ភិក្ខុនីវិភង្គោ

១៩៦៤. ភិក្ខុនីនំ ហិតត្ថាយ, វិភង្គំ យំ ជិនោព្រវិ;

តស្មិំ អបិ សមាសេន, កិញ្ចិមត្តំ ភណាមហំ.

បារាជិកកថា

១៩៦៥. ឆន្ទសោ មេថុនំ ធម្មំ, បដិសេវេយ្យ យា បន;

ហោតិ បារាជិកា នាម, សមណី សា បវុច្ចតិ.

១៩៦៦. មនុស្សបុរិសាទីនំ, នវន្នំ យស្ស កស្សចិ;

សជីវស្សាប្យជីវស្ស, សន្ថតំ វា អសន្ថតំ.

១៩៦៧. អត្តនោ តិវិធេ មគ្គេ, យេភុយ្យក្ខាយិតាទិកំ;

អង្គជាតំ បវេសេន្តី, អល្លោកាសេ បរាជិតា.

១៩៦៨. ឥតោ បរមវត្វាវ, សាធារណវិនិច្ឆយំ;

អសាធារណមេវាហំ, ភណិស្សាមិ សមាសតោ.

១៩៦៩. អធក្ខកំ សរីរកំ, យទុព្ភជាណុមណ្ឌលំ;

សរីរកេន ចេ តេន, ផុសេយ្យ ភិក្ខុនី បន.

១៩៧០. អវស្សុតស្សាវស្សុតា, មនុស្សបុគ្គលស្ស យា;

សរីរមស្ស តេន វា, ផុដ្ឋា បារាជិកា សិយា.

១៩៧១. កប្បរស្ស បនុទ្ធម្បិ, គហិតំ ឧព្ភជាណុនា;

យថាវុត្តប្បការេន, កាយេនានេន អត្តនោ.

១៩៧២. បុរិសស្ស តថា កាយ- បដិពទ្ធំ ផុសន្តិយា;

តថា យថាបរិច្ឆិន្ន- កាយពទ្ធេន អត្តនោ.

១៩៧៣. អវសេសេន វា តស្ស, កាយំ កាយេន អត្តនោ;

ហោតិ ថុល្លច្ចយំ តស្សា, បយោគេ បុរិសស្ស ច.

១៩៧៤. យក្ខបេតតិរច្ឆាន- បណ្ឌកានំ អធក្ខកំ;

ឧព្ភជាណុំ តថេវស្សា, ឧភតោវស្សវេ សតិ.

១៩៧៥. ឯកតោវស្សវេ ចាបិ, ថុល្លច្ចយមុទីរិតំ;

អវសេសេ ច សព្ពត្ថ, ហោតិ អាបត្តិ ទុក្កដំ.

១៩៧៦. ឧព្ភក្ខកមធោជាណុ-មណ្ឌលំ បន យំ ឥធ;

កប្បរស្ស ច ហេដ្ឋាបិ, គតំ ឯត្ថេវ សង្គហំ.

១៩៧៧. កេលាយតិ សចេ ភិក្ខុ, សទ្ធិំ ភិក្ខុនិយា បន;

ឧភិន្នំ កាយសំសគ្គ-រាគេ សតិ ហិ ភិក្ខុនោ.

១៩៧៨. ហោតិ សង្ឃាទិសេសោវ, នាសោ ភិក្ខុនិយា សិយា;

កាយសំសគ្គរាគោ ច, សចេ ភិក្ខុនិយា សិយា.

១៩៧៩. ភិក្ខុនោ មេថុនោ រាគោ, គេហបេមម្បិ វា ភវេ;

តស្សា ថុល្លច្ចយំ វុត្តំ, ភិក្ខុនោ ហោតិ ទុក្កដំ.

១៩៨០. ឧភិន្នំ មេថុនេ រាគេ, គេហបេមេបិ វា សតិ;

អវិសេសេន និទ្ទិដ្ឋំ, ឧភិន្នំ ទុក្កដំ បន.

១៩៨១. យស្ស យត្ថ មនោសុទ្ធំ, តស្ស តត្ថ ន ទោសតា;

ឧភិន្នម្បិ អនាបត្តិ, ឧភិន្នំ ចិត្តសុទ្ធិយា.

១៩៨២. កាយសំសគ្គរាគេន, ភិន្ទិត្វា បឋមំ បន;

បច្ឆា ទូសេតិ ចេ នេវ, ហោតិ ភិក្ខុនិទូសកោ.

១៩៨៣. អថ ភិក្ខុនិយា ផុដ្ឋោ, សាទិយន្តោវ ចេតសា;

និច្ចលោ ហោតិ ចេ ភិក្ខុ, ន ហោតាបត្តិ ភិក្ខុនោ.

១៩៨៤. ភិក្ខុនី ភិក្ខុនា ផុដ្ឋា, សចេ ហោតិបិ និច្ចលា;

អធិវាសេតិ សម្ផស្សំ, តស្សា បារាជិកំ សិយា.

១៩៨៥. តថា ថុល្លច្ចយំ ខេត្តេ, ទុក្កដញ្ច វិនិទ្ទិសេ;

វុត្តត្តា ‘‘កាយសំសគ្គំ, សាទិយេយ្យា’’តិ សត្ថុនា.

១៩៨៦. តស្សា ក្រិយសមុដ្ឋានំ, ឯវំ សតិ ន ទិស្សតិ;

ឥទំ តព្ពហុលេនេវ, នយេន បរិទីបិតំ.

១៩៨៧. អនាបត្តិ អសញ្ចិច្ច, អជានិត្វាមសន្តិយា;

សតិ អាមសនេ តស្សា, ផស្សំ វាសាទិយន្តិយា.

១៩៨៨. វេទនដ្ដាយ វា ខិត្ត-ចិត្តាយុម្មត្តិកាយ វា;

សមុដ្ឋានាទយោ តុល្យា, បឋមន្តិមវត្ថុនា.

ឧព្ភជាណុមណ្ឌលកថា.

១៩៨៩. បារាជិកត្តំ ជានន្តិ, សលិង្គេ តុ ឋិតាយ ហិ;

‘‘ន កស្សចិ បរស្សាហំ, អារោចេស្សាមិ ទានិ’’តិ.

១៩៩០. ធុរេ និក្ខិត្តមត្តស្មិំ, សា ច បារាជិកា សិយា;

អយំ វជ្ជបដិច្ឆាទិ- នាមិកា បន នាមតោ.

១៩៩១. សេសំ សប្បាណវគ្គស្មិំ, ទុដ្ឋុល្លេន សមំ នយេ;

វិសេសោ តត្រ បាចិត្តិ, ឥធ បារាជិកំ សិយា.

វជ្ជបដិច្ឆាទិកថា.

១៩៩២. សង្ឃេនុក្ខិត្តកោ ភិក្ខុ, ឋិតោ ឧក្ខេបនេ បន;

យំទិដ្ឋិកោ ច សោ តស្សា, ទិដ្ឋិយា គហណេន តំ.

១៩៩៣. អនុវត្តេយ្យ យា ភិក្ខុំ, ភិក្ខុនី សា វិសុម្បិ ច;

សង្ឃមជ្ឈេបិ អញ្ញាហិ, វុច្ចមានា តថេវ ច.

១៩៩៤. អចជន្តីវ តំ វត្ថុំ, គហេត្វា យទិ តិដ្ឋតិ;

តស្ស កម្មស្ស ឱសានេ, ឧក្ខិត្តស្សានុវត្តិកា.

១៩៩៥. ហោតិ បារាជិកាបន្នា, ហោតាសាកិយធីតរា;

បុន អប្បដិសន្ធេយា, ទ្វិធា ភិន្នា សិលា វិយ.

១៩៩៦. អធម្មេ បន កម្មស្មិំ, និទ្ទិដ្ឋំ តិកទុក្កដំ;

សមុដ្ឋានាទយោ សព្ពេ, វុត្តា សមនុភាសនេ.

ឧក្ខិត្តានុវត្តិកកថា.

១៩៩៧. អបារាជិកខេត្តស្ស, គហណំ យស្ស កស្សចិ;

អង្គស្ស បន តំ ហត្ថ-គ្គហណន្តិ បវុច្ចតិ.

១៩៩៨. បារុតស្ស និវត្ថស្ស, គហណំ យស្ស កស្សចិ;

ឯតំ សង្ឃាដិយា កណ្ណ-គ្គហណន្តិ បវុច្ចតិ.

១៩៩៩. កាយសំសគ្គសង្ខាត-អសទ្ធម្មស្ស ការណា;

ភិក្ខុនី ហត្ថបាសស្មិំ, តិដ្ឋេយ្យ បុរិសស្ស វា.

២០០០. សល្លបេយ្យ តថា តត្ថ, ឋត្វា តុ បុរិសេន វា;

សង្កេតំ វាបិ គច្ឆេយ្យ, ឥច្ឆេយ្យា គមនស្ស វា.

២០០១. តទត្ថាយ បដិច្ឆន្ន-ដ្ឋានញ្ច បវិសេយ្យ វា;

ឧបសំហរេយ្យ កាយំ វា, ហត្ថបាសេ ឋិតា បន.

២០០២. អយមស្សមណី ហោតិ, វិនដ្ឋា អដ្ឋវត្ថុកា;

អភព្ពា បុនរុឡ្ហាយ, ឆិន្នោ តាលោវ មត្ថកេ.

២០០៣. អនុលោមេន វា វត្ថុំ, បដិលោមេន វា ចុតា;

អដ្ឋមំ បរិបូរេន្តី, តថេកន្តរិកាយ វា.

២០០៤. អថាទិតោ បនេកំ វា, ទ្វេ វា តីណិបិ សត្ត វា;

សតក្ខត្តុម្បិ បូរេន្តី, នេវ បារាជិកា សិយា.

២០០៥. អាបត្តិយោ បនាបន្នា, ទេសេត្វា តាហិ មុច្ចតិ;

ធុរនិក្ខេបនំ កត្វា, ទេសិតា គណនូបិកា.

២០០៦. ន ហោតាបត្តិយា អង្គំ, សឧស្សាហាយ ទេសិតា;

ទេសនាគណនំ នេតិ, ទេសិតាបិ អទេសិតា.

២០០៧. អនាបត្តិ អសញ្ចិច្ច, អជានិត្វា ករោន្តិយា;

សមុដ្ឋានាទយោ សព្ពេ, អនន្តរសមា មតា.

២០០៨. ‘‘អសទ្ធម្មោ’’តិ នាមេត្ថ, កាយសំសគ្គនាមកោ;

អយមុទ្ទិសិតោ អត្ថោ, សព្ពអដ្ឋកថាសុបិ.

២០០៩. វិញ្ញូ បដិពលោ កាយ-សំសគ្គំ បដិបជ្ជិតុំ;

កាយសំសគ្គភាវេ តុ, សាធកំ វចនំ ឥទំ.

អដ្ឋវត្ថុកកថា.

២០១០. អវស្សុតា បដិច្ឆាទី, ឧក្ខិត្តា អដ្ឋវត្ថុកា;

អសាធារណបញ្ញត្តា, ចតស្សោវ មហេសិនា.

បារាជិកកថា និដ្ឋិតា.

សង្ឃាទិសេសកថា

២០១១. យា បន ភិក្ខុនី ឧស្សយវាទា;

អដ្ដករី មុខរី វិហរេយ្យ;

យេន កេនចិ នរេនិធ សទ្ធិំ;

សា គរុកំ កិរ ទោសមុបេតិ.

២០១២. សក្ខិំ វាបិ សហាយំ វា, បរិយេសតិ ទុក្កដំ;

បទេ បទេ តថា អដ្ដំ, កាតុំ គច្ឆន្តិយាបិ ច.

២០១៣. អារោចេតិ សចេ បុព្ពំ, ភិក្ខុនី អត្តនោ កថំ;

ទិស្វា វោហារិកំ តស្សា, ហោតិ អាបត្តិ ទុក្កដំ.

២០១៤. អារោចេតិ សចេ បច្ឆា, ឥតរោ អត្តនោ កថំ;

ហោតិ ភិក្ខុនិយា តស្សា, ថុល្លច្ចយមនន្តរំ.

២០១៥. អារោចេតិតរោ បុព្ពំ, សចេ សោ អត្តនោ កថំ;

បច្ឆា ភិក្ខុនី ចេ បុព្ព-សទិសោវ វិនិច្ឆយោ.

២០១៦. ‘‘អារោចេហី’’តិ វុត្តា ចេ, ‘‘កថំ តវ មមាបិ ច’’;

អារោចេតុ យថាកាមំ, បឋមេ ទុក្កដំ សិយា.

២០១៧. ទុតិយារោចនេ តស្សា, ថុល្លច្ចយមុទីរិតំ;

ឧបាសកេន វុត្តេបិ, អយមេវ វិនិច្ឆយោ.

២០១៨. អារោចិតកថំ សុត្វា, ឧភិន្នម្បិ យថា តថា;

វិនិច្ឆយេ កតេ តេហិ, អដ្ដេ បន ច និដ្ឋិតេ.

២០១៩. អដ្ដស្ស បរិយោសានេ, ជយេ ភិក្ខុនិយា បន;

បរាជយេបិ វា តស្សា, ហោតិ សង្ឃាទិសេសតា.

២០២០. ទូតំ វាបិ បហិណិត្វា, អាគន្ត្វាន សយម្បិ វា;

បច្ចត្ថិកមនុស្សេហិ, អាកឌ្ឍីយតិ យា បន.

២០២១. អារាមេ បន អញ្ញេហិ, អនាចារំ កតំ សចេ;

អនោទិស្ស បរំ កិញ្ចិ, រក្ខំ យាចតិ តត្ថ យា.

២០២២. យាយ កិញ្ចិ អវុត្តាវ, ធម្មដ្ឋា សយមេវ តុ;

សុត្វា តំ អញ្ញតោ អដ្ដំ, និដ្ឋាបេន្តិ សចេ បន.

២០២៣. តស្សា, ឧម្មត្តិកាទីន-មនាបត្តិ បកាសិតា;

កថិនេន សមុដ្ឋានំ, តុល្យំ សកិរិយំ ឥទំ.

អដ្ដការិកថា.

២០២៤. ជានន្តី ភិក្ខុនី ចោរិំ, វជ្ឈំ វិទិតមេវ យា;

សង្ឃំ អនបលោកេត្វា, រាជានំ គណមេវ វា.

២០២៥. វុដ្ឋាបេយ្យ វិនា កប្បំ, ចោរិវុដ្ឋាបនំ បន;

សង្ឃាទិសេសមាបត្តិ-មាបន្នា នាម ហោតិ សា.

២០២៦. បញ្ចមាសគ្ឃនំ យាយ, ហរិតំ បរសន្តកំ;

អតិរេកគ្ឃនំ វាបិ, អយំ ‘‘ចោរី’’តិ វុច្ចតិ.

២០២៧. ភិក្ខុនីសុ បនញ្ញាសុ, តិត្ថិយេសុបិ វា តថា;

យា បព្ពជិតបុព្ពា សា, អយំ ‘‘កប្បា’’តិ វុច្ចតិ.

២០២៨. វុដ្ឋាបេតិ ច យា ចោរិំ, ឋបេត្វា កប្បមេវិទំ;

សចេ អាចរិនិំ បត្តំ, ចីវរំ បរិយេសតិ.

២០២៩. សម្មន្នតិ ច សីមំ វា, តស្សា អាបត្តិ ទុក្កដំ;

ញត្តិយា ទុក្កដំ ទ្វីហិ, កម្មវាចាហិ ច ទ្វយំ.

២០៣០. ថុល្លច្ចយស្ស, កម្មន្តេ, គរុកំ និទ្ទិសេ ពុធោ;

គណោ អាចរិនី ចេវ, ន ច មុច្ចតិ ទុក្កដំ.

២០៣១. អនាបត្តិ អជានន្តី, វុដ្ឋាបេតិ, តថេវ ច;

កប្បំ វា អបលោកេត្វា, តស្សា ឧម្មត្តិកាយ វា.

២០៣២. ចោរិវុដ្ឋាបនំ នាម, ជាយតេ វាចចិត្តតោ;

កាយវាចាទិតោ ចេវ, សចិត្តញ្ច ក្រិយាក្រិយំ.

ចោរិវុដ្ឋាបនកថា.