បាដិទេសនីយកថា

១៨៣០. យោ ចន្តរឃរំ ភិក្ខុ, បវិដ្ឋាយ តុ ហត្ថតោ;

អញ្ញាតិកាយ យំ កិញ្ចិ, តស្ស ភិក្ខុនិយា បន.

១៨៣១. សហត្ថា បដិគ្គណ្ហេយ្យ, ខាទនំ ភោជនម្បិ វា;

គហណេ ទុក្កដំ ភោគេ, បាដិទេសនិយំ សិយា.

១៨៣២. រថិកាយបិ វា ព្យូហេ, សន្ធិសិង្ឃាដកេសុ វា;

ហត្ថិសាលាទិកេ ឋត្វា, គណ្ហតោបិ អយំ នយោ.

១៨៣៣. រថិកាយ សចេ ឋត្វា, ទេតិ ភិក្ខុនិ ភោជនំ;

អាបត្តិ អន្តរារាមេ, ឋត្វា គណ្ហាតិ ភិក្ខុ ចេ.

១៨៣៤. ឯត្ថន្តរឃរំ តស្សា, បវិដ្ឋាយ ហិ វាក្យតោ;

ភិក្ខុស្ស ច ឋិតដ្ឋានំ, នប្បមាណន្តិ វណ្ណិតំ.

១៨៣៥. តស្មា ភិក្ខុនិយា ឋត្វា, អារាមាទីសុ ទេន្តិយា;

វីថិយាទីសុ ចេ ឋត្វា, ន ទោសោ បដិគណ្ហតោ.

១៨៣៦. យាមកាលិកសត្តាហ-កាលិកំ យាវជីវិកំ;

អាហារត្ថាយ គហណេ, អជ្ឈោហារេ ច ទុក្កដំ.

១៨៣៧. អាមិសេន អសម្ភិន្ន-រសំ សន្ធាយ ភាសិតំ;

បាដិទេសនិយាបត្តិ, សម្ភិន្នេករសេ សិយា.

១៨៣៨. ឯកតោឧបសម្បន្ន-ហត្ថតោ បដិគណ្ហតោ;

កាលិកានំ ចតុន្នម្បិ, អាហារត្ថាយ ទុក្កដំ.

១៨៣៩. ញាតិកាយបិ អញ្ញាតិ-សញ្ញិនោ វិមតិស្ស វា;

ទុក្កដំ ញាតិសញ្ញិស្ស, តថា អញ្ញាតិកាយ វា.

១៨៤០. ទាបេន្តិយា អនាបត្តិ, ទទមានាយ វា បន;

និក្ខិបិត្វាន្តរារាមា-ទីសុ ឋត្វាបិ ទេន្តិយា.

១៨៤១. គាមតោ នីហរិត្វា វា, ទេតិ ចេ ពហិ វដ្ដតិ;

‘‘បច្ចយេ សតិ ភុញ្ជា’’តិ, ទេតិ ចេ កាលិកត្តយំ.

១៨៤២. ហត្ថតោ សាមណេរីនំ, សិក្ខមានាយ វា តថា;

ឥទំ ឯឡកលោមេន, សមុដ្ឋានំ សមំ មតំ.

បឋមបាដិទេសនីយកថា.

១៨៤៣. អវុត្តេ ‘‘អបសក្កា’’តិ, ឯកេនាបិ ច ភិក្ខុនា;

សចេជ្ឈោហរណត្ថាយ, អាមិសំ បដិគណ្ហតិ.

១៨៤៤. គហណេ ទុក្កដំ ភោគេ, បាដិទេសនិយំ សិយា;

ឯកតោឧបសម្បន្នំ, ន វារេន្តស្ស ទុក្កដំ.

១៨៤៥. តថេវានុបសម្បន្នា-យុបសម្បន្នសញ្ញិនោ;

តត្ថ វេមតិកស្សាបិ, ហោតិ អាបត្តិ ទុក្កដំ.

១៨៤៦. អនាបត្តិត្តនោ ភត្តំ, បទាបេតិ ន ទេតិ ចេ;

តថា អញ្ញស្ស ភត្តំ វា, ន ទាបេតិ បទេតិ ចេ.

១៨៤៧. យំ ន ទិន្នំ តំ ទាបេតិ, ន ទិន្នំ យត្ថ វាបិ ច;

តត្ថ តម្បិ ច សព្ពេសំ, សមំ ទាបេតិ ភិក្ខុនី.

១៨៤៨. វោសាសន្តី ឋិតា សិក្ខ-មានា វា សាមណេរិកា;

ភោជនានិ ច បញ្ចេវ, វិនា, ឧម្មត្តកាទិនោ.

១៨៤៩. កថិនេន សមុដ្ឋានំ, សមានន្តិ បកាសិតំ;

ក្រិយាក្រិយមិទំ វុត្តំ, តិចិត្តញ្ច តិវេទនំ.

ទុតិយបាដិទេសនីយកថា.

១៨៥០. សេក្ខន្តិ សម្មតេ ភិក្ខុ, លទ្ធសម្មុតិកេ កុលេ;

ឃរូបចារោក្កមនា, បុព្ពេវ អនិមន្តិតោ.

១៨៥១. អគិលានោ គហេត្វា ចេ, បរិភុញ្ជេយ្យ អាមិសំ;

គហណេ ទុក្កដំ ភោគេ, បាដិទេសនិយំ សិយា.

១៨៥២. យាមកាលិកសត្តាហ-កាលិកេ យាវជីវិកេ;

គហណេ បរិភោគេ ច, ហោតិ អាបត្តិ ទុក្កដំ.

១៨៥៣. អសេក្ខសម្មតេ សេក្ខ-សម្មតន្តិ ច សញ្ញិនោ;

តត្ថ វេមតិកស្សាបិ, តថេវ បរិទីបិតំ.

១៨៥៤. អនាបត្តិ គិលានស្ស, គិលានស្សាវសេសកេ;

និមន្តិតស្ស វា ភិក្ខា, អញ្ញេសំ តត្ថ ទីយតិ.

១៨៥៥. ឃរតោ នីហរិត្វា វា, ទេន្តិ ចេ យត្ថ កត្ថចិ;

និច្ចភត្តាទិកេ វាបិ, តថា ឧម្មត្តកាទិនោ.

១៨៥៦. អនាគតេ ហិ ភិក្ខុម្ហិ, ឃរតោ បឋមំ បន;

នីហរិត្វា សចេ ទ្វារេ, សម្បត្តេ ទេន្តិ វដ្ដតិ.

១៨៥៧. ភិក្ខុំ បន ច ទិស្វាវ, នីហរិត្វាន គេហតោ;

ន វដ្ដតិ សចេ ទេន្តិ, សមុដ្ឋានេឡកូបមំ.

តតិយបាដិទេសនីយកថា.

១៨៥៨. គហដ្ឋេនាគហដ្ឋេន, ឥត្ថិយា បុរិសេន វា;

អារាមំ ឧបចារំ វា, បវិសិត្វា សចេ បន.

១៨៥៩. ‘‘ឥត្ថន្នាមស្ស តេ ភត្តំ, យាគុ វា អាហរីយតិ’’;

ឯវមារោចិតំ វុត្តំ, បដិសំវិទិតន្តិ ហិ.

១៨៦០. អាហរីយតុ តំ បច្ឆា, យថារោចិតមេវ វា;

តស្ស វា បរិវារម្បិ, អញ្ញំ កត្វា ពហុំ បន.

១៨៦១. យាគុយា វិទិតំ កត្វា, បូវំ ភត្តំ ហរន្តិ ចេ;

ឥទម្បិ វិទិតំ វុត្តំ, វដ្ដតីតិ កុរុន្ទិយំ.

១៨៦២. កុលានិ បន អញ្ញានិ, ទេយ្យធម្មំ បនត្តនោ;

ហរន្តិ តេន សទ្ធិំ ចេ, សព្ពំ វដ្ដតិ តម្បិ ច.

១៨៦៣. អនារោចិតមេវំ យំ, យំ អារាមមនាភតំ;

តំ អសំវិទិតំ នាម, សហធម្មិកញាបិតំ.

១៨៦៤. យំ អសំវិទិតំ កត្វា, អាភតំ បន តំ ពហិ;

អារាមំ បន បេសេត្វា, ការាបេត្វា តមាហរេ.

១៨៦៥. គន្ត្វា វា អន្តរាមគ្គេ, គហេតព្ពំ តុ ភិក្ខុនា;

សចេ ឯវមកត្វា តំ, អារាមេ ឧបចារតោ.

១៨៦៦. គហេត្វាជ្ឈោហរន្តស្ស, គហណេ ទុក្កដំ សិយា;

អជ្ឈោហារបយោគេសុ, បាដិទេសនិយំ មតំ.

១៨៦៧. បដិសំវិទិតេយេវ, អសំវិទិតសញ្ញិនោ;

តត្ថ វេមតិកស្សាបិ, ហោតិ អាបត្តិ ទុក្កដំ.

១៨៦៨. បដិសំវិទិតេ តស្ស, គិលានស្សាវសេសកេ;

ពហារាមេ គហេត្វា វា, អន្តោយេវស្ស ភុញ្ជតោ.

១៨៦៩. តត្ថជាតផលាទីនិ, អនាបត្តេវ ខាទតោ;

សមុដ្ឋានាទយោ សព្ពេ, កថិនេន សមា មតា.

ចតុត្ថបាដិទេសនីយកថា.

ឥតិ វិនយវិនិច្ឆយេ បាដិទេសនីយកថា និដ្ឋិតា.