគតំ ភណ្ឌំ, ផន្ទាបេតិ សចេ បន;

អបព្យូហេតិ តត្ថេវ, តស្ស ថុល្លច្ចយំ សិយា.

៥៥. ហរន្តោ កុម្ភិយា ភណ្ឌំ, មុដ្ឋិំ ឆិន្ទតិ អត្តនោ;

ភាជនេ វា គតំ កត្វា, ហោតិ ភិក្ខុ បរាជិតោ.

៥៦. ហារំ វា បន បាមង្គំ, សុត្តារុឡ្ហំ តុ កុម្ភិយា;

ផន្ទាបេតិ យថាវត្ថុំ, ឋានា ចាវេតិ ចេ ចុតោ.

៥៧. សប្បិអាទីសុ យំ កិញ្ចិ, បិវតោ បាទបូរណំ;

ឯកេនេវ បយោគេន, បីតមត្តេ បរាជយោ.

៥៨. កត្វាវ ធុរនិក្ខេបំ, បិវន្តស្ស បុនប្បុនំ;

សកលម្បិ ច តំ កុម្ភិំ, បិវតោ ន បរាជយោ.

៥៩. សចេ ខិបតិ យំ កិញ្ចិ, ភណ្ឌកំ តេលកុម្ភិយំ;

តំ បាទគ្ឃនកំ តេលំ, ធុវំ បិវតិ តាវទេ.

៦០. ហត្ថតោ មុត្តមត្តេវ, ថេយ្យចិត្តោ វិនស្សតិ;

អាវិញ្ជេត្វាបិ វា កុម្ភិំ, តេលំ គាឡេតិ ចេ តថា.

៦១. តេលស្សាកិរណំ ញត្វា, ខិត្តំ រិត្តាយ កុម្ភិយា;

បីតំ តេលញ្ច តំ ភណ្ឌំ, ឧទ្ធរន្តោវ ធំសិតោ.

៦២. តត្ថេវ ភិន្ទតោ តេលំ, ឆឌ្ឌេន្តស្ស តថេវ ច;

ឈាបេន្តស្ស អភោគំ វា, ករោន្តស្ស ច ទុក្កដំ.

ភូមដ្ឋកថា.

៦៣. ឋបិតំ បត្ថរិត្វា ច, សាដកត្ថរណាទិកំ;

វេឋេត្វា ឧទ្ធរន្តស្ស, មុត្តេ ឋានា បរាភវោ.

៦៤. ឱរិមន្តេន វា ផុដ្ឋ-មោកាសំ បារិមន្តតោ;

បារាជិកមតិក្កន្តេ, កឌ្ឍតោ ឧជុកម្បិ វា.

ថលដ្ឋកថា.

៦៥. បុរតោ មុខតុណ្ឌញ្ច, កលាបគ្គញ្ច បច្ឆតោ;

ទ្វីសុ បស្សេសុ បក្ខន្តោ, ហេដ្ឋា បាទនខា តថា.

៦៦. ឧទ្ធញ្ចាបិ សិខគ្គន្តិ, គគនេ គច្ឆតោ បន;

មោរស្ស ឆ បរិច្ឆេទា, វេទិតព្ពា វិភាវិនា.

៦៧. ភិក្ខុ ‘‘សស្សាមិកំ មោរំ, គហេស្សាមី’’តិ ខេគតំ;

ហត្ថំ វាបិ បសារេតិ, បុរតោ វាស្ស តិដ្ឋតិ.

៦៨. មោរោបិ គគនេ បក្ខេ, ចារេតិ ន ច គច្ឆតិ;

ទុក្កដំ គមនច្ឆេទេ, អាមសន្តស្ស ចេវ តំ.