មហាវគ្គោ

មហាខន្ធកកថា

បព្ពជ្ជាកថា

២៤៤៤. សីលក្ខន្ធាទិយុត្តេន, សុភក្ខន្ធេន ទេសិតេ;

ខន្ធកេបិ បវក្ខាមិ, សមាសេន វិនិច្ឆយំ.

២៤៤៥. មាតរា អននុញ្ញាតំ, បិតរា វាបិ ភិក្ខុនោ;

ភណ្ឌុកម្មមបុច្ឆិត្វា, បព្ពាជេន្តស្ស ទុក្កដំ.

២៤៤៦. ឧទ្ទេសបរិបុច្ឆាយ, សយំ ចេ ព្យាវដោ សិយា;

ទហរោ អាណាបេតព្ពោ, បព្ពាជេត្វានយាតិ ច.

២៤៤៧. ឧបជ្ឈាយមថុទ្ទិស្ស, អវុត្តោ ទហរោ បន;

បព្ពាជេតិ សចេ តំ សោ, សយមេវាបិ វដ្ដតិ.

២៤៤៨. សាមណេរោបិ វត្តព្ពោ, ទហរោ នត្ថិ តត្ថ ចេ;

‘‘ខណ្ឌសីមមិមំ នេត្វា, បព្ពាជេត្វានយា’’តិ ច.

២៤៤៩. សរណានិ បនេតស្ស, ទាតព្ពានេវ អត្តនា;

ឯវម្បិ ភិក្ខុនាយេវ, ហោតិ បព្ពាជិតោ នរោ.

២៤៥០. បុរិសំ ភិក្ខុតោ អញ្ញោ, បព្ពាជេតិ ន វដ្ដតិ;

ឥត្ថិំ ភិក្ខុនិតោ អញ្ញោ, បព្ពាជេតិ ន វដ្ដតិ.

២៤៥១. សាមណេរោបិ វា ទាតុំ, សាមណេរីបិ វា តថា;

អាណត្តិយា ឧភិន្នម្បិ, កាសាយានិ លភន្តិ តេ.

២៤៥២. សយមេវ ច យំ កិញ្ចិ, បព្ពាជេន្តេន ភិក្ខុនា;

កេសាបនយនំ កត្វា, បឋមំ ឧទកេ បុន.

២៤៥៣. ន្ហាបេតព្ពោ សិយា សុដ្ឋុ, ឃំសិត្វា គោមយាទិនា;

សរីរេ បីឡកា វាបិ, កច្ឆុ វា តស្ស ហោន្តិ ចេ.

២៤៥៤. មាតា យថា និយំបុត្តំ, ន ជិគុច្ឆតិ សព្ពសោ;

ន្ហាបេតព្ពោវ យតិនា, តថេវ អជិគុច្ឆតា.

២៤៥៥. កស្មា? បនេត្តកេនាបិ, ឧបការេន សាសនេ;

សោ សទា ពលវស្នេហោ, ហោតុបជ្ឈាយកាទិសុ.

២៤៥៦. វិនោទេត្វា បនុប្បន្នំ, ឧក្កណ្ឋំ កុលបុត្តកា;

សិក្ខាយោ បរិបូរេត្វា, និព្ពានំ បាបុណន្តិ ហិ.

២៤៥៧. គន្ធចុណ្ណេន វា បច្ឆា, ចុណ្ណេនបិ ហលិទ្ទិយា;

សរីរំ តស្ស សីសញ្ច, ឧព្ពដ្ដេត្វា បុនប្បុនំ.

២៤៥៨. គិហិគន្ធំ វិនោទេត្វា, កាសាយានិ បនេកតោ;

ទ្វត្តិក្ខត្តុំ សកិំ វាបិ, ទាតព្ពានិស្ស ភិក្ខុនា.

២៤៥៩. អថ ហត្ថេបិ វា តស្ស, អទត្វា សយមេវ តំ;

អច្ឆាទេតិ ឧបជ្ឈាយោ, វដ្ដតាចរិយោបិ វា.

២៤៦០. និវាសេតិ អនាណត្តោ, សោ បារុបតិ វា សយំ;

អបនេត្វា តតោ សព្ពំ, បុន ទាតព្ពមេវ តំ.

២៤៦១. ភិក្ខុនា តុ សហត្ថេន, តថា អាណត្តិយាបិ វា;

ទិន្នំ វដ្ដតិ កាសាវំ, នាទិន្នំ បន វដ្ដតិ.

២៤៦២. តស្សេវ សន្តកំ វាបិ, កា កថា អត្តសន្តកេ;

វន្ទាបេត្វា តត្ថ ភិក្ខូ, ការាបេត្វាន ឧក្កុដិំ.

២៤៦៣. អញ្ជលិំ បគ្គហាបេត្វា, ទាតព្ពំ សរណត្តយំ;

បដិបាដិវសេនេវ, ន ច ឧប្បដិបាដិយា.

២៤៦៤. សចេ ឯកបទំ វាបិ, ទេតិ ឯកក្ខរម្បិ វា;

បដិបាដិំ វិរជ្ឈិត្វា, គហិតំ ចេ ន វដ្ដតិ.

២៤៦៥. តិក្ខត្តុំ យទិ វា ទេតិ, ពុទ្ធំ សរណមេវ វា;

តថា សេសេសុ ចេវម្បិ, ន ទិន្នានេវ ហោន្តិ ហិ.

២៤៦៦. កត្វានុនាសិកន្តានិ, ឯកាពទ្ធានិ វា បន;

វិច្ឆិន្ទិត្វាថ ម-ន្តានិ, ទាតព្ពានិ វិជានតា.

២៤៦៧. ឧបសម្បទកម្មំ តុ, ឯកតោសុទ្ធិយា សិយា;

ន ហោតិ បន បព្ពជ្ជា, ឧភតោសុទ្ធិយា វិនា.

២៤៦៨. តស្មា អាចរិយេនាបិ, តថាន្តេវាសិកេនបិ;

ពុ-ទ្ធ-ការាទយោ វណ្ណា, ឋានករណសម្បទំ.

២៤៦៩. អហាបេន្តេន វត្តព្ពា, បព្ពជ្ជាគុណមិច្ឆតា;

ឯកវណ្ណវិនាសេន, បព្ពជ្ជា ហិ ន រូហតិ.

២៤៧០. យទិ សិទ្ធាបិ បព្ពជ្ជា, សរណាគមនតោវ ហិ;

ទាតព្ពា ទស សីលានិ, បូរណត្ថាយ ភិក្ខុនា.

បព្ពជ្ជាកថា.

២៤៧១. ឧបជ្ឈាយមថាចរិយំ, និស្សាយ វសតា បន;

កត្តព្ពានេវ វត្តានិ, បិយសីលេន ភិក្ខុនា.

២៤៧២. អាសនំ បញ្ញបេតព្ពំ, ទន្តកដ្ឋំ មុខោទកំ;

ទាតព្ពំ តស្ស កាលេន, សចេ យាគុ ភវិស្សតិ.

២៤៧៣. យាគុ តស្សុបនេតព្ពា, សង្ឃតោ កុលតោបិ វា;

បត្តេ វត្តញ្ច កាតព្ពំ, វត្តំ គាមប្បវេសនេ.

២៤៧៤. ចីវរេ យានិ វត្តានិ, វុត្តានិ ហិ មហេសិនា;

សេនាសនេ តថា បាទ-បីឋកថលិកាទិសុ.

២៤៧៥. ឯវមាទីនិ វត្តានិ, សព្ពានិ បន រោគតោ;

វុដ្ឋានាគមនន្តានិ, សត្តតិំសសតំ សិយុំ.

២៤៧៦. វត្តភេទេន សព្ពត្ថ, ទុក្កដំ តុ បកាសិតំ;

អនាទរវសេនេវ, អករោន្តស្ស ភិក្ខុនោ.

ឧបជ្ឈាយាចរិយវត្តកថា.

២៤៧៧. ឧបជ្ឈាយស្ស វត្តានិ, តថា សទ្ធិវិហារិកេ;

សតំ តេរស ហោន្តេវ, តថាន្តេវាសិកេបិ ច.

សទ្ធិវិហារិកន្តេវាសិកវត្តកថា.

២៤៧៨. បក្កន្តេ វាបិ វិព្ភន្តេ, បក្ខសង្កន្តកេ មតេ;

អាណត្តិយា ឧបជ្ឈាយា, បស្សម្ភតិ ច និស្សយោ.

២៤៧៩. ហោតិ អាចរិយម្ហាបិ, ឆធា និស្សយភេទនំ;

បក្កន្តេ វាបិ វិព្ភន្តេ, បក្ខសង្កន្តកេ មតេ.

២៤៨០. អាណត្តិយំ ឧភិន្នម្បិ, ធុរនិក្ខេបនេបិ ច;

ឯកេកស្ស ឧភិន្នំ វា, នាលយេ សតិ ភិជ្ជតិ.

២៤៨១. ឧបជ្ឈាយសមោធាន-គតស្សាបិ ច ភិជ្ជតិ;

ទស្សនំ សវនញ្ចាតិ, សមោធានំ ទ្វិធា មតំ.

២៤៨២. អទ្ធិកស្ស គិលានស្ស, គិលានុបដ្ឋកស្ស ច;

យាចិតស្ស ន ទោសោវ, វសិតុំ និស្សយំ វិនា.

២៤៨៣. ជានតា អត្តនោ ចេវ, វនេ ផាសុវិហារតំ;

សភាគេ ទាយកេសន្តេ, វសិតុម្បិ ច វដ្ដតិ.

និស្សយបដិប្បស្សម្ភនកថា.

២៤៨៤. កុដ្ឋិំ គណ្ឌិំ កិលាសិញ្ច, សោសិញ្ច អបមារិកំ;

តថា រាជភដំ ចោរំ, លិខិតំ ការភេទកំ.

២៤៨៥. កសាហតំ នរញ្ចេវ, បុរិសំ លក្ខណាហតំ;

ឥណាយិកញ្ច ទាសញ្ច, បព្ពាជេន្តស្ស ទុក្កដំ.

២៤៨៦. ហត្ថច្ឆិន្នមឡច្ឆិន្នំ, បាទច្ឆិន្នញ្ច បុគ្គលំ;

កណ្ណនាសង្គុលិច្ឆិន្នំ, កណ្ឌរច្ឆិន្នមេវ ច.

២៤៨៧. កាណំ កុណិញ្ច ខុជ្ជញ្ច, វាមនំ ផណហត្ថកំ;

ខញ្ជំ បក្ខហតញ្ចេវ, សីបទិំ បាបរោគិនំ.

២៤៨៨. ជរាយ ទុព្ពលំ អន្ធំ, ពធិរញ្ចេវ មម្មនំ;

បីឋសប្បិំ តថា មូគំ, បព្ពាជេន្តស្ស ទុក្កដំ.

២៤៨៩. អតិទីឃោតិរស្សោ វា, អតិកាលោបិ វា តថា;

អច្ចោទាតោបិ វា មដ្ឋ-តម្ពលោហនិទស្សនោ.

២៤៩០. អតិថូលោ អតិកិស្សោ, មហាសីសោបិ វា តថា;

អតិខុទ្ទកសីសេន, សហិតេន យុត្តោបិ វា.

២៤៩១. កុដកុដកសីសោ វា, តថា សិខរសីសកោ;

វេឡុនាឡិសមានេន, សីសេន ច យុតោ នរោ.

២៤៩២. កប្បសីសោបិ បព្ភារ-សីសោ វា វណសីសកោ;

តថា កណ្ណិកកេសោ វា, ថូលកេសោបិ វា តថា.

២៤៩៣. បូតិនិល្លោមសីសោ វា, ជាតិបណ្ឌរកេសកោ;

ជាតិយា តម្ពកេសោ វា, តថេវាវដ្ដសីសកោ.

២៤៩៤. សីសលោមេកពទ្ធេហិ, ភមុកេហិ យុតោបិ វា;

សម្ពទ្ធភមុកោ វាបិ, និល្លោមភមុកោបិ វា.

២៤៩៥. មហន្តខុទ្ទនេត្តោ វា, តថា វិសមលោចនោ;

កេករោ វាបិ គម្ភីរ-នេត្តោ វិសមចក្កលោ.

២៤៩៦. ជតុមូសិកកណ្ណោ វា, ហត្ថិកណ្ណោបិ វា បន;

ឆិទ្ទមត្តកកណ្ណោ វា, តថេវាវិទ្ធកណ្ណកោ.

២៤៩៧. តថា ដង្កិតកណ្ណោ វា, បូតិកណ្ណោបិ វា បន;

យោនកាទិប្បភេទោបិ, នាយំ បរិសទូសកោ.

២៤៩៨. អតិបិង្គលនេត្តោ វា, តថា និប្បខុមក្ខិ វា;

អស្សុបគ្ឃរនេត្តោ វា, បក្កបុប្ផិតលោចនោ.

២៤៩៩. តថេវ ច មហានាសោ, អតិខុទ្ទកនាសិកោ;

តថា ចិបិដនាសោ វា, នរោ កុដិលនាសិកោ.

២៥០០. និច្ចវិស្សវនាសោ វា, យោ វា បន មហាមុខោ;

វង្កភិន្នមុខោ វាបិ, មហាឱដ្ឋោបិ វា បន.

២៥០១. តថា តនុកឱដ្ឋោ វា, វិបុលុត្តរឱដ្ឋកោ;

ឱដ្ឋឆិន្នោបិ ឧប្បក្ក-មុខោ ឯឡមុខោបិ វា.

២៥០២. សង្ខតុណ្ឌោបិ ទុគ្គន្ធ-មុខោ វា បន បុគ្គលោ;

មហាទន្តោបិ អច្ចន្តំ, តថា អសុរទន្តកោ.

២៥០៣. ហេដ្ឋា ឧបរិតោ វាបិ, ពហិនិក្ខន្តទន្តកោ;

អទន្តោ បូតិទន្តោ វា, អតិខុទ្ទកទន្តកោ.

២៥០៤. យស្ស ទន្តន្តរេ ទន្តោ, កាឡកទន្តសន្និភោ;

សុខុមោវ ឋិតោ, តំ ចេ, បព្ពាជេតុម្បិ វដ្ដតិ.

២៥០៥. យោ មហាហនុកោ បោសោ;

ទីឃេន ហនុនា យុតោ;

ចិបិដហនុកោ វាបិ;

រស្សេន ហនុនា យុតោ.

២៥០៦. និម្មស្សុទាឋិកោ វាបិ, អតិទីឃគលោបិ វា;

អតិរស្សគលោបិ វា, ភិន្នគណ្ឋិគលោបិ វា.

២៥០៧. តថា ភដ្ឋំសកូដោ វា, ភិន្នបិដ្ឋិឧរោបិ វា;

សុទីឃរស្សហត្ថោ វា, កច្ឆុកណ្ឌុសមាយុតោ.

២៥០៨. មហានិសទមំសោ វា, ឧទ្ធនគ្គុបមាយុតោ;

វាតណ្ឌិកោ មហាឩរុ, សង្ឃដ្ដនកជាណុកោ.

២៥០៩. ភិន្នជាណុ មហាជាណុ, ទីឃជង្ឃោ វិជង្ឃកោ;

វិកដោ វាបិ បណ្ហោ វា, តថា ឧព្ពទ្ធបិណ្ឌិកោ.

២៥១០. យដ្ឋិជង្ឃោ មហាជង្ឃោ, មហាបាទោបិ យោ នរោ;

តថា បិដ្ឋិកបាទោ វា, មហាបណ្ហិបិ វា បន.

២៥១១. វង្កបាទោ នរោ យោ វា, គណ្ឋិកង្គុលិកោបិ វា;

យោ បនន្ធនខោ វាបិ, កាឡបូតិនខោបិ ច.

២៥១២. ឥច្ចេវមាទិកំ កញ្ចិ, នរំ បរិសទូសកំ;

បព្ពាជេន្តស្ស ភិក្ខុស្ស, ហោតិ អាបត្តិ ទុក្កដំ.

បរិសទូសកកថា.

២៥១៣. ‘‘សាមណេរជ្ជ មា ខាទ, មា ភុញ្ជ ច បិវា’’តិ ច;

និវារេន្តស្ស អាហារំ, ហោតិ អាបត្តិ ទុក្កដំ.