ចូឡវគ្គោ

បារិវាសិកក្ខន្ធកកថា

២៧៤៨. តជ្ជនីយំ និយស្សញ្ច, បព្ពាជំ បដិសារណំ;

តិវិធុក្ខេបនញ្ចាតិ, សត្ត កម្មានិ ទីបយេ.

២៧៤៩. តេចត្តាលីស វត្តានិ, ខន្ធកេ កម្មសញ្ញិតេ;

នវាធិកានិ តិំសេវ, ខន្ធកេ តទនន្តរេ.

២៧៥០. ឯវំ សព្ពានិ វត្តានិ, ទ្វាសីតេវ មហេសិនា;

ហោន្តិ ខន្ធកវត្តានិ, គហិតាគហណេន តុ.

២៧៥១. បារិវាសញ្ច វត្តញ្ច, សមាទិន្នស្ស ភិក្ខុនោ;

រត្តិច្ឆេទោ កថំ វុត្តោ, វត្តភេទោ កថំ ភវេ?

២៧៥២. សហវាសោ វិនាវាសោ, អនារោចនមេវ ច;

បារិវាសិកភិក្ខុស្ស, រត្តិច្ឆេទោ ច ទុក្កដំ.

២៧៥៣. ឯកច្ឆន្នេ បនាវាសេ, បកតត្តេន ភិក្ខុនា;

និវាសោ ទកបាតេន, ឧក្ខិត្តស្ស និវារិតោ.

២៧៥៤. បារិវាសិកភិក្ខុស្ស, អន្តោយេវ ន លព្ភតិ;

ឥច្ចេវំ បន និទ្ទិដ្ឋំ, មហាបច្ចរិយំ បន.

២៧៥៥. ‘‘អវិសេសេន និទ្ទិដ្ឋំ, មហាអដ្ឋកថាទិសុ;

ឧភិន្នំ ទកបាតេន, និវាសោ វារិតោ’’តិ ហិ.

២៧៥៦. អភិក្ខុកេ បនាវាសេ, អនាវាសេបិ កត្ថចិ;

វិប្បវាសំ វសន្តស្ស, រត្តិច្ឆេទោ ច ទុក្កដំ.

២៧៥៧. បារិវាសិកភិក្ខុស្ស, ភិក្ខុំ ទិស្វាន តង្ខណេ;

នារោចេន្តស្ស ចេតស្ស, រត្តិច្ឆេទោ ច ទុក្កដំ.

២៧៥៨. បញ្ចេវ ច យថាវុឌ្ឍំ, លភតេ បារិវាសិកោ;

កាតុំ តត្ថេវ ច ឋត្វា, ឧបោសថបវារណំ.

២៧៥៩. វស្សសាដិំ យថាវុឌ្ឍំ, ទេន្តិ ចេ សង្ឃទាយកា;

ឱណោជនំ តថា ភត្តំ, លភតេ បញ្ចិមេ បន.

បារិវាសិកក្ខន្ធកកថា.

សមថក្ខន្ធកកថា

២៧៦០. វិវាទាធារតា ចានុ-វាទាធិករណម្បិ ច;

អាបត្តាធារតា ចេវ, កិច្ចាធិករណម្បិ ច.

២៧៦១. ឯតានិ បន ចត្តារិ, វុត្តានិ ច មហេសិនា;

ភេទការកវត្ថូនិ, វិវាទោ តត្ថ និស្សិតោ.

២៧៦២. វិបត្តិយោ ចតស្សោវ, អនុវាទោ ឧបាគតោ;

អាបត្តាធារតា នាម, សត្ត អាបត្តិយោ មតា.

២៧៦៣. សង្ឃកិច្ចានិ និស្សាយ, កិច្ចាធិករណំ សិយា;

ឯតេសំ តុ ចតុន្នម្បិ, សមត្តា សមថា មតា.

២៧៦៤. សម្មុខា សតិ ចាមូឡ្ហោ, បដិញ្ញាវិនយោបិ ច;

តស្សបាបិយសី ចេវ, តថា យេភុយ្យសីបិ ច.

២៧៦៥. តិណវត្ថារកោ ចេវ, សត្តមោ វិនយោ មតោ;

សត្តិមេ សមថា វុត្តា, ពុទ្ធេនាទិច្ចពន្ធុនា.

២៧៦៦. វិវាទោ សម្មតិ ទ្វីហិ, អនុវាទោ ចតូហិ ច;

អាបត្តិ បន តីហេវ, កិច្ចមេកេន សម្មតិ.

២៧៦៧. ឆដ្ឋេន បឋមេនាបិ, វិវាទោ ឯត្ថ សម្មតិ;

សម្មុខាវិនយាទីហិ, អនុបុព្ពេន តីហិបិ.

២៧៦៨. តថេវ បញ្ចមេនាបិ, អនុវាទោ ហិ សម្មតិ;

សម្មុខេន បដិញ្ញាយ, តិណវត្ថារកេន ច.

២៧៦៩. អាបត្តូបសមំ យាតិ, តីហេវ សមថេហិ សា;

សម្មុខាវិនយេនេវ, កិច្ចមេកេន សម្មតិ.

២៧៧០. យេភុយ្យសិកកម្មេ តុ, សលាកំ គាហយេ ពុធោ;

គូឡ្ហេន វិវដេនាបិ, កណ្ណជប្បេន វា បន.

២៧៧១. អលជ្ជុស្សទេ គូឡ្ហេន, វិវដេនេវ លជ្ជិសុ;

ពាលេសុ កណ្ណជប្បេន, សលាកំ គាហយេ ពុធោ.

២៧៧២. លជ្ជី អលជ្ជី ពាលោតិ, កេន សក្កា វិជានិតុំ?

សកេន កម្មុនាយេវ, តេន សក្កា វិជានិតុំ.

២៧៧៣. អាបជ្ជតិ ច សញ្ចិច្ច, អាបត្តិំ បរិគូហតិ;

ឆន្ទាទិអគតិំ យាតិ, អលជ្ជី ឯទិសោ សិយា.

២៧៧៤. នាបជ្ជតិ ច សញ្ចិច្ច, អាបត្តិំ ន ច គូហតិ;

ន គច្ឆតិគតិញ្ចាបិ, ឯទិសោ លជ្ជិ បុគ្គលោ.

២៧៧៥. ទុច្ចិន្តិតោ ច ទុព្ភាសី, តថា ទុក្កដការិកោ;

ឯទិសោ បន ‘‘ពាលោ’’តិ, លក្ខណេនេវ ញាយតិ.

២៧៧៦. តិធា សលាកគាហេន, ពហុកា ធម្មវាទិនោ;

យេភុយ្យសិកកម្មេន, កត្តព្ពន្តិ ជិនោព្រវិ.

២៧៧៧. អលជ្ជី សានុវាទោ ច, អសុចី កម្មតោ ច យោ;

តស្សបាបិយសីកម្ម-យោគ្គោ សោ ហោតិ បុគ្គលោ.

២៧៧៨. ភណ្ឌនេ កលហេ ជាតេ, វិវាទស្មិំ អនប្បកេ;

ពហុអស្សាមណេ ចិណ្ណេ, អនគ្គេបិ ច ភស្សកេ.

២៧៧៩. មូលមូលំ គវេសន្តំ, ហោតិ វាឡញ្ច កក្ខឡំ;

តិណវត្ថារកេនេវ, កាតព្ពន្តិ បកាសិតំ.

២៧៨០. យថា ច តិណបណ្ណេន, ឆន្នំ គូថញ្ច មុត្តកំ;

ន ច វាយតិ ទុគ្គន្ធំ, វូបសម្មតិ តង្ខណេ.

២៧៨១. ឋបេត្វា ថុល្លវជ្ជញ្ច, គិហីហិ បដិសំយុតំ;

ទិដ្ឋាវិកម្មិកញ្ចេវ, យោ ច តត្ថ ន ហោតិ តំ.

២៧៨២. សេសាយាបត្តិយា យាវ, ឧបសម្បទមាឡតោ;

សុទ្ធោ ហោតិ និរាបត្តិ, តិណវត្ថារកេ តថា.

សមថក្ខន្ធកកថា.

ខុទ្ទកវត្ថុក្ខន្ធកកថា

២៧៨៣. រុក្ខេ វា បន កុដ្ដេវា, អដ្ដានេ ថម្ភកេសុ វា;

ន្ហាយមានោ សកំ កាយំ, ឧគ្ឃំសេយ្យស្ស ទុក្កដំ.

២៧៨៤. កាយំ គន្ធព្ពហត្ថេន, កុរុវិន្ទកសុត្តិយា;

មល្លកេន ន ឃំសេយ្យ, នាញ្ញមញ្ញញ្ច កាយតោ.

២៧៨៥. អកតំ មល្លកំ នាម, គិលានស្សេវ វដ្ដតិ;

កតំ តំ មល្លកំ នាម, សព្ពេសម្បិ ន វដ្ដតិ.

២៧៨៦. កបាលិដ្ឋកខណ្ឌានិ, សព្ពស្ស បុថុបាណិកំ;

គិលានស្សាគិលានស្ស, វត្ថវដ្ដិ ច វដ្ដតិ.

២៧៨៧. វុត្តា ផេណកបាសាណ-កថលា បាទឃំសនេ;

វដ្ដំ វា ចតុរស្សំ វា, កតកំ ន ច វដ្ដតិ.

២៧៨៨. យំ កិញ្ចិបិ អលង្ការំ, ធារេន្តស្សបិ ទុក្កដំ;

ហោតិ អន្តមសោ តាល-បណ្ណមត្តម្បិ ភិក្ខុនោ.

២៧៨៩. ឱសណ្ហេយ្យ សកេ កេសេ, យោ ហត្ថផណកេន វា;

ផណកេនបិ កោច្ឆេន, ទុក្កដំ តស្ស និទ្ទិសេ.

២៧៩០. សិត្ថតេលោទតេលេហិ, មណ្ឌនត្ថំ ន វដ្ដតិ;

អនុលោមនិបាតត្ថំ, ឧទ្ធំលោមេន ភិក្ខុនា.

២៧៩១. ហត្ថំ តេលេន តេមេត្វា, បុញ្ឆិតព្ពា សិរោរុហា;

វដ្ដតុណ្ហាភិតត្តស្ស, អល្លហត្ថេន បុញ្ឆិតុំ.

២៧៩២. អាទាសេ ឧទបត្តេ វា, យត្ថ កត្ថចិ អត្តនោ;

មុខពិម្ពំ វិនា ហេតុំ, ឱលោកេន្តស្ស ទុក្កដំ.

២៧៩៣. ‘‘សញ្ឆវិំ តុ មុខំ, នោ’’តិ, ទដ្ឋុមាពាធបច្ចយា;

‘‘ជិណ្ណោ នោ’’តាយុសង្ខារ-ជាននត្ថញ្ច វដ្ដតិ.

២៧៩៤. នច្ចំ វា បន គីតំ វា, វាទិតំ វាបិ ភិក្ខុនោ;

ទដ្ឋុំ វា បន សោតុំ វា, គច្ឆតោ ហោតិ ទុក្កដំ.

២៧៩៥. ទដ្ឋុមន្តមសោ មោរ-នច្ចម្បិ ច ន វដ្ដតិ;

សោតុមន្តមសោ ទន្ត-គីតម្បិ ច ន វដ្ដតិ.

២៧៩៦. នច្ចន្តស្ស សយំ វាបិ, នច្ចាបេន្តស្ស ទុក្កដំ;

អនាបត្តន្តរារាមេ, ឋត្វា សុណាតិ បស្សតិ.

២៧៩៧. ‘‘បស្សិស្សាមី’’តិ នច្ចំ វា, គីតំ វា បន វាទិតំ;

វិហារតោ វិហារំ វា, គច្ឆតោ ហោតិ ទុក្កដំ.

២៧៩៨. អាបត្តន្តោវិហារេបិ, ឧដ្ឋហិត្វាន គច្ឆតោ;

ឋត្វា គីវំ បសារេត្វា, បស្សតោបិ ច វីថិយំ.

២៧៩៩. កេសា ទីឃា ន ធារេយ្យា, យោ ធារេយ្យស្ស ទុក្កដំ;

ទ្វង្គុលំ វា ទុមាសំ វា, តតោ ឧទ្ធំ ន វដ្ដតិ.

២៨០០. នខេ នាសិកលោមានិ, ទីឃានិ ន តុ ធារយេ;

ន ច វីសតិមដ្ឋំ វា, កាតុំ វដ្ដតិ ភិក្ខុនោ.

២៨០១. កប្បាបេយ្យ វិសុំ មស្សុំ, ទាឋិកំ វា ឋបេយ្យ យោ;

សំហរាបេយ្យ វា លោមំ, សម្ពាធេ តស្ស ទុក្កដំ.

២៨០២. ឆិន្ទតោ ទុក្កដំ វុត្តំ, កេសេ កត្តរិកាយ វា;

អគិលានស្ស អញ្ញេន, ឆិន្ទាបេន្តស្ស វា តថា.

២៨០៣. ឆិន្ទតោ អត្តនោ អង្គ-ជាតំ ថុល្លច្ចយំ សិយា;

សេសង្គឆេទនេ អត្ត-វធេ អាបត្តិ ទុក្កដំ.

២៨០៤. អហិកីដាទិទដ្ឋស្ស, តាទិសាពាធបច្ចយា;

ន ទោសោ ឆិន្ទតោ អង្គំ, មោចេន្តស្ស ច លោហិតំ.

២៨០៥. អបរិស្សាវនោ មគ្គំ, សចេ គច្ឆតិ ទុក្កដំ;

យាចមានស្ស វា មគ្គេ, តថេវាទទតោបិ តំ.

២៨០៦. ន ភុញ្ជេ ន បិវេ នគ្គោ, ន ខាទេ ន ច សាយយេ;

ន ទទេ ន ច គណ្ហេយ្យ, ន គច្ឆេយ្យបិ អញ្ជសំ.

២៨០៧. វន្ទិតព្ពំ ន នគ្គេន, វន្ទាបេតព្ពមេវ វា;

បរិកម្មំ ន កាតព្ពំ, ន នគ្គេន ច ការយេ.

២៨០៨. បរិកម្មេ បដិច្ឆាទី, តិស្សោ ជន្តាឃរាទិកា;

វុត្តា, វត្ថបដិច្ឆាទី, សព្ពត្ថ បន វដ្ដតិ.

២៨០៩. យត្ថ កត្ថចិ បេឡាយំ, ភុញ្ជិតុំ ន ច វដ្ដតិ;

ឯកតោ ភុញ្ជតោ ហោតិ, ទុក្កដំ ឯកភាជនេ.

២៨១០. ឯកបាវុរណា ឯក-ត្ថរណា វា និបជ្ជរេ;

ឯកមញ្ចេបិ វា តេសំ, ហោតិ អាបត្តិ ទុក្កដំ.

២៨១១. ន និសីទេយ្យ សង្ឃាដិ-បល្លត្ថិកមុបាគតោ;

កិញ្ចិ កីឡំ ន កីឡេយ្យ, បលិតំ ន ច គាហយេ.

២៨១២. ភមុកាយ នលាដេ វា, ទាឋិកាយបិ ឧគ្គតំ;

តាទិសំ បលិតំ ចញ្ញំ, គាហាបេតុម្បិ វដ្ដតិ.

២៨១៣. អគិលានោ សចេ ភិក្ខុ, ឆត្តំ ធារេយ្យ ទុក្កដំ;

អត្តនោ ចីវរាទីនំ, គុត្តត្ថំ បន វដ្ដតិ.

២៨១៤. ហត្ថិសោណ្ឌំ ចតុក្កណ្ណំ, វសនំ មច្ឆវាឡកំ;

វេល្លិយំ តាលវណ្ដញ្ច, និវាសេន្តស្ស ទុក្កដំ.

២៨១៥. គហិបារុបនំ វាបិ, បារុបន្តស្ស ទុក្កដំ;

និវាសនេ បារុបនេ, បរិមណ្ឌលតា មតា.

២៨១៦. លោកាយតំ ន វាចេយ្យ, ន ច តំ បរិយាបុណេ;

ន តិរច្ឆានវិជ្ជា វា, វាចេតព្ពាវ ភិក្ខុនា.

២៨១៧. ន ច វដ្ដតិ ធារេតុំ, សព្ពា ចាមរិពីជនី;

ន ចាលិម្បេយ្យ ទាយំ វា, ន ច លញ្ជេ មុខម្បិ ច.

២៨១៨. ន វហេ ឧភតោកាជំ, វដ្ដតន្តរកាជកំ;

សីសក្ខន្ធកដោលម្ព-ភារេ ទោសោ ន វិជ្ជតិ.

២៨១៩. អដ្ឋង្គុលាទិកំ ភិក្ខុ, បច្ឆិមំ ចតុរង្គុលា;

ខាទតោ ទន្តកដ្ឋញ្ច, ហោតិ អាបត្តិ ទុក្កដំ.