សេខិយកថា

១៨៧០. យោ អនាទរិយេនេវ, បុរតោ បច្ឆតោបិ វា;

ឱលម្ពេត្វា និវាសេយ្យ, តស្ស ចាបត្តិ ទុក្កដំ.

១៨៧១. ហត្ថិសោណ្ឌាទិតុល្យំ តុ, និវាសេន្តស្ស ទុក្កដំ;

អាបត្តិភីរុនា និច្ចំ, វត្ថព្ពំ បរិមណ្ឌលំ.

១៨៧២. ជាណុមណ្ឌលតោ ហេដ្ឋា, អដ្ឋង្គុលប្បមាណកំ;

ឱតារេត្វា និវត្ថព្ពំ, តតោ ឩនំ ន វដ្ដតិ.

១៨៧៣. អសញ្ចិច្ចាសតិស្សាបិ, អជានន្តស្ស កេវលំ;

អនាបត្តិ គិលានស្សា-បទាសុម្មត្តកាទិនោ.

បរិមណ្ឌលកថា.

១៨៧៤. ឧភោ កោណេ សមំ កត្វា, សាទរំ បរិមណ្ឌលំ;

កត្វា បារុបិតព្ពេវំ, អករោន្តស្ស ទុក្កដំ.

១៨៧៥. អវិសេសេន វុត្តំ តុ, ឥទំ សិក្ខាបទទ្វយំ;

តស្មា ឃរេ វិហារេ វា, កត្តព្ពំ បរិមណ្ឌលំ.

ទុតិយំ.

១៨៧៦. គណ្ឋិកំ បដិមុញ្ចិត្វា, កត្វា កោណេ ឧភោ សមំ;

ឆាទេត្វា មណិពន្ធញ្ច, គន្តព្ពំ គីវមេវ ច.

១៨៧៧. តថា អកត្វា ភិក្ខុស្ស, ជត្តូនិបិ ឧរម្បិ ច;

វិវរិត្វា យថាកាមំ, គច្ឆតោ ហោតិ ទុក្កដំ.

តតិយំ.

១៨៧៨. គលវាដកតោ ឧទ្ធំ, សីសញ្ច មណិពន្ធតោ;

ហត្ថេ បិណ្ឌិកមំសម្ហា, ហេដ្ឋា បាទេ ឧភោបិ ច.

១៨៧៩. វិវរិត្វាវសេសញ្ច, ឆាទេត្វា ចេ និសីទតិ;

ហោតិ សោ សុប្បដិច្ឆន្នោ, ទោសោ វាសូបគស្ស ន.

ចតុត្ថំ.

១៨៨០. ហត្ថំ វា បន បាទំ វា, អចាលេន្តេន ភិក្ខុនា;

សុវិនីតេន គន្តព្ពំ, ឆដ្ឋេ នត្ថិ វិសេសតា.

បញ្ចមឆដ្ឋានិ.

១៨៨១. សតីមតាវិការេន, យុគមត្តញ្ច បេក្ខិនា;

សុសំវុតេន គន្តព្ពំ, ភិក្ខុនោក្ខិត្តចក្ខុនា.

១៨៨២. យត្ថ កត្ថចិ ហិ ដ្ឋានេ, ឯកស្មិំ អន្តរេ ឃរេ;

ឋត្វា បរិស្សយាភាវំ, ឱលោកេតុម្បិ វដ្ដតិ.

១៨៨៣. យោ អនាទរិយំ កត្វា, ឱលោកេន្តោ តហិំ តហិំ;

សចេន្តរឃរេ យាតិ, ទុក្កដំ អដ្ឋមំ តថា.

សត្តមដ្ឋមានិ.

១៨៨៤. ឯកតោ ឧភតោ វាបិ, ហុត្វា ឧក្ខិត្តចីវរោ;

ឥន្ទខីលកតោ អន្តោ, គច្ឆតោ ហោតិ ទុក្កដំ.

នវមំ.

១៨៨៥. តថា និសិន្នកាលេបិ, នីហរន្តេន កុណ្ឌិកំ;

អនុក្ខិបិត្វា ទាតព្ពា, ទោសោ វាសូបគស្ស ន.

ទសមំ.

បឋមោ វគ្គោ.

១៨៨៦. ន វដ្ដតិ ហសន្តេន, គន្តុញ្ចេវ និសីទិតុំ;

វត្ថុស្មិំ ហសនីយស្មិំ, សិតមត្តំ តុ វដ្ដតិ.

បឋមទុតិយានិ.

១៨៨៧. អប្បសទ្ទេន គន្តព្ពំ, ចតុត្ថេបិ អយំ នយោ;

មហាសទ្ទំ ករោន្តស្ស, ឧភយត្ថាបិ ទុក្កដំ.

តតិយចតុត្ថានិ.

១៨៨៨. កាយប្បចាលកំ កត្វា, ពាហុសីសប្បចាលកំ;

គច្ឆតោ ទុក្កដំ ហោតិ, តថេវ ច និសីទតោ.

១៨៨៩. កាយំ ពាហុញ្ច សីសញ្ច, បគ្គហេត្វា ឧជុំ បន;

គន្តព្ពមាសិតព្ពញ្ច, សមេនិរិយាបថេន តុ.

១៨៩០. និសីទនេន យុត្តេសុ, តីសុ វាសូបគស្ស ហិ;

អនាបត្តីតិ ញាតព្ពំ, វិញ្ញុនា វិនយញ្ញុនា.

ទុតិយោ វគ្គោ.

១៨៩១. ខម្ភំ កត្វា សសីសំ វា, បារុបិត្វាន គច្ឆតោ;

ទុក្កដំ មុនិនា វុត្តំ, តថា ឧក្កុដិកាយ វា.

១៨៩២. ហត្ថបល្លត្ថិកាយាបិ, ទុស្សបល្លត្ថិកាយ វា;

តស្សន្តរឃរេ ហោតិ, និសីទន្តស្ស ទុក្កដំ.

១៨៩៣. ទុតិយេ ច ចតុត្ថេ ច, ឆដ្ឋេ វាសូបគស្ស តុ;

អនាបត្តីតិ សារុប្បា, ឆព្ពីសតិ បកាសិតា.

ឆដ្ឋំ.

១៨៩៤. សក្កច្ចំ សតិយុត្តេន, ភិក្ខុនា បត្តសញ្ញិនា;

បិណ្ឌបាតោ គហេតព្ពោ, សមសូបោវ វិញ្ញុនា.

១៨៩៥. សូបោ ភត្តចតុព្ភាគោ, ‘‘សមសូបោ’’តិ វុច្ចតិ;

មុគ្គមាសកុលត្ថានំ, សូបោ ‘‘សូបោ’’តិ វុច្ចតិ.

១៨៩៦. អនាបត្តិ អសញ្ចិច្ច, គិលានស្ស រសេរសេ;

តថេវ ញាតកាទីនំ, អញ្ញត្ថាយ ធនេន វា.

សត្តមដ្ឋមនវមានិ.

១៨៩៧. អន្តោលេខាបមាណេន, បត្តស្ស មុខវដ្ដិយា;

បូរិតោវ គហេតព្ពោ, អធិដ្ឋានូបគស្ស តុ.

១៨៩៨. តត្ថ ថូបីកតំ កត្វា, គណ្ហតោ យាវកាលិកំ;

យំ កិញ្ចិ បន ភិក្ខុស្ស, ហោតិ អាបត្តិ ទុក្កដំ.

១៨៩៩. អធិដ្ឋានូបគេ បត្តេ, កាលិកត្តយមេវ ច;

សេសេ ថូបីកតំ សព្ពំ, វដ្ដតេវ ន សំសយោ.

១៩០០. ទ្វីសុ បត្តេសុ ភត្តំ តុ, គហេត្វា បត្តមេកកំ;

បូរេត្វា យទិ បេសេតិ, ភិក្ខូនំ បន វដ្ដតិ.

១៩០១. បត្តេ បក្ខិប្បមានំ យំ, ឧច្ឆុខណ្ឌផលាទិកំ;

ឱរោហតិ សចេ ហេដ្ឋា, ន តំ ថូបីកតំ សិយា.

១៩០២. បុប្ផតក្កោលកាទីនំ, ឋបេត្វា ចេ វដំសកំ;

ទិន្នំ អយាវកាលិត្តា, ន តំ ថូបីកតំ សិយា.

១៩០៣. វដំសកំ តុ បូវស្ស, ឋបេត្វា ឱទនោបរិ;

បិណ្ឌបាតំ សចេ ទេន្តិ, ឥទំ ថូបីកតំ សិយា.

១៩០៤. ភត្តស្សូបរិ បណ្ណំ វា, ថាលកំ វាបិ កិញ្ចិបិ;

ឋបេត្វា បរិបូរេត្វា, សចេ គណ្ហាតិ វដ្ដតិ.

១៩០៥. បដិគ្គហេតុមេវស្ស, តំ តុ សព្ពំ ន វដ្ដតិ;

គហិតំ សុគហិតំ, បច្ឆា, ភុញ្ជិតព្ពំ យថាសុខំ.

តតិយោ វគ្គោ.

១៩០៦. បឋមំ ទុតិយំ វុត្ត-នយំ តុ តតិយេ បន;

ឧបរោធិមទស្សេត្វា, ភោត្តព្ពំ បដិបាដិយា.

១៩០៧. អញ្ញេសំ អត្តនោ ភត្តំ, អាកិរំ បន ភាជនេ;

នត្ថោមសតិ ចេ ទោសោ, តថា ឧត្តរិភង្គកំ.

តតិយំ.

១៩០៨. ចតុត្ថេ យំ តុ វត្តព្ពំ, វុត្តំ បុព្ពេ អសេសតោ;

បញ្ចមេ មត្ថកំ ទោសោ, មទ្ទិត្វា បរិភុញ្ជតោ.

១៩០៩. អនាបត្តិ គិលានស្ស, បរិត្តេបិ ច សេសកេ;

ឯកតោ បន មទ្ទិត្វា, សំកឌ្ឍិត្វាន ភុញ្ជតោ.

ចតុត្ថបញ្ចមានិ.

១៩១០. យោ ភិយ្យោកម្យតាហេតុ, សូបំ វា ព្យញ្ជនម្បិ វា;

បដិច្ឆាទេយ្យ ភត្តេន, តស្ស ចាបត្តិ ទុក្កដំ.

ឆដ្ឋំ.

១៩១១. វិញ្ញត្តិយំ តុ វត្តព្ពំ, អបុព្ពំ នត្ថិ កិញ្ចិបិ;

អដ្ឋមេ បន ឧជ្ឈានេ, គិលានោបិ ន មុច្ចតិ.

១៩១២. ‘‘ទស្សាមិ ទាបេស្សាមី’’តិ, ឱលោកេន្តស្ស ភិក្ខុនោ;

អនាបត្តីតិ ញាតព្ពំ, ន ច ឧជ្ឈានសញ្ញិនោ.

អដ្ឋមំ.

១៩១៣. មហន្តំ បន មោរណ្ឌំ, កុក្កុដណ្ឌញ្ច ខុទ្ទកំ;

តេសំ មជ្ឈប្បមាណេន, កត្តព្ពោ កពឡោ បន.

១៩១៤. ខជ្ជកេ បន សព្ពត្ថ, មូលខាទនិយាទិកេ;

ផលាផលេ អនាបត្តិ, គិលានុម្មត្តកាទិនោ.

នវមំ.

១៩១៥. អទីឃោ បន កាតព្ពោ, អាលោបោ បរិមណ្ឌលោ;

ខជ្ជតុត្តរិភង្គស្មិំ, អនាបត្តិ ផលាផលេ.

ទសមំ.

ចតុត្ថោ វគ្គោ.

១៩១៦. អនាហដេ មុខទ្វារំ, អប្បត្តេ កពឡេ បន;

អត្តនោ ច មុខទ្វារំ, វិវរន្តស្ស ទុក្កដំ.

បឋមំ.

១៩១៧. មុខេ ច សកលំ ហត្ថំ, បក្ខិបន្តស្ស ទុក្កដំ;

មុខេ ច កពឡំ កត្វា, កថេតុំ ន ច វដ្ដតិ.

១៩១៨. វចនំ យត្តកេនស្ស, បរិបុណ្ណំ ន ហោតិ ហិ;

មុខស្មិំតត្តកេ សន្តេ, ព្យាហរន្តស្ស ទុក្កដំ.

១៩១៩. មុខេ ហរីតកាទីនិ, បក្ខិបិត្វា កថេតិ យោ;

វចនំ បរិបុណ្ណំ ចេ, កថេតុំ បន វដ្ដតិ.

ទុតិយតតិយានិ.

១៩២០. យោ បិណ្ឌុក្ខេបកំ ភិក្ខុ, កពឡច្ឆេទកម្បិ វា;

មក្កដោ វិយ គណ្ឌេ វា, កត្វា ភុញ្ជេយ្យ ទុក្កដំ.

ចតុត្ថបញ្ចមឆដ្ឋានិ.

១៩២១. និទ្ធុនិត្វាន ហត្ថំ វា, ភត្តំ សិត្ថាវការកំ;

ជិវ្ហានិច្ឆារកំ វាបិ, តថា ‘‘ចបុ ចបូ’’តិ វា.

១៩២២. អនាទរវសេនេវ, ភុញ្ជតោ ហោតិ ទុក្កដំ;

សត្តមេ អដ្ឋមេ នត្ថិ, ទោសោ កចវរុជ្ឈនេ.

សត្តមទសមានិ.

បញ្ចមោ វគ្គោ.

១៩២៣. កត្វា ឯវំ ន ភោត្តព្ពំ, សទ្ទំ ‘‘សុរុ សុរូ’’តិ ច;

ហត្ថនិល្លេហកំ វាបិ, ន ច វដ្ដតិ ភុញ្ជិតុំ.

១៩២៤. ផាណិតំ ឃនយាគុំ វា, គហេត្វា អង្គុលីហិ តំ;

មុខេ អង្គុលិយោ ភោត្តុំ, បវេសេត្វាបិ វដ្ដតិ.

១៩២៥. ន បត្តោ លេហិតព្ពោវ, ឯកាយង្គុលិកាយ វា;

ឯកឱដ្ឋោបិ ជិវ្ហាយ, ន ច និល្លេហិតព្ពកោ.

ចតុត្ថំ.

១៩២៦. សាមិសេន តុ ហត្ថេន, ន ច បានីយថាលកំ;

គហេតព្ពំ, បដិក្ខិត្តំ, បដិក្កូលវសេន ហិ.

១៩២៧. បុគ្គលស្ស ច សង្ឃស្ស, គហដ្ឋស្សត្តនោបិ ច;

សន្តកោ បន សង្ខោ វា, សរាវំ វាបិ ថាលកំ.

១៩២៨. តស្មា ន ច គហេតព្ពំ, គណ្ហតោ ហោតិ ទុក្កដំ;

អនាមិសេន ហត្ថេន, គហណំ បន វដ្ដតិ.

បញ្ចមំ.

១៩២៩. ឧទ្ធរិត្វាបិ ភិន្ទិត្វា, គហេត្វា វា បដិគ្គហេ;

នីហរិត្វា អនាបត្តិ, ឆឌ្ឌេន្តស្ស ឃរា ពហិ.